КР Президентинин «1941-1945-жылдардагы Улуу Ата Мекендик согуштагы Жеңиштин 64 жылдыгын майрамдоо жана Улуу Ата Мекендик согуштун ардагерлерине бир жолку социалдык колдоо көрсөтүү боюнча кошумча чаралары жөнүндө» жарлыгы

КР Президентинин 2022-жылдын 31-майындагы ПЖ № 172 Жарлыгына ылайык КҮЧҮН ЖОГОТТУ

КЫРГЫЗ РЕСПУБЛИКАСЫНЫН ПРЕЗИДЕНТИ ЖАРЛЫК 2009-жылдын 27-апрели ПЖ № 211 1941-1945-жылдардагы Улуу Ата Мекендик согуштагы Жеңиштин 64 жылдыгын майрамдоо жана Улуу Ата Мекендик согуштун ардагерлерине бир жолку социалдык колдоо көрсөтүү боюнча кошумча чаралары жөнүндө 1941-1945-жылдардагы Улуу Ата Мекендик согушта фашизмди жеңүүгө өтө маанилүү тарыхый маани берип, кыргызстандык жоокерлердин баатырдыгын жана каармандыгын, ооруктун эмгекчилеринин кайратман эмгегин терең баалап, өлкөнүн өсүп келе жаткан муунун Мекенине берилгендиктин жана сүйүүнүн деминде патриоттук тарбия берүү, ошондой эле согуштун ардагерлерине материалдык колдоо көрсөтүү максатында, ТОКТОМ КЫЛАТ:

1. 1941-1945-жылдардагы Улуу Ата Мекендик согуштагы Жеңиштин 64 жылдыгын белгилөө максатында:

- төмөнкүлөргө бир жолку кошумча акчалай жөлөкпул бөлүнсүн:

- Улуу Ата Мекендик согуштун майыптарына жана катышуучуларына; 1941-жылдын 8-сентябрынан 1944-жылдын 27-январына чейин курчоого алуу мезгилинде Ленинград шаарынын ишканаларында, мекемелеринде жана уюмдарында иштеген жана "Ленинградды коргогондугу үчүн" медалы менен сыйланган адамдарга, жана "Курчоодогу Ленинграддын тургуну" белгиси менен сыйланган адамдарга; экинчи дүйнөлүк согуштун мезгилинде фашисттер жана алардын союздаштары түзгөн концлагерлердеги, геттолордогу жана башка мажбурлап кармоо жерлериндеги мурдагы жашы жете элек туткундарга - 3000 сом өлчөмүндө;

- Улуу Ата Мекендик согушта курман болгон жоокерлердин үй-бүлөлөрүнө; Улуу Ата Мекендик согуштун жылдарында ооруктагы каарман эмгеги жана кынтыксыз аскердик кызмат өтөгөндүгү үчүн СССРдин ордендери жана медалдары менен сыйлангандарга; Улуу Ата Мекендик согуштун жылдарында жумушчу колонналарга (эмгек армиясына) мыйзамсыз зомбулук менен мобилизациялоого дуушар болгон жана кийин акталган жарандарга - 1000 сом өлчөмүндө.

2. Жергиликтүү мамлекеттик администрациялар жана жергиликтүү өз алдынча башкаруу органдары:

- 1941-1945-жылдардагы Улуу Ата Мекендик согуштагы Жеңиштин 64 жылдыгын майрамдоого арналган салтанаттуу иш-чараларды уюштурсун;

- согуштун ардагерлерине, ооруктун эмгекчилерине, эмгектин ардагерлерине, аймактын өнүгүшүнө олуттуу салым кошкон улгайган курактагы жарандарга бардык тараптан колдоо көрсөтүү үчүн республиканын бардык аймактарында кайрымдуулуктун бир айлыгын өткөрсүн.

3. 1941-1945-жылдардагы Улуу Ата Мекендик согуштагы Жеңиштин 65 жылдыгын майрамдоонун алдында:

- 2010-жылдын 9-май күнү бүткүл элдик майрам катары белгиленсин;

- 2009-жылдын 1-июлуна чейинки мөөнөттө Улуу Ата Мекендик согуштагы Жеңиштин 65 жылдыгын майрамдоону даярдоо жана өткөрүү боюнча уюштуруу комитетинин курамы түзүлсүн;

- уюштуруу комитети Улуу Ата Мекендик согуштагы Жеңиштин 65 жылдыгын майрамдоо боюнча иш-чаралардын планын иштеп чыксын жана жүзөгө ашырсын.

4. Кыргыз Республикасынын Өкмөтү ушул Жарлыктын 1- жана 3-пункттарынан келип чыгуучу финансылык, уюштуруу жана башка маселелерди чечсин.

5. Бул Жарлыктын аткарылышына контролдук кылуу милдети Кыргыз Республикасынын Президентинин Администрациясынын коргоо жана коопсуздук иштер боюнча бөлүмүнө жана экономикалык жана социалдык саясат бөлүмүнө жүктөлсүн.

6. Бул Жарлык кол коюлган күндөн тартып күчүнө кирет.

Кыргыз Республикасынын Президенти

К.Бакиев