Мамлекеттик ветеринардык көзөмөл тарабынан контролго алынуучу объекттерди мамлекеттик каттоо, эсепке алуу жана санариптик реестрди жүргүзүү тартиби жөнүндө жобо (Кыргыз Республикасынын Өкмөтүнүн токтому менен бекитилген)

2-тиркеме

Кыргыз Республикасынын Өкмөтүнүн 2017-жылдын 24-августундагы № 528 токтому менен бекитилген

Мамлекеттик ветеринардык көзөмөл тарабынан контролго алынуучу объекттерди мамлекеттик каттоо, эсепке алуу жана санариптик реестрди жүргүзүү тартиби жөнүндө ЖОБО (КР Министрлер Кабинетинин 2026-жылдын 13-майындагы № 339 токтомунун редакциясына ылайык)

Ушул Жобо ветеринардык-санитардык жана тамак-аш коопсуздугун камсыз кылуу, ошондой эле Кыргыз Республикасында мамлекеттик ветеринардык көзөмөлдү натыйжалуу уюштуруу максатында уюштуруу-укуктук формасына жана менчигинин түрүнө карабастан мамлекеттик ветеринардык көзөмөл тарабынан контролго алынуучу объекттерди (мындан ары - объекттер) мамлекеттик каттоо жана эсепке алуу тартибин жана бирдиктүү жол-жобону жүргүзүү шарттарын аныктайт.

1. Объекттерди мамлекеттик каттоо жана эсепке алуу ага уникалдуу идентификациялык номерди ыйгаруу менен мамлекеттик санариптик реестрге объект жөнүндө маалыматтарды киргизүү, ошондой эле катталууга тийиш эмес объекттер тууралуу маалыматтарды чогултуу жана белгилөө боюнча административдик жол-жоболорду билдирет.

2. Ушул Жободо колдонулуучу түшүнүктөр:

объектти мамлекеттик каттоо - объекттин белгиленген ветеринардык-санитардык талаптарга шайкештигин текшерүүнү (иликтөөнү), ал жөнүндө маалыматтарды мамлекеттик санариптик реестрге киргизүүнү жана уникалдуу идентификациялык номерди ыйгарууну камтыган административдик жол-жобо; мамлекеттик ветеринардык көзөмөл тарабынан контролго алынуучу объекти - юридикалык жакка, жеке ишкерге же дыйкан (фермердик) чарбага таандык болгон, анда жаныбарларды кармоого, контролго алынуучу товарларды (продукцияны) өндүрүүгө, кайра иштетүүгө, сактоого, ташууга жана сатууга байланышкан иш, ошондой эле ветеринария жаатындагы иш жүргүзүлгөн имараттар, курулуштар, курулмалар, өндүрүш аянтчалары, цехтер, участоктор, жайлар; объекттерди эсепке алуу - ветеринардык көзөмөлдөө боюнча ыйгарым укуктуу органдын аймактык бөлүмдөрүнүн мамлекеттик катталууга тийиш эмес объекттер жөнүндө маалыматтарды чогултуу жана белгилөө боюнча иши; объекттин идентификациялык номери - мамлекеттик каттоодо объектке ыйгарылуучу жана товарларды (продукцияны) көзөмөлдөө, контролдоо, байкоо жүргүзүү максатында аны бирдей мааниде идентификациялоо үчүн колдонулган белгиленген түзүмдөгү уникалдуу тамга-сандык код; арыз ээси - объектти мамлекеттик каттоону жүргүзүү үчүн кайрылган юридикалык жак, жеке ишкер же алардын ыйгарым укуктуу өкүлү; объекттин эсепке алуу иши - ыйгарым укуктуу органдын аймактык бөлүмдөрү тарабынан түзүлүүчү документтердин жана санариптик маалыматтардын жыйындысы; ветеринардык-санитардык корутунду - объекттин белгиленген ветеринардык-санитардык талаптарга шайкештигин ырастоочу документ, анын ичинде санариптик формадагы документ; санариптик реестрден көчүрмө - объектти мамлекеттик каттоо фактысын ырастоочу документ, анын ичинде санариптик формадагы документ.

