Каракол шаардык кеңешинин «Каракол шаары менен Ак-Суу районунун ортосундагы административдик чек-ара жөнүндө»токтому

КАРАКОЛ ШААРДЫК КЕӉЕШИ ТОКТОМ 2019-жылдын 02-июлу №27-28/1 Каракол шаары менен Ак-Суу районунун ортосундагы административдик чек-ара жөнүндө Кыргыз Республикасынын Өкмөтүнүн Ысык-Көл областындагы ыйгарымдуу өкүлү А.Ш.Осмоналиевдин, жерди жайгаштыруу жана кыймылсыз мүлккө укуктарды каттоо боюнча Каракол Ак-Суу аймактык башкармалыктын башчысы Э.К.Сулайманбековдун маалыматтарын угуп жана талкуулап, жана Кыргыз Республикасынын Өкмөтүнүн Ысык-Көл областындагы ыйгарымдуу өкүлү А.Ш.Осмоналиевдин 2019-жылдын 24-январында, №21 тескемеси менен түзүлгөн ведомстволор аралык комиссиясы тарабынан топтолгон материалдарды карап, Каракол шаары менен Ак-Суу районунун чек арасындагы, 1991-жылы пайда болгон талаш тилкелер боюнча маселени чечүүнүн маанилүүлүгүн, жана өз учурунда «Кыргызгипрозем» институту тарабынан даярдалган Каракол шаарынын сырткы административдик чек араларынын сүрөттөмөсүнүн негизинде кабыл алынган, Кыргыз Республикасынын « Ысык-Көл областынын Каракол шаарынын жана Ак-Суу районунун чек арасын сүрөттөө жөнүндөгү» 2004-жылдын 4-октябрындагы №176 Мыйзамы, Ак-Суу районунун Октябрь айыл өкмөтүнүн тургундарынын нааразылыктарын пайда кылып келе жатканын эске алуу менен, Каракол шаары менен Ак-Суу районунунун ортосундагы чек ара боюнча, көптөн бери көтөрүлүп келаткан маселелерди чечүү максатында, Каракол шаардык депутаттар Кеңешинин жерди пайдалануу, архитектура, курулуш жана муниципалдык менчик боюнча туруктуу комиссиясынын корутундусун эске алуу менен, Каракол шаардык депутаттар Кеңешинин XXVII чакырылышынын XXVIII сессиясы, ТОКТОМ КЫЛАТ:

1. Кыргыз Республикасынын 2004-жылдын 4-октябрында кабыл алынган «Кыргыз Республикасынын Ысык-Көл областынын Ак-Суу району жана Каракол шаарынын чек арасынын сүрөттөмөсүн бекитүү жөнүндөгү» №176 Мыйзамы менен бекитилген, Кыргыз Республикасынын Каракол шаарынын сырткы административдик чек арасынын сүрөттөмөсүнө төмөнкү өзгөртүүлөрдү киргизүүгө, башкача айтканда, Ак-Суу районуна төмөнкү жер тилкелерин өткөрүп берүүгө, жерди жайгаштыруу жана кыймылсыз мүлккө укуктарды каттоо боюнча Каракол- Ак-Суу аймактык башкармалык тарабынан берилген карталарга ылайык, макулдук берилсин (2-барактагы карта тиркелет):

- Октябрь айыл өкмөтүнүн тургундары, 1996-жылдан бери, жер үлүштөрү катары пайдаланып келген, аянты 106,4 ганы түзгөн, аэропорттун түндүк-чыгыш тарабында жайгашкан сугат жерлерди;

- Каракол шаарынын түштүк-чыгыш тарабында жайгашкан, мурдагы ЗОС «Вилардын» жерлериндеги, аянты 31 ганы түзгөн, сугат жер тилкесин.

2. Каракол шаарынын мэриясы милдеттендирилсин:

- Каракол шаары менен Ак-суу районунун административдик чек арасынын сүрөттөмөсүн өзгөртүү үчүн, керектүү документтерди даярдоого;

- Бул токтомду Кыргыз Республикасынын Өкмөтүнүн Ысык-Көл областындагы ыйгарымдуу өкүлүнүн аппаратына, областын тиешелүү кызматтары жана Кыргыз Республикасынын Өкмөтү менен макулдашуу үчүн киргизүүгө.

3. Бул токтом Мамлекеттик ченемдик укуктук актыларынын реестрине киргизүү үчүн областтык юстиция башкармалыгына жиберилсин.

4. Токтом ММКларда жарыялансын.

5. Токтомдун аткарылышына көзөмөл жүргүзүү жерди пайдалануу, архитектура, курулуш, муниципалдык менчик боюнча туруктуу комиссиясына (К.Т.Калмакиев) жана Каракол шаарынын биринчи вице-мэри С.С.Өскөнбаевге жүктөлсүн.

Төрага

Э.А.Айсаракунов