Бишкек шаардык кеңешинин «Бишкек шаардык кеңешинин 2018-жылдын 31-майындагы № 67 „Муниципалдык турак жай фонду, аны берүү тартиби жана муниципалдык турак жай фондунун турак жайы үчүн акы өлчөмүн жана акы түзүмүн аныктоо жөнүндө“ токтомуна өзгөртүүлөрдү киргизүү тууралуу» токтому

БИШКЕК ШААРДЫК КЕҢЕШИНИН ТОКТОМУ

2026-жылдын 31-марты № 86 Бишкек шаардык кеңешинин 2018-жылдын 31-майындагы № 67 «Муниципалдык турак жай фонду, аны берүү тартиби жана муниципалдык турак жай фондунун турак жайы үчүн акы өлчөмүн жана акы түзүмүн аныктоо жөнүндө» токтомуна өзгөртүүлөрдү киргизүү тууралуу

Бишкек шаарынын муниципалдык менчик объекттерин сарамжалдуу пайдалануу, Бишкек шаарынын муниципалдык турак жай фондунун турак жайларын турак жай шарттарын жакшыртууга муктаж жарандарга, ошондой эле Бишкек шаарынын жергиликтүү өз алдынча башкаруу органынын уюму, ишканасы же мекемеси менен эмгек мамиледе болгон жана кызматтык турак жай алууга муктаж жарандарга берүүнүн тартибин өркүндөтүү максатында, Кыргыз Республикасынын Турак жай кодексинин 38, 39, 56 жана 57-беренелерине, «Мүлккө муниципалдык менчик жөнүндө» Кыргыз Республикасынын Мыйзамынын 19-беренесине, «Жергиликтүү мамлекеттик администрация жана жергиликтүү өз алдынча башкаруу органдары жөнүндө» Кыргыз Республикасынын Мыйзамынын 34-беренесине ылайык, Бишкек шаардык кеңеши,

ТОКТОМ КЫЛАТ:

1. Бишкек шаардык кеңешинин 2018-жылдын 31-майындагы № 67 «Муниципалдык турак жай фонду, аны берүү тартиби жана муниципалдык турак жай фондунун турак жайы үчүн акы өлчөмүн жана акы түзүмүн аныктоо жөнүндө» токтомуна төмөнкүдөй өзгөртүүлөр киргизилсин:

1) 2-пункттун 1-пунктчасы төмөнкү мазмундагы абзац менен толукталсын:

«муниципалдык турак жай фондун пайдалануу жана берүү тартиби жөнүндө жобону иштеп чыгуу жана актуалдаштыруу;»;

2-пункттун 2-пунктчасы алынып салынсын;

2-пункт төмөнкүдөй мазмундагы 4-пунктча менен толукталсын: «4) Кыргыз Республикасынын турак жай мыйзамдарында каралган тартипте кызматтык турак жайларда жашап жаткан муниципалдык турак жай фондунун турак жайларын пайдалануучулар менен турак жайды мүлктүк ижаралоо келишимдерин түзсүн.»;

2) Жогоруда көрсөтүлгөн токтом менен бекитилген Муниципалдык турак жай фондун пайдалануу жана берүү тартиби жөнүндө жободо:

