МСКнын «Оператор тарабынан отунду маркалоого чечимдин формасын бекитүү жана Кыргыз Республикасынын Финансы министрлигине караштуу Мамлекеттик салык кызматынын 2024-жылдын 27-сентябрындагы № 288 “Кыргыз Республикасында отунду маркалоо тартибин бекитүү жөнүндө” буйругуна өзгөртүүлөрдү киргизүү тууралуу» буйругу

Оператор тарабынан отунду маркалоого чечимдин формасын бекитүү жана Кыргыз Республикасынын Финансы министрлигине караштуу Мамлекеттик салык кызматынын 2024-жылдын 27-сентябрындагы № 288 “Кыргыз Республикасында отунду маркалоо тартибин бекитүү жөнүндө” буйругуна өзгөртүүлөрдү киргизүү тууралуу

Кыргыз Республикасынын Салык кодексинин 96 жана 345-беренелерине жана Кыргыз Республикасынын Министрлер Кабинетинин 2024-жылдын 4-июлундагы № 361 токтому менен бекитилген Кыргыз Республикасында отун маркерин колдонуу тартиби жөнүндө жобонун 6 жана 15-пункттарына ылайык буйрук кылам:

1. Оператор тарабынан отунду маркалоого чечимдин (EXCISE STI-005) формасы тиркемеге ылайык бекитилсин.

2. Кыргыз Республикасынын Финансы министрлигине караштуу Мамлекеттик салык кызматынын 2024-жылдын 27-сентябрындагы № 288 “Кыргыз Республикасында отунду маркалоо тартибин бекитүү жөнүндө” буйругуна төмөнкүдөй өзгөртүүлөр киргизилсин:

жогоруда аталган буйрук менен бекитилген Кыргыз Республикасында отунду маркалоо тартибинде:

– 5 жана 6-пункттар төмөнкүдөй редакцияда баяндалсын:

“5. Кыргыз Республикасынын аймагында өндүрүлгөн отунду маркалоо жөнүндө чечим ыйгарым укуктуу салык органынын автоматташтырылган маалымат тутуму (мындан ары – АМТ) аркылуу аймактык салык органы тарабынан кабыл алынат, чечимди алуу үчүн салык төлөөчү маркалоо күнүнө чейинки эки жумушчу күн мурун cалык төлөөчүнүн кабинети АМТ аркылуу отунду маркалоого өтүнмө берет.

Өтүнмөдө пландаштырылган маркалоо жөнүндө төмөнкү маалыматтар көрсөтүлөт:

– вагондордун (авто цистерналардын) номерлери, отундун көлөмү (тоннасы) жана тыгыздыгы;

– маркалоо жүргүзүлүүчү даректер жана аны ишке ашыруунун болжолдуу убактысы;

– маркалоочу жерде болгон салык төлөөчүнүн өкүлү жөнүндө маалымат.

Өтүнмөгө маркаланууга тийиш болгон продукциянын бардык көлөмү үчүн акциз салыгынын же банк кепилдигинин төлөнгөндүгүн жана отун маркерлеринин номиналдык наркынын төлөнгөндүгүн ырастаган кагаз жүзүндөгү (сканерленген) же электрондук түрдөгү төлөм документтеринин түп нускасы тиркелиши керек.

Эгерде салык төлөөчү салык мыйзамдарына ылайык акциз салыгын төлөөдөн бошотулса, акциз салыгын төлөө документтери берилбейт.

6. Оператор тарабынан импорттолуучу маркалануучу продукцияны маркалоо жөнүндө чечимди ыйгарым укуктуу салык органы кабыл алат. Мында 5-пунктта каралган маалыматтардан жана документтерден тышкары, салык төлөөчү өтүнмөгө ташып киргизилүүчү маркалануучу продукцияга инвойстордун сканерленген же электрондук түрдөгү түп нускаларын жана маркалануучу продукцияны жеткирүүгө жеткирүүчү менен түзүлгөн келишимди тиркейт.”;

– төмөнкүдөй мазмундагы 61-пункт менен толукталсын:

“61. Отунду маркалоо ыйгарым укуктуу салык органынын АМТда таризделген салык кызматынын органынын чечимине ылайык маркалоо оператору тарабынан жүргүзүлөт. Маркалоо процесси аяктагандан кийин ыйгарым укуктуу салык органынын АМТда чечимдин статусу маркалоо аткарылгандыгы жөнүндө тиешелүү белгиге өзгөрөт.

