Кыргыз Республикасынын кесиптик билим берүүнүн онлайн билим берүү уюму жөнүндө ТИПТҮҮ ЖОБО

Тиркеме

(Кыргыз Республикасынын Министрлер Кабинетинин 2025-жылдын 17-февралындагы № 77 токтомуна)

Кыргыз Республикасынын кесиптик билим берүүнүн онлайн билим берүү уюму жөнүндө ТИПТҮҮ ЖОБО

1. Кыргыз Республикасынын кесиптик билим берүүнүн онлайн билим берүү уюму жөнүндө типтүү жобо (мындан ары - Типтүү жобо) онлайн окутуу методу менен билим берүү кызматтарын көрсөтүүчү (башталгыч, орто жана жогорку) кесиптик билим берүү уюмдарынын онлайн билим берүү ишин уюштуруу тартибин аныктайт.

2. Бул Типтүү жободо төмөнкүдөй түшүнүктөр колдонулат:

1) окутуунун асинхрондук форматы - белгилүү бир жерге жана убакытка карабастан маалыматтык системалар жана байланыштын башка каражаттары аркылуу билим берүү процессинин катышуучуларынын өз ара аракеттенүүсүн болжолдогон онлайн окутуу форматы;

2) маалыматтык-коммуникациялык технологиялар - аппараттык-программалык комплексти жана телекоммуникациялар тармагын колдонуу менен жүзөгө ашырылуучу маалыматтарды издөө, чогултуу, сактоо, пайдалануу, жайылтуу процесстери, методдору;

3) окутуунун кредиттик технологиясы - академиялык кредиттерди топтоо менен дисциплиналарды окуп-үйрөнүүнүн ырааттуулугун билим алуучулардын тандоосунун жана өз алдынча пландаштыруусунун негизинде окутуу;

4) массалык ачык онлайн курс (мындан ары - МАОК) - электрондук окутуу технологияларын колдонуу менен жана Интернет аркылуу ачык жеткиликтүү болгон массалык интерактивдүү катышуу менен окутуу курсу;

5) кесиптик билим берүүнүн онлайн билим берүү уюму (мындан ары - онлайн билим берүү уюму) - кесиптик билим берүү программалары боюнча онлайн окутуу билим берүү кызматтарын көрсөтүүчү билим берүү уюму;

6) билим берүү порталы - маалыматтык-телекоммуникациялык тармактын жардамы менен билим берүү процессинин катышуучуларына маалыматтык ресурстарга жана билим берүү мүнөзүндөгү кызмат көрсөтүүлөргө жетүү үчүн арналган маалыматтык система;

7) онлайн курс - Интернет аркылуу, анын ичинде онлайн билим берүү уюмдарында мурда жазылган видео лекцияларды колдонуу менен билимдерди, көндүмдөрдү жана компетенцияларды алууга мүмкүндүк берүүчү окуу программасы;

8) онлайн окутуу - окутуу методу, анын алкагында билим алуучу белгилүү бир жерге жана убакытка карабастан маалыматтык-коммуникациялык технологиялар аркылуу билим алат;

9) прокторинг - бул атайын программаны, веб-камераны жана микрофонду колдонуу менен онлайн режимде тест жана башка экзамендерди тапшыруу учурунда билим алуучулардын иш-аракеттерин контролдоо технологиясы;

10) окутуунун синхрондуу форматы - маалыматтык системалардын жана башка байланыш каражаттарынын мүмкүнчүлүктөрүн пайдалануу менен билим берүү процессинин бардык катышуучуларынын реалдуу убакыт режиминде түз байланышын (стриминг) божомолдогон онлайн окутуу форматы;

11) окутууну башкаруу системасы - билим берүү процессинин бардык катышуучуларынын өз ара аракеттенүүсү менен онлайн окутуунун окуу материалдарынын жана куралдарынын топтомун камтыган окуу курстарын башкаруу үчүн платформа;

12) билим алуучунун санариптик изи - окутууну башкаруу системасында жазылган билим берүү ишинин натыйжалары жөнүндө верификацияланган маалыматтардын топтому;

13) санариптик билим берүү ресурстары - ар кандай маалыматтык санариптик булактардан алынган, окуу процессинин дидактикалык жана башка методикалык максаттарына жетүүгө багытталган санариптик түрдө берилген маалыматтардын жыйындысы.

