# 15-берене. Өзүн-өзү жөнгө салуучу уюмдун иши жана өзүн-өзү жөнгө салуучу уюмга мүчөлүк (катышуу)

- Документ: [Товардык биржалар жөнүндө](https://aqlex.ai/kg/doc/230050152)
- Документтеги орду: 4-глава
- Толук аталышы: Кыргыз Республикасынын 2026-жылдын 3-августунун № 140 "Товардык биржалар жөнүндө" Мыйзамы
- Актынын түрү: Закон
- Номери: 140
- Кабыл алынган күнү: 03.08.2026
- Статусу: Күчүндө
- Редакциянын күнү: 03.08.2026
- Тексттин тили: кыргыз тили
- aqlex'теги барагы: <https://aqlex.ai/kg/doc/230050152/st-15>
- Расмий булак: <https://cbd.minjust.gov.kg/4-5826/edition/57624/ru>
- Башка тилдеги тексти (Markdown): <https://aqlex.ai/doc/230050152/st-15.md>

> Текст расмий булактын маалыматы боюнча 03.08.2026 редакциясында берилди. Бул юридикалык кеңеш эмес: юридикалык маанилүү аракеттер үчүн расмий жарыялоо менен салыштырыңыз.
>
> Кантип шилтеме берүү керек: Товардык биржалар жөнүндө, 15-берене (03.08.2026 редакциясы) - https://aqlex.ai/kg/doc/230050152/st-15

---

1. Өзүн-өзү жөнгө салуучу уюм өз ишин ушул Мыйзамга, өзүн-өзү жөнгө салуучу уюмдун уставына жана эрежелерине ылайык жүргүзөт.

2. Өзүн-өзү жөнгө салуучу уюмга мүчөлүк (катышуу) ыктыярдуу негизде жүзөгө ашырылат.

3. Өзүн-өзү жөнгө салуучу уюмдун мүчөлөрү (катышуучулары) болуп товардык биржалар, биржа брокерлери, биржа дилерлери жана маркет-мейкерлер саналат. Товардык биржалар, биржа брокерлери, биржа дилерлери жана маркет-мейкерлер бир гана өзүн-өзү жөнгө салуучу уюмдун мүчөсү (катышуучусу) боло алышат.

4. Өзүн-өзү жөнгө салуучу уюмдун мүчөлүгүнө (катышуучуларына) кабыл алуунун жана мүчөлүктү (катышууну) токтотуунун шарттары, тартиби өзүн-өзү жөнгө салуучу уюмдун уставында жана эрежелеринде аныкталат.

Өзүн-өзү жөнгө салуучу уюмдун эрежелери, ошондой эле аларга өзгөртүүлөр жана толуктоолор ыйгарым укуктуу мамлекеттик орган менен макулдашылууга тийиш. Өзүн-өзү жөнгө салуучу уюмдун мүчөлүгүнө (катышуучуларына) кабыл алуудан баш тартуу же мүчөлүктөн (катышуучулардан) чыгаруу жөнүндө чечим Кыргыз Республикасынын мыйзамдарында белгиленген тартипте даттанылуусу мүмкүн.

5. Өзүн-өзү жөнгө салуучу уюм өзүн-өзү жөнгө салуучу уюмдун мүчөлөрүнүн (катышуучуларынын) тизмегин өзүнүн интернет-ресурсуна жайгаштырууга милдеттүү.

Жетекчи алмашканда жана (же) мүчөлөрдүн (катышуучулардын) кызматкерлеринин курамы өзгөргөндө өзүн-өзү жөнгө салуучу уюм көрсөтүлгөн тизмекти 3 жумуш күндүн ичинде жаңылоого милдеттүү.

6. Өзүн-өзү жөнгө салуучу уюм тарабынан өз мүчөлөрүнүн (катышуучуларынын) ишин контролдоо Кыргыз Республикасынын мыйзамдарында белгиленген тартипте жана негиздерде жүзөгө ашырылат.

Мында өзүн-өзү жөнгө салуучу уюмдун мүчөлөрүн (катышуучуларын) текшерүүлөрдү уюштуруу жана өткөрүү тартиби өзүн-өзү жөнгө салуучу уюмдун ыйгарым укуктуу мамлекеттик орган менен макулдашылган эрежелеринде аныкталат.

7. Өзүн-өзү жөнгө салуучу уюмдагы мүчөлүк (катышуу) төмөнкүдөй негиздер боюнча токтотулат:

1) товардык биржанын биржа брокеринин, биржа дилеринин жана маркет-мейкеринин арызы боюнча;

2) мүчө (катышуучу) ушул Мыйзамдын жоболорун, биржалык соода эрежелерин, өзүн-өзү жөнгө салуучу уюмдун уставын жана эрежелерин бир нече жолу бузган учурда.

Ушул Мыйзамдын жоболорун, биржалык соода эрежелерин, өзүн-өзү жөнгө салуучу уюмдун уставын жана эрежелерин бузуулар аныкталгандыгына байланыштуу мүчөлүгү (катышуусу) токтотулган өзүн-өзү жөнгө салуучу уюмдун мүчөлөрү (катышуучулары), ошондой эле ушул Мыйзамдын жоболорун бузууга жол берген жетекчилер жана кызматкерлер 2 жылдан кем эмес мөөнөткө биржалык соодага катыша албайт.

8. Өзүн-өзү жөнгө салуучу уюмдардын реестринен мүчөлөрдү (катышуучуларды) чыгаруу өзүн-өзү жөнгө салуучу уюмдун уставында жана эрежелеринде белгиленген тартипте жана негиздерде жүзөгө ашырылат.

---

Мурунку берене: [14-берене](https://aqlex.ai/kg/doc/230050152/st-14)  
Кийинки берене: [16-берене](https://aqlex.ai/kg/doc/230050152/st-16)