КР Өкмөтүнүн токтому менен бекитилген «Кыргыз Республикасынын Энергетика министрлигинин алдындагы Отун-энергетикалык комплексинин ачыктык демилгеси боюнча байкоочу кеңеш жөнүндө» жобосу

Кыргыз Республикасынын Өкмөтүнүн 2011-жылдын 28-февралындагы №77 токтому менен бекитилген

Кыргыз Республикасынын Энергетика министрлигинин алдындагы Отун-энергетикалык комплексинин ачыктык демилгеси боюнча байкоочу кеңеш жөнүндө ЖОБО

I. Жалпы жоболор

II. Байкоочу кеңештин милдеттери, функциялары жана укуктары III. Байкоочу кеңеш - курамы жана түзүү тартиби IV. Байкоочу кеңештин иштөө тартиби

V. Байкоочу кеңеш - мүчөлүк жана укуктар

VI. Байкоочу кеңештин ишин уюштуруу

I. Жалпы жоболор

1. Кыргыз Республикасынын Энергетика министрлигинин алдындагы Отун-энергетикалык комплексинин ачыктык демилгеси боюнча байкоочу кеңеш (мындан ары - Байкоочу кеңеш) "Кыргыз Республикасынын отун-энергетикалык комплексинин ачыктык демилгеси жөнүндө" Кыргыз Республикасынын Президентинин 2010-жылдын 20-июлундагы N 49 Жарлыгына ылайык түзүлөт жана Отун-энергетикалык комплексинин ачыктык демилгеси боюнча программаны ишке ашырууга жалпы көзөмөлдү жүзөгө ашыруучу орган (мындан ары - ОЭКАД программасы) болуп саналат.

2. Байкоочу кеңеш өз ишинде өзүнүн компетенциясына кирген бардык маселелер боюнча чечимдерди кабыл алууда ыктыярдуулук, өз алдынча башкаруу, калыстык, айкындуулук, ачыктык жана көз карандысыздык принциптерине негизденет.

3. Катчылык (мындан ары - ОЭКАД катчылыгы) Байкоочу кеңештин жумушчу органы болуп саналат.

4. Байкоочу кеңештин өзүнүн фирмалык бланкы болот.

II. Байкоочу кеңештин милдеттери, функциялары жана укуктары

5. Байкоочу кеңештин негизги милдеттери төмөнкүлөр болуп саналат:

- ОЭКАД программасын ишке ашыруу боюнча иш-чаралардын аткарылышынын мониторингин жүзөгө ашыруу;

- ОЭКАД программасын ишке ашыруу боюнча Кыргыз Республикасынын Өкмөтү үчүн сунуштарды жана рекомендацияларды даярдоо;

- сектордун чыгымдары жана кирешелери, акча агымдары, отун-энергетика комплексинин ишканалары тарабынан максаттуу көрсөткүчтөрдүн аткарылышы жана отун-энергетика комплексинин ишканаларынын (мындан ары ОЭК ишканалары) ишинин натыйжасына тиешелүү башка маанилүү маалыматтар жөнүндө коомчулукка берилген маалыматтардын сапатын (тууралыгын, жүйөлүүлүгүн, ишенимдүүлүгүн) көзөмөлгө алуу.

6. Негизги милдеттерин чечүү максатында Байкоочу кеңеш төмөнкү иш милдеттерди аткарат:

- ОЭКАД программасын ишке ашырууга байланыштуу институттук, укуктук, тескөөчүлүк, финансылык жана уюштуруучулук маселелерин кошуп алганда, ОЭКАД программасын ишке ашыруунун мониторингин жүзөгө ашыруу;

- энергетика тармагындагы маалыматтардын сапатын, ишенимдүүлүгүн жана ачык-айкындыгын жогорулатуу көз карашынан алганда ОЭКАД программасынын натыйжалуулугун баалоо.

7. Байкоочу кеңеш өзүнө жүктөлгөн функцияларды ишке ашыруу максатында төмөнкүлөргө укуктуу:

- өзүнүн жыйындарында мамлекеттик органдардын өкүлдөрүн, ошондой эле ОЭК ишканаларынын жетекчилерин жана ОЭКАД программасын ишке ашыруу маселелери боюнча эксперттерди угууга;

- отун-энергетикалык комплексинин ачыктык демилгесин ишке ашыруу максатында мамлекеттик органдардан, ОЭК ишканаларынан жана донордук уюмдардан зарыл маалыматтарды сурап алууга;

- ыйгарым укуктуу мамлекеттик органдардын энергетика тармагындагы коомдук кызыкчылыктарды козгогон ченемдик укуктук актылардын жана чечимдердин долбоорлорун кароого;

- ОЭКАД программасын ишке ашыруу боюнча иш-чаралардын аткарылышынын жүрүшү жөнүндө эксперттик баалоону жүзөгө ашыруу үчүн чет өлкөлүк адистерди да кошуу менен адистерди тартууга;