3. Онлайн билим берүү уюмунун максаты болуп онлайн окутуу методун колдонуу менен башталгыч, орто же жогорку кесиптик билим берүү саналат.

4. Онлайн билим берүү уюмунун милдеттери болуп төмөнкүлөр саналат:

1) билим алуучулардын турган жерине карабастан онлайн окутуу методу менен билим алуучулардын билим берүү программаларын өздөштүрүүсүн камсыз кылуучу билим берүү чөйрөсүн түзүү;

2) билим алуучулардын онлайн режимде заманбап санариптик технологияларды колдонуу менен билим берүү программаларын өздөштүрүүсү үчүн шарттарды түзүү;

3) сапаттуу үзгүлтүксүз кесиптик билим берүү;

4) онлайн билим берүү уюмунун педагогикалык, илимий, окуу-көмөкчү, административдик-чарбалык кызматкерлерин даярдоо деңгээлин колдонулуучу технологияларга ылайык камсыз кылуу;

5) билим берүү процессине инновациялык механизмдерди киргизүү, билим берүү чөйрөсүн жакшыртуу боюнча чараларды ишке ашыруу;

6) билим алуучунун ар тараптуу инсандык өнүгүүсүнө көмөк көрсөтүү;

7) инклюзивдүү билим берүү принциптерин кеңейтүү жана колдонуу;

8) билим берүү процессинин катышуучуларынын маалыматтык коопсуздугун камсыз кылуу.

5. Онлайн окутуу методун колдонуу менен билим берүү программаларын ишке ашыруучу онлайн билим берүү уюмдарына карата төмөнкү талаптар белгиленет:

1) онлайн окутууну үзгүлтүксүз уюштуруу үчүн маалыматтык-технологиялык инфраструктуранын болушу, анын ичинде туруктуу тармактык туташуунун, сервердик жабдуунун, маалыматтарды сактоо системасынын, киберкоопсуздук системаларынын, Интернет тармагына туташтырууну камсыз кылган коммуникациялык байланыш каналдарынын, билим алуучунун инсандыгын идентификациялоо үчүн аутентификация системаларынын, өздөштүрүүлөрдү табуу системаларынын, онлайн прокторингдин болушу;

2) Кыргыз Республикасынын мыйзамдарына ылайык билим алуучулардын коопсуздугун камсыз кылууга жана жеке маалыматтарын коргоого карата талаптардын негизинде системалардын маалыматтык коопсуздугун жана маалыматтарды коргоону камсыз кылуу;

3) окуу процессин санариптик билим берүү ресурстары менен камсыз кылуу;

4) билим алуучулардын билим берүү порталына жана санариптик билим берүү ресурстарына жетүүсүн камсыз кылуу;

5) билим берүү кызматтарын көрсөтүү боюнча санариптик сервистерге: сабактардын электрондук расписаниесине, билим алуучулардын окуудагы жетишкендиктерин академиялык контролдоонун бардык түрлөрүнө, өзүн-өзү баалоо системаларына; электрондук китепканага; электрондук документ жүгүртүүгө толук жеткиликтүүлүктү камсыз кылуу;

6) өзгөчө билим берүү муктаждыктары бар билим алуучуларды онлайн окутуу үчүн шарттарды камсыз кылуу;

7) окуу процессинин сапатын камсыз кылуунун ички системасына ылайык билим берүү кызматтарынын сапатына мониторинг жүргүзүү системасынын болушу.

