ККыргыз Республикасынын Министрлер Кабинетинин (Кыргыз Республикасынын Министрлер Кабинети менен Россия Федерациясынын Өкмөтү- нүн ортосундагы Кыргыз Республикасынын уран казуу жана тоо-кен өндүрүшүнүн таасирине кабылган аймактарын реабилитациялоодо кызматташуу жөнүндө макулдашуунун долбоорун жактыруу тууралуу) тескемеси

КЫРГЫЗ РЕСПУБЛИКАСЫНЫН МИНИСТРЛЕР КАБИНЕТИНИН ТЕСКЕМЕСИ

2024-жылдын 26-марты № 110-т

"Кыргыз Республикасынын Министрлер Кабинети жөнүндө" Кыргыз Республикасынын конституциялык Мыйзамынын 13, 17-беренелерине, "Кыргыз Республикасынын эл аралык келишимдери жөнүндө" Кыргыз Республикасынын Мыйзамынын 8-беренесине ылайык:

1. Кыргыз Республикасынын Министрлер Кабинети менен Россия Федерациясынын Өкмөтүнүн ортосундагы Кыргыз Республикасынын уран казуу жана тоо-кен өндүрүшүнүн таасирине кабылган аймактарын реабилитациялоодо кызматташуу жөнүндө макулдашуунун тиркелген долбоору жактырылсын.

2. Кыргыз Республикасынын өзгөчө кырдаалдар министрине жогоруда көрсөтүлгөн Макулдашууга принциптүү эмес мүнөздөгү өзгөртүүлөрдү жана толуктоолорду киргизүү укугу менен Кыргыз Республикасынын Министрлер Кабинетинин атынан кол коюуга ыйгарым укук берилсин.

3. Бул тескеме 2024-жылдын 20-мартынан тартып күчүнө кирет.

Кыргыз Республикасынын Министрлер Кабинетинин Төрагасы

А.Жапаров

Долбоор

Кыргыз Республикасынын Министрлер Кабинети менен Россия Федерациясынын Өкмөтүнүн ортосундагы Кыргыз Республикасынын уран казуу жана тоо-кен өндүрүшүнүн таасирине кабылган аймактарын реабилитациялоодо кызматташуу жөнүндө МАКУЛДАШУУ

Мындан ары Тараптар деп аталуучу Кыргыз Республикасынын Министрлер Кабинети жана Россия Федерациясынын Өкмөтү, 2012-жылдын 28-ноябрындагы Кыргыз Республикасынын Өкмөтү менен Россия Федерациясынын Өкмөтүнүн ортосундагы Атомдук энергияны тынчтык максатында пайдалануу жаатындагы кызматташуу жөнүндө макулдашуунун жоболорун жетекчиликке алуу менен; эки мамлекет тең Атомдук энергия боюнча эл аралык агенттиктин мүчөсү жана 1968-жылдын 1-июлундагы Ядролук куралды таркатпоо жөнүндө келишимдин катышуучусу экенин эске алып, эки мамлекет тең Вена шаарында 1997-жылдын 5-сентябрында кол коюлган Иштелип бүткөн отунду колдонуунун коопсуздугу жөнүндө жана радиоактивдүү калдыктарды колдонуунун коопсуздугу тууралуу бириккен конвенциянын мүчөлөрү экендигине байланыштуу; Кыргыз Республикасынын мурдагы уран казуу жана тоо-кен өндүрүшүнүн районундагы аймактарды натыйжалуу пайдаланууга жана экологиялык абалын жакшыртууга умтулуусун көңүлгө алып; уран продукциясын өндүргөн ишканалар жоюлгандан кийин калган калктуу аймактарды социалдык-экономикалык жактан өнүктүрүүнүн зарылдыгын эске алуу менен; Кыргыз Республикасы менен Россия Федерациясынын ортосундагы атом энергиясын тынчтык максаттарында пайдалануу жаатындагы өз ара пайдалуу кызматташууну андан ары кеңейтүүгө жана тереңдетүүгө умтулуп, төмөнкүлөр жөнүндө макулдашты: 1-берене. Ушул Макулдашуунун максаттары төмөнкүлөр болуп саналат: Кыргыз Республикасынын аймагында мурдагы уран казуу жана тоо-кен өндүрүшүнүн калдыктары жайгашкан райондордо жашаган калктын коопсуздугун камсыз кылууга көмөктөшүү; Кыргыз Республикасынын аймагында мурдагы уран казуу жана тоо-кен өндүрүш ишканаларынын объекттеринде өзгөчө кырдаалдардын пайда болуу тобокелдиктерин азайтуу. 2-берене.

