11-берене. Уюшкан кылмыштуулукка каршы атайын аракеттенүү

1. Уюшкан кылмыштуулукка каршы атайын аракеттенүү ыйгарым укуктуу органдар тарабынан төмөнкүдөй жолдор менен жүзөгө ашырылат:

1) уюшкан топтор же кылмыштуу коомдоштуктар тарабынан жасалган кылмыштардын алдын алуу, бөгөт коюу, аныктоо;

2) уюшкан кылмыштуулуктун келип чыгышына өбөлгө түзүүчү себептерди жана шарттарды талдоо жана болжолдоо;

3) алдын алуучу каттоодо турган адамдарга карата алдын алуучу таасир этүү чараларын колдонуу;

4) уюшкан топту, кылмыштуу коомдоштукту түзгөндүгү же аларга катышкандыгы үчүн же болбосо аларды каржылагандыгы үчүн жаза өтөп жаткан адамдарды түзөтүү жана кайра социалдаштыруу шарттарын түзүү;

5) тышкы миграция чөйрөсүндөгү Кыргыз Республикасынын мыйзамдарында белгиленген тартипте уюшкан кылмыштуулукка тиешеси бар же болбосо криминалдык статусу бар чет өлкөлүк жарандардын жана жарандыгы жок адамдардын Кыргыз Республикасына кирүүсүнө тыюу салуу жөнүндө сунуштарды киргизүү, ошондой эле аларды Кыргыз Республикасынын чегинен тышкары чыгаруу боюнча чараларды көрүү;

6) уюшкан топту, кылмыштуу коомдоштукту түзгөндүгү же аларга катышкандыгы үчүн же болбосо жазаны аткаруу (өтөө) мезгилинде аларды каржылагандыгы үчүн жаза өтөп жаткан адамдардын укукка каршы аракеттеринин алдын алуу;

7) алдын алуучу каттоодо турган адамдардын мүлктүк жана финансылык абалын текшерүү;

8) ушул Мыйзамга жана Кыргыз Республикасынын башка ченемдик укуктук актыларына ылайык уюшкан топтордун, кылмыштуу коомдоштуктардын кылмыштуу иши, аларды каржылоо каналдары, алардын курамына кирген адамдардын криминалдык иерархиясы жана криминалдык статусу жөнүндө маалыматтарды чогултуу;

9) уюшкан топторду жана кылмыштуу коомдоштуктарды, анын ичинде алардын ишин каржылоо схемасын түзүүнү болтурбоо;

10) уюшкан топтордун же кылмыштуу коомдоштуктардын мамлекеттик жана муниципалдык кызмат орундарын ээлеген адамдар жана мамлекеттик органдардын, юридикалык жактардын кызмат адамдары менен коррупциялык байланыштарды түзүүсүн, алардын кылмыштуу ишке тартылышын болтурбоо;

11) жаза өтөп жаткан адамдардын уюшкан топторду, кылмыштуу коомдоштуктарды түзүүсүнө жол бербөө, ошондой эле жаза өтөө мезгилинде криминалдык идеологияны пропагандалоону жана криминалдык иерархияны түзүүнү болтурбоо;

12) уюшкан топтор же кылмыштуу коомдоштуктар тарабынан жасалуучу кылмыштардын алдын алуу, бөгөт коюу, аныктоо боюнча ыкчам-алдын алуу, атайын иш-чараларды өткөрүү;

13) уюшкан топтордун же кылмыштуу коомдоштуктардын лидерлеринин жана мүчөлөрүнүн кылмыштуу чогулуштарынын (криминалдык жыйындарынын) алдын алуу, бөгөт коюу;

14) уюшкан кылмыштуулукка каршы атайын аракеттенүүнүн башка багыттарын ишке ашыруу.

2. Мамлекеттик органдар өз ара аракеттенүү жөнүндө ведомстволор аралык регламенттердин алкагында уюшкан кылмыштуулукка каршы атайын аракеттенүү чөйрөсүндө өз ара аракеттенүүнү жүзөгө ашырат.