Кыргыз Республикасынын Министрлер Кабинетинин (Кыргыз Республикасы менен Венесуэла Боливар Республикасынын ортосундагы Дипломаттык жана кызматтык паспорттордун ээлери үчүн визаларды жокко чыгаруу жөнүндө макулдашуунун долбоорун жактыруу тууралуу) тескемеси

КЫРГЫЗ РЕСПУБЛИКАСЫНЫН МИНИСТРЛЕР КАБИНЕТИНИН ТЕСКЕМЕСИ

2024-жылдын 20-сентябры № 559-т

Кыргыз Республикасы менен Венесуэла Боливар Республикасынын ортосундагы Дипломаттык жана кызматтык паспорттордун ээлери үчүн визаларды жокко чыгаруу жөнүндө макулдашуунун тиркелген долбоору принциптүү эмес мүнөздөгү өзгөртүүлөрдү жана толуктоолорду киргизүүнү эске алуу менен жактырылсын.

Кыргыз Республикасынын Министрлер Кабинетинин Төрагасы

А.Жапаров

Долбоор

Кыргыз Республикасы менен Венесуэла Боливар Республикасынын ортосундагы Дипломаттык жана кызматтык паспорттордун ээлери үчүн визаларды жокко чыгаруу жөнүндө МАКУЛДАШУУ

Мындан ары Тараптар деп аталуучу Кыргыз Республикасы жана Венесуэла Боливар Республикасы, эки мамлекеттин ортосундагы эки тараптуу мамилелерди бекемдөөгө ниеттенип, дипломаттык же кызматтык паспорттору бар жарандарынын сапарларын жеңилдетүүнү каалап, эки Тараптын кызыкчылыгында иштиктүү климатты өнүктүрүүгө ниеттенип, Тараптар төмөнкүлөр жөнүндө макулдашты: 1-берене. Аныктамалар Ушул Макулдашуунун максаттары үчүн:

1. "Тараптар" Кыргыз Республикасын жана Венесуэла Боливар Республикасын билдирет.

2. "Жарандар" ушул берененин 1-пунктунда аныкталгандай, Тараптардын биринин жарандарын билдирет.

3. "Макулдашуу" деп Тараптардын өз ара макулдугунун негизинде түзүлгөн жана эл аралык укуктун ченемдери менен жөнгө салынуучу ушул Макулдашуу түшүнүлөт.

2-берене. Максаты Ушул Макулдашуунун максаты Тараптардын дипломаттык жана кызматтык паспорттордун ээлери болгон жарандарынын кирүүсү жана жүрүүсү үчүн визаларды өз ара жокко чыгаруунун шарттарын белгилөө болуп саналат. 3-берене. Колдонуу чөйрөсү Ушул Макулдашуунун жоболору төмөнкү паспорттордун кайсынысы болбосун ээлерине жайылтылат:

1. Жарактуу мөөнөтү токсон (90) күндөн кем эмес болгон Кыргыз Республикасынын жарактуу дипломаттык жана кызматтык паспорттору.

2. Жарактуу мөөнөтү токсон (90) күндөн кем эмес болгон Венесуэла Боливар Республикасынын жарактуу дипломаттык жана кызматтык паспорттору.

4-берене. Кирүү жана жүрүү шарттары

1. Тараптардын 2-беренеде аталган жарактуу паспорттордун бирине ээ болгон жарандары экинчи Тараптын аймагына визасыз кире алышат жана токсон (90) күндүк максималдуу мөөнөттүн ичинде жүрө алышат.

2. Тараптардын биринин 2-беренеде аталган жарактуу паспорттордун бирине ээ болгон жарандары экинчи Тараптын аймагында жүргөн мезгилде иштөөгө уруксатты талап кылган кандайдыр бир иш менен алектене алышпайт.

3. Тараптардын биринин 2-беренеде аталган жарактуу паспорттордун бирине ээ болгон, өзүнүн жүрүүсүн ушул берененин 1-пунктунда уруксат берилгенден ашык мөөнөткө узартууну каалаган же иштөөгө уруксатты талап кылган кандайдыр бир иш менен алектенүүнү каалаган жарандары тиешелүү виза же иштөөгө уруксат алышы керек.

5-берене. Тараптардын жарандарынын милдеттенмелери

1. Тараптардын биринин 2-беренеде белгиленген паспорттордун бирине ээ болгон жарандары алар экинчи Тараптын аймагында жүргөндө колдонуудагы мыйзамдарды жана эрежелерди сакташы керек.

