309-берене. Бузуулар жөнүндө протоколдун мазмуну

1. Бузуу жасалганда ыйгарым укуктуу орган тарабынан кагаз түрүндөгү протокол түзүлөт же электрондук колтамга менен күбөлөндүрүлгөн бузуу жөнүндө протоколдун электрондук формасы пайдаланылышы мүмкүн.

2. Бузуулар жөнүндө протоколдо төмөнкүлөр көрсөтүлөт:

1) аны түзүүнүн датасы, убактысы жана орду;

2) протоколду түзгөн адамдын кызмат орду, фамилиясы, аты, атасынын аты;

3) бузууларды жасагандыгы үчүн ишке тартылып жаткан адам жөнүндө маалымат;

4) бузуулар жасалган орду, датасы, убактысы жана анын жасагандыгы жөнүндө тастыктаган жагдайлар;

5) ушул Кодекстин бузуулар үчүн жоопкерчиликти караган беренеси;

6) эгерде күбөлөр жана жабыр тарткандар бар болсо, алар жөнүндө маалыматтар;

7) бузууларды жасагандыгы үчүн тартылган адамдын түшүнүгү;

8) бузуулар жөнүндө ишти чечүү үчүн зарыл болгон башка маалыматтар.

3. Бузуулар жөнүндө протоколду түзөөрдөн мурда ыйгарым укуктуу орган бузуулар үчүн жоопкерчиликке тартылган ар бир адамга алардын төмөнкү укуктарын түшүндүрүүгө милдеттүү:

1) өкүлдүн жардамынан пайдаланууга;

2) түшүндүрмө берүү же түшүндүрмө берүүдөн жана суроолорго жооп берүүдөн баш тартууга;

3) ыйгарым укуктуу органдын чечимине сотко даттанууга.

Бузгандыгы үчүн жоопкерчиликке тартылган жактын өтүнүчү боюнча ыйгарым укуктуу органдын кызмат адамы көрсөтүлгөн укуктардын ар бирин кең-кесири түшүндүрүүгө милдеттүү.

4. Протоколго аны түзгөн адам жана бузууларды жасагандыгы үчүн жоопкерчиликке тартылып жаткан адам кол коет.

Күбөлөр жана жабыр тарткандар болгон учурда протоколго ошол адамдар да кол коёт.

5. Бузууларды жасагандыгы үчүн жоопкерчиликке тартылып жаткан жак протоколго кол коюудан баш тарткан учурда протоколго бул жөнүндө жазуу жазылат. Бузууларды жасагандыгы үчүн жоопкерчиликке тартылып жаткан жак протоколдун мазмуну боюнча түшүнүктөрүн жана сын-пикирлерин тиркөөгө, ошондой эле ага кол коюудан өзүнүн баш тартуусунун жүйөсүн баяндоого укуктуу.

6. Протокол эки нускада түзүлөт, анын бири бузууларды жасагандыгы үчүн жоопкерчиликке тартылып жаткан жакка кол койдуруу менен тапшырылат.

7. Зарылчылыкка жараша ыйгарым укуктуу орган мыйзамда белгиленген тартипте лицензиясын (сертификатын, уруксат берүүлөрүн) чакыртып алуу тууралуу чечим кабыл алуу үчүн же башка укуктарды чектөө боюнча ыйгарым укуктуу органга протоколдун көчүрмөсүн жөнөтөт.

(КР 2019-жылдын 21-февралындагы № 29 Мыйзамынын редакциясына ылайык)