1. Ушул Макулдашууну ишке ашыруу үчүн Тараптар төмөнкү компетенттүү органдарды дайындайт:

Кыргыз Тараптан - Кыргыз Республикасынын Өзгөчө кырдаалдар министрлиги; Россия Тараптан - "Росатом" атомдук энергия боюнча мамлекеттик корпорациясы. Компетенттүү органдар, алардын аталыштары же болбосо функциялары өзгөргөн учурда Тараптар дипломатиялык каналдар аркылуу бири-бирине жазуу жүзүндө дароо маалымдайт.

2. Кыргыз Тараптын компетенттүү органы Кыргыз Республикасынын мыйзамдарында белгиленген тартипте кыргыз ыйгарым укуктуу уюмун аныктайт жана бул тууралуу Россия Тараптын компетенттүү органына жазуу жүзүндө билдирет.

3. Россия Тараптын компетенттүү органы Россия Федерациясынын мыйзамдарында белгиленген тартипте россиялык ыйгарым укуктуу уюмду аныктайт жана бул тууралуу Кыргыз Тараптын компетенттүү органына жазуу жүзүндө билдирет.

4. Россиялык ыйгарым укуктуу уюм ушул Макулдашууну ишке ашыруунун алкагында кызматташууну ишке ашыруу үчүн россиялык жана кыргыз уюмдарын (мындан ары - тартылуучу уюмдар) тартууга укуктуу.

5. Тараптардын компетенттүү органдары ушул Макулдашуунун аткарылышын контролдоо жана аны ишке ашыруунун жүрүшүндө келип чыгуучу маселелерди кароо үчүн Тараптардын компетенттүү органдары тарабынан дайындалган өкүлдөрдөн турган биргелешкен координациялык комитетти түзөт.

Биргелешкен координациялык комитеттин жыйналыштары зарылдыгына жараша Тараптардын компетенттүү органдарынын макулдашуусуна ылайык Кыргыз Республикасында жана Россия Федерациясында кезектешип өткөрүлөт. 3-берене.

1. Ушул Макулдашууда каралган кызматташууну ишке ашыруу үчүн Россия Тараптын компетенттүү органы төмөнкү милдеттенмелердин аткарылышын камсыз кылат:

- долбоордук документтерди иштеп чыгуу жана Кыргыз Республикасынын мурдагы уран казуу жана тоо-кен өндүрүшүнүн таасирине кабылган аймактарында реабилитациялоо иш-чараларын жүргүзүү;

- аткарылуучу реабилитациялык иштерди башкаруу жана контролдоо маселелери боюнча иштерди жүргүзүү.

2. Ушул беренеде көрсөтүлгөн милдеттенмелер Россия Федерациясынын мыйзамдарына ылайык бөлүнгөн Россия Тараптын каражатынын эсебинен аткарылат.

4-берене.

1. Ушул Макулдашууда каралган кызматташууну ишке ашыруу үчүн Кыргыз Тараптын компетенттүү органы төмөнкү милдеттенмелердин аткарылышын камсыз кылат:

- үчүнчү жактардын укуктарынан эркин болгон иштерди жүргүзүү аянтчаларын берүү жана аларга россиялык ыйгарым укуктуу уюмунун жана тартылуучу уюмдардын кызматкерлерине кирүү мүмкүнчүлүгүн берүү;

- россиялык ыйгарым укуктуу уюмга, ошондой эле тартылуучу россиялык уюмдарга, Кыргыз Республикасында жумуштарды аткаруу жана кызматтарды көрсөтүү үчүн зарыл болгон уруксаттарды (лицензияларды) алууга, ошондой эле Кыргыз Республикасынын аймагында өкүлчүлүктөрдү (филиалдарды) ачууга жана Кыргыз Республикасынын салык органдарында каттоодон өтүүгө көмөк көрсөтүү.

