Кыргыз Республикасынын өкүлдөрүнүн жаштар саясаты маселелери боюнча эл аралык платформаларга катышуусун эсепке алуу жана уюштуруу маселелерин координациялоо тартиби жөнүндө жобо (Кыргыз Республикасынын Министрлер Кабинетинин токтомуна тиркеме)

Тиркеме

(Кыргыз Республикасынын Министрлер Кабинетинин 2025-жылдын 18-ноябрындагы № 745 токтомуна)

Кыргыз Республикасынын өкүлдөрүнүн жаштар саясаты маселелери боюнча эл аралык платформаларга катышуусун эсепке алуу жана уюштуруу маселелерин координациялоо тартиби жөнүндө жобо

1- глава. Жалпы жоболор

1. Кыргыз Республикасынын өкүлдөрүнүн жаштар саясаты маселелери боюнча эл аралык платформаларга катышуусун эсепке алуу жана уюштуруу маселелерин координациялоо тартиби жөнүндө ушул жобо (мындан ары – Жобо) «Жаштар жөнүндө» Кыргыз Республикасынын Мыйзамын ишке ашыруу максатында иштелип чыккан жана Кыргыз Республикасы катышуучусу болуп саналган эл аралык келишимдердин алкагында жүзөгө ашырылуучу жаштар саясаты маселелери боюнча эл аралык платформаларга Кыргыз Республикасынын өкүлдөрүнүн катышуусу менен байланышкан уюштуруу маселелерин эсепке алуу жана координациялоо механизмин аныктайт.

2. Эсепке алуу жана координациялоо жаштар саясаты жаатындагы ыйгарым укуктуу мамлекеттик орган (мындан ары – ыйгарым укуктуу орган) тарабынан жүзөгө ашырылат.

3. Ушул Жобо Кыргыз Республикасынын өкүлдөрүнүн эл аралык жаштар демилгелерине катышуусунун натыйжалуулугун жогорулатууга, жаштардын эл аралык кызматташуусу чөйрөсүндө жаштар саясатын өнүктүрүүгө көмөк көрсөтүүгө багытталган.

2- глава. Негизги түшүнүктөр

4. Ушул Жободо колдонулуучу негизги түшүнүктөр:

1) жаштар саясаты маселелери боюнча эл аралык платформалар – жаштарды глобалдык же региондук диалогго тартууга багытталган эл аралык же региондук уюмдар, түзүмдөр, бирикмелер жана иш-чаралар;

2) ыйгарым укуктуу орган – мамлекеттик жаштар саясатын ишке ашырууга жооптуу мамлекеттик орган;

3) өкүл – жаштар менен активдүү иш алып барган жана/же жаштар демилгелеринин кызыкчылыктарын коргогон, эл аралык жаштар платформасына катышуу үчүн өкүлдөнгөн Кыргыз Республикасынын жараны;

4) улуттук координатор – ыйгарым укуктуу орган тарабынан кыргыз делегациясынын катышуусун координациялоо үчүн дайындалган адам;

5) делегация – эл аралык жаштар иш-чараларына катышуу үчүн расмий түрдө жиберилген өкүлдөрдүн тобу;

6) өнөктөш уюмдар – жаштар уюмдары, өкмөттүк эмес уюмдар, окуу жайлар жана жаштардын эл аралык иш-чараларга катышуу маселелеринде ыйгарым укуктуу орган менен кызматташкан башка түзүмдөр.