2. Тараптардын биринин 2-беренеде көрсөтүлгөн паспорттордун ээлери болгон жарандары экинчи Тараптын аймагына чек арадан расмий өткөрүү пункттары аркылуу гана кире алышат жана жүрө алышат.

3. Аларга коопсуздук, иммиграция, бажы жана саламаттык сактоо талаптары менен байланышкан чектөөлөрдөн же ушул паспорттордун ээлерине тиешелүү ар кандай башка мыйзамдуу колдонулуучу жоболордон тышкары эч кандай чектөөлөр жайылтылбайт.

6-берене. Аккредиттелген дипломатиялык жана консулдук персонал

1. Экинчи Тараптын аймагында жайгашкан дипломатиялык өкүлчүлүктөргө же консулдук мекемелерге же эл аралык уюмдардын өкүлчүлүктөрүнө дайындалган бир Тараптын жарандары, ошондой эле мындай адамдардын жакын туугандарынын курамына кирген, 2-беренеде аталган паспорттордун ээлери болгон алардын үй-бүлө мүчөлөрү экинчи Тараптын аймагына визасыз кире алышат жана өздөрү дайындалган бүткүл мөөнөттүн ичинде жүрө алышат.

2. Экинчи Тараптын Тышкы иштер министрлиги ушул Берененин 1-пунктунда белгиленген жарандарды алар анын аймагына киргенден кийин отуз (30) күндүн ичинде аккредитациялайт жана ошол Тараптын колдонулуучу улуттук эрежелерине ылайык визанын тиешелүү категориясы таризделет. Жөнөтүүчү мамлекет жогоруда аталган адамдардын аккредиттелген мамлекетке келгендиги, ошондой эле функциялары жөнүндө аккредиттелген мамлекетке дипломатиялык каналдар аркылуу алдын ала кабарлайт. Бул формалдуулук аккредиттөөчү мамлекеттин жарандары биротоло кетип жаткан мезгилде да сакталышы керек.

7-берене. Тараптардын милдеттенмелери

1. Ушул Макулдашуу ар бир Тараптын компетенттүү органдарынын экинчи Тараптын 2-беренеде көрсөтүлгөн паспорттордун биринин ээси болуп саналган жарандарынын алардын тиешелүү аймактарына кирүүсүнөн баш тартуу, алардын жүрүүсүнүн мөөнөтүн кыскартуу же алардын жүрүүсүнүн мөөнөтүн улуттук коопсуздукка, коомдук тартипке же саламаттык сактоого тиешелүү мыйзамдуу жоболорго же ченемдерге ылайык токтотуу укугун чектебейт.

2. Эгерде ушул Берененин жоболору башка Тараптын жаранына зыян келтирсе, жогоруда аталган чараларды көрүү үчүн жооптуу органдар бул жөнүндө экинчи Тарапка жазуу жүзүндө токтоосуз билдирет.

3. Тараптардын биринин жараны 2-беренеде аталган паспорттордун кайсынысы болбосун экинчи Тараптын аймагында жоготкон же алар уурдалган, бузулган же жараксыз деп табылган учурда, ошол паспорттун ээси тиешелүү болгон дипломатиялык же консулдук өкүлчүлүк ага жараны болгон Тараптын аймагына кайтууга мүмкүндүк берүүчү документтерди берет.

4. Жогоруда белгиленген дипломатиялык же консулдук өкүлчүлүк экинчи Тараптын компетенттүү органдарына мындай учурлар жөнүндө дипломатиялык каналдар аркылуу токтоосуз кабарлайт.

5. Ушул Макулдашуу Тараптардын эл аралык макулдашуулардан келип чыгуучу башка милдеттенмелерин, атап айтканда 1961-жылдын 18-апрелиндеги Дипломатиялык мамилелер жөнүндө Вена конвенциясынан жана 1963-жылдын 24-апрелиндеги Консулдук мамилелер жөнүндө Вена конвенциясынан келип чыгуучу милдеттенмелерди бузбайт.

8-берене. Паспорттордун көчүрмөлөрү менен алмашуу

1. Тараптар 2-беренеде белгиленген паспорттордун көчүрмөлөрү менен дипломатиялык каналдар аркылуу ушул Макулдашууга кол коюлган күндөн тартып отуз (30) күндүн ичинде алмашат.