1-пунктта: биринчи абзац төмөнкүдөй редакцияда баяндалсын: «1. Ушул Жобо Кыргыз Республикасынын Турак жай кодексине ылайык иштелип чыкты жана төмөнкүдөй бирдиктүү тартипти белгилейт: турак жай шарттарын жакшыртууга муктаж жарандарды эсепке алуу; муниципалдык турак жай фондунун турак жайларын акы төлөө менен мөөнөттүү пайдаланууга берүү; муниципалдык турак жай фондунун турак жайларын мөөнөттүү акы төлөнүүчү пайдаланууга берүү; кызматтык турак жайларды берүү; муниципалдык турак жай фондунун турак жайларын менчиктештирүү.»; үчүнчү абзац төмөнкүдөй редакцияда баяндалсын: «муниципалдык турак жай фонду - муниципалдык менчикте турган жана ушул Жобо менен аныкталган тартипте турак жай шарттарын жакшыртууга муктаж Кыргыз Республикасынын жарандарына берилүүчү турак жайлардын жыйындысы;»; төртүнчү абзацтагы «түзүмдүк» деген сөз алып салынсын; төмөнкү мазмундагы жетинчи жана сегизинчи абзацтар менен толукталсын: «Турак жай шарттарын жакшыртууга муктаж жарандарды эсепке алуу боюнча комиссия – Бишкек шаарынын аймагында жашаган жана турак жай шарттарын жакшыртууга муктаж жарандарды Кыргыз Республикасынын мыйзамдары тарабынан белгиленген негиздер боюнча эсепке коюу жана эсепке алуу үчүн ушул Жобого ылайык жарандарды эсепке алуу маселелери боюнча ыйгарым укуктуу орган алдында түзүлүүчү коллегиалдуу орган; муниципалдык турак жай фондун башкаруу маселелери боюнча комиссия – муниципалдык турак жай фондунун турак жайларын берүү, башкаруу жана менчиктештирүү менен байланышкан маселелерди чечүү үчүн ушул Жобого ылайык түзүлүүчү коллегиалдуу орган.»;

3-пункттагы «буйругу» деген сөз «чечими» деген сөз менен алмаштырылсын;

5-пункт төмөнкүдөй редакцияда баяндалсын: «Муниципалдык турак жай фондунун турак жайларын берүү ыйгарым укуктуу орган тарабынан кезектүүлүккө ылайык төмөнкүдөй тартипте жүзөгө ашырылат: Бишкек шаарынын ар бир администрациялык районунда жашаган жери боюнча турак жай шарттарын жакшыртууга муктаждардын эсебинде турган адамдарга бирден турак жай; иштеген жери боюнча эсепте турган жана турак жай шарттарын жакшыртууга муктаж адамга бир кызматтык турак жай.»;

7-пункт төмөнкүдөй редакцияда баяндалсын: «7. Кыргыз Республикасынын мыйзамдары тарабынан белгиленген негиздер боюнча жарандар турак жай шарттарын жакшыртууга муктаждар деп таанылат.»;

10-пункттагы «өздүк» деген сөз «жеке» деген сөз менен алмаштырылсын;

11-пункттун үчүнчү абзацы төмөнкүдөй редакцияда баяндалсын: «Санарип аймак» автоматташтырылган маалыматтык тутуму аркылуу Бишкек шаарынын жергиликтүү өз алдынча башкаруу органдары тарабынан берилген үй-бүлөсүнүн курамы жана иш жүзүндө жашаган жери жөнүндө маалым каттар;»;

12-пункт төмөнкүдөй мазмундагы үчүнчү абзац менен толукталсын: «Турак жай шарттарын жакшыртууга муктаж жарандарды жашаган жери боюнча эсепке алуу ушул Жобонун 3-пунктуна ылайык иш жүргүзгөн турак жай шарттарын жакшыртууга муктаж жарандарды эсепке алуу боюнча комиссиянын корутундусу бар болгон учурда жарандарды эсепке алуу маселелери боюнча ыйгарым укуктуу органдардын чечими менен жүргүзүлөт.»;

Жобо төмөнкүдөй мазмундагы 161-пункт менен толукталсын: «161. Иштеген жери боюнча турак жай шарттарын жакшыртууга муктаж жарандарды эсепке алуу ушул Жобонун 241-пунктуна ылайык түзүлгөн муниципалдык турак жай фондун башкаруу маселелери боюнча комиссиясынын корутундусунун негизинде ыйгарым укуктуу орган тарабынан жүзөгө ашырылат. Иштеген жери боюнча эсепке алуу үчүн Бишкек шаарынын жергиликтүү өз алдынча башкаруу органдарынын уюмунун, ишканасынын же мекемесинин администрациясы жана кесиптик бирлик комитети ыйгарым укуктуу органга турак жай шарттарын жакшыртууга муктаж адамга кызматтык турак жайын берүү жөнүндө тийиштүү өтүнүч катын ушул Жобонун 11-пунктунда көрсөтүлгөн документтерди тиркөө менен берет, ал муниципалдык турак жай фондун башкаруу маселелери боюнча комиссиясы тарабынан каралууга тийиш.»;

