Постановление Правительства КР «Об Отчете об исполнении бюджета Социального фонда Кыргызской Республики за 2012 год»

(КР Министрлер Кабинетинин 2022-жылдын 14-январындагы № 9 токтомуна ылайык күчүн жоготту)

КЫРГЫЗ РЕСПУБЛИКАСЫНЫН ӨКМӨТҮ ТОКТОМ 2013-жылдын 26-июну № 377 2012-жылга Кыргыз Республикасынын Социалдык фондунун бюджетинин аткарылышы жөнүндө отчет тууралуу "Кыргыз Республикасынын Социалдык фонду жөнүндө" Кыргыз Республикасынын Мыйзамынын 5-беренесине ылайык Кыргыз Республикасынын Өкмөтү ТОКТОМ КЫЛАТ:

1. 2012-жылга Кыргыз Республикасынын Социалдык фондунун бюджетинин аткарылышы жөнүндө Отчет 1-4-тиркемелерге ылайык эске алынсын.

2. Жогоруда аталган Отчет Кыргыз Республикасынын Жогорку Кеңешине жиберилсин.

3. 2012-жылга Кыргыз Республикасынын Социалдык фондунун бюджетинин аткарылышы жөнүндө отчет Кыргыз Республикасынын Жогорку Кеңешинде каралган учурда Кыргыз Республикасынын Социалдык фондунун төрагасы Кыргыз Республикасынын Өкмөтүнүн расмий өкүлү болуп дайындалсын.

4. Бул токтом расмий жарыяланган күндөн тартып күчүнө кирет.

"Премьер-министр

Ж. Сатыбалдиев

Кыргыз Республикасынын Өкмөтүнүн 2013-жылдын 26-июнундагы № 377 токтомуна 1-тиркеме

2012-жылга Кыргыз Республикасынын Социалдык фондунун бюджетинин аткарылышы жөнүндө ОТЧЕТ

2012-жылы Кыргыз Республикасынын Социалдык фондунун (мындан ары Социалдык фонд) жалпы кирешеси жыл башындагы калдыкты эсепке алуу менен 33907786,5 миң сомду (ИДПга карата 11,1%) түздү, бул такталган бюджеттен 100,7 пайызга көп, анын ичинде камсыздандыруу төгүмдөрү пландагы 18606 860,1 миң сомдун ордуна 18793316,2 миң сом түштү же планды аткаруу 101,0 пайызды түздү. Камсыздандыруу төгүмдөрүнүн жалпы суммасынын ичинен 17605762,7 миң сом учурдагы төлөмдөр жана 1187553,5 миң сом өткөн жылдар үчүн мөөнөтү өткөн карыздардын түшүшү болуп саналат. Камсыздандыруу төгүмдөрүнүн түшүүсү 2011-жылга караганда 115,9 пайызга же 2584277,5 миң сомго көбөйдү. Камсыздандыруу төгүмдөрүнүн жыйымынын өсүшү өткөн жылга салыштырмалуу чарбакер субъекттерден жана бюджеттик уюмдардан камсыздандыруу төгүмдөрүнүн түшүүсүнүн көбөйгөндүгүнүн эсебинен камсыздалды. Камсыздандыруу төгүмдөрүн жыйноо боюнча мындай оң натыйжалар төлөөчүлөр менен учурдагы камсыздандыруу төгүмдөрүн жыйноо боюнча жүргүзүлгөн максаттуу иштердин жана камсыздандыруу төгүмдөрү боюнча мөөнөтү өтүп кеткен карыздарды өндүрүү боюнча көрүлгөн таасирдүү чаралардын жыйынтыгында жетишилди. Республикалык бюджеттен аскер кызматчыларына пенсия төлөөгө, жеңилдетилген пенсияларды төлөөгө жана пенсияга үстөктөргө, электр энергиясына компенсациялык төлөмдөргө милдеттүү түрдө бөлүнүүчү каражаттар 2012-жылга такталган бюджетке ылайык 10652290,0 миң сом суммасында толук өлчөмдө түштү. 2012-жылы Социалдык фонд тарабынан бош акча каражаттарын Кыргыз Республикасынын коммерциялык банктарынын мөөнөттүү депозиттик эсептерине, мамлекеттик казыналык векселдерге, ошондой эле Кыргыз Республикасынын Улуттук банкы чыгарган баалуу кагаздарга жайгаштыруудан жана башка булактардан 256282,8 миң сом же бюджетте каралгандан 10267,0 миң сомго көп киреше алынган. Социалдык фонддун 2012-жылдагы чыгымдары 32800391,5 миң сомду түздү, анын ичинде:

- Пенсиялык фонддуку - 28266794,0 миң сом;

- Милдеттүү медициналык камсыздандыруу фондунуку - 1209970 миң сом;

- Эмгекчилердин ден соолугун чыңдоо фондунуку - 152000,0 миң сом;

- Мамлекеттик пенсиялык топтоо фондунуку - 3171627,5 миң сом.

