# КР Президентинин 2019-жылдын 24-июлундагы ПЖ № 96 "Комуз күнү жөнүндө" Жарлыгы - Толук аталышы: КР Президентинин 2019-жылдын 24-июлундагы ПЖ № 96 "Комуз күнү жөнүндө" Жарлыгы - Актынын түрү: Указ - Номери: 96 - Кабыл алынган күнү: 24.07.2019 - Статусу: Күчүндө - Редакциянын күнү: 24.07.2019 - Тексттин тили: кыргыз тили - aqlex'теги барагы: - Расмий булак: - Башка тилдеги тексти (Markdown): > Текст расмий булактын маалыматы боюнча 24.07.2019 редакциясында берилди. Бул юридикалык кеңеш эмес: юридикалык маанилүү аракеттер үчүн расмий жарыялоо менен салыштырыңыз. > > Кантип шилтеме берүү керек: КР Президентинин 2019-жылдын 24-июлундагы ПЖ № 96 "Комуз күнү жөнүндө" Жарлыгы (24.07.2019 редакциясы) - https://aqlex.ai/kg/doc/430079 --- КЫРГЫЗ РЕСПУБЛИКАСЫНЫН ПРЕЗИДЕНТИ ЖАРЛЫК 2019-жылдын 24-июлу ПЖ № 96 Комуз күнү жөнүндө Жогорку технологиялар ылдам өскөн шарттарда улуттук маданиятты сактап калуу мамлекеттик органдардын жана жарандык коомдун ишинин маанилүү багыттарынын бири болуп эсептелет. Улуттук маданият коомду андан ары консолидациялоо жана Кыргызстан элинин биримдигин бекемдөө үчүн шарттарды түзөт. Кыргыз элинин руханий маданиятынын ажырагыс бөлүгү катары салттуу музыканы комузсуз элестетүү мүмкүн эмес. Комуз кыргыз элинин салттуу маданиятында өзгөчө орунду ээлейт. Комуздун күүлөрү өзүнө философиялык ойлорду, жашоо-турмушту жана маданияттын өзгөчөлүгүн камтып, муундан муунга өтүп, биздин күндөргө чейин жетти. Азыркы шарттарда комуздун жаңы маанисин ачуу керек, ал кыргызстандыктардын көп түрдүү маданиятындагы биримдиктин символу болууга тийиш. Кыргызстан элинин маданий интеграциясы коомдогу тынчтыктын, ынтымактын жана өлкөнү социалдык-экономикалык өнүктүрүүнүн негизи болуп калат. Ушуга байланыштуу Кыргызстандын этностук коомчулуктарынын маданияттар аралык диалогун кеңейтүү үчүн салттуу музыканын ролун күчөтүү зарыл. Аталган багытта тиешелүү ишти жүргүзүү максатында ТОКТОМ КЫЛАМ: 1. Кыргыз Республикасынын Өкмөтүнө төмөнкүлөр сунушталсын: - 9-сентябрды Кыргыз Республикасында жыл сайын белгиленүүчү Комуз күнү (мындан ары - Комуз күнү) деп белгилөө; - Кыргыз Республикасынын Маданият, маалымат жана туризм министрлигине Кыргыз Республикасынын Өкмөтүнүн облустардагы ыйгарым укуктуу өкүлдөрү, Кыргыз Республикасынын жергиликтүү мамлекеттик администрацияларынын башчылары жана жергиликтүү өз алдынча башкаруу органдары менен өз ара аракеттенип, Комуз күнүн майрамдоого арналган иш-чараларды уюштуруу боюнча чараларды көрүүнү тапшыруу. 2. Бул Жарлыктын аткарылышын контролдоо Кыргыз Республикасынын Президентинин Аппаратынын жарандык өнүктүрүү, диний жана этностук саясат бөлүмүнө жүктөлсүн. 3. Бул Жарлык расмий жарыяланган күндөн тартып күчүнө кирет. "Эркин Тоо" газетасынын 2019-жылдын 30-июлундагы N 63 жарыяланды Кыргыз Республикасынын Президенти С.Жээнбеков