17-пункт төмөнкүдөй мазмундагы 7-пунктча менен толукталсын: «7) «Санарип аймак» автоматташтырылган маалыматтык тутуму аркылуу Бишкек шаарынын жергиликтүү өз алдынча башкаруу органдары тарабынан берилген үй-бүлөсүнүн курамы жана иш жүзүндө жашаган жери жөнүндө маалым каттарды бербесе.»;

22-пункт төмөнкүдөй редакцияда баяндалсын: «22. Турак жай шарттарын жакшыртууга муктаж жарандарды эсепке алуу боюнча комиссия тарабынан турак жай шарттарын жакшыртууга муктаж жарандарга турак жайларды берүүнүн кезектүүлүгүн тактоо жыл сайын жүргүзүлөт. Зарыл болгон учурда турак жай шарттарын жакшыртууга муктаждардын эсебине туруу үчүн жарандар тарабынан берилген документтерде камтылган маалыматтардын толуктугу жана аныктыгы текшерилет.»;

Жобо төмөнкүдөй мазмундагы 221-пункт менен толукталсын: «221. Жашаган жери боюнча эсепке алынган турак жай шарттарын жакшыртууга муктаж жарандардын кезектүүлүгү Жарандарды эсепке алуу китебинде катталган эсепке алынгандыгы жөнүндө жазылган датанын негизинде жарандарды эсепке алуу маселелери боюнча ыйгарым укуктуу органдар тарабынан аныкталат. Иштеген жери боюнча эсепке алынган турак жай шарттарын жакшыртууга муктаж жарандардын кезектүүлүгү муниципалдык турак жай фондун башкаруу боюнча комиссиянын корутундусунун негизинде ыйгарым укуктуу орган тарабынан аныкталат, ал Бишкек шаарынын жергиликтүү өз алдынча башкаруу органдарынын уюмунун, ишканасынын же мекемесинин администрациясынын жана кесиптик бирлик комитетинин турак жай шарттарын жакшыртууга муктаж адамга кызматтык турак жай берүү жөнүндө өтүнүч катынын ыйгарым укуктуу органда катталган датасын эске алат.»;

24-пункт төмөнкүдөй редакцияда баяндалсын: «24. Муниципалдык турак жай фондунун турак жайын берүү ыйгарым укуктуу орган тарабынан Бишкек шаарынын мэриясынын чечими боюнча акы төлөө негизинде он жылдык мөөнөткө мөөнөттүү пайдаланууга берүү менен жүзөгө ашырылат. Бишкек шаарынын мэриясынын чечими муниципалдык турак жай фондун башкаруу маселелери боюнча комиссиянын корутундусуна ылайык киргизилген ыйгарым укуктуу органдын сунушунун негизинде кабыл алынат.»;

Жобо төмөнкүдөй мазмундагы 241, 242-пункттар менен толукталсын: «241. Муниципалдык турак жай фондунун турак жайларын акы төлөп мөөнөттүү пайдаланууга берүүгө байланышкан маселелерди чечүү үчүн ыйгарым укуктуу органга караштуу муниципалдык турак жай фондун башкаруу маселелери боюнча комиссия түзүлөт. Муниципалдык турак жай фондун башкаруу маселелери боюнча комиссиянын курамы жана иш тартиби Бишкек шаарынын мэриясынын тийиштүү чечими менен бекитилет. Муниципалдык турак жай фондун башкаруу маселелери боюнча комиссия Кыргыз Республикасынын мыйзамдарына ылайык төмөнкү маселелерди карайт жана корутунду чыгарат: иштеген жери боюнча эсепке алынган турак жай шарттарын жакшыртууга муктаж жарандарды эсепке алуу жана кезектүүлүгүн аныктоо; жашаган жери боюнча эсепке алынган адамдарга муниципалдык турак жай фондунун турак жайларын акы төлөө менен мөөнөттүү пайдаланууга берүү; иштеген жери боюнча эсепте турган адамдарга муниципалдык турак жай фондунун турак жайларын кызматтык турак жай катары акы төлөө менен мөөнөттүү пайдаланууга берүү; муниципалдык турак жай фондунун турак жайларын кызматтык жайлардын катарына киргизүү; муниципалдык турак жай фондунун турак жайларын кызматтык жайлардын катарынан чыгаруу; муниципалдык турак жай фондунун турак жайларын менчиктештирүү.»;