2. Бул беренеде көрсөтүлгөн милдеттенмелер ушул Макулдашуунун 3-беренесинин 2-пунктунда каралган каражаттарды тартуусуз аткарылат.

5-берене. Кыргыз Тарап ушул Макулдашуунун алкагында ишке ашырылуучу товарларды жеткирүүнү, жумуштарды аткарууну жана кызматтарды көрсөтүүнү, ошондой эле ушул Макулдашууну ишке ашыруунун алкагында тартылган Кыргыз Республикасынын салык резиденти болуп саналбаган россиялык уюмдардын жана жеке жактардын кирешелерин Кыргыз Республикасынын аймагында салыктардан жана башка төлөмдөрдөн бошотот. 6-берене. Ушул Макулдашуунун 3-беренесинде каралган иштерди аткаруунун натыйжалары, үчүнчү өлкөлөргө өткөрүп берүү укугусуз Кыргыз Тарапка таандык. Кыргыз Тараптын компетенттүү органы Россия Тараптын компетенттүү органы тарабынан түзүлүүчү аткарылган иштердин натыйжаларын кабыл алуу боюнча комиссиясына өзүнүн өкүлүн жиберет. Аткарылган иштердин натыйжалары Тараптардын компетенттүү органдарынын ортосунда макулдашылган тартипте Кыргыз Тараптын менчигине өткөрүлөт. 7-берене. Ушул Макулдашууну колдонууга жана (же) чечмелөөгө байланыштуу бардык пикир келишпестиктер, эгерде Тараптар башкача макулдашпаса, Тараптардын компетенттүү органдарынын ортосундагы консультациялар жана сүйлөшүүлөр аркылуу чечилет. 8-берене. Ушул Макулдашууда каралбаган маселелер, анын ичинде маалыматты коргоо маселелери боюнча, 2012-жылдын 28-ноябрындагы Кыргыз Республикасынын Өкмөтү менен Россия Федерациясынын Өкмөтүнүн ортосундагы Атомдук энергияны тынчтык максатында пайдалануу жаатындагы кызматташуу жөнүндө макулдашуунун тиешелүү жоболору колдонулат. 9-берене. Тараптардын өз ара макулдугу боюнча ушул Макулдашууга өзүнчө протоколдор менен таризделүүчү өзгөртүүлөр киргизилиши мүмкүн, алар ушул Макулдашуунун ажырагыс бөлүгү болуп саналат. 10-берене.

1. Ушул Макулдашуу анын күчүнө кириши үчүн зарыл болгон мамлекеттик ички жол-жоболорду Тараптар аткаргандыгы жөнүндө жазуу жүзүндөгү акыркы билдирүүсүн дипломатиялык каналдар аркылуу алган күндөн тартып күчүнө кирет.

2. Ушул Макулдашуу мөөнөтсүз болуп саналат.

3. Тараптардын ар бири дипломатиялык каналдар аркылуу экинчи Тарапка мындай ниети жөнүндө жазуу жүзүндөгү билдирүү жөнөтүү аркылуу ушул Макулдашууну токтото алат. Ушул Макулдашуунун колдонулушу экинчи Тарап мындай билдирүүнү алгандан бир жыл өткөндөн кийин токтотулат.

4. Тараптардын бири экинчи Тараптан ушул Макулдашууну токтотуу жөнүндө билдирүүнү алгандан кийин, Тараптар объекттерди реабилитациялоо жана реабилитацияланган объекттерди пайдаланууга берүү үчүн, ошондой эле аларды пайдалануунун кепилденген мөөнөтүнүн ичинде көмөк көрсөтүү үчүн бардык милдеттенмелерди аткаруу мүмкүнчүлүгү жөнүндө дароо консультацияларды жүргүзөт.

____________ шаарында 20___-ж. "____" _______________ ар бири кыргыз жана орус тилдеринде эки нускада түзүлдү, мында эки текст тең бирдей күчкө ээ. Ушул Макулдашууну чечмелөөдө карама-каршылыктар келип чыккан учурда, орус тилиндеги текст колдонулат.

Кыргыз Республикасынын Министрлер Кабинети үчүн

Россия Федерациясынын Өкмөтү үчүн

_____________________________________

_____________________________________