- Кыргыз Республикасынын Энергетика министрлигинин жана ОЭК ишканаларынын директорлор кеңешинин кароосуна ОЭКАД программасын ишке ашырууга байланыштуу сунуштамаларды киргизүүгө;

- Кыргыз Республикасынын Өкмөтүнө ОЭКАД программасына өзгөртүүлөрдү жана толуктоолорду киргизүү жөнүндө сунуштарды, ошондой эле аны ишке ашыруунун натыйжалары жөнүндө отчетторду берүүгө;

- өз иштерин камсыз кылуу үчүн донордук жана башка демөөрчүлүк жардамдарды тартууга;

- Кыргыз Республикасынын отун-энергетикалык комплексинин ачык-айкындыгын камсыз кылууга байланыштуу маселелер боюнча сунуштама мүнөздөгү чечимдерди кароого жана кабыл алууга.

III. Байкоочу кеңеш: курамы жана түзүү тартиби

8. Байкоочу кеңештин курамына коомдук уюмдардын өкүлдөрү бир тараптан, мамлекеттик органдардын жана отун-энергетикалык комплексинин ишканаларынын өкүлдөрү экинчи тараптан бирдей пропорциялык катышта мүчө болуп киришет.

9. Мамлекеттик органдардан жана отун-энергетикалык комплексинин ишканаларынан Байкоочу кеңештин мүчөлүгүнө талапкерлер мамлекеттик органдар жана отун-энергетикалык комплексинин ишканалары тарабынан Кыргыз Республикасынын Энергетика министрлигине берилет.

10. Байкоочу кеңештин мүчөлүгүнө коомдук уюмдардан талапкерлер Кыргыз Республикасынын Энергетика министрлиги тарабынан тандалып алынат. Тандап алуу ачык-айкындык принцибин сактоо менен жана энергетика секторунда, ачык-айкындык принциптерин киргизүү жагында, ошондой эле энергетикалык компаниялардын кызматтарына керектөөчүлөрдүн укуктарын коргоо жагында иш тажрыйбасы бар жана Байкоочу кеңештин негизги милдеттерине жооп берген критерийлердин негизинде жүзөгө ашырылат. Кыргыз Республикасынын Энергетика министрлиги тандап алуу комиссиясын түзөт жана Комиссия жөнүндө жобону бекитет.

Тандап алуу комиссиясынын курамына Байкоочу кеңештин мүчөлүгүнө талапкер болбогон коомдук уюмдардын өкүлдөрү кирет. Коомдук уюмдардан тандап алуу комиссиянын мүчөлөрүн шайлоону Кыргыз Республикасынын Энергетика министрлиги коомдук уюмдардын өкүлдөрүнөн консультация алуу жолу менен жүргүзөт. Мында Кыргыз Республикасынын Энергетика министрлиги тандап алуу комиссиянын ишине катышууга Кыргыз Республикасынын аймагында иш жүргүзгөн коомдук уюмдардын өкүлдөрүн жана коомдук уюмдардан өкүлдөрдү тандоо боюнча ишке катышууну каалагандарды чакырат.

11. Коомдук уюмдардан Комиссия тандап алган Байкоочу кеңештин курамына талапкерлер Кыргыз Республикасынын Энергетика министрлиги тарабынан Кыргыз Республикасынын Өкмөтүнүн бекитүүсүнө киргизилет жана 2 жылдык мөөнөткө Кыргыз Республикасынын Өкмөтүнүн чечими менен дайындалат.

IV. Байкоочу кеңештин иштөө тартиби

12. Байкоочу кеңеш өз ишин жыйындарды өткөрүү жолу менен ушул Жобого ылайык жүзөгө ашырат.

13. Байкоочу кеңештин жыйынын коомдук уюмдардын өкүлдөрүнүн тобунан жана мамлекеттик органдардын жана Кыргыз Республикасынын отун энергетикалык комплексинин ишканаларынын тобунан бирден эки тең төрага алып барат.

14. Байкоочу кеңештин жыйыны зарылдыгына жараша, бирок кварталына бир жолудан кем эмес өткөрүлөт.

15. Байкоочу кеңеш анын тең төрагасынын бири тарабынан чакырылат, мында ОЭКАД катчылыгы Байкоочу кеңештин жыйынын өткөрүүчү күндөн бир жума мурда Байкоочу кеңештин мүчөлөрүнө жыйындын күн тартибин жана кароо үчүн зарыл болгон материалдарды (документтердин долбоорлорун, отчетторду ж.б.) жиберет.

16. Байкоочу кеңештин жыйынын өткөрүүгө демилге көтөргөн тең төрага ОЭКАД катчылыгына Байкоочу кеңештин жыйынын өткөрүү жөнүндө сунуш берет, анда кароо үчүн сунуш кылынган маселелер, ошондой эле чечимдин долбоору көрсөтүлөт.

