КР Министрлер Кабинетинин (Кыргыз Республикасынын Министрлер Кабинетине караштуу Кыргыз Республикасынын Социалдык фонду менен Казакстан Республикасынын Эмгек жана калкты социалдык коргоо министрлигинин ортосундагы Пенсиялык камсыздоо чөйрөсүндө маалыматтык өз ара аракеттенүү жөнүндө макулдашуунун долбооруна макулдук берүү тууралуу) тескемеси

КЫРГЫЗ РЕСПУБЛИКАСЫНЫН МИНИСТРЛЕР КАБИНЕТИНИН ТЕСКЕМЕСИ

2025-жылдын 9-августу № 685-т

"Кыргыз Республикасынын эл аралык келишимдери жөнүндө" Кыргыз Республикасынын Мыйзамынын 6-беренесинин 6-бөлүгүнө, "Кыргыз Республикасынын Министрлер Кабинети жөнүндө" Кыргыз Республикасынын конституциялык Мыйзамынын 13, 17-беренелерине ылайык: Кыргыз Республикасынын Министрлер Кабинетине караштуу Кыргыз Республикасынын Социалдык фонду менен Казакстан Республикасынын Эмгек жана калкты социалдык коргоо министрлигинин ортосундагы Пенсиялык камсыздоо чөйрөсүндө маалыматтык өз ара аракеттенүү жөнүндө макулдашуунун тиркелген долбооруна принциптүү эмес мүнөздөгү өзгөртүүлөрдү жана толуктоолорду киргизүү укугу менен макулдук берилсин.

Кыргыз Республикасынын Министрлер Кабинетинин Төрагасы

А.А. Касымалиев

Долбоор

Кыргыз Республикасынын Министрлер Кабинетине караштуу Кыргыз Республикасынын Социалдык фонду менен Казакстан Республикасынын Эмгек жана калкты социалдык коргоо министрлигинин ортосундагы Пенсиялык камсыздоо чөйрөсүндө маалыматтык өз ара аракеттенүү жөнүндө МАКУЛДАШУУ

Кыргыз Республикасынын Министрлер Кабинетине караштуу Кыргыз Республикасынын Социалдык фонду (мындан ары - КР СФ) бир тараптан жана Казакстан Республикасынын Эмгек жана калкты социалдык коргоо министрлиги (мындан ары - КР ЭКСКМ) экинчи тараптан, мындан ары Тараптар деп аталып, төмөнкүлөр жөнүндө макулдашты: 1-берене. Макулдашуунун максаты Ушул Макулдашуунун максаты болуп Тараптардын мамлекеттеринин мыйзамдарына ылайык белгиленген пенсияларды Тараптардын мамлекеттеринин жарандарынын бир эле учурда алуу фактыларын текшерүү максатында КР СФ менен КР ЭКСКМ ортосунда корголгон электрондук документ жүгүртүүнү уюштуруу эсептелет. 2-берене. Макулдашуунун предмети Ушул Макулдашуунун предмети болуп Тараптардын мамлекеттеринин мыйзамдарына ылайык белгиленген Тараптардын мамлекеттеринин жарандарынын бир убакта пенсия алуу фактылары жөнүндө маалымат алмашуу саналат. 3-берене. Тараптардын өз ара аракеттенүүсү

1. Тараптардын маалыматтык өз ара аракеттенүүсү Кыргыз Республикасында жана Казакстан Республикасында жашаган жарандарга пенсия төлөөнүн негиздүүлүгүн ырастоо, ошондой эле жарандардын Тараптардын мамлекеттеринин мыйзамдарында белгиленген бир убакта пенсия алуу фактысы аныкталган учурда иш-аракеттердин тартибин аныктоо максатында жүзөгө ашырылат.

2. Тараптар жеке маалыматтардын купуялуулугун жана коопсуздугун камсыз кылат.

3. Тараптар өз ара аракеттенүүнү уюштурууда төмөнкү принциптерди жетекчиликке алат:

- Тараптардын мамлекеттеринин кызматтык жана мыйзам менен корголгон башка сырларын так сактоону;

- маалыматты коргоону жана маалыматка жетүүнү контролдоону камсыз кылууну.

4. Электрондук түрдө өз ара аракеттенүү ушул Макулдашуунун тиркемесине ылайык маалыматтардын курамын (берилүүчү маалыматтын тизмегин) пайдалануу менен жүзөгө ашырылат.

5. Ушул Макулдашуунун алкагында Тараптар акысыз негизде өз ара аракеттенет.