Маркалануучу продукцияны импорттоочу же өндүрүүчү продукцияны стандарттуу эмес идиштерде (цистерналарда) жүктөп жиберген же импорттогон учурда, маркалоо процессинде маркалоочу операторго аккредиттелген уюм тарабынан күбөлөндүрүлгөн цистернаны тарирлөө таблицасын берүүгө милдеттүү.

Маркалоо оператору тарабынан отунду маркалоо салык төлөөчүнүн өкүлүнүн жана салык органынын кызматкеринин катышуусунда жүргүзүлөт.”;

– 8-пункт төмөнкүдөй редакцияда баяндалсын:

“8. Ыйгарым укуктуу салык органынын АМТ иштебей калган же башка күтүлбөгөн жагдайлар пайда болгон учурда, отунду үзгүлтүксүз өндүрүүнү жана импорттоону камсыз кылуу үчүн салык органынын отунду маркалоо тууралуу кагаз түрүндөгү чечиминин негизинде отунду маркалоо жүргүзүлөт. Аталган чечимге салык кызматынын органынын жетекчисинин колу коюлушу жана тийиштүү салык органынын мөөрү менен күбөлөндүрүлүшү керек.”;

– 14-пункттун биринчи жана экинчи абзацтары төмөнкүдөй редакцияда баяндалсын:

“14. Отунду маркалоо оператору ыйгарым укуктуу салык органынын АМТ аркылуу маркаланып жаткан отундун физикалык касиеттери боюнча акт даярдайт жана аны нөөмөтчү инспектор менен макулдашат.

Ченөө актысында төмөнкүдөй маалыматтар камтылат:”;

– 15-пункт төмөнкүдөй редакцияда баяндалсын:

“15. Салык төлөөчүнүн кабинети АМТ аркылуу берилген өтүнмөдө маалыматтар туура эмес көрсөтүлгөндө же отундун иш жүзүндөгү көлөмүнүн же түрүнүн четтөөсүнүн жол берилген каталары аныкталганда, маркалоо оператору ыйгарым укуктуу салык органынын АМТ аркылуу четтөө жөнүндө өлчөө актысын нөөмөттөгү инспекторго макулдашууга жөнөтөт, чечимде көрсөтүлгөн өтүнмөнүн туура эмес пункттары жокко чыгарылат жана салык төлөөчү салык төлөөчүнүн кабинети АМТ аркылуу отунду маркалоого жаңы өтүнмөнү туура маалыматтарды көрсөтүү менен кайрадан берет.”.

3. Санариптик трансформациялоо башкармалыгы (А.О. Осмонов) акциздик товарлардын жүгүртүлүшүн жана маркалоону башкарууну контролдоо башкармалыгы (Б.А. Акматов) менен биргеликте ыйгарым укуктуу салык органынын автоматташтырылган маалымат тутумун Кыргыз Республикасында отунду маркалоо тартибине киргизилип жаткан өзгөртүүлөргө ылайык келтирсин, ошондой эле ушул буйрукту жана оператор тарабынан отунду маркалоого чечимдин (EXCISE STI-005) формасын Кыргыз Республикасынын Министрлер Кабинетине караштуу Мамлекеттик салык кызматынын расмий сайтына жайгаштырсын.

4. Иш кагаздар менен камсыздоо жана контролдоо бөлүмү (А.Дж.Маматбекова) ушул буйрукту Кыргыз Республикасынын Министрлер Кабинетине караштуу Мамлекеттик салык кызматынын борбордук аппаратынын түзүмдүк бөлүктөрүнө жана аймактык башкармалыктарына жеткирсин.

5. Ушул буйруктун аткарылышын контролдоо Кыргыз Республикасынын Министрлер Кабинетине караштуу Мамлекеттик салык кызматынын төрагасынын орун басары Б. М. Джиенбековго жүктөлсүн.

Төрага А. Н. Шыкмаматов