17. Эгерде жыйынга ар бир кызыкдар тараптын тобунан бештен кем эмес өкүл келип, анын курамынын үчтөн экиси катышканда Байкоочу кеңештин жыйыны мыйзамдуу болуп саналат.

18. Байкоочу кеңештин мүчөлөрү чечимди тил табышып кабыл алууга аракеттенүүлөрү керек. Эгерде Байкоочу кеңеш тил табыша албаса, анда чечим "бир мүчө - бир добуш" принциби боюнча кабыл алынат.

19. Байкоочу кеңештин чечимдери добуштардын дасыккан көпчүлүгү (добуштардын 2\3төн кем эмеси) менен кабыл алынат жана Кыргыз Республикасынын Өкмөтү же башка мамлекеттик органдар, ошондой эле ОЭК ишканаларынын директорлор кеңештери үчүн отун-энергетикалык комплексинин ачыктык маселелери боюнча иштелип чыккан сунуштары же рекомендациялары менен протоколдор түрүндө таризделет.

20. Протоколго тең төрагалар кол коет. Байкоочу кеңештин мүчөлөрүндө өзгөчө пикир болгондо, Байкоочу кеңештин мүчөсүнүн өзгөчө пикири бар тиркеме протоколго тиркелет.

21. Жыйындын протоколу, жыйын өткөрүлгөндөн кийин беш жумушчу күндүн ичинде Байкоочу кеңештин бардык мүчөлөрүнө жөнөтүлөт. Мында протокол ошондой эле Байкоочу кеңештин веб-сайтына жайгаштырылат.

V. Байкоочу кеңеш: мүчөлүк жана укуктар

22. Байкоочу кеңештин мүчөсү төмөнкүлөргө укуктуу:

- Байкоочу кеңештин компетенциясына кирген маселелер боюнча Байкоочу кеңештин жыйынын өткөрүүнү демилгелөөгө, ошондой эле каралып жаткан маселелерди талкуулоодо жана алар боюнча чечимдерди кабыл алууда доклад, билдирүү жасоого жана сунуштарды киргизүүгө;

- Кыргыз Республикасынын Энергетика министрлигинин коллегиясынын жыйындарына катышууга;

- ОЭК ишканаларынын директорлор кеңешинин төрагаларынын жазуу жүзүндөгү макулдугу менен, ОЭКАД маселелери боюнча директорлор кеңешинин жыйындарына катышууга;

- мамлекеттик органдардан жана ОЭК ишканаларынан Байкоочу кеңештин чечимдерин ишке ашыруу жөнүндө маалыматтарды алууга;

- тең төрагаларынын биринин атына берилген жазуу жүзүндөгү арызынын негизинде Байкоочулар кеңешинин курамынан чыгууга.

VI. Байкоочу кеңештин ишин уюштуруу

23. Мамлекеттик органдардын жана отун-энергетикалык комплексинин ишканаларынын тобунан Байкоочу кеңештин тең төрагасы болуп Кыргыз Республикасынын энергетика министри эсептелет.

Коомдук уюмдардын тобунан Байкоочу кеңештин тең төрагасы коомдук уюмдардан Байкоочу кеңештин мүчөлөрүнүн добуш берүү жолу менен Байкоочу кеңештин биринчи жыйынында шайланат.

24. ОЭКАД катчылыгы Байкоочу кеңеш тарабынан түзүлөт. Мында Байкоочу кеңештин мүчөсү Катчылыктын курамында болушу мүмкүн эмес.

25. ОЭКАД катчылыгынын функциялары:

- Байкоочу кеңештин ишинин уюштурулушун камсыз кылууну жүзөгө ашыруу;

- Байкоочу кеңешке келип түшкөн анын жыйынын өткөрүү жөнүндө сунуштарды жана Байкоочу кеңеш тарабынан демилге кылган маселелерди карап чыгуу жана чечүү үчүн эсепке алуу;

- Байкоочу кеңеш үчүн ОЭК ишканаларынан жана мамлекеттик органдардан ОЭКАД программасын ишке ашыруу жөнүндө маалыматтарды (суроо-талап боюнча) жыйноону жүзөгө ашыруу. Суроо-талап Байкоочу кеңештин тең төрагаларынын колу коюлуп, Катчылыкка жөнөтүлөт;

- Байкоочу кеңештин жыйындарын протоколдоштуруу жана протоколдорду Байкоочу кеңештин мүчөлөрүнө жиберүү;

- мамлекеттик жана расмий тилдерде ОЭКАД боюнча отчетторду кеңири таратуу үчүн коомчулук менен байланыштын стратегиясын даярдоо жана ишке ашыруу;

- Байкоочу кеңештин веб-сайтын түзүү жана колдоо, анын ичинде веб-сайттын мазмунун дайыма жаңылоо жана интерактивдүү тартипте иштешин камсыз кылуу;

- Байкоочу кеңештин мүчөлөрүнөн анын курамынан чыгуу жөнүндө жазуу жүзүндөгү арыздарын кабыл алуу.