242. Муниципалдык турак жай фондун башкаруу маселелери боюнча комиссия жарандарды эсепке алуу маселелери боюнча ыйгарым укуктуу органдар, ошондой эле Бишкек шаарынын жергиликтүү өз алдынча башкаруу органдарынын уюмунун, ишканасынын же мекемесинин администрациясы жана кесиптик бирлик комитети тарабынан берилген документтердин жана маалыматтардын толуктугун жана Кыргыз Республикасынын мыйзамдарынын талаптарына ылайык келишин карайт.»;

30-пункт төмөнкүдөй редакцияда баяндалсын: «30. Муниципалдык турак жай фондунун үйлөрүндө бошогон (кароосуз калган, ээсиз калган) турак жайлар ушул Жобо жана Кыргыз Республикасынын Турак жай кодекси тарабынан аныкталган тартипте ыйгарым укуктуу орган тарабынан ушул Жобонун 5-пунктуна ылайык Бишкек шаарынын мэриясынын чечиминин негизинде турак жай шарттарын жакшыртууга муктаж адамдарга акы төлөө менен мөөнөттүү пайдаланууга берилет.»;

32-пункт төмөнкүдөй редакциядагы баяндалсын: «32.Муниципалдык турак жай фондунун турак жайын берүү ыйгарым укуктуу органдар тарабынан Бишкек шаарынын мэриясынын чечиминин негизинде жүргүзүлөт. Эгерде мурда белгилүү болбогон жана жаранга муниципалдык турак жай фондунун турак жайын берүү жөнүндө чечим кабыл алууга таасир тийгизиши мүмкүн болгон жагдайлар аныкталса, турак жайды мүлктүк жалдоо келишими түзүлгөнгө чейин муниципалдык турак жай фондунан турак жайды берүү жөнүндө чечим Бишкек шаарынын мэриясы тарабынан кайра каралышы мүмкүн.»;

34-пункт төмөнкүдөй редакцияда баяндалсын: «34. Муниципалдык турак жай фондунун турак жайы, бул турак жай кызматтык турак жай катары акы төлөө менен мөөнөттүү пайдаланууга бериле тургандыгы жөнүндө Бишкек шаарынын мэриясынын тийиштүү чечимин көрсөтүү жолу менен муниципалдык турак жай фондун берүү боюнча комиссиянын корутундусунун негизинде киргизилген ыйгарым укуктуу органдын сунушу боюнча кызматтык турак жайдын катарына киргизилет.»;

341-пункт төмөнкүдөй редакцияда баяндалсын: «341. Кызматтык турак жай Кыргыз Республикасынын 2013-жылдын 9-июлундагы № 117 Турак жай кодекси күчүнө киргенге чейин берилген болсо, муниципалдык турак жай фондун башкаруу маселелери боюнча комиссиянын корутундусунун негизинде киргизилген ыйгарым укуктуу органдын сунушу боюнча Бишкек шаарынын мэриясынын чечими менен кызматтык турак жайдын катарынан төмөнкү учурларда чыгарылышы мүмкүн: муниципалдык турак жай фондунун турак жайын спорт, илим жана маданият жаатындагы жетишкендиктери үчүн кызматтык турак жай катары алган адам жашаган учурда; муниципалдык турак жай фондунун турак жайын расмий жазуу жүзүндөгү күбөлүктөр (тастыктама) боюнча кызматтык турак жай катары алган адам жашаган учурда; муниципалдык турак жай фондунун турак жайын кызматтык турак жай катары алган жана Бишкек шаарынын мамлекеттик органдарында, ошондой эле муниципалдык уюмдарында, ишканаларында же мекемелеринде жыйырма жылдан кем эмес жалпы эмгек стажы бар адам жашаган учурда; муниципалдык турак жай фондунун турак жайын турак жай шарттарын жакшыртууга муктаж болгондордун жалпы кезектүүлүк тартибинде кызматтык турак жай катары алган адам жашаган учурда.»;