2. Тараптардын бири 1-пунктта көрсөтүлгөн паспортторго кандайдыр бир өзгөртүүлөрдү киргизген учурда паспортуна өзгөртүүлөр киргизилген Тарап экинчи Тарапка өзгөртүлгөн паспорттордун көчүрмөлөрүн мындай өзгөртүүлөр күчүнө киргенге чейин отуз (30) күн мурда дипломатиялык каналдар аркылуу берет.

9-берене. Түзөтүүлөр

1. Ушул Макулдашуунун жоболору Тараптардын өз ара макулдугу боюнча кошумча макулдашуу жолу менен өзгөртүлүшү мүмкүн.

2. Түзөтүүлөрдү сунуштап жаткан Тарап экинчи Тарапка дипломатиялык каналдар аркылуу жазуу жүзүндө кабарлайт жана макулдашылгандан кийин мындай түзөтүүлөр ушул Макулдашуунун күчүнө киришине тиешелүү жоболорго ылайык күчүнө кирет.

10-берене. Улуттук мыйзамдарды урматтоо Тараптар бул Макулдашууну эки мамлекетте тең колдонулган мыйзамдарга ылайык ишке ашырат. 11-берене. Талаш-тартыштарды жөнгө салуу Ушул Макулдашуунун жоболорун чечмелөөгө же колдонууга байланыштуу келип чыккан ар кандай маселелер же талаш-тартыштар Тараптардын ортосунда дипломатиялык каналдар аркылуу чечилет. 12-берене. Чектөөлөр жана токтотуп туруу

1. Тараптардын ар бири дипломатиялык каналдар аркылуу экинчи Тарапка өзүнүн ниети жөнүндө жазуу жүзүндөгү билдирүүнү алдын ала жөнөтүү менен коомдук тартипти, коомдук коопсуздукту жана/же коомдук саламаттык сактоо жүйөлөрү боюнча ушул Макулдашуунун колдонулушун убактылуу, жарым-жартылай же толугу менен чектөөгө же токтотуп турууга укуктуу.

2. Ушул Макулдашуунун колдонулушун токтотуп турууну каалаган Тарап экинчи Тарапка токтотуп туруу жөнүндө кабарлайт жана себептерин жазуу жүзүндө дипломатиялык каналдар аркылуу көрсөтөт. Токтотуп туруу бир Тарап экинчи Тарапка кабарлагандан кийин жети (7) күндөн кийин күчүнө кирет.

3. Токтотуп туруу Тараптардын өз ара макулдугу боюнча, токтотуп туруунун себептери жоюлгандан кийин, экинчи Тарапка дипломатиялык каналдар аркылуу жазуу жүзүндө кабарлагандан кийин жокко чыгарылат.

4. Ушул Макулдашуунун колдонулушун токтотуп туруу 2-беренеде аталган жарактуу паспорттордун бирине ээ болгон, экинчи Тараптын аймагында эчак эле жүргөн Тараптардын биринин жарандарынын укуктук статусун козгобойт.

13-берене. Күчүнө кириши, колдонуу мөөнөтү жана колдонулушун токтотуу

1. Ушул Макулдашуу эки Тараптын тең мыйзамдарында каралган тиешелүү жол-жоболор жана талаптар аткарылгандыгы жөнүндө акыркы жазуу жүзүндөгү билдирүү дипломатиялык каналдар аркылуу алынгандан кийин отуз (30) күндөн кийин күчүнө кирет.

2. Ушул Макулдашуу беш (5) жылдык мөөнөткө түзүлөт жана эгерде Тараптардын бири башка Тарапка Макулдашууну узартпоо ниети жөнүндө дипломатиялык каналдар аркылуу алты (6) ай мурда жазуу жүзүндө билдирбесе, ушундай эле мөөнөттөргө узартылат.

3. Ушул Макулдашууну Тараптардын ар бири дипломатиялык каналдар аркылуу токтотушу мүмкүн. Мындай токтотуу экинчи Тараптан билдирүү алынгандан кийин токсон (90) күндөн кийин күчүнө кирет.

2024-жылдын _________________ эки (2) түп нускада, кыргыз, испан жана англис тилдеринде кол коюлду, мында бардык тексттер бирдей аутенттүү болуп саналат. Чечмелөөдө айырмачылыктар болгон учурда англис тилиндеги текст артыкчылыкка ээ болот.

Кыргыз Республикасы үчүн

Венесуэла Боливар Республикасы үчүн