6. Онлайн билим берүү уюму "Билим берүү жөнүндө" Кыргыз Республикасынын Мыйзамына, ушул Типтүү жобого ылайык иш жүргүзөт жана онлайн окутуу методу менен кесиптик билим алуу укугун ишке ашыруу үчүн шарттарды түзөт.

7. Менчигинин формасына карабастан онлайн билим берүү уюмун түзүү, башкаруу, кайра уюштуруу жана жоюу Кыргыз Республикасынын граждандык мыйзамдары, "Билим берүү жөнүндө" Кыргыз Республикасынын Мыйзамы жана билим берүү уюмунун уставы менен жөнгө салынат.

8. Кесиптик билим берүүнүн билим берүү программаларын ишке ашырууда онлайн билим берүү уюму тарабынан билим берүү ишин жүзөгө ашыруучу жер болуп бул уюмдун юридикалык каттоодон өткөн жери саналат.

9. Онлайн билим берүү уюму билим берүү ишине лицензия алган учурдан тартып кесиптик билим берүү программаларын ишке ашыруу боюнча билим берүү ишин жүргүзүү укугуна ээ болот. Орто жана жогорку кесиптик билим берүүнүн онлайн билим берүү уюму квалификацияларды ыйгаруу жана билими жөнүндө мамлекеттик үлгүдөгү документтерди берүү укугуна аккредитациядан өткөндөн кийин ээ болот.

10. Онлайн билим берүү уюмдарын лицензиялоо, аккредитациялоо ушул Типтүү жобонун онлайн окутуу боюнча атайын талаптарын эске алуу менен Кыргыз Республикасынын лицензиялоо жана билим берүү чөйрөсүндөгү мыйзамдарында белгиленген тартипте жүзөгө ашырылат.

11. Онлайн билим берүү уюмуна билим алуучуларды кабыл алуу Кыргыз Республикасынын билим берүү чөйрөсүндөгү мыйзамдарына ылайык жүргүзүлөт.

12. Онлайн билим берүү уюму билим берүү программаларын кесиптик билим берүүнүн тиешелүү деңгээлиндеги багыттар/адистиктер/кесиптер боюнча мамлекеттик билим берүү стандарттарынын негизинде ишке ашырат.

13. Типтүү жобого тиркелген тизмекте көрсөтүлгөн адистиктерди даярдоо багыттарын кошпогондо, онлайн окутуу методун колдонуу менен билим берүү процесси билим берүү уюму тарабынан жүзөгө ашырылат.

14. Башталгыч кесиптик билим берүү уюмдарында онлайн окутуу методу менен IT-технология жаатындагы кесиптер боюнча билим берүү программаларын ишке ашырууга жол берилет.

15. Онлайн окутуунун билим берүү программасы окутуунун асинхрондук жана синхрондук форматтарынын катышын чагылдырат, мында синхрондук сабактардын катышы МАОКту колдонуу менен өздөштүрүү каралган дисциплиналарды кошпогондо, ар бир дисциплинанын жалпы көлөмүнүн 20%ынан кем эмесин түзүшү керек.

16. Онлайн окутуу онлайн билим берүү уюмунун билим берүү порталы аркылуу жүргүзүлөт, ал төмөнкүлөрдү камтыйт:

1) окутуу процессин окуу-методикалык жактан камсыздоону башкаруу системасын, анын ичинде курстун элементтеринин камтылган түзүмүн: окутуунун натыйжаларын жана окутуунун натыйжаларына жетишүүнү текшерүүгө багытталган контролдук тапшырмаларды милдеттүү түрдө көрсөтүү менен дисциплиналар боюнча жумушчу окуу программаларын (силлабустарды), лекцияларды, практикалык, лабораториялык тапшырмаларды, курсту баалоо саясатын, аудио-, видеоконтентти, электрондук документтерди, сүрөттөрдү, медиасервистерге гипершилтемелерди, электрондук китепкананы, МАОК платформасын, билим берүү процессинин катышуучулары менен кайтарым байланыш үчүн жеткиликтүү корпоративдик каналдарды, топтук сабактарды уюштурууну, окутуучу - билим алуучу, билим алуучу - билим алуучу, окутуучу - окутуучу, администрация - билим алуучунун өз ара аракеттенүүлөрүн;