3. Объектти мамлекеттик каттоо ветеринардык көзөмөлдөө боюнча ыйгарым укуктуу мамлекеттик орган (мындан ары - ыйгарым укуктуу орган) жана анын аймактык бөлүмдөрү тарабынан мамлекеттик санариптик реестрге (мындан ары - мамлекеттик санариптик реестр) мамлекеттик ветеринардык көзөмөл тарабынан контролго алынуучу объекттерди киргизүү аркылуу жүргүзүлөт.

4. Ишинин түрлөрү ушул Жобонун 1-тиркемесине ылайык тизмеге киргизилген объекттер мамлекеттик каттоодон өтүүгө тийиш.

5. Объектти мамлекеттик каттоо төмөнкүдөй административдик жол-жоболорду камтыйт:

- арыз ээсинин арызын жана документтерин кабыл алуу жана каттоо; мамлекеттик объекттер коштоочу кат менен кайрылат;

- берилген маалыматтардын толуктугун жана аныктыгын текшерүү;

- объекттин белгиленген ветеринардык-санитардык талаптарга шайкештигин документтик жана жеринде текшерүүнү жүргүзүү;

- ветеринардык-санитардык корутундуну тариздөө;

- объектти мамлекеттик каттоо же андан баш тартуу жөнүндө чечимди кабыл алуу;

- мамлекеттик санариптик реестрге маалыматтарды киргизүү жана идентификациялык номерди ыйгаруу;

- мамлекеттик санариптик реестрден көчүрмө берүү.

6. Объектти мамлекеттик каттоо анын иш жүзүндө жайгашкан жери боюнча жүргүзүлөт. Арыз ээси бир нече аймактык обочолонгон объекттерде иш жүргүзгөн учурда мамлекеттик каттоо мындай ар бир объектке карата жүргүзүлөт.

7. Арыз ээси тарабынан ушул Жобонун 2-тиркемесине ылайык формада объектти мамлекеттик каттоо жөнүндө арыз төмөнкү ыкмалардын бири менен берилет:

- арыз ээсинин санариптик кол тамгасы коюлган санариптик документ түрүндө;

- кагаз жүзүндөгү документти берүү менен ыйгарым укуктуу органга же анын аймактык бөлүмүнө жеке кайрылуу аркылуу.

8. Зарыл болгон документтердин тизмеги төмөнкүлөрдү камтыйт:

- юридикалык жак үчүн: мамлекеттик каттоо (кайра каттоо) жөнүндө күбөлүктүн көчүрмөсү, уставдын (жобонун) көчүрмөсү;

- жеке ишкер үчүн: арыз ээси тарабынан күбөлөндүрүлгөн жеке ишкер катары мамлекеттик каттоодон өткөндүгү жөнүндө күбөлүктүн көчүрмөсү; ким экендигин күбөлөндүргөн документтин көчүрмөсү;

- кыймылсыз мүлктүн турак эмес объекттерин пайдалануу укугун ырастаган документтер (менчик укугу жөнүндө күбөлүк, ижара, субижара келишими);

- өндүрүштүк, кампа, көмөкчү жана санитардык-тиричилик жайларды көрсөтүү менен объекттин схемасы (планы);

- ХАССПнын принциптерине негизделген өндүрүштүк контролдоо программасы (Евразия экономикалык бирлигинин техникалык регламенттерине ылайык иши көрсөтүлгөн принциптердин негизинде милдеттүү контролдонууга тийиш болгон объекттер үчүн);

9. Ыйгарым укуктуу орган иштин түрлөрү боюнча дифференцияланган, арызга тиркелүүчү документтердин кошумча тизмегин бекитүүгө укуктуу. Аталган тизмек ыйгарым укуктуу органдын сайтына расмий жарыяланууга тийиш.

10. Объектти текшерүүнүн жыйынтыгы боюнча аймактык бөлүм төмөнкү чечимдердин бирин кабыл алат:

- объект белгиленген талаптарга шайкеш келсе - объектке идентификациялык номерди ыйгаруу жана аны мамлекеттик санариптик реестрге киргизүү үчүн ветеринардык-санитардык корутундуну кошкондо, документтерди тиркөө менен ыйгарым укуктуу органга суроо-талапты жиберет;

- бузуулар аныкталса - арыз ээсине аларды жоюу жөнүндө жазма буйрукту берет. Жазма буйрукта белгиленген бузууларды жоюу мөөнөтү 20 календардык күндөн ашпайт.