3- глава. Катышуу принциптери

5. Жаштар саясаты маселелери боюнча эл аралык платформаларга Кыргыз Республикасынын делегацияларын түзүү жана алардын катышуусу ыйгарым укуктуу орган тарабынан өз чечими боюнча жана төмөнкү принциптердин негизинде жүзөгө ашырылат:

ыктыярдуулук – жарандардын катышуусу бир гана алардын жеке каалоосу менен жүзөгө ашырылат; ачыктык жана бирдей жетүү мүмкүндүгү – белгиленген талаптарга ылайык келген бардык талапкерлер үчүн бирдей шарттарды камсыз кылуу; компетенттүүлүк жана кесипкөйлүк – тийиштүү тармактарда зарыл болгон билимге, көндүмдөргө жана тажрыйбага ээ адамдардын артыкчылыктуу катышуусу; тандоо жол-жоболорунун ачык-айкындыгы – чечимдер жаңылыш жана негизсиз болбогон так жана калыс критерийлердин негизинде тандоо жүргүзүү.

4- глава. Катышуу тартиби

6. Кыргыз Республикасынын өкүлдөрүнүн жаштар саясаты маселелери боюнча эл аралык платформаларга катышуусу ыйгарым укуктуу орган жана тышкы иштер чөйрөсүндөгү ыйгарым укуктуу мамлекеттик орган аркылуу жүзөгө ашырылат.

Мамлекеттик органдар, жаштар уюмдары жана бирикмелери Кыргыз Республикасынын мыйзамдарында жана Кыргыз Республикасы катышуучусу болуп саналган, мыйзамда белгиленген тартипте күчүнө кирген эл аралык келишимдерде каралган учурларды кошпогондо, эл аралык уюмдар менен түз өз ара аракеттене алат.

7. Эл аралык жаштар платформаларына катышууга чакыруулар, ошондой эле тиешелүү документтер белгиленген тартипте дипломатиялык каналдар аркылуу келип түшөт. Тышкы иштер чөйрөсүндөгү ыйгарым укуктуу мамлекеттик орган чакырууну карап чыгуу жана бекитүү үчүн ыйгарым укуктуу органга жиберет.

8. Ыйгарым укуктуу орган чакыруунун мыйзамдарга шайкештигине максатка ылайыктуулугун карайт жана мындай иш-чарага жаштар өкүлдөрүнүн катышуусуна макулдук берет.

9. Ыйгарым укуктуу органда Кыргыз Республикасынын өкүлдөрүнүн эл аралык жаштар иш-чараларына, форумдарына, конференцияларына, сессияларына жана башка платформаларына катышуусун эсепке алууну жана координациялоону камсыз кылуучу маалыматтар базасы түзүлөт жана жүргүзүлөт.

10. Маалыматтар базасына ар бир катышуучу жөнүндө негизги маалымат киргизилет: фамилиясы, аты, жиберүүчү уюм, иш-чаранын аталышы, аны өткөрүү датасы жана жери, каржылоо булагы, ошондой эле катышуунун натыйжалары жөнүндө маалымат.

11. Талапкерлерди тандоо ыйгарым укуктуу орган тарабынан жүзөгө ашырылат. Тандоо жөнүндө жарыялар ыйгарым укуктуу органдын расмий баракчаларында жайгаштырылат.

Талапкерлер төмөнкү критерийлер боюнча тандалат:

– Кыргыз Республикасынын жарандары;

– иш-чаранын курактык категориясына ылайык катышуучунун курагы;

– иш-чаранын тематикасына ылайык келген билиминин, тажрыйбасынын жана/же ишинин болушу;

– соттуулугу, тартиптик жазалары жана/же мурунку эл аралык иш-чараларда жүрүм-турум нормаларын бузуулардын жоктугу.

Тандоонун алкагында артыкчылык төмөнкү талапкерлерге берилет:

– ыктыярчылык иште 1 жылдан кем эмес тажрыйбасы барларга;

– маанилүү илимий иштеп чыгуулары же ачылыштары бар жаш окумуштууларга;

– инновациялык долбоорлордун жана технологиялык чечимдердин авторлоруна же теңавторлоруна;

– артыкчылыктуу тармактардагы стартаптардын катышуучуларына же негиздөөчүлөрүнө;

– эл алдына чыгып сүйлөө, панелдик дискуссияларга, презентацияларга катышуу тажрыйбасы барларга;

– маданий иш-чаралардын жана чыгармачыл демилгелердин активдүү катышуучуларына.

