42-статья. Аргасыз жер которуучуларга жардам көрсөтүү

Ушул Мыйзамга ылайык аргасыз жер которуучулар деп таанылган жарандарга:

1) Кыргыз Республикасынын Министрлер Кабинети тарабынан аныкталгандай административдик-аймактык бирдиктен турак жай же жер участогу берилет же келтирилген материалдык зыяндар калыбына келтирилет. Турак-жай, жер участогун берүүнүн же зыяндарды калыбына келтирүүнүн жана башка зарыл жардамдарды көрсөтүүнүн шарттары жана тартиби Кыргыз Республикасынын Министрлер Кабинети тарабынан аныкталат;

2) ишке орношууга мүмкүнчүлүк болбогон учурларда, ишке орношууга же жумушсуз катары каттоодон өтүүгө көмөк көрсөтүлөт;

3) кесиптик даярдык алууда (кайра даярдоодо) жана квалификациясын жогорулатууда көмөк көрсөтүлөт;

4) ошол калктуу конуштарда ишке орношуу мүмкүнчүлүгү, жашоо шарттары тууралу маалыматтар берилет;

5) турак жай курулуш кооперативине кирүүдө, ошондой эле жеке турак жай курууда жер участогун алуу жана курулуш материалдарын сатып алуу боюнча жардам көрсөтүлөт;

6) жаңы турган жери же жашаган жери боюнча тиешелүү социалдык төлөмдөрдү (пенсияларды, жөлөкпулдарды) алуу камсыздандырылат;

7) жеңилдетилген шарттарда медициналык жана дары-дармектик жардамдар көрсөтүлөт;

8) бөлөк адамдын кароосуна муктаж жалгыз бой аргасыз жер которуучуларга - кары-картаңдарга жана майыптарга калкты социалдык жактан коргоо мекемелеринен кезексиз тартипте орундар берилет;

9) аргасыз жер которуучулардын балдарын мектепке чейинки жана жалпы билим берүүчү мекемелерге орноштурууда, ошондой эле окуучуларды жана студенттерди тиешелүү орто жана жогорку кесиптик билим берүү мекемелерине которууда көмөк көрсөтүлөт;

10) алардын ден соолуктарына зыян келтирилген учурда дарылануу үчүн санаториялык-курорттук мекемелерден жеңилдетилген жолдомолор менен камсыз болууга көмөк көрсөтүлөт;

11) жагдайга жараша Кыргыз Республикасынын Министрлер Кабинети аныктаган тартипте жана өлчөмдө бир жолку жөлөкпул берилет;

12) Кыргыз Республикасынын Министрлер Кабинетинин жана жергиликтүү өз алдынча башкаруу органдарынын чечими боюнча башка зарыл жардамдар көрсөтүлөт.

(Кыргыз Республикасынын 2024-жылдын 15-февралындагы № 47 Мыйзамынын редакциясына ылайык)