КР Өкмөтүнүн ««Кыргыз Республикасында этил спиртинин жүгүртүлүшүн мамлекеттик жөнгө салууну камсыздоо боюнча убактылуу чаралар жөнүндө» Декретин ишке ашыруу тууралуу» токтому

КЫРГЫЗ РЕСПУБЛИКАСЫНЫН ӨКМӨТҮ ТОКТОМ 2010-жылдын 3-сентябры № 184 «Кыргыз Республикасында этил спиртинин жүгүртүлүшүн мамлекеттик жөнгө салууну камсыздоо боюнча убактылуу чаралар жөнүндө» Декретин ишке ашыруу тууралуу «Кыргыз Республикасынын Убактылуу Өкмөтүнүн 2010-жылдын 10-июнундагы № 62 «Кыргыз Республикасында этил спиртинин жүгүртүлүшүн мамлекеттик жөнгө салууну камсыздоо боюнча убактылуу чаралар жөнүндө» Декретине ылайык жана этил спиртин чыгаруу жана жүгүртүү чөйрөсүндө натыйжалуу мамлекеттик жөнгө салууну, этил спиртин контрабандалык алып келүүгө жана контрафакт продукцияны чыгаруу үчүн пайдаланууга бөгөт коюуну, салыктык төлөмдөрдүн толук түшүүсүн, калктын ден соолугун сактоону камсыздоо максатында Кыргыз Республикасынын Өкмөтү ТОКТОМ КЫЛАТ:

1. Тиркелгендер бекитилсин:

- Этил спиртин (коньяк спиртинен башкасын) өндүрүү жана/же жүгүртүү көлөмүн декларациялоо тартиби жөнүндө жобо;

- Чарбакер субъекттерге этил спиртин берүүнүн тартиби жана Кыргыз Республикасында өндүрүлүүчү этил спиртин, ошондой эле республикага импорттолуучу этил спиртин (коньяк спиртинен башкасын) аларды өндүрүүнүн, сактоонун, ташуунун, сатуунун жана экспорттоонун стадияларында көзөмөлдөө жөнүндө жобо.

2. Төмөнкүлөр белгиленсин:

- чарбакер субъекттерге этил спиртин өндүрүү жана/же жүгүртүү, сатуу, экспорттоо жана импорттоо үчүн белгиленген тартипте берилген лицензиялар аларда көрсөтүлгөн мөөнөткө чейин жарактуу;

- этил спиртин өндүрүүгө жана/же жүгүртүүгө лицензиясы бар чарбакер субъекттер этил спиртин алууга жана сатууга келишим түзүүдө Кыргыз Республикасынын Убактылуу Өкмөтүнүн 2010-жылдын 10-июнундагы № 62 «Кыргыз Республикасында этил спиртинин жүгүртүлүшүн мамлекеттик жөнгө салууну камсыздоо боюнча убактылуу чаралар жөнүндө» Декретинин 4-пунктуна ылайык колдонуудагы келишимдерди жана контракттарды «Кара-Балта спирт заводу» мамлекеттик ишканасына макулдашуу үчүн беришет;

- көзөмөлдөө чөйрөсүндөгү контролдоо Кыргыз Республикасынын Экономикалык жөнгө салуу министрлигинин алдындагы Этил спиртин жана алкоголдук продукциялардын өндүрүлүшүн жана жүгүртүлүшүн контролдоо боюнча мамлекеттик инспекцияга тапшырылат.

3. «Кара-Балта спирт заводу» мамлекеттик ишканасына 40 миң дал ашык эмес көлөмдө этил спиртин өндүрүүгө, сактоого, дүң жана (же) чекене сатууга укугун кайтарымсыз келишимдик негизде «Каракол» спирт заводу» мамлекеттик ишканасына берүү сунушталсын.

4. Жарактуу лицензиянын негизинде этил спиртин өндүрүүнү жана жүгүртүүнү ишке ашырган ишканалардын иштерин Кыргыз Республикасынын Экономикалык жөнгө салуу министрлигинин алдындагы Этил спиртин жана алкоголдук продукциялардын өндүрүлүшүн жана жүгүртүлүшүн контролдоо боюнча мамлекеттик инспекция контролдоору белгиленсин.