Катышуучуларды тандоо процессинде ыйгарым укуктуу орган өнөктөш уюмдардан келип түшкөн сунуштамаларды жана сунуштарды эске алууга укуктуу. Ыйгарым укуктуу органдын өзүнчө чечими менен каралган учурларды кошпогондо, бир эле ошол адамдын бир календардык жыл ичинде үчтөн ашык эл аралык иш-чарага катышуусуна жол берилбейт.

12. Делегациянын курамын түзүүдө чакыруунун же кабыл алуучу тараптын шарттары боюнча чектелген чөйрөдөгү адамдардын

катышуусу болжолдонгон учурларды кошпогондо, ишти координациялоону жана натыйжалуу өз ара аракеттенүүнү камсыз кылуу максатында ыйгарым укуктуу органдын өкүлүнүн катышуусу каралат.

5- глава. Уюштуруучулук коштоо

13. Ыйгарым укуктуу орган:

– делегацияны даярдоону координациялайт;

– методикалык жана маалыматтык колдоо көрсөтөт;

– тышкы иштер чөйрөсүндөгү ыйгарым укуктуу мамлекеттик орган жана кабыл алуучу тарап менен өз ара аракеттенет;

– катышуунун натыйжаларын жана отчетторду даярдоону контролдойт.

14. Зарыл болгон учурда өкүл даярдоо инструктажынан өтүүгө милдеттүү.

Инструктаж ыйгарым укуктуу орган тарабынан жүргүзүлөт жана өкүлдү жаштар саясаты маселелери боюнча эл аралык платформаларда өз функцияларын натыйжалуу аткарууга даярдоону камсыз кылат, анын ичинде дипломатиялык этикет, эл алдына чыгып сүйлөө жана актуалдуу маселелер боюнча Кыргыз Республикасынын позициясы менен тааныштыруу.

15. Катышуунун жыйынтыгы боюнча өкүл 14 жумуш күндүн ичинде ыйгарым укуктуу органга же тиешелүү органга төмөнкүлөрдү камтыган жазуу жүзүндөгү отчетту берүүгө милдеттүү:

– иш-чаранын кыскача сыпаттамасы;

– Кыргыз Республикасынын делегациясынын катышуусу;

– жетишилген натыйжалар;

– андан аркы кадамдар боюнча сунуштар.

6- глава. Финансылык камсыз кылуу

16. Өкүлдөрдүн катышуусун каржылоо төмөнкүлөрдүн эсебинен жүзөгө ашырылышы мүмкүн:

– республикалык бюджеттин жана жергиликтүү бюджеттин;

– эл аралык жана донордук программалардын;

– жиберүүчү уюмдун каражаттарынын;

– катышуучулардын жеке каражаттарынын (башка каржылоо жок болгон учурда);

– Кыргыз Республикасынын мыйзамдарына каршы келбеген башка каражаттардын.

17. Катышууга кеткен чыгымдар кабыл алуучу тарап же эл аралык өнөктөштөр тарабынан жарым-жартылай же толугу менен жабылган иш-чараларга артыкчылык берилет.

18. Эгерде жаштар саясаты маселелери боюнча эл аралык платформаларга делегациянын жана өкүлдөрдүн чыгымдарынын орду чакыруучу тараптын эсебинен толтурулса, Кыргыз Республикасынын мыйзамдарында каралган башка учурларды кошпогондо, республикалык жана жергиликтүү бюджеттен каржылоого тыюу салынат.

7- глава. Жыйынтыктоочу жоболор

19. Ушул Жобонун аткарылышын контролдоо ыйгарым укуктуу орган тарабынан тышкы иштер чөйрөсүндөгү ыйгарым укуктуу мамлекеттик орган менен биргеликте жүзөгө ашырылат.