Ош жана Жалал-Абад шаарларын калыбына келтирүү жана өнүктүрүү боюнча программанын алкагында курулган турак жайды Кыргыз Республикасынын жарандарына берүү тартиби жөнүндө ЖОБО (Кыргыз Республикасынын Өкмөтүнүн токтому менен бекитилген)

Тиркеме-2 Кыргыз Республикасынын Өкмөтүнүн 2012-жылдын 4-майындагы № 275 токтому менен бекитилген

Ош жана Жалал-Абад шаарларын калыбына келтирүү жана өнүктүрүү боюнча программанын алкагында курулган турак жайды Кыргыз Республикасынын жарандарына берүү тартиби жөнүндө ЖОБО

1. Бул Жобо Кыргыз Республикасынын Өкмөтүнүн токтому менен бекитилген Ош жана Жалал-Абад шаарларын калыбына келтирүү жана өнүктүрүү боюнча программанын алкагында курулган турак жай алууга укугу бар Кыргыз Республикасынын жарандарынын категорияларынын тизмесине ылайык Ош жана Жалал-Абад шаарларын калыбына келтирүү жана өнүктүрүү боюнча программанын алкагында курулган жайды Кыргыз Республикасынын жарандарына берүү тартибин жана шарттарын белгилейт.

2. Жарандар турак жай алууга өтүнүч бергенде, аларга менчик укугунда тиешелүү болгон жер участоктору талкаланган турак жай үйлөрү жана курулмалары менен муниципалдык менчикке ыктыярдуу түрдө белгиленген тартипте өткөрүп берилет.

3. Жарандар өздөрүнө менчик укугунда тиешелүү болгон жер участокторун муниципалдык менчикке ыктыярдуу түрдө өткөрүп берүүдөн баш тарткан учурда аталган адамдар Кыргыз Республикасынын Өкмөтүнүн 2010-жылдын 17-августундагы № 164 "Ош шаарында, Ош жана Жалал-Абад облустарынын аймагында жабыр тарткан адамдарга объекттерди курууга жана калыбына келтирүүгө мамлекеттик жардам көрсөтүү боюнча чаралар жөнүндө" токтомуна ылайык жеке турак жай үйүн калыбына келтирүү же куруу үчүн ссуда алууга укуктуу.

4. Көп квартиралуу үйлөрдөн (квартиралар: 1 бөлмөлүү, 2 бөлмөлүү, 3 бөлмөлүү) берилүүчү турак жайдын жалпы аянты Кыргыз Республикасынын мыйзамдарында белгиленген бир адам үчүн турак жай аянтынын нормалары эске алуу менен үй-бүлө мүчөлөрүнүн санына жараша аныкталат.

5. Бир категориядагы жарандардын арыздарын кароодо биринчи кезек үй-бүлө мүчөлөрүнүн санына, үй-бүлөнүн ишке жарактуу мүчөлөрүнүн санына (багуучусуна) жараша, үй-бүлөдө жашаган ден соолугунун мүмкүнчүлүгү чектелген адамдардын топтук таандыктуулугун эске алуу менен аныкталат. Бирдей шарттарда кезектүүлүк арыз берүү убактысына жана катталган датасына ылайык чечилет.

6. Турак жайды алуу үчүн төмөнкү документтер берилет:

- Ош жана Жалал-Абад шаарларын калыбына келтирүү жана өнүктүрүү боюнча программанын алкагында курулган турак жайды бөлүштүрүү боюнча мамлекеттик комиссияга (мындан ары - Мамлекеттик комиссия) турак жай алууга арыз;

- паспорттун же өзүн күбөлөндүргөн башка документтин көчүрмөсү;

- үй-бүлөнүн жашы жеткен бардык мүчөлөрү кол койгон жана нотариуста күбөлөндүрүлгөн, жер участогун ыктыярдуу түрдө өткөрүп берүү жөнүндө арыз (жер участогу бар болсо);

- жашаган жеринен үй-бүлөнүн курамы жөнүндө маалымкат же үй китебинен көчүрмө (бар болсо);

- Жер участогуна менчик укугу жөнүндө актынын көчүрмөсү (бар болсо);

- 2010-жылдын июнь окуяларынын натыйжасында келтирилген зыянды баалоо боюнча комиссиянын текшерүү актысынын көчүрмөсү;

- Ош шаарында, Ош жана Жалал-Абад облустарында 2010-жылдын июнь окуяларынын кесепетинен турак жайсыз калгандыгы же турак жайы талкалангандыгы жөнүндө Кыргыз Республикасынын Өзгөчө кырдаалдар министрлигинин маалымкаты;

- Ош шаарында, Ош жана Жалал-Абад облустарында 2010-жылдын июнь окуяларынын кесепетинен үй-бүлө мүчөсү каза болгондугу жөнүндө күбөлүктүн көчүрмөсү (каза болгон адамдардын үй-бүлөлөрү үчүн);

- майып болгондугу жөнүндө медициналык-социалдык эксперттик комиссиянын (МСЭК) маалымкаты;

- Ош шаарында, Ош жана Жалал-Абад облустарында 2010-жылдын май-июнь окуяларынын кесепетинен үй-бүлө мүчөсүн дайынсыз жоголгон деп таануу жөнүндө соттун чечиминин көчүрмөсү (туугандары дайынсыз жоголгон үй-бүлө мүчөлөрү үчүн);

- Ош жана Жалал-Абад шаарларын калыбына келтирүү жана өнүктүрүү боюнча программанын алкагында курулган турак жай алууга укугу бар Кыргыз Республикасынын жарандарынын категорияларынын тизмесинде көрсөтүлгөн адамдардын тобуна арыз ээсинин таандыктыгын ырастоочу документтердин көчүрмөсү.