2012-жылы пенсиялардын жана жөлөк пулдардын өлчөмүн жогорулатуунун эсебинен Пенсиялык фонддун чыгымдары 2011-жылга караганда 5718867,0 миң сомго көбөйдү жана 28266794,0 миң сомду түздү. 2012-жылы пенсиялар эки этап менен жогорулатылды; Кыргыз Республикасынын Өкмөтүнүн 2012-жылдын 23-мартындагы № 199 "2012-жылдын 1-майынан тартып пенсиянын камсыздандыруу бөлүктөрүн көбөйтүү жөнүндө" токтомунун негизинде 2012-жылдын 1-майынан тартып пенсиянын камсыздандыруу бөлүктөрү жогорулатылды. Анын негизинде төмөн пенсиялар бир аз, ал эми чоң өлчөмдөгү пенсиялар олуттуу жогорулатылган. 10,0 миң сомдон ашык пенсиялар 2012-жылдын май айынан кийин 5%га 800 сомдон 1500 сомго чейин, тактап айтканда инфляциянын пландаштырылган деңгээлинен жогорку деңгээлге жогорулатылган. Буга байланыштуу 2012-жылдын 1-ноябрынан тартып 10 миң сомдон ашык пенсиялар жогорулатылган жок; Азык-түлүк товарларына баанын өсүшүнүн шартында Кыргыз Республикасынын Өкмөтүнүн 2012-жылдын 3-октябрындагы № 676 "2012-жылдын 1-майынан тартып пенсиянын камсыздандыруу бөлүктөрүн жогорулатуу жөнүндө" токтомунун негизинде 2012-жылдын 1-ноябрынан баштап пенсиялар жогорулатылды, ага ылайык өлчөмү 10,0 миң сомго жетпеген пенсиянын камсыздандыруу бөлүктөрү дифференциялуу (150 сомдон 300 сомго чейин) жогорулатылды. Пенсияны эки этап менен жогорулатуу пенсиянын орточо өлчөмүн өткөн жылга салыштырмалуу 3760 сомдон 4192 сомго чейин (өсүш 432 сомду же 111,5% түздү) көбөйтүүгө мүмкүндүк берди. 2012-жылдын жыйынтыгы боюнча пенсиянын орточо өлчөмү 2012-жылдагы пенсионердин жашоо минимумунун деңгээлинин 108,6%ын түздү (3858,3 сом.). 2012-жылы пенсиянын өлчөмүн жогорулатуу жашоо минимумунан төмөн пенсия алган пенсионерлердин санын 70,2%дан 60%га чейин кыскартууга мүмкүндүк берди. 2013-жылдын 1-январына карата республика боюнча пенсия алуучулардын саны 565,4 миң адамды түзөт, анын ичинен Кыргыз Республикасынын Транспорт жана коммуникациялар министрлигинин алдындагы "Кыргыз почтасы" мамлекеттик ишканасы (мындан ары - "Кыргыз почтасы" МИ) аркылуу 427,9 миң адам же жалпы санынын 75,7%ы, республиканын коммерциялык банктары аркылуу 137,5 миң адам же жалпы санынан 24,3%ы пенсияларын алышат. 2012-жылдын ичинде пенсияларды төлөө боюнча карыздарга жол берилген жок. Алсак, 2013-жылдын 1-январына карата электр энергиясына компенсациялык төлөмдөрдү эсепке алуу менен пенсияларды төлөөгө керектелүүчү сумма 26051525,8 миң сом өлчөмүндө толук каржыланды. "Мамлекеттик пенсиялык социалдык камсыздандыруу жөнүндө" Кыргыз Республикасынын Мыйзамына ылайык 2012-жылы каза болгон пенсионерлердин сөөгүн коюуга жөлөк пул 324417,8 миң сом суммасында төлөнүп берилди. 2012-жылы Милдеттүү медициналык камсыздандыруу фондун 1209970,0 миң сом суммасында, Эмгекчилердин ден соолугун чыңдоо фондун 152000,0 миң сом суммасында каржылоо Социалдык фонддун 2012-жылга бюджети жөнүндө бекитилген Мыйзамга ылайык жүргүзүлдү. "Мамлекеттик социалдык камсыздандыруу боюнча камсыздандыруу төгүмдөрүнүн тарифтери жөнүндө" Кыргыз Республикасынын Мыйзамына ылайык Мамлекеттик пенсиялык топтоо фондуна камсыздандыруу төгүмдөрүн төлөө 2 пайыз өлчөмүндө белгиленген. 