11. Жазма буйрукта көрсөтүлгөн бузууларды жоюуга убакытты кошкондо, аймактык бөлүм тарабынан арызды кароонун жалпы мөөнөтү арыз келип түшкөн күндөн тартып 30 календардык күндөн ашпоого тийиш.

12. Ыйгарым укуктуу орган аймактык бөлүмдөн суроо-талап келип түшкөн датадан тартып 5 жумуш күндүн ичинде идентификациялык номерди ыйгаруу жана объект жөнүндө маалыматтарды мамлекеттик санариптик реестрге киргизүү тууралуу чечим кабыл алат же болбосо негиздүү баш тартууну чыгарат.

13. Мамлекеттик каттоодон баш тартууга төмөнкү учурларда жол берилет:

- берилген документтерде анык эмес маалыматтар же алардын талаптарга шайкеш келбегендиги аныкталса;

- текшерүүнүн жыйынтыгы боюнча берилген жазма буйрукту белгиленген мөөнөттө аткарбоо;

- объекттин калктын жана/же жаныбарлардын өмүрүнө жана ден соолугуна түздөн-түз коркунуч келтирүүчү ветеринардык-санитардык талаптарга шайкеш келбегендиги.

14. Мамлекеттик каттоо, мамлекеттик каттоодон баш тартуу жана мамлекеттик каттоону токтотуу жөнүндө чечимдер ыйгарым укуктуу органдын жетекчисинин буйругу менен таризделет.

15. Каттоодон баш тартуу арыз ээсинин баш тартууга негиз болгон себептерди жойгондон кийин кайра кайрылуусуна тоскоолдук жаратпайт.

16. Объектти мамлекеттик санариптик реестрден чыгаруу ыйгарым укуктуу орган тарабынан 14 жумуш күндүн ичинде төмөнкүлөрдүн негизинде жүргүзүлөт:

- объекттин ээсинин ишти токтотуу жөнүндө арызынын;

- юридикалык жактын жоюлгандыгын же жеке ишкердин ишти токтоткондугун ырастоочу документтин;

- мыйзамдуу күчүнө кирген соттун чечиминин;

- калктын жана/же жаныбарлардын өмүрүнө жана ден соолугуна зыян келтирүү коркунучун жараткан ветеринардык-санитардык талаптарды системалуу түрдө (календардык жыл ичинде эки жана андан көп жолу) бузгандыгына байланыштуу каттоону токтотуу жөнүндө ыйгарым укуктуу органдын буйругунун.

17. Объекттерди мамлекеттик эсепке алуу ыйгарым укуктуу органдын аймактык бөлүмдөрү тарабынан мамлекеттик каттоого алынууга тийиш болгон объекттердин тизмегине киргизилбеген объекттерге карата жүргүзүлөт.

18. Коомдук тамактануу объекттери, жаныбарлардан алынуучу товарларды (продукцияны) сатуучу дүң жана чекене базарлар, эт сатуу пункттары жана эт павильондору, ветеринардык-санитардык экспертиза жүргүзүүчү лабораториялар, мал көмүү жайлары, сибир жарасынын очоктору, Беккари чуңкурлары, ветеринардык клиникалар жана дарыканалар эсепке алынууга тийиш.

19. Объекттерди эсепке алуу тартиби, анын ичинде каттала турган маалыматтардын формасы жана тизмеги ыйгарым укуктуу орган тарабынан бекитилет.

20. Мамлекеттик ветеринардык көзөмөл тарабынан контролго алынуучу объекттердин мамлекеттик санариптик реестри катталган объекттер жөнүндө түзүмдөштүрүлгөн маалыматтардын жыйындысын камтыган бирдиктүү автоматташтырылган маалыматтык системаны билдирет. Мамлекеттик санариптик реестр электрондук формада жүргүзүлөт жана товарларды (продукцияны) идентификациялоо, көзөмөлдөө, байкоого алууну камсыз кылуу үчүн объекттер жөнүндө маалыматтарды чогултууну, сактоону, иштеп чыгууну жана берүүнү камсыз кылат.