7. Турак жай алууга укугу бар Кыргыз Республикасынын жарандарынын кезегинин тизмесин түзүүнү жарандар же балдардын ата-энеси/мыйзамдуу өкүлдөрү жок болгон учурда балдардын укуктарын жана мыйзамдуу кызыкчылыктарын коргоо боюнча ыйгарым укуктуу органдар берген арыздардын негизинде жергиликтүү өз алдынча башкаруу органдарынын алдында түзүлүүчү комиссиялар (мындан ары - комиссиялар) жүргүзөт.

8. Комиссиянын жобосу жана курамы жергиликтүү кеңештердин чечими менен түзүлөт жана бекитилет. Комиссиянын курамына төмөнкүлөрдүн өкүлдөрү киргизилет:

- жергиликтүү өз алдынча башкаруунун аткаруучу органынын;

- жергиликтүү мамлекеттик администрациянын;

- жергиликтүү өз алдынча башкаруунун өкүлчүлүктү органынын;

- Кыргыз Республикасынын Саламаттык сактоо министрлигинин, Кыргыз Республикасынын Ички иштер министрлигинин, Кыргыз Республикасынын Социалдык өнүгүү министрлигинин аймактык бөлүмдөрүнүн;

- жабыр тарткан адамдардын өкүлдөрү;

- жарандык коомчулуктун (ӨЭУ) өкүлдөрү.

9. Жарандардын же балдардын укуктарын жана мыйзамдуу кызыкчылыктарын коргоо боюнча ыйгарым укуктуу органдардын турак жай алууга арыз берүүсүнүн фактысын комиссия эсепке алуу журналына каттайт, ал номерленип, боо өткөрүлүп байланып жана барактын санын көрсөтүү менен мөөр басып чапталат.

10. Комиссия жыйындарын мезгилдүү, бирок айына бир жолудан кем эмес өткөрөт.

11. Комиссия жарандардан же балдардын укуктарын жана мыйзамдуу кызыкчылыктарын коргоо боюнча ыйгарым укуктуу органдардан түшкөн арыздарды белгиленген тартипте изилдейт жана чечим кабыл алат, бул чечим тиешелүү протокол менен таризделет, чечим комиссия мүчөлөрүнүн жарымынан көбү катышканда көпчүлүк добуш менен кабыл алынат.

12. Комиссиянын протоколдору ушул Жобонун 6-пунктунда аталган арыздар жана документтер тиркелип, Мамлекеттик комиссиянын жактыруусуна 10 жумушчу күндүн ичинде жиберилет.

13. Турак жай алууга укугу бар жарандарга турак жай берүү жөнүндө Мамлекеттик комиссия жактырган чечим жаранды конкреттүү турак жай аянтына жайгаштыруу боюнча жол-жоболорду (чүчүкулак карматуу) жүргүзүү үчүн негиз болуп эсептелет.

14. Курамына ден соолугунун мүмкүнчүлүгү чектелген адам кирген үй-бүлө жарандарды жайгаштыруу боюнча жол-жоболорду (чүчүкулак карматуу) жүргүзүүгө чейин турак жай аянтынын жайгашуу кабатын тандоого укуктуу.

15. Мамлекеттик комиссия тарабынан турак жай алууга укугу бар жарандардын арыздарын кароонун натыйжалары чечим кабыл алынгандан кийин 10 (он) календарлык күндүн ичинде аларга маалымдалат.

16. 2010-жылдын июнунда үйлөрү талкаланган жарандарга турак жайды менчикке берүү турак жайды жер участогуна алмашуу келишимин түзүү жолу менен таризделет, ал келишим жер жайгаштыруу жана кыймылсыз мүлккө укуктарды каттоо боюнча жергиликтүү органда катталууга тийиш.

17. Мамлекеттик комиссиянын чечими Кыргыз Республикасынын мыйзамдарында каралган тартипте даттанылышы мүмкүн.

18. 2010-жылдын июнь окуяларынын учурунда документтер жоголуп кеткендигинин айынан документтери жок болсо жана аларды арыз берүү учурунда калыбына келтирүүгө мүмкүндүк болбосо, жергиликтүү өз алдынча башкаруу органдары жана жергиликтүү мамлекеттик администрациялар тиешелүү мамлекеттик органдарга расмий түрдө кайрылуу жолу менен жарандарга документтерди калыбына келтирүү же аталган фактыларды ырастоо үчүн көмөк көрсөтүүгө милдеттүү.

19. Мамлекеттик комиссиянын чечими ордер берүү үчүн негиз болуп эсептелет, ордерге арыз берүүчүнүн протоколго ылайык турак жай пайдаланууга бирдей укугу бар үй-бүлө мүчөлөрү киргизилет.

20. Ушул Жободо каралбаган маселелер Кыргыз Республикасынын мыйзамдарынын нормаларына ылайык чечилет.