5. Бул токтом жалпыга маалымдоо каражаттарына расмий жарыяланган күндөн баштап күчүнө кирет жана 2010-жылдын 1-декабрына чейин жарактуу болот.

6. Бул токтомдун аткарылышын контролдоо Кыргыз Республикасынын Президентинин Администрациясынын тийиштүү бөлүмдөрүнө тапшырылсын.

Кыргыз Республикасынын Президенти

Р. Отунбаева

Кыргыз Республикасынын Өкмөтүнүн 2010-жылдын 3-сентябрындагы № 184 токтому менен бекитилген

Этил (коньяк спиртинен башкасын) спиртин өндүрүүнүн жана/же жүгүртүүнүн көлөмүн декларациялоо тартиби жөнүндө жобо

1. Бул Жобо чийки заттардын (коньяк спиртинен башка) бардык түрүнөн өндүрүлгөн этил спиртин өндүрүүнүн жана/же жүгүртүүнүн көлөмүн декларациялоонун тартибин аныктайт.

2. Чийки заттардын бардык түрүнөн, анын ичинде спирт - чийки затынан жана этил спиртинин ректификаланган (коньяк спиртинен башка) этил спиртинен жана этил спиртинин башкы фракциясынан өндүрүлгөн, түзүлгөн контракттарга ылайык алкоголдук жана курамында спирт камтылган продукцияларды өндүрүүгө жана башка максаттарга этил спиртин колдонуучу чарбакер субъекттер - тиркемеге ылайык формада «Кара-Балта спирт заводу» мамлекеттик ишканасына ай сайын, отчеттук айдан кийинки айдын 3үнөн кечиктирбестен декларация тапшырышат.

3. Тамак-аш эмес багыттагы курамында спирт бар продукцияларды өндүрүүгө жана башка (медициналык жана техникалык) максаттарга (коньяк спиртинен башка) этил спиртин колдонуучу чарбакер субъекттер (атайын керектөөчүлөр) аны сатып алууга түзүлгөн контракттарга ылайык дал ушул чарбакер субъектинин керектөөлөрү үчүн бекитилген спирттин чыгымдалган ченемдерине ылайык эркин формада «Кара-Балта спирт заводу» мамлекеттик ишканасына ай сайын, отчеттук айдан кийинки айдын 3үнөн кечиктирбестен декларация тапшырышат.

4. «Кара-Балта спирт заводу» мамлекеттик ишканасы ай сайын, отчеттук айдан кийинки айдын 15инен кечиктирбестен Кыргыз Республикасынын Экономикалык жөнгө салуу министрлигине караштуу Этил спиртин жана алкоголдук продукцияларды өндүрүүнү жана жүгүртүүнү контролдоо боюнча мамлекеттик инспекцияга жана Кыргыз Республикасынын Өкмөтүнө караштуу Мамлекеттик салык кызматына чарбакер субъекттер тапшырган декларациялардын негизинде колдонулган этил спиртинин көлөмү жөнүндө отчет берет.

Этил спиртин өндүрүүнүн жана /же жүгүртүүнүн көлөмүн декларациялоо тартиби жөнүндө жобого тиркеме

Уюмдардын аталышы

Уюмдун коду

Идентификациялык салык номери

Юридикалык дареги, телефон (мамлекеттик каттоодогу дареги)

Юридикалык жактын дареги

Лицензиянын сериясы, номери, алган күнү, иштөө мөөнөтү

Иш-аракетинин түрү

Колдонулган этил спиртинин жалпы көлөмү (бардык отчёттук мезгил үчүн, миң дал)

201__- ж._____________айы үчүн колдонулган этил спиртинин көлөмү жөнүндө ДЕКЛАРАЦИЯ

Этил спиртинин сорту

Жыл башына карата этил спиртинин калдыгы

Отчеттук ай үчүн кайра иштетилген этил спирти

Жыл башынан тартып кайра иштетилген этил спирти

Отчёттук мезгилдин акырына карата этил спиртинин калдыгы

Өндүрүлгөн алкоголдук жана курамында спирти бар продукциялар

Өлчөө бирдиги