4-берене. Электрондук документ жүгүртүү тартиби

1. Электрондук документ алмашуу төмөнкүдөй тартипте жүргүзүлөт:

1.1. Тараптар:

1.1.1. пенсия төлөө фактысын тактоо зарыл болгон учурда ушул Макулдашуунун тиркемесинде белгиленген форма боюнча алуучулардын тизмеси түрүндө суроо-талап жиберет;

1.1.2. алынган маалыматты пенсия алуучулардын колдо болгон маалыматтар базасы менен салыштырат жана салыштыруунун жыйынтыгын Тараптар маалымат алган күндөн тартып 3 (үч) айдан кечиктирбестен экинчи Тарапка жиберет;

1.1.3. алынган маалыматта Тараптардын мамлекеттеринин жарандары боюнча маалыматтардын туура эмес форматы аныкталган учурда бир айлык мөөнөттө салыштыруу мүмкүн эместиги жана маалыматтардын аныкталган туура эмес форматтарын жоюу зарылдыгы жөнүндө кабарлоо жиберет.

1.2. Электрондук документтер Тараптардын расмий электрондук почтасына файл түрүндө же эсепке алынган DVD-дискте жазуулардын саны жана берилүүчү маалыматтын көлөмү жөнүндө маалыматтарды көрсөтүү менен "Кызматтык пайдалануу үчүн" купуялуулугу жөнүндө белги коюлган коштомо кат менен берилет.

Маалымат алмашуу форматы Тараптар менен макулдашылат. 5-берене. Тараптардын милдеттери

1. Тараптар өзүнө төмөнкү милдеттерди алат:

1.1. Пенсия алуучулар жөнүндө Тараптан алынган маалыматты пенсия алуучулар жөнүндө Тараптын колдонуудагы маалымат базасы менен салыштыруу.

1.2. Берилген туура эмес маалыматтын форматын алар аныкталган учурда кабарлоо жана четтетүү.

2. Берилүүчү электрондук форматка карата талаптар өзгөргөндө Тараптар бул өзгөрүүлөр жөнүндө бир айлык мөөнөттө кабарлайт.

3. Ушул Макулдашуу боюнча милдеттенмелерди аткаруу мүмкүн болбогон учурда Тараптар милдеттенмелердин убактылуу токтотулгандыгы жөнүндө бири-бирине токтоосуз кат жүзүндө кабарлайт.

4. Маалыматты иштеп чыгуунун коопсуздугун жана купуялуулугун камсыз кылуу максатында Тараптар төмөнкүлөргө милдеттенет:

4.1. Маалыматтын купуялуулугун сактоо менен маалыматтык өз ара аракеттенүүнү зарыл болгон коргоо каражаттары менен камсыз кылууга.

4.2. Документ жүгүртүүгө тартылган бардык системаларда вируска каршы текшерүүлөрдү үзгүлтүксүз жүргүзүүгө.

4.3. Датасын, убактысын, жөнөтүүчүнү жана маалымат тибин көрсөтүп, журналдарды кеминде 1 жыл сактоо менен жеке маалыматтарды түзүү, жөнөтүү, алуу жана иштеп чыгуу менен байланышкан бардык иш-аракеттердин эсебин жүргүзүүгө.

4.4. Тараптардын корпоративдик электрондук почта даректеринин расмий макулдашылган тизмегин гана колдонууга.

5. Кесиптик, кызматтык зарылчылыкка байланыштуу, ошондой эле эмгек милдеттерин аткарууга байланыштуу жеке маалыматтар белгилүү болгон Тараптар алардын купуялуулугун, ошондой эле Тараптардын мамлекеттеринин мыйзамдарына ылайык үчүнчү жактарга жайылбашын камсыз кылат.

6. Салыштыруунун жыйынтыгы боюнча пенсиялардын эки жолу дайындалганы аныкталган учурда бул факт аныкталган пенсионерге билдирилет. Тараптардын бири пенсиядан баш тарткан жана алынган сумманын ордун толук толтурган учурда экинчи Тарап мурдагы өлчөмдөгү пенсияны төлөп берүүнү кайра баштайт жана улантат.

7. Тараптар маалыматтарды берүү каражаттарына карабастан жеке маалыматтарды ташуу үчүн арналган маалыматтарды иттттеп чыгуу системаларынын коопсуздугун камсыз кылат (маалыматтарды берүү каражаттарын контролдоо).

6-берене. Тараптардын жоопкерчилиги

1. Маалыматты ачыкка чыгаруу жана (же) жайылтуу жана ушул Макулдашууда каралгандан башка максаттарда пайдалануу Тараптардын мамлекеттеринин мыйзамдарында каралган жоопкерчиликке алып келет.