2) билим берүү процессинин катышуучулары жөнүндө маалыматтарды башкаруу системасын: жеке эсептик каттоого кирүү, билим алуучулардын жетишүүсү жана катышуусу, окуу процессинин ачыктыгы, окуу сабактарынын электрондук расписаниеси, окуу дисциплиналарына онлайн каттоо, профессордук-окутуучулук курам жана биргелешип башкаруунун катышуучулары жөнүндө маалыматтар;

3) илимий жана практикалык изилдөөлөрдү башкаруу системасын: изилдөө долбоорлорунун, басылмалардын, илимий иштеп чыгуулардын, илимпоздордун жана изилдөө натыйжаларынын базасы.

17. Онлайн билим берүү уюму төмөнкүлөрдү камсыз кылат:

1) билим алуучуларды онлайн билим берүү уюмунун илимий-изилдөө иштерине жана социалдык-маданий турмушуна тартууну;

2) онлайн билим берүү уюмунун билим берүү порталында билим берүү программаларына ылайык санариптик контентти жайгаштырууну;

3) төмөнкү талаптарга жооп берген санариптик контенттин сапатын: толуктугу, ар түрдүүлүгү, педагогикалык дизайндын болушу, мультимедиялуулугу;

4) онлайн окутууну өнүктүрүү боюнча башка билим берүү уюмдары менен өз ара аракеттенүүнү;

5) Кыргыз Республикасынын жеке маалыматтарды коргоо жаатындагы мыйзамдарын сактоону.

18. Билим алуучуларды кабыл алуудан баштап окууну аяктаганга чейин консультациялык коштоо үчүн онлайн билим берүү уюму төмөнкүлөрдү камсыз кылат:

1) өзүнүн функциялык милдеттеринин алкагында онлайн окутууда зарыл компетенцияларга ээ администрациялык-башкаруучу, окутуучу, окуу-көмөкчү жана тейлөөчү персоналдын болушун;

2) жеткиликтүү корпоративдик байланыш каналдарынын болушун;

3) онлайн окутууну уюштуруу боюнча көрсөтмө материалдарды иштеп чыгууну жана пайдаланууну, аларды онлайн билим берүү уюмунун расмий сайтында жарыялоону;

4) окуу процессинде онлайн билим берүү уюмунун санариптик ресурстарынын презентациясы менен билим алуучулар үчүн адаптациялык жумаларды уюштурууну.

19. Билим алуучуларды кабыл алуудан баштап окууну аяктаганга чейин техникалык коштоо үчүн онлайн билим берүү уюму төмөнкүлөрдү камсыз кылат:

1) онлайн окутууга тартылган санариптик инфраструктуранын жана санариптик платформалардын, мобилдик тиркемелердин жеткиликтүүлүгүн жана үзгүлтүксүз иштешин;

2) өзүнчө жайда лицензиялык программалык камсыздоо менен онлайн курстардын, электрондук ресурстардын студиялык өндүрүшүн камсыз кылган программалык-аппараттык комплекстин иштешин;

3) онлайн окутууга тартылган санариптик инфраструктуранын жана санариптик платформалардын маалыматтык коопсуздугун.

20. Билим алуучуларды кабыл алуудан баштап окууну аяктаганга чейин методикалык коштоо үчүн онлайн билим берүү уюму төмөнкүлөрдү камсыз кылат:

1) заманбап санариптик билим берүү технологияларын колдонууну;

2) онлайн окутууну уюштуруу боюнча методикалык материалдарды иштеп чыгууну;

3) санариптик платформаларда онлайн окутуу дисциплиналары боюнча окуу-методикалык материалдарды жана санариптик билим берүү ресурстарын иштеп чыгууну жана жайгаштырууну.