2012-жылдын аягында Мамлекеттик пенсиялык топтоо фондунун эсебинде 2010, 2011-жылдары топтолгон каражаттарды эсепке алуу менен, 3310630,4 миң сом акча каражаты топтолду. "Кыргыз Республикасында мамлекеттик социалдык камсыздандыруу боюнча пенсиянын топтоо бөлүгүн каржылоо үчүн каражаттарды инвестициялоо жөнүндө" Кыргыз Республикасынын Мыйзамы инвестициялоо жаатындагы мамилелерди жөнгө салуучу Мыйзам болуп эсептелет. Кыргыз Республикасынын Өкмөтүнүн 2011-жылдын 23-августундагы № 490 "Кыргыз Республикасында мамлекеттик социалдык камсыздандыруу боюнча пенсиянын топтоо бөлүгүн каржылоо үчүн каражаттарды инвестициялоо жөнүндө" Кыргыз Республикасынын Мыйзамын ишке ашыруу тууралуу" токтому менен Кыргыз Республикасынын Социалдык фонду тарабынан пенсиялык топтоо каражаттарын инвестициялоонун убактылуу эрежелери жана Кыргыз Республикасынын Социалдык фонду тарабынан депозиттик аукциондорду өткөрүүнүн тартиби жөнүндө жобо бекитилген, аларга ылайык Социалдык фонд 2012-жылдын 31-декабрына чейин пенсиялык топтоолорду инвестициялоону ишке ашырат жана депозиттик аукциондорду өткөрөт. Буга байланыштуу, Мамлекеттик пенсиялык топтоо фондунун каражаттарынын жалпы 3310630,4 миң сом суммасынан 2011-жылдын августунан тартып мамлекеттик баалуу кагаздарга 238544,2 миң сом инвестицияланган жана коммерциялык банктардын депозиттерине 785000,0 миң сом салынган. 2012-жылы Мамлекеттик пенсиялык топтоо фондунун каражаттарынан бардыгы 1376369,1 миң сом инвестацияланды. 2012-жылы Мамлекеттик пенсиялык топтоо фондунун каражаттарын инвестициялоо боюнча кирешелер 344360,0 миң сомду түздү, бул бюджетте каралгандан 33559,8 миң сомго көп. Ошондой эле, 2012-жылы камсыздандыруу базасын кеңейтүү максатында бардык эмгекке жарамдуу жарандарды жекече эсепке алуу, аларга идентификациялык номерлерди ыйгаруу жана жеке камсыздандыруу эсептерин ачуу боюнча жигердүү иштер жүргүзүлдү. 2013-жылдын 1-январына карата жекече эсепке алуу тутумунда каттоодо турган жарандардын саны 4907,3 миң адамды же калктын жалпы санынын 93,3 пайызын түздү, алардын ичинен иштеген жарандар 1666,8 миң адамды же Кыргыз Республикасынын экономикалык жактан жигердүү калкынын 95,1 пайызын түздү. 2012-жылы жекече эсепке алуу тутумунда 111208 адам катталган. 2012-жылга Социалдык фонддун бюджети 45344,4 миң сом суммасына профицит менен бекитилген. 2012-жылы бюджеттин аткарылышынын жыйынтыктары боюнча бюджеттин профицити 1107395,0 миң сомду түздү, анын ичинде Мамлекеттик пенсиялык топтоо фондунун каражаттары 139002,9 миң сом. 2012-жылы пенсияларды төлөөдө "Кыргызпочтасы" МИ филиалдары тарабынан пенсиялык каражаттарды максатсыз пайдалануу жана мыйзамсыз эсептен чыгаруу фактылары болду. Алсак, текшерүүлөрдүн жыйынтыгы боюнча 13792,5 миң сом суммасында финансылык тартип бузуулар аныкталган. Бардык аныкталган бузуулар четтетилди жана суммалар толугу менен калыбына келтирилди. Бюджеттин аткарылышы боюнча иште кемчиликтерге жол беришкен Социалдык фонддун органдарынын жетекчилери менен адистери финансылык тартип бузуу фактылары боюнча жоопкерчиликке тартылышты.

Кыргыз Республикасынын Өкмөтүнүн 2013-жылдын 26-июнундагы № 377 токтомуна 2-тиркеме

2012-жылга Кыргыз Республикасынын Социалдык фондунун БЮДЖЕТИНИН АТКАРЫЛЫШЫ (миң сом)

Кыргыз Республикасынын Өкмөтүнүн 2013-жылдын 26-июнундагы № 377 токтомуна 3-тиркеме

2012-жылга Милдеттүү медициналык камсыздандыруу фондунун БЮДЖЕТИНИН АТКАРЫЛЫШЫ

(миң сом)

Кыргыз Республикасынын Өкмөтүнүн 2013-жылдын 26-июнундагы № 377 токтомуна 4-тиркеме

2012-жылга Эмгекчилердин ден соолугун чындоо фондунун БЮДЖЕТИНИН АТКАРЫЛЫШЫ

(миң сом)