Тамекини жана никотинди (тамеки жана никотин камтылган заттарды) чегүү үчүн атайын орундарды/жайларды жабдууга карата талