Мамлекеттик, анын ичинде администрациялы курулмаларды, имараттарды (жайларды) пайдалануу, ижарага берүү тартиби жана шарттары жөнүндө жобо (Кыргыз Республикасынын Өкмөтүнүн токтому менен бекитилген)

Кыргыз Республикасынын Өкмөтүнүн 2011-жылдын 30-майындагы №263 токтому менен бекитилген

Мамлекеттик, анын ичинде администрациялы курулмаларды, имараттарды (жайларды) пайдалануу, ижарага берүү тартиби жана шарттары жөнүндө ЖОБО

1. Жалпы жоболор

1. Бул, Мамлекеттик, анын ичинде администрациялык курулмаларды, имараттарды (жайларды) пайдалануу, ижарага берүү тартиби жана шарттары жөнүндө жобо (мындан ары - Жобо) Кыргыз Республикасынын Граждандык кодексине жана башка нормативдик укуктук актыларга ылайык иштелип чыкты жана мамлекеттик, анын ичинде администрациялык курулмаларды, имараттарды (жайларды) пайдалануу, ижарага берүү тартибин жана шарттарын, ошондой эле ижара келишимдерин тариздөөнү аныктайт.

2. Бул Жободо пайдаланылчу негизги түшүнүктөр:

мамлекеттик, анын ичинде администрациялык курулмаларды, имараттарды (жайларды) пайдалануу, ижарага берүү мамилелердин системасын билдирет, мында ижарага берүүчү мамлекеттик, анын ичинде администрациялык курулмалардын, имараттардын (жайлардын) пайдаланылбаган бөлүгүн ижарага алуучуга акысы үчүн убактылуу ээлик кылууга жана пайдаланууга берүүгө милдеттенет; ижарага берүүчү - мамлекеттин мүлк операциялык башкаруусунда, чарбалык башкаруусунда (балансында) турган мамлекеттин башкаруу органдары жана мамлекеттик мекемелер, мамлекеттик ишканалар; ижарачы - мамлекеттик, анын ичинде администрациялык курулмаларды, имараттарды (жайларды) акы төлөө менен убактылуу ээлик кылууга жана пайдаланууга (ижарага) алуу өтүнүчү менен ижарага берүүчүгө кайрылган жеке адам же юридикалык жак; ижара объектилери болуп мамлекеттин менчигинде турган мамлекеттик имараттар, курулмалар жана пайдаланылбаган аянттар таанылат.

2. Мамлекеттик, анын ичинде администрациялык курулмаларды, имараттарды (жайларды) ижарага берүүнүн тартиби жана шарттары

3. Мамлекеттик, анын ичинде администрациялык курулмалар, имараттар (жайлар) ижарачыга мамлекеттик мүлктү менчиктештирүү жана башкаруу боюнча ыйгарым укуктуу мамлекеттик орган (мындан ары - ыйгарым укуктуу орган) чыгарган чечимдин негизинде берилет.

4. Ижарага берүүчү тараптар кол коюшкан мамлекеттик мүлктү ижаралоо келишимин ыйгарым укуктуу мамлекеттик органга макулдашууга жана каттоого берет. Ижара келишимдери келишимдин жарактуулук мөөнөтү көрсөтүлгөн расмий кат менен коштолот.

5. Ыйгарым укуктуу мамлекеттик орган расмий кат алынган күндөн баштап бир айдын ичинде ижара акысынын эсебин текшерет, ижара келишимин макулдашат жана бир жылга каттайт.

6. Ижара келишиминин жарактуулук мөөнөтүн биротоло ыйгарым укуктуу мамлекеттик орган аныктайт. Ижарачы ижарага алынган мамлекеттик, анын ичинде администрациялык курулманы, имаратты (жайды) капиталдык оңдоого орчундуу инвестициялык каражат салган учурда ыйгарым укуктуу мамлекеттик орган ижара келишиминин мөөнөтүн үч жылдан ашыкка белгилеши мүмкүн.

7. Эгер берилчү аянт 300 кв.м ашык болсо, анда ижарага берүүчү конкурс өткөрүлөөрдөн 10 күндөн кем эмес мурдатан жалпыга маалымдоо каражаттарына кулактандыруу жарыялоо менен андай аянтты ижарага берүү боюнча конкурс өткөрөт. Конкурска 2ден кем эмес катышуучу катышса конкурс болду деп эсептелет. Бизнес планы жакшыраак деп таанылган катышуучу конкурстун жеңүүчүсү деп эсептелет.

Бул пункттун талаптары мамлекеттик, анын ичинде администрациялык имараттарды 1 жылдан кем эмес ижарадан турган ижарачыларга карата колдонулбайт.

8. Мамлекеттик, анын ичинде администрациялык курулмаларды, имараттарды (жайларды) ижарага берүү шарттары, тараптардын укуктары жана милдеттери, тараптардын жоопкерчиликтери жана башка шарттар ижара келишими менен белгиленет.

9. Ижарачы ижара келишими күчүнө кирген учурдан тартып мамлекеттик, анын ичинде администрациялык курулманы, имаратты (жайды) ижарага алат. Ижара келишими аны ыйгарым укуктуу мамлекеттик органда каттаган учурдан тартып күчүнө кирет.

10. Ижарачы өзүнүн ишин жүргүзүүгө жана ижара келишимин аткарууга байланыштуу болгон милдеттенмелери боюнча мыйзамга ылайык мүлктүк жоопкерчилик тартат.

11. Ижарага берүүчү ижарачынын ижаралык келишимдин аткарып жаткандыгын текшерүүгө, бул үчүн бардык зарыл документтерди жана маалыматтарды алууга укуктуу.

12. Ижарага алынуучу мамлекеттик, анын ичинде администрациялык курулманы, имаратты (жайды) ижарачы субарендага ижарага берүүчүнүн жана ыйгарым укуктуу мамлекеттик органдын жазуу түрүндөгү макулдугу менен гана бере алат.

3. Ижара келишими

13. Ижарага берүүчү менен ижарачынын ортосундагы мамилени жөнгө салуучу негизги документ ижара келишими болот (1-тиркеме).

14. Ижара келишиминде ижарага берилчү мамлекеттик, анын ичинде администрациялык курулманын, имараттын (бөлмөнүн) аталышы, аянты жана жайгашкан жери, мамлекеттик, анын ичинде администрациялык курулманы, имаратты (жайды), аны менен кошо жер участогун пайдалангандык үчүн акынын өлчөмү жана аны төлөө тартиби, ижара мөөнөтү, тараптардын келишим боюнча укуктары жана милдеттери, аны бузуунун шарттары жана башка шарттар каралат.

4. Мамлекеттик, анын ичинде администрациялык курулманы, имаратты (жайды)

ижарага берүү келишимин түзүүнүн, өзгөртүүнүн жана бузуунун тартиби

15. Ижара акысын ижарага берүүчү ушул токтом менен бекитилген Мамлекеттик, анын ичинде администрациялык имараттарды (жайларды) пайдалангандык үчүн ижара акысын эсептөө тартиби жөнүндө нускамага ылайык эсептейт.

16. Ижара акысы туруктуу суммада белгиленген төлөм түрүндө ижарага берүүчүнүн алыш-бериш төгүлөт. Ижара акысына коммуналдык төлөмдөр, эксплуатациялык чыгымдар, салык жана башка мыйзамдарда каралган бөлөк төлөмдөр кирбейт.

17. Ижара акысынан түшкөн каражаттарды максаттуу пайдалануу жоопкерчилигин мамлекеттик органдын, ишкананын, мекеменин жана уюмдун жетекчиси жана башкы бухгалтери тартат.

18. Мамлекеттик мүлктү ижарага берүүдөн түшкөн каражат ай сайын ижарага берүүчүнүн алыш-бериш эсебине түшөт жана ал 10 банктык күндүн ичинде ыйгарым укуктуу мамлекеттик органдын эсебине которот, андан кийин ал республикалык бюджетке кириштелет.

19. Ижарага берүүчүнүн жана башка компетенттүү органдардын макулдугу менен ижарачы мамлекеттик, анын ичинде администрациялык курулмага, имаратка (жайга) капиталдык оңдоо жумуштарын жүргүзсө жана анын баасы оңдоо жумуштарынын сметалык наркына ылайык бир айлык ижара акысынан бир нече эсе көп болсо, ал жумуштардын баасы ыйгарым укуктуу мамлекеттик органга макулдашуу боюнча ижарага берүүчүнүн карамагында калган каражаттардын эсебинен ижара акысына чегерилет.

20. Ижарага берүүчү ыйгарым укуктуу мамлекеттик органга ар бир ижарачыдан түшкөн ижара акысы жөнүндө маалыматтарды ай сайын берүүгө тийиш (2-тиркеме).

21. Ижарага берүүчү ижара келишимин түзүүгө байланыштуу маалыматтардын жана материалдардын тууралыгы үчүн жоопкерчилик тартат.

22. Эгерде келишим узартылбаса, ижара келишими келишимдин жарактуулугунун акыркы күнү бүткөндө күчүн жоготот.

23. Ижарага берүүчү жана (же) ижарачы тараптарга жазуу жүзүндө билдирүү жиберүү менен келишимди мөөнөтүнөн мурда бузуу жөнүндө демилге көтөрүүгө укуктуу. Келишимди мөөнөтүнөн мурда бузуу жөнүндө чечимди ыйгарым укуктуу мамлекеттик орган билдирүүнү алган күндөн тартып 15 күндүн ичинде чыгарат.

Зарыл болсо ыйгарым укуктуу мамлекеттик орган ижара берүүчүгө жана ижарачыга 15 күндөн кем эмес мурдатан жазуу түрүндө билдирүү жиберүү жолу менен ижара келишимин бир жактуу тартипте жое алат.

24. Төмөнкүдөй учурларда эреже бузууну жоюу жөнүндө жазуу түрүндө эскертүү берилгенден кийин ижарачы ал эреже бузууларды 15 күндүк мөөнөттө жойбосо, ижара келишими бузулушу мүмкүн:

- мүлктү келишимдин шарттарын бузуу менен пайдаланса;

- ижара акысын келишимде белгиленген төлөөчү убакта төлөбөсө;

- келишимде каралган башка шарттар бузулса.

Келишимди жоюлганда ижарачы анын ичинде администрациялык имаратты, курулманы (жайды), бошотуу боюнча бир айлык мөөнөттө чара көрүүгө жана ыйгарым укуктуу мамлекеттик органга маалымат берүүгө тийиш.

25. Ижара акысы белгиленген баалар жана тарифтер кабыл алынган ченемдик укуктук актыларга ылайык өзгөрүлгөн учурларда кайра каралат. Ижара акысынын өзгөргөндүгү тууралуу ыйгарым укуктуу мамлекеттик орган ижарага берүүчүгө, ал болсо ижарачыга жазуу түрүндө билдирет.

26. Келишимдин шарттарына өзгөртүүлөр жана толуктоолор колдонуудагы ижара келишимине кошумча макулдашуу түзүү жолу менен киргизилиши мүмкүн.

27. Ижарага берилген мамлекеттик, анын ичинде администрациялык курулмалардын, имараттардын (жайлардын) капиталдык жана кезектеги ремонту белгиленген нормативдер боюнча, түзүлгөн келишимдин шарттарында жүргүзүлөт.

5. Мамлекеттик, анын ичинде администрациялык курулмаларды, имараттарды (жайларды) ижарага берүү

28. Эгер ижара келишиминде башкача каралбаса, мамлекеттик, анын ичинде администрациялык курулмаларды, имараттарды (жайларды) берүүгө даярдоо, анын ичинде өткөрүп берүү актысын түзүү жана кол коюуга берүү ижарага берүүчүнүн милдети болот жана анын эсебинен ишке ашырылат.

29. Акт ижарага берүүчүнүн жана ижарачынын ыйгарым укуктуу өкүлдөрүнүн катышуусунда түзүлөт.

30. Актыда төмөнкүдөй реквизиттер болууга тийиш:

- актынын түзүлгөн жери жана күнү;

- ижара келишиминин номуру жана кол коюлган күнү, ага ылайык мамлекеттик курулмаларды, имараттарды (жайларды) өткөрүп берүү-кабыл алуу ишке ашырылат;

- өткөрүлүп берилчү мамлекеттик, анын ичинде администрациялык курулманын, имараттын (жайдын) техникалык абалы;

- табылган эреже бузууларды жана туура эместиктерди жоюунун мөөнөтү жана тартиби.

31. Актыга тараптардын өкүлдөрү кол коюшат жана мөөрлөрү менен күбөлөндүрүлөт. Келишимди бузууда же анын мөөнөтү бүткөндө да ижарага алынган мүлктү өткөрүп берүү-кабыл алуу актысы түзүлөт.

32. Келишим токтотулганда ижарачы ижара берүүчүгө мамлекеттик, анын ичинде администрациялык курулманы, имаратты (жайды) кандай алса ошондой абалда, эскирүүсүн эске алуу менен, же келишимде шартталган абалда кайра берүүгө милдеттүү.

6. Тараптардын жоопкерчилиги

33. Келишим боюнча милдеттенмелерин аткарбаган же тийиштүү түрдө аткарбаган учурда тараптар Кыргыз Республикасынын мыйзамдарында белгиленген жоопкерчиликти тартышат.

34. Күнөөлүү тарап башка тарапка келтирген материалдык зыянды жана келишим боюнча милдеттерин аткарбагандан же тийиштүү түрдө аткарбагандан келтирилген бардык чыгымдардын ордун толтурууга милдеттүү.

35. Тартиптик, администрациялык жана жазык жоопкерчилигине тартылган күнөөлүү жактарды келтирилген зыяндын ордун толтуруу милдетинен бошотпойт.

36. Ушул Жобонун шарттарын бузгандыгы үчүн мамлекеттик органдын, ишкананын, мекеменин, уюмдун жетекчиси жеке жоопкерчилик тартат.

37. Ижара келишимин түзүүдөн атайылап качкан жана мамлекеттик мүлктү ижарага берүүдөн түшкөн кирешени жашырган учурда ижарага берүүчү Кыргыз Республикасынын мыйзамдарына ылайык жооп тартат.

38. Ижара келишимин түзүүдөн качкан жана мамлекеттик мүлктү ижарага берүүдөн түшкөн кирешени жашырган учурда ижарага берүүчү Кыргыз Республикасынын мыйзамдарына ылайык жоопкерчилик тартат.

1-тиркеме Макулдашылды Мамлекеттик мүлктү менчиктештирүү жана башкаруу боюнча ыйгарым укуктуу мамлекеттик орган 200__-жылдын "___" _____________

Мамлекеттик, анын ичинде администрациялык курулмаларды, имараттарды (жайларды) ижарага берүү жөнүндө №___ ТИПТҮҮ КЕЛИШИМ

_________ ш. "__" ____________ 200___-ж.

__________________________________________________________________ атынан мындан ары "Ижарага берүүчү" деп аталуучу, _____________________ _______________________________________________________________________ негизинде аракеттенүүчү _______________________________________________ жана экинчи тараптан, мындан ары "Ижарага алуучу" деп аталуучу ________ _____________________________________________________________ ортосунда (эгер жеке адам болсо аты-жөнү көрсөтүлөт: эгер юридикалык жак болсо - юридикалык жактын аталышы, келишим түзүүгө ыйгарым укук берилген өкүлдүн аты-жөнү жана бул юридикалык жак эмненин негизинде иш жүргүзөөрү көрсөтүлсүн) төмөнкүлөр жөнүндө ушул Келишим түзүлдү:

1. Жалпы шарттары

1. Ижарага берүүчү _______________________________________________

_______________________________________________________________________ (көчө, аянт, проспект) дарегиндеги, жалпы аянты ____ кв.м, №___ курулушта ____ кабатында жайгашкан, мамлекеттик, анын ичинде администрациялык курулманы, имаратты (жайды) _____ максатында пайдалануу үчүн ижарага берет, ал эми ижарачы ижарага алат.

2. Ижара мөөнөтү 200_-ж. "___" ______ тартып 200_-ж. "____" ______ чейин _____ айга (жылга) белгиленет (мамлекеттик мүлктү менчиктештирүү жана башкаруу боюнча ыйгарым укуктуу орган толтурат).

Мөөнөтү бүткөндөн тартып келишим жоюлган болуп эсептелет. Келишимдин жарактуулук мөөнөтү бүтүшү тараптардын келишим боюнча милдеттенмелери токтотулушуна алып келет.

3. Келишим ыктыярдуу негизде түзүлөт.

2. Тараптардын укуктары жана милдеттери

4. Ижарага берүүчү төмөнкүдөй укуктарга ээ:

- ижарачыдан ай сайын ижара акысын алууга;

- ижарачынын чарбалык ишинин натыйжасында мамлекеттик, анын ичинде администрациялык курулманын, имараттын (жайдын) абалы жана экологиялык жагдайы начарлашынан улам болгон чыгымдардын ордун толтурууну ижарачыдан талап кылууга;

- колдонулуп жаткан мыйзамдар өзгөргөн учурда ижарачыга макулдашуу боюнча келишимге зарыл болгон өзгөртүүлөрдү, толуктоолорду жана тактоолорду киргизүүгө;

- ижарачынын бул келишимдин шарттарын бузуу менен жүргүзүп жаткан иштерин токтотууга.

5. Ижарачы төмөнкүлөргө укуктуу:

- ижарага алынган мамлекеттик, анын ичинде администрациялык курулмада, имаратта (жайда) өз алдынча чарбалык ишти ушул келишимдин максаттарына жана шарттарына ылайык гана жүргүзүүгө;

- өткөрүп берүү-алуу актысына кол коюлгандан кийин ижарага алынган мамлекеттик, анын ичинде администрациялык курулманы, имаратты (жайды) пайдаланууга киришүүгө.

6. Ижарага берүүчү төмөнкүлөргө милдеттүү:

- мамлекеттик, анын ичинде администрациялык курулманы, имаратты (жайды) ижарачыга ушул келишимдин шарттарына ылайык абалда берүүгө;

- бул келишим макулдашылгандан кийин мамлекеттик, анын ичинде администрациялык курулманы, имаратты (жайды) он күндүн ичинде ижарачыга өткөрүү-кабыл алуу актысы боюнча өткөрүп берүүгө;

- эгерде мыйзамга жана ушул келишимдин шарттарына каршы келбесе ижарачынын чарбалык ишине кийлигишпөөгө, анын мамлекеттик, анын ичинде администрациялык курулманы, имаратты (жайды) пайдаланышына тоскоол кылбоого;

- ижаралык пайдаланууга берилген мамлекеттик, анын ичинде администрациялык курулманын, имараттын (жайдын) абалын контролдоого;

- келишим ажыратылгандан кийин ижарачынын ижаралык пайдаланууга берилген курулманы, имаратты (жайды) бошотушу боюнча керектүү чараларды көрүүгө;

- ижарачыдан ижара акысы алынгандан кийин банктык 10 күндүн ичинде ижарачы төккөн ижара акысын мамлекеттик мүлктү менчиктештирүү жана башкаруу боюнча ыйгарым укуктуу мамлекеттик органдын алыш-бериш эсебине которууга;

- келишимди мөөнөтүнөн мурда ажыратаары жөнүндө ижарачыга өз убагында билдирүүгө.

7. Ижарачы төмөнкүлөргө милдеттүү:

- мамлекеттик, анын ичинде администрациялык курулманы, имаратты (жайды) ушул келишимдин шарттарына ылайык пайдаланууга алууга;

- ижарага алынган мамлекеттик, анын ичинде администрациялык курулманы, имаратты (жайды) ушул келишимдин 1.1-пунктунда белгиленген түз арналышы боюнча гана пайдаланууга;

- ижарага алынган мамлекеттик, анын ичинде администрациялык курулманы, имаратты (жайды) жана жанындагы аймакты ижара берүүчүгө кайра өткөрүп бергенге чейин тийиштүү техникалык жана санитардык абалда кармоого;

- ижарага алынган мамлекеттик, анын ичинде администрациялык курулмада, имаратта (жайда) ижарага берүүчүнүн жана компетенттүү органдардын жазуу түрүндө уруксатысыз ижарачынын ишине байланыштуу эч кандай капиталдык (тирөөч конструкцияларга тиешелүү) өзгөртүп пландоолорду жана өзгөртүп жабдууну жасабоого;

- ижара акысын ар бир айдын 5-күнүнө чейин төлөөгө, ошондой эле коммуналдык жана башка максаттуу тейлөө кызматтарына өзүнчө келишим боюнча төлөөгө;

- ижарага берүүчүгө ижарага алынган объектиге эркин кирүү мүмкүндүгүн белгиленген тартипте камсыздоого, көрсөтмөлөрдү белгиленген мөөнөттө аткарууга;

- ижарага алынган мамлекеттик, анын ичинде администрациялык курулмага, имаратка (жайга) тийиштүү эрежелерди жана мамлекеттик көзөмөлдөө органдарынын буйруктарын аткарууга жана мыйзам менен белгиленген жоопкерчиликти алууга;

- башка ижарачылардын укуктарын, ошондой эле мамлекеттик, анын ичинде администрациялык курулманы, имаратты (жайды) пайдалануу тартибин бузбоого;

- өзүнүн чарбалык ишинин натыйжасында ижарага алынган мамлекеттик, анын ичинде администрациялык курулманын, имараттын (жайдын) сапаты начарлаганына байланыштуу ижара берүүчүгө келтирилген чыгымдарды толугу менен ордун толтурууга;

- ижарага алынган мүлктү күрөөгө койбоого же башкача түрдө барымтага салбоого;

- келишим бүткөндө мамлекеттик, анын ичинде администрациялык курулманы, имаратты (жайды) ижара берүүчүгө оң абалда кайра берүүгө.

3. Келишим боюнча төлөмдөр жана эсеп-кысаптар

8. Мамлекеттик, анын ичинде администрациялык курулманын, имараттын (жайдын) ижара акысынын өлчөмү айына 1 кв.м үчүн сомду түзөт. _____ кв.м аянттагы мамлекеттик, анын ичинде администрациялык курулманын, имараттын (жайдын) ижарасы үчүн акы айына бардыгы ____ сомду түзөт.

9. Ижара акысы кабыл алынган ченемдик укуктук актыларга ылайык белгиленген баалар жана тарифтер өзгөргөн шартта кайра каралат. Ижарага берүүчү ижара акысынын өзгөргөнү тууралуу ижарачыга жазуу түрүндө билдирет.

10. Ижара акысын өз убагында төлөбөсө ижарачы кечиктирилген ар бир күн үчүн жалпы карыздын суммасынын 0,5 проценти өлчөмдө үстөк төлөйт.

4. Келишимдин жарактуулук мөөнөтү жана колдонууну токтотуунун шарттары

11. Бул келишим ыйгарым укуктуу мамлекеттик органда каттоодон өткөн учурдан тартып күчүнө кирет.