21. Мамлекеттик санариптик реестр ушул Жобонун 4-тиркемесине ылайык объект жөнүндө төмөнкү негизги маалыматтарды камтыйт:

- юридикалык жактын толук жана кыскартылган (эгерде бар болсо) аталышы же жеке ишкердин фамилиясы, аты, атасынын аты;

- объекттин идентификациялык номери;

- объекттин жайгашкан жери (иш жүзүндөгү дареги);

- тиешелүү коддорун көрсөтүү менен ишке ашырылуучу иштин түрлөрү;

- мамлекеттик каттоонун жана идентификациялык номерди ыйгаруунун датасы;

- объекттин мамлекеттик санариптик реестрдеги статусу.

22. Мамлекеттик санариптик реестрде камтылган маалыматтар, жеткиликтүүлүгү чектелген маалыматтарды кошпогондо, жалпыга жеткиликтүү болуп саналат жана ыйгарым укуктуу органдын расмий сайтында жайгаштырылууга тийиш.

23. Ыйгарым укуктуу орган мамлекеттик санариптик реестрде камтылган маалыматтардын аныктыгын, актуалдуулугун жана толуктугун камсыз кылат.

24. Мамлекеттик санариптик реестрдин маалыматтарына өзгөртүүлөрдү киргизүү ыйгарым укуктуу орган тарабынан объекттин ээсинин арызынын жана ырастоочу документтеринин негизинде арыз келип түшкөн күндөн тартып 5 жумуш күндүн ичинде ишке ашырылат.

25. Евразия экономикалык бирлигине мүчө мамлекеттердин ыйгарым укуктуу органдарынан жана башка чет мамлекеттерден келип түшкөн расмий маалыматтардын негизинде мамлекеттик санариптик реестрге объекттин статусу жөнүндө төмөнкүдөй маалыматтар киргизилет:

- чектөөсү жок;

- убактылуу чектелген;

- күчөтүлгөн лабораториялык контролдоо;

- эскертүү;

- атайын талаптар.

26. Мамлекеттик санариптик реестрден көчүрмө арыз ээсине же башка кызыкдар адамга ишеним каттын негизинде жана/же суроо-талап боюнча суроо-талап катталган күндөн тартып 3 жумуш күндүн ичинде берилет. Мамлекеттик санариптик реестрден көчүрмөнүн формасы ушул Жобонун 3-тиркемесинде келтирилген.

27. Идентификациялык номер объектке ыйгарым укуктуу орган тарабынан мамлекеттик каттоодо бир жолу ыйгарылат жана төмөнкүдөй түзүмгө ээ:

- KG - Х.ХХ - XX / Fx - ХХХХ [Ех], мында:

- KG - өлкөнүн коду;

- X - облустун литердик коду;

- ХХ-ХХ - райондун же шаардын коду;

- Fх - иштин түрүнүн коду;

- ХХХХ - аймактык бөлүмдөгү объекттин катар номери;

- [Ех] - экспорттоочу объекттер үчүн кошумча символ. Мисалы: KG-B.05-51/F1-0001/Ex.

28. Объекттин жайгашкан ордун башка административдик-аймактык бирдикке (облуска, районго) өзгөртүү же иштин негизги түрүн башка код менен түргө өзгөртүү учурларын кошпогондо, идентификациялык номерди өзгөртүүгө жол берилбейт. Аталган учурларда объектке баштапкы каттоо үчүн белгиленген тартипте жаңы идентификациялык номер ыйгарылат, ал эми мурда ыйгарылган номер жокко чыгарылат.

29. Идентификациялык номер мөөнөтсүз болуп саналат жана объекттин ишинин бүткүл мезгилинде күчүндө болот.

30. Юридикалык жак же жеке ишкер ыйгарылган идентификациялык номерди контролдоого алынган товарларга (продукцияга) карата товардык-коштоочу документтерде көрсөтүүгө милдеттүү.

31. Мамлекеттик санариптик реестрге киргизүү үчүн зарыл болгон маалыматтарды бербегендиги же өз убагында бербегендиги, ошондой эле анык эмес маалыматтарды бергендиги үчүн арыз ээси, жеке жана юридикалык жактар Кыргыз Республикасынын Укук бузуулар жөнүндө кодексине ылайык жоопкерчилик тартат.

32. Ушул Жобонун талаптарын бузгандыгы үчүн каттоочу орган Кыргыз Республикасынын мыйзамдарына ылайык жоопкерчилик тартат.