342-пункт төмөнкү мазмунда толукталсын; «342. Кызматтык турак жай муниципалдык турак жай фондун башкаруу маселелери боюнча комиссиянын корутундусунун негизинде киргизилген ыйгарым укуктуу органдын сунушу боюнча Бишкек шаарынын мэриясынын чечими менен кызматтык турак жайдын катарынан төмөнкү учурларда чыгарылышы мүмкүн: кызматтык турак жайда Бишкек шаарынын жергиликтүү өз алдынча башкаруу органынын уюму, ишканасы же мекемеси менен акыркы жыйырма жылдан бери үзгүлтүксүз эмгектик мамиледе турган адам жашаган учурда; кызматтык турак жайда кызматтык турак жайды алгандан кийин пенсия курагына жеткен жана Бишкек шаарынын жергиликтүү өз алдынча башкаруу органынын уюмдарында, ишканаларында же мекемелеринде он беш жылдан кем эмес жалпы эмгек стажы бар адам жашаган учурда; каза болгон учурда жергиликтүү өз алдынча башкаруу органынын уюмдары, ишканалары же мекемелери менен акыркы он беш жыл ичинде үзгүлтүксүз эмгектик мамиледе турган адамдын үй-бүлө мүчөлөрү аны менен бирге жашаган учурда, үй-бүлө мүчөлөрүнүн менчигинде башка турак жайы болбогон же каза болгон адамдын үй-бүлө мүчөлөрүнүн менчигиндеги турак жайы белгиленген санитардык жана техникалык талаптарга жооп бербеген, жашоого жараксыз жана оңдоого мүмкүн эмес деп белгиленген тартипте табылган учурда; муниципалдык турак жай фондунун турак жайын турак жай шарттарын жакшыртууга муктаждардын жалпы кезектүүлүк тартибинде кызматтык турак жай катары алган каза болгон адамдын үй-бүлө мүчөлөрү аны менен бирге жашаган учурда, үй-бүлө мүчөлөрүнүн менчигинде башка турак жайы болбогон, же каза болгон адамдын үй-бүлө мүчөлөрүнүн менчигинде турган турак жайы белгиленген санитардык жана техникалык талаптарга жооп бербеген, жашоого жараксыз жана оңдоого мүмкүн эмес деп белгиленген тартипте табылган учурда.»;

35-пункт төмөнкүдөй редакцияда баяндалсын: «35. Кызматтык турак жай Бишкек шаарынын жергиликтүү өз алдынча башкаруу органдарынын уюму, ишканасы же мекемеси менен бир жылдан кем эмес эмгектик мамиледе турган жана турак жай шарттарын жакшыртууга муктаж адамга Бишкек шаарынын аймагында бош турак жай бар экендигин эске алуу менен берилет.»;

38-пункттагы «убактылуу колдонууга» деген сөздөр «эмгектик мамиледе болгон мезгилде акы төлөө менен мөөнөттүү пайдаланууга» деген сөздөр менен алмаштырылсын;

411-пункт төмөнкүдөй мазмунда баяндалсын: «411. Кызматтык турак жайда жашаган жана 341 жана 342-пункттарда көрсөтүлгөн категорияларга кирген адам турак жайды кызматтык турак жайдын катарынан чыгаруу үчүн бул адамдын жана анын үй-бүлө мүчөлөрүнүн менчигинде башка турак жайдын жоктугун, ошондой эле бул адамда жана анын үй-бүлө мүчөлөрүндө кызматтык турак жайда жашаган мезгилде кыймылсыз мүлктү ээликтен ажыратуу боюнча бүтүмдөрдүн жоктугун ырастаган документтерди тиркөө менен ыйгарым укуктуу органга тийиштүү арызын берет.»;

44-пункттагы «муниципалдык турак жайды» деген сөздөр «муниципалдык турак жай фондунун жайын акы төлөө менен мөөнөттүү пайдаланууга» деген сөздөр менен алмаштырылсын;

47-пункт төмөнкүдөй редакцияда баяндалсын: «47. Мүлктүк жалдоо келишимин түзүүдө үй-бүлөнүн жашы жеткен бардык мүчөлөрүнүн паспортторун же паспортту алмаштыруучу башка документтерин же үй-бүлөнүн жашы жете элек бардык мүчөлөрүнүн туулгандыгы тууралуу күбөлүктөрүн көрсөтүү милдеттүү. Бишкек шаарынын мэриясынын тийиштүү чечимине кол тамга коюлгандан кийин муниципалдык турак жай фондунун турак жайын жалдоочу 30 күндүн ичинде мүлктүк жалдоо келишимин түзүүгө жана аны мамлекеттик каттоодон өткөрүүнү жүзөгө ашырууга тийиш.»;