12. Бул келишим төмөнкүдөй себептердин бири боюнча күчүн жоготот:

- ижарага алынган мамлекеттик, анын ичинде администрациялык курулманы, имаратты (жайды) келишимге ылайык эмес пайдаланганда:

- тараптардын бири келишимди мөөнөтүнөн мурун токтотуу жөнүндө билдиргенде;

- тараптардын бири келишим боюнча милдеттенмесин тийиштүү түрдө аткарбаганда;

- юридикалык жак (Ижарачы) жоюлган учурда;

- Ижарачы болгон жаран - жеке адам өлгөндө, ал аракетке жөндөмсүз, аракетке жөндөмдүүлүгү чектелген же дайынсыз жоголду деп таанылган учурда;

- ижара акысы, эксплуатациялык чыгымдар, коммуналдык кызматтардын акысы, санкциялар келишим менен белгиленген мөөнөттө төлөнбөсө. Ижара акысы жана коммуналдык кызматтардын акысын төлөө үч айдан ашык толук кечиктирилсе Ижарага берүүчүнүн келишимди бир тараптуу тартипте жоюшуна негиз болот;

- келишимдин жарактуулук мөөнөтүнүн акыркы күнү өтүшү боюнча;

- ыйгарым укуктуу мамлекеттик органдын демилгеси боюнча.

5. Тараптардын жоопкерчилиги

13. Күнөөлүү тарап өзүнүн келишим боюнча милдеттерин аткарбагандыктан же тийиштүү түрдө аткарбагандыктан башка тарапка келтирилген материалдык зыяндын жана башка бардык чыгымдардын ордун толтурууга милдеттүү.

14. Ушул келишимдин талаптарын жана шарттарын түз жана жашыруун түрүндө бузган бүтүмдөр жараксыз деп эсептелет, ал эми аларды жасаганы үчүн күнөөлүү жактар Кыргыз Республикасынын мыйзамдары менен белгиленген тартиптик, материалдык, администрациялык жана жазык жоопкерчилигине тартылат.

15. Тартиптик, материалдык, администрациялык жана жазык жоопкерчилигине тартуу күнөөлүү жактарды келтирилген зыяндын ордун толтуруу милдетинен бошотпойт.

6. Талаш-тартыштарды чечүүнүн тартиби

16. Тараптардын ортосундагы бардык талаш-тартыштар сүйлөшүү жолу менен чечилет.

17. Эгер макулдашууга келишпесе, талаш-тартыштар Кыргыз Республикасынын мыйзамдарына ылайык сот тартибинде чечилет.

7. Башка шарттар

18. Ыйгарым укуктуу мамлекеттик органда макулдашуудан өтпөгөн ижара келишими жараксыз болот.

19. Ижарачы милдеттенмени бузган учурда ыйгарым укуктуу мамлекеттик орган келишимди бир жактуу тартипте жоет.

20. Бул келишимге тиркеме (ижара акысынын эсептелиши) тиркелет, ал ажырагыс жана зарыл бөлүгү болуп эсептелет жана тараптардын ыйгарым укуктуу өкүлдөрү кол коюшу керек.

21. Ижарага берилген, анын ичинде администрациялык имараттын, курулманын (жайдын) сыртында жарнаманы жайгаштыруу Ижарага берүүчү менен белгиленген тартипте макулдалууга тийиш.

22. Бул келишим жазуу түрүндө түзүлөт, тараптардын колу коюлат.

23. Келишим бирдей юридикалык күчкө ээ үч нускада түзүлдү. Бир нускасы ыйгарым укуктуу мамлекеттик органда, экинчиси - Ижарага берүүчүдө калат, үчүнчүсү - Ижарачыга берилет.

Тараптардын юридикалык даректери жана банк маалыматтары: Ижарага берүүчү Ижарачы _________________ _________________ Колу Колу

М.О. М.О.

2-тиркеме

Жогору турган ведомство: _________________________________________ Ижарага берүүчү: _________________________________________________ Адрес: ____________________________________ тел: _________________ 20__-ж. отчеттук мезгили үчүн ижара акысы жөнүндө МААЛЫМАТ

Жетекчи __________________________________________________________ Башкы бухгалтер _____________________________________________ М.О.