33. Каттоочу органдын чечимине даттануу "Административдик иштин негиздери жана административдик жол-жоболор жөнүндө" Кыргыз Республикасынын Мыйзамына ылайык жүргүзүлөт.

Мамлекеттик ветеринардык көзөмөл тарабынан контролго алынуучу объекттерди мамлекеттик каттоо, эсепке алуу жана санариптик реестрди жүргүзүү тартиби жөнүндө жобого 1-тиркеме

Райондордун жана шаарлардын коддору

№

Коду

Аталышы

1

01-01

Бишкек шаары

2

08-01

Токмок шаары

3

08-80

Кемин району

4

08-81

Чүй району

5

08-82

Ысык-Ата району

6

08-83

Аламүдүн району

7

08-84

Сокулук району

8

08-85

Москва району

9

08-86

Жайыл району

10

08-87

Панфилов району

11

09-01

Балыкчы шаары

12

09-02

Каракол шаары

13

09-90

Ак-Суу району

14

09-91

Тоң району

15

09-92

Жети-Өгүз району

16

09-93

Түп району

17

09-94

Ысык-Көл району

18

07-01

Талас шаары

19

07-70

Манас району

20

07-71

Айтматов району

21

07-72

Бакай-Ата району

22

07-73

Талас району

23

05-01

Нарын шаары

24

05-50

Нарын району

25

05-51

Ат-Башы району

26

05-52

Ак-Талаа району

27

05-53

Жумгал району

28

05-54

Кочкор району

29

06-01

Ош шаары

30

06-60

Ноокат району

31

06-61

Алай району

34

06-62

Чоң-Алай району

35

06-63

Араван району

36

06-64

Кара-Суу району

37

06-65

Кара-Кулжа району

38

06-66

Өзгөн району

39

03-01

Баткен шаары

40

03-02

Кызыл-Кыя шаары

41

03-03

Сүлүктү шаары

42

03-30

Баткен району

43

03-31

Лейлек району

44

03-32

Кадамжай району

45

04-01

Манас шаары

46

04-02

Кара-Көл шаары

47

04-03

Майлуу-Суу шаары

48

04-04

Таш-Көмүр шаары

49

04-40

Сузак району

50

04-41

Базар-Коргон району

51

04-42

Ноокен району

52

04-43

Тогуз-Торо району

53

04-44

Аксы району

54

04-45

Ала-Бука району

55

04-46

Чаткал району

56

04-47

Токтогул району

Облустардын литердик коддору

№

Литердик код

Аталышы

1

Ch

Чүй облусу

2

I

Ысык-Көл облусу

3

N

Нарын облусу

4

Т

Талас облусу

5

О

Ош облусу

6

J

Жалал-Абад облусу

7

В

Баткен облусу

Иштин түрлөрүнүн коддору

№

Иштин түрү

Коду

1

Этти кайра иштетүү ишканалары

F1

2

Мал союучу пункттар (мал союучу жайлар)

F2

3

Терини жана жүндү кайра иштетүү объекттери

F3

4

Канаттууларды кайра иштетүү ишканалары

F4

5

Балык чарбасы жана балыкты кайра иштетүү ишканалары

F5

6

Сүттү кайра иштетүү ишканалары

F6

7

Чийки сүттү, чийки каймакты жана чийки майсыз сүттү кабыл алуу пункттары

F7

8

Жаныбарлардан алынуучу азыктарды жана чийки заттарды сактоо жана сатуу объекттери

F8

9

Ич эттерди жана жаныбарлардан алынуучу техникалык чийки заттарды кабыл алуу, ташып келүү, сактоо жана сатуу объекттери

F9

10

Балды жана балчылык азыктарын кайра иштетүү объекттери

F10

11

Айыл чарба жаныбарларын асылдандыруу, өстүрүү, багуу жана сатуу менен алектенүүчү объекттер

F11

12

Тоюттарды жана тоют кошумчаларын өндүрүү, сактоо жана сатуу объекттери

F12

13

Ветеринардык дары каражаттарын жана препараттарды өндүрүү, сактоо жана сатуу объекттери

F13

14

Жапайы жана экзотикалык жаныбарларды кармоо, асылдандыруу жана сатуу объекттери

F14

15

Мал базарлары

F15

16

Аңчылык продукциясынын жүгүртүү объекттери (аңчылык трофейлери, каракчылар, консервацияланган үлгүлөр)