21. Жеке маалыматтарды чогултуу, сактоо жана пайдалануу онлайн билим берүү уюмунда Кыргыз Республикасынын жеке маалыматтар чөйрөсүндөгү мыйзамдарынын талаптарын сактоо менен ички колдонуу үчүн гана жүргүзүлөт. Билим берүү процессинин катышуучуларынын жеке маалыматтарынын купуялуулугу үчүн жоопкерчиликти онлайн билим берүү уюму тартат.

22. Онлайн билим берүү уюму билим алуучулардын жеке маалыматтарын Кыргыз Республикасынын аймагында жайгашкан, ата мекендик провайдерлер жана/же онлайн билим берүү уюмунун IT-адистери башкарган, тейлеген жана колдогон серверлерде жайгаштырууну камсыз кылат.

23. Онлайн билим берүү уюму билим алуучу менен келишим түзөт, анда билим алуучунун техникалык жактан камсыздалышына карата талаптар, жеке маалыматтарын иштеп чыгууга макулдук берүү жана онлайн платформанын колдонуучулук келишиминин шарттарын кабыл алуу каралган.

24. Билим берүү процессинин натыйжалуулугуна мониторинг жүргүзүү жана талдоо онлайн билим берүү уюму тарабынан билим берүү процессинин бардык катышуучуларынын санариптик изин байкоо аркылуу жүргүзүлөт.

25. Онлайн окутууда академиялык чынчылдык принциптерин сактоо менен жазуу жүзүндөгү иштин бардык түрлөрү көчүрүп алуу предметине милдеттүү түрдө текшерилет.

26. Билим алуучулардын жетишүүсүн учурдагы контролдоо жана орто аралык аттестациялоо формасы онлайн билим берүү уюму тарабынан өз алдынча аныкталат. Онлайн режимде жетишүүнү учурдагы контролдоодо жана орто аралык аттестациялоодо онлайн прокторинг технологиясы колдонулат.

27. Тиешелүү мамлекеттик билим берүү стандартынын талаптарынын деңгээлинде билим берүү программасын толук көлөмдө аткарган билим алуучулар жыйынтыктоочу мамлекеттик аттестацияга киргизилет. Онлайн билим берүү уюмунун бүтүрүүчүлөрүн жыйынтыктоочу мамлекеттик аттестациялоо прокторинг системасын камсыз кылуу менен күндүзгү же онлайн режимде жүргүзүлөт.

28. Онлайн билим берүү уюму билим алуучулар арасында билим берүү порталынын, билим берүү программаларынын жана (же) дисциплиналардын/модулдардын, санариптик контенттин жана онлайн окутууга тартылган окутуучулардын сапатынын дал келиши боюнча анкета жана (же) сурамжылоо жүргүзөт.

29. Онлайн билим берүү уюмундагы билим берүү процессинин катышуучулары болуп билим алуучулар, педагогикалык, окуу-көмөкчү жана административдик кызматкерлер, биргелешип башкаруунун катышуучулары саналат.

30. Онлайн билим берүү уюму кабыл алууда тапшыруучуларды онлайн окутуу методун колдонуу менен билим берүү процессин жөнгө салуучу устав жана башка укук белгилөөчү документтер менен тааныштырууга милдеттүү.

31. Билим алуучулардын, педагогикалык кызматкерлердин укуктары жана милдеттери онлайн билим берүү уюмунун уставы жана Кыргыз Республикасынын билим берүү чөйрөсүндөгү мыйзамдары менен белгиленет.

32. Онлайн билим берүү уюмунда окутууга онлайн окутуу боюнча компетенцияга, методикага жана технологияларга ээ болгон педагогикалык кызматкерлерге уруксат берилет.

