Башталгыч жана кесиптик орто билим берүү системасын колдоо, өнүктүрүү жана чыңдоо долбоорлорун жана программаларын координациялоо боюнча байкоочу комитет жөнүндө жобо(Кыргыз Республикасынын Министрлер Кабинетинин тескемесине)

2-тиркеме

(Кыргыз Республикасынын Министрлер Кабинетинин 2022-жылдын 15-июнундагы N 327-т тескемесине)

Башталгыч жана кесиптик орто билим берүү системасын колдоо, өнүктүрүү жана чыңдоо долбоорлорун жана программаларын координациялоо боюнча байкоочу комитет жөнүндө ЖОБО

1. Жалпы жоболор

1. Башталгыч жана кесиптик орто билим берүү системасын колдоо, өнүктүрүү жана чыңдоо долбоорлорун жана программаларын координациялоо боюнча байкоочу комитет (мындан ары - Байкоочу комитет) мамлекеттик органдардын жана башталгыч жана кесиптик орто билим берүү системасын колдоо, өнүктүрүү жана чыңдоо боюнча иш-чараларга тартылган эл аралык уюмдардын ишин координациялоону камсыз кылуу максатында түзүлгөн консультациялык-кеңешме орган болуп саналат.

2. Байкоочу комитеттин иши Кыргыз Республикасынын Конституциясына жана мыйзамдарына, Кыргыз Республикасынын башка ченемдик укуктук актыларына, Кыргыз Республикасынын мыйзамдарына ылайык күчүнө кирген эл аралык келишимдерге, ошондой эле ушул Жобого ылайык жүзөгө ашырылат.

3. Байкоочу комитеттин иши коомдук башталышта жүргүзүлөт.

2. Байкоочу комитеттин максаты жана милдеттери

4. Байкоочу комитеттин негизги максаты болуп өнөктөш-донорлор тарабынан каржылануучу башталгыч жана кесиптик орто билим берүү чөйрөсүн колдоо, өнүктүрүү жана чыңдоо боюнча долбоорлорду жана программаларды ишке ашыруунун жогорку натыйжалуулугуна жетишүү эсептелет.

5. Байкоочу комитеттин негизги милдети болуп өнөктөш-донорлор тарабынан каржылануучу башталгыч жана кесиптик орто билим берүү чөйрөсүн колдоо, өнүктүрүү жана чыңдоо боюнча долбоорлорду жана программаларды ишке ашырууну жалпы координациялоону камсыз кылуу саналат.

3. Байкоочу комитеттин функциялары

6. Белгиленген максаттарга жетишүү жана милдеттерди аткаруу үчүн Байкоочу комитет төмөнкүдөй функцияларды жүзөгө ашырат:

- долбоорлорду жана программаларды каржылоонун жылдык планын жана иш пландарын карайт;

- өзүнүн жыйналыштарында долбоорлорду жана программаларды ишке ашыруу боюнча иштин жүрүшү жөнүндө Кыргыз Республикасынын Билим берүү жана илим министрлигинин отчетторун угат;

- Кыргыз Республикасынын Билим берүү жана илим министрлигинин сунушу боюнча Байкоочу комитеттин деңгээлинде чечүүнү талап кылган айрым көйгөйлүү маселелерди карайт жана алар боюнча чечимдерди кабыл алат;

- Кыргыз Республикасынын Билим берүү жана илим министрлигинин сунушу боюнча долбоорлорду жана программаларды ишке ашыруу маселелери боюнча сунуштарды карайт жана Кыргыз Республикасынын Министрлер Кабинетинин кароосуна киргизет.

4. Байкоочу комитеттин укуктары

7. Байкоочу комитет белгиленген тартипте төмөнкүлөргө укуктуу:

- мамлекеттик органдардын, жергиликтүү өз алдынча башкаруу органдарынын адистерин жана көз карандысыз эксперттерди ишке тартууга;

- мамлекеттик органдардан, жергиликтүү өз алдынча башкаруу органдарынан керектүү маалыматтарды сурап алууга;

- өзүнүн жыйналыштарына долбоорлорду жана программаларды ишке ашыруу маселелери боюнча мамлекеттик органдардын, жергиликтүү өз алдынча башкаруу органдарынын жана коомдук уюмдардын өкүлдөрүн чакырууга жана угууга.

5. Байкоочу комитеттин ишин уюштуруу

8. Байкоочу комитеттин курамы Кыргыз Республикасынын Министрлер Кабинети тарабынан аныкталат. Байкоочу комитетти Кыргыз Республикасынын Министрлер Кабинетинин Төрагасынын орун басары башкарат.

9. Байкоочу комитеттин жыйналыштары зарылчылыкка жараша, бирок жылына бир жолудан кем эмес өткөрүлөт. Жыйналыштар Байкоочу комитеттин мүчөлөрүнүн курамынын жарымынан көбү катышкан шартта укуктуу деп таанылат.

10. Байкоочу комитеттин чечимдери Байкоочу комитеттин мүчөлөрүнүн жыйналышка катышкан санынын көпчүлүк добушу менен ачык добуш берүүдө кабыл алынат, протоколдор менен таризделет, ага Байкоочу комитеттин төрагасы кол коёт.

11. Байкоочу комитеттин чечимдери сунуштама мүнөзгө ээ жана иште колдонуу үчүн мамлекеттик органдарга жана жергиликтүү өз алдынча башкаруу органдарына жиберилиши мүмкүн.

12. Байкоочу комитеттин ишин уюштуруучулук жана башка жактан камсыз кылуу Кыргыз Республикасынын Билим берүү жана илим министрлиги тарабынан жүзөгө ашырылат.