481-пункт төмөнкү мазмунда толукталсын: «481. Муниципалдык турак жай фондунун турак жайында жашаган жана белгиленген ченемден ашкан турак жайы бар жалдоочу өзүнүн үй-бүлө мүчөлөрүнүн макулдугу менен ээлеп турган жайдын ордуна муниципалдык турак жай фондунун аз өлчөмдөгү турак жайын берүү үчүн ыйгарым укуктуу органга кайрылууга укуктуу. Ыйгарым укуктуу орган “Муниципалдык менчик объекттерин алмаштыруу жөнүндө” жобого ылайык, Бишкек шаардык кеңешинин 2007-жылдын 29-июнундагы №334 токтому менен бекитилген тартипте арызды карап чыгып, 14 жумуш күнүнүн ичинде алмаштыруу жөнүндө чечим кабыл алат.»;

61-пункттун жетинчи абзацы төмөнкүдөй редакцияда баяндалсын: «Менчиктештирүүнүн формасын ыйгарым укуктуу орган аныктайт.»;

65-пунктта: экинчи абзац төмөнкүдөй редакцияда баяндалсын: «Муниципалдык турак жай фондунун турак жайын менчиктештирүү жөнүндө жарандардын арыздары ыйгарым укуктуу органга берилет жана муниципалдык турак жай фондун башкаруу маселелери боюнча комиссия тарабынан каралат.»; төмөнкү мазмундагы үчүнчү абзац менен толукталсын: «Муниципалдык турак жай фондунун турак жайын менчиктештирүү жөнүндө арыз берген жаран, арызга бул адамдын жана анын үй-бүлө мүчөлөрүнүн менчигинде башка турак жайдын жана курулуш үчүн жер участогунун жоктугун, ошондой эле муниципалдык турак жай фондунун турак жайында жашаган мезгилде бул адамда жана анын үй-бүлө мүчөлөрүндө кыймылсыз мүлктү ээликтен ажыратуу боюнча бүтүмдөрдүн жоктугун ырастаган документтерди тиркейт.»;

66-пункт төмөнкү мазмунда толукталсын: «66. Ыйгарым укуктуу орган муниципалдык турак жай фондунун турак жайын менчиктештирүү жөнүндө жарандардын арыздарын ыйгарым укуктуу орган менен жалдоочунун ортосунда түзүлгөн мүлктүк жалдоо келишиминин мөөнөтү аяктагандан кийин гана карайт.».

2. Бишкек шаарынын мэриясы ушул токтомду ишке ашыруу боюнча белгиленген тартипте зарыл чараларды көрсүн.

3. Ушул токтом каттоодон өткөрүлсүн жана Кыргыз Республикасынын ченемдик укуктук актыларынын мамлекеттик реестрине киргизүү үчүн Кыргыз Республикасынын Юстиция министрлигине жөнөтүлсүн.

4. Ушул токтомдун аткарылышын контролдоо Бишкек шаардык кеңешинин муниципалдык менчик, жер маселелери, шаар куруу жана архитектура боюнча туруктуу комиссиясына жана Бишкек шаарынын мэрине (А. Дж. Джунушалиев) жүктөлсүн.

2026-жылдын 13-апрелинде https://www.gorkenesh.kg/bshknyn-toktomdoru/29-sozyv/6501-86-bishkek-shaardyk-ke-eshinin-2018-zhyldyn-31-majyndagy-67-munitsipaldyk-turak-zhaj-fondu-any-ber-tartibi-zhana-munitsipaldyk-turak-zhaj-fondunun-turak-zhajy-ch-n-aky-lch-m-n-zhana-aky-t-z-m-n-anyktoo-zh-n-nd-toktomuna-zg-rt-l-rd-kirgiz-tuuraluu.html расмий сайтында жарыяланды

Бишкек шаардык кеңешинин төрагасы

Б. Усеналиев