33. Онлайн билим берүү уюмун башкаруу Кыргыз Республикасынын билим берүү чөйрөсүндөгү мыйзамдарына, ушул Типтүү жобого жана онлайн билим берүү уюмунун уставына ылайык жүргүзүлөт.

34. Онлайн билим берүү уюмун түздөн-түз жетектөөнү жетекчи ишке ашырат, аны кызмат ордуна дайындоо жана кызмат ордунан бошотуу Кыргыз Республикасынын билим берүү чөйрөсүндөгү мыйзамдарына ылайык жүргүзүлөт.

35. Педагогикалык жана башка кызматкерлерди кызматка дайындоо жана кызматтан бошотуу Кыргыз Республикасынын эмгек мыйзамдарына жана Кыргыз Республикасынын билим берүү чөйрөсүндөгү мыйзамдарына ылайык онлайн билим берүү уюмунун жетекчиси тарабынан жүзөгө ашырылат.

36. Онлайн билим берүү уюмунда биргелешип башкаруунун формалары болуп педагогикалык жана илимий кеңештер, көзөмөлчүлүк кеңеши, ата-энелер комитети жана башка кеңештер саналат.

37. Онлайн билим берүү уюмунда биргелешип башкаруу органдарын шайлоо тартиби жана алардын ыйгарым укуктары Кыргыз Республикасынын билим берүү чөйрөсүндөгү мыйзамдарына ылайык онлайн билим берүү уюмунун уставында аныкталат.

38. Онлайн билим берүү уюмун каржылоо булактары болуп төмөнкүлөр саналат:

1) республикалык жана жергиликтүү бюджеттер;

2) билим берүү уюмдарынын уюштуруучуларынын каражаттары, ошондой эле жеке жана юридикалык жактардын, чет мамлекеттердин, эл аралык уюмдардын ыктыярдуу төгүмдөрү;

3) Кыргыз Республикасынын мыйзамдарында тыюу салынбаган акы төлөнүүчү билим берүү кызматтарын көрсөтүүнүн натыйжасында жана башка иш-аракеттерден алынган онлайн билим берүү уюмунун өздүк каражаттары;

4) депозиттик салымдардан түшкөн кирешелер;

5) кредиттер жана гранттар;

6) Кыргыз Республикасынын мыйзамдарына каршы келбеген башка булактар.

39. Онлайн билим берүү уюмдары Кыргыз Республикасынын банктык мыйзамдарына ылайык банктык жана кредиттик уюмдарда валюталык эсептерге ээ болушу мүмкүн.

40. Акы төлөнүүчү билим берүү кызмат көрсөтүүлөрдүн наркы билим берүү чөйрөсүндөгү мыйзамдарга ылайык онлайн билим берүү уюмунун жетекчиси тарабынан бекитилет.

41. Онлайн билим берүү уюму чет өлкөлүк жана эл аралык уюмдар, мекемелер менен түз байланыш түзүүгө укуктуу.

Кыргыз Республикасынын кесиптик билим берүүнүн онлайн билим берүү уюму жөнүндө типтүү жобого тиркеме

Онлайн-окутуу методун колдонуу менен билим алууга жол берилбеген орто жана жогорку кесиптик билим берүү адистиктеринин жана даярдоо багыттарынын ТИЗМЕГИ

1. Орто кесиптик билим берүү адистиктери:

№

Коду

Даярдоо адистиктеринин аталышы

060000. Саламаттык сактоо жана медициналык илимдер

1

060101

Дарылоо иши

2

060102

Акушердик иш

3

060104

Медициналык-профилактикалык иш

4

060106

Ортопедиялык стоматология

5

060107

Профилактикалык стоматология

6

060108

Фармация

7

060109

Медайымдык иш

8

060110

Лабораториялык диагностика

9

060111

Медициналык оптика

10

060112

Медициналык массаж

11

060113

Физикалык терапия

070000. Маданият жана искусство

12

070102

Аспаптык аткаруучулук (аспаптардын түрлөрү боюнча)

13

070104

Вокалдык искусство

14

070106

Хор дирижерлугу

15

070109

Эстрада музыкалык искусствосу (түрлөрү боюнча)

16

070113

Музыканын теориясы

17

070114

Соло жана хор элдик ырдоо

18

070115

Музыкалык үн оператору чеберчилиги

19

070201

Актердук искусство

20

070202

Цирк искусствосу

21

070203

Дүйнөлүк көркем маданият

22

070206

Театралдык-декорациялык искусство

23

070301

Балет искусствосу

24

070302

Хореография искусствосу

25

070501

Реставрация

26

070802

Декоративдик-колдонмо искусство жана элдик кол өнөрчүлүк (түрлөрү боюнча)

27

070903

Скульптура

28

070907

Живопись

29

071402

Социалдык-маданий ишмердүүлүк жана элдик көркөм чыгармачылык (түрлөрү боюнча)

2. Бүтүрүүчүгө "бакалавр" жана "магистр" квалификациясын ыйгаруу менен ырасталган жогорку кесиптик билим берүүнүн даярдоо багыттары:

№

Коду

Бакалавр, магистр даярдоо багыттарынын аталышы

560000. Саламаттык сактоо

30

560100

Коомдук саламаттык сактоо

570000. Маданият жана искусство

31

570100

Искусствонун тарыхы жана теориясы

32

570200

Музыка искусствосу

33

570300

Театр искусствосу

34

570500

Көркөм сүрөт искусствосу

35

570900

Реставрация

36

571000

Элдик көркөм маданият

37

571100

Телекөрсөтүү

770000. Аскердик билим берүү

38

770100

Командалык тактикалык мотоаткычтар аскерлери

3. Бүтүрүүчүгө "адис" квалификациясын ыйгаруу менен ырасталган жогорку кесиптик билим берүүнүн даярдоо багыттары:

№

Коду

Адистиктин аталышы

560000. Саламаттык сактоо

39

560001

Дарылоо иши

40

560002

Педиатрия

41

560003

Медициналык-профилактикалык иш

42

560004

Стоматология

43

560005

Фармация

44

560006

Медайымдык иш

570000. Маданият жана искусство

45

570001

Искусство таануу

46

570002

Театр таануу

47

570003

Хореография искусствосунун тарыхы жана теориясы

48

570004

Музыка таануу

49

570005

Кино таануу

50

570006

Кино операторлук

51

570007

Көркөм сүрөт искусствосунун тарыхы жана теориясы

52

570008

Аспаптык аткаруучулук (аспаптардын түрлөрү боюнча)

53

570009

Вокалдык искусство (вокалдык искусствонун түрлөрү боюнча)

54

570010

Дирижерлук (аткаруучу коллективдердин түрлөрү боюнча)

55

570011

Композиция

56

570012

Эстрада музыкалык искусствосу (түрлөрү боюнча)

57

570013

Үн режиссурасы (колдонуу чөйрөсү боюнча)

58

570014

Актердук искусство

59

570015

Режиссура (колдонуу чөйрөсү боюнча)

60

570016

Театралдык-декорациялык искусство

61

570017

Хореография искусствосу

62

570018

Хореограф режиссурасы

63

570019

Хореография педагогикасы

64

570020

Дизайн

65

570021

Интерьер жана жабдуулар

66

570023

Монументалдык-декоративдик искусство

67

570022

Декоративдик-колдонмо искусство жана элдик кол өнөрчүлүк

68

570024

Живопись

69

570025

Графика

70

570026

Скульптура

71

570027

Адабий чыгармачылык

72

570028

Элдик көркөм чыгармачылык

73

570029

Социалдык-маданий ишмердүүлүк