F16

17

Аарыларды (аары пакеттерин жана аары үй-бүлөлөрүн) асылдандыруу, багуу жана сатуу объекттери

F17

18

Айыл чарба куштарын асылдандыруу, өстүрүү, багуу жана сатуу объекттери

F18

Мамлекеттик ветеринардык көзөмөл тарабынан контролго алынуучу объекттерди мамлекеттик каттоо, эсепке алуу жана санариптик реестрди жүргүзүү тартиби жөнүндө жобого 2-тиркеме

Форма

Мамлекеттик катталууга тийиш болгон Кыргыз Республикасынын аймагында мамлекеттик ветеринардык көзөмөл тарабынан контролго алынуучу объекттерди мамлекеттик каттоо жөнүндө АРЫЗ

Арыз ээси: ________________________________________________________________________ __________________________________________________________________________________

(фамилиясы, аты, атасынын аты, жашаган жери)

__________________________________________________________________________________

жеке адамдын инсандыгын күбөлөндүрүүчү документтер

__________________________________________________________________________________

төлөөчүнүн эсептик номери, юридикалык жактын аталышы

__________________________________________________________________________________

жана жайгашкан жери, телефону)

контролго алынуучу мамлекеттик ветеринардык көзөмөл объектин каттоону өтүнөм: __________ ___________________________________________________________________________________ ______________________________________________________ (объекттин иш жүзүндөгү дареги) Объекттин жүзөгө ашырылуучу процесстеринин тизмеги: __________________________________ __________________________________________________________________________________ Ушул арызда камтылган маалыматтардын аныктыгын ырастайм.

_________________________________________ _____________________________ (арыз ээсинин же анын өкүлүнүн колу) (аты-жөнү)

М.О.

___________________________

(датасы)

Мамлекеттик ветеринардык көзөмөл тарабынан контролго алынуучу объекттерди мамлекеттик каттоо, эсепке алуу жана санариптик реестрди жүргүзүү тартиби жөнүндө жобого 3-тиркеме

Форма

Мамлекеттик ветеринардык көзөмөл тарабынан контролго алынуучу объекттердин санариптик реестринен КӨЧҮРМӨ

Кыргыз Республикасынын Суу ресурстары, айыл чарба жана кайра иштетүү өнөр жайы министрлигине караштуу Ветеринардык жана фитосанитардык көзөмөл кызматы

__________________________________________________________________________________

(аймактык бөлүмдүн аталышы)

_____________________________________ ___________________________________________

(датасы) (номери)

__________________________________________________________________________________ (мамлекеттик каттоого тийиш болгон, объекттердин санариптик реестрине киргизилүүчү идентификациялык номер) __________________________________________________________________________________ __________________________________________________________________________________ (аталышы жана жайгашкан жери (юридикалык жак үчүн), фамилиясы, аты, атасынын аты, ким экендигин күбөлөндүрүүчү документтин маалыматтары (жеке жак үчүн) __________________________________________________________________________________ __________________________________________________________________________________

(объекттин иш жүзүндөгү дареги)

__________________________________________________________________________________ __________________________________________________________________________________

(объекттин процесстеринин тизмеги)

__________________________________ ________________________________

(кызматы) (Аты-жөнү) (колу)

Мамлекеттик ветеринардык көзөмөл тарабынан контролго алынуучу объекттерди мамлекеттик каттоо, эсепке алуу жана санариптик реестрди жүргүзүү тартиби жөнүндө жобого 4-тиркеме

Форма

Мамлекеттик катталууга тийиш болгон, Кыргыз Республикасынын аймагында мамлекеттик ветеринардык көзөмөл тарабынан контролго алынуучу объекттердин санариптик РЕЕСТРИ

№

Аталышы жана юридикалык дареги (юридикалык жак үчүн); аты-жөнү, каттоо дареги, кимдигин ырастаган документтин маалыматтары (жеке жак үчүн)

Объекттин идентификациялык номери

Объекттин иш жүзүндөгү дареги (юридикалык жана жеке жактар үчүн)

Текшерүү жүргүзгөн аймактык бөлүмдүн аталышы жана жайгашкан орду

Ишинин түрү

Объекттерди реестрге киргизүү үчүн негиз (буйрук жана ветеринардык-санитардык корутунду)

Объекттин статусу