2. Тараптар берилип жаткан маалыматтын купуялуулугун камсыз кылуу боюнча милдеттенмелерди алат жана жоопкерчилик тартат.

Мындай милдеттенмелер жеке мүнөздөгү маалыматтар менен иштөө аяктагандан кийин да күчүндө калат.

3. Ушул Макулдашуунун жоболорун ишке ашыруу боюнча ыйгарым укуктуу органдар төмөнкүлөр болуп саналат:

кыргыз Тараптан - КР СФ; казакстан Тараптан - КР ЭКСКМ Калкты социалдык коргоо чөйрөсүндө жөнгө салуу жана котролдоо комитети. Жогоруда аталган ыйгарым укуктуу органдардын аталышы же функциялары өзгөргөн учурда Тараптар бири-бирине өз убагында жазуу жүзүндө кабарлайт. 7-берене. Талаш-тартыштарды чечүү тартиби Ушул Макулдашууну ишке ашырууда пикир келишпестиктер келип чыккан учурда Тараптар аларды консультацияларды жана сүйлөшүүлөрдү жүргүзүү аркылуу чечет. Жумушчу тартипте чечүүгө мүмкүн болбогон электрондук түрдө документ алмашууга байланыштуу пикир келишпестиктер жана талаш-тартыштар келип чыкканда жана алардын пайда болушуна негиз болгон иш жүзүндөгү жагдайларды аныктоо максатында Тараптар техникалык экспертиза жүргүзүү үчүн биргелешкен комиссияны дайындайт. 8-берене. Макулдашууну колдонуу мөөнөтү

1. Ушул Макулдашуу кол коюлган датадан тартып күчүнө кирет.

2. Ушул Макулдашуу бир жылга жарактуу. Бул Макулдашуунун колдонулушу Тараптардын бири экинчи Тарапка анын колдонулушун токтотуу жөнүндө өзүнүн ниетин жазуу жүзүндө кабарламайынча кийинки жылдык мезгилдерге автоматтык түрдө узартылат. Мындай учурда бул Макулдашууну колдонуу дипломатиялык каналдар боюнча мындай жазуу жүзүндөгү кабарлоону алган датадан тартып 3 (үч) ай өткөндөн кийин токтотулат.

9-берене. Корутунду жоболор

1. Тараптардын өз ара макулдугу боюнча бул Макулдашууга ушул Макулдашуунун ажырагыс бөлүгү болуп саналган өзгөртүүлөр жана толуктоолор киргизилиши мүмкүн жана ушул Макулдашуунун 8-беренесинде каралган тартипте күчүнө кирүүчү өзүнчө протоколдор менен таризделет.

2. Ушул Макулдашууну ишке ашырууда өз ара аракеттенүү (кат алышуу) жана маалымат (документтерди) берүү орус тилинде жүргүзүлөт.

3. Тараптар ушул Макулдашуу боюнча укуктарын жана милдеттерин экинчи Тараптын жазуу жүзүндөгү макулдугусуз үчүнчү жактарга берүүгө укуксуз.

4. Ушул Макулдашуунун тиркемеси анын ажырагыс бөлүгү болуп саналат.

2025-жылдын ____________ _____________________ шаарында кыргыз, казак жана орус тилдеринде бирдей күчкө ээ болгон эки нускада түзүлдү. Тексттердин ортосунда айырмачылыктар болгон учурда Тараптар орус тилиндеги текстке кайрылат.

Кыргыз Республикасынын Министрлер Кабинетине караштуу Кыргыз Республикасынын Социалдык фонду үчүн

Казакстан Республикасынын Эмгек жана калкты социалдык коргоо министрлиги үчүн

Кыргыз Республикасынын Министрлер Кабинетине караштуу Кыргыз Республикасынын Социалдык фонду менен Казакстан Республикасынын Эмгек жана калкты социалдык коргоо министрлигинин ортосундагы Пенсиялык камсыздоо чөйрөсүндө маалыматтык өз ара аракеттенүү жөнүндө макулдашууга тиркеме

_____________________ карата белгиленген пенсия алуучулардын тизмеси Кыргыз Республикасында/ Казахстан Республикасында

№

Аты-жөнү толугу менен (кириллицада)

Аты-жөнү толугу менен (латиницада)

Туулган жылы

ИЖН/ИСН

Жашаган жери боюнча каттоо дареги

Пенсиянын түрлөрү

Тизмени жөнөткөн Тарап пенсияны белгилеген датасы/тизмени жиберген Тараптын пенсияны токтоткон датасы

Тизмени алган Тарап пенсияны белгилеген датасы/тизмени алган Тараптын пенсияны токтоткон датасы

1

2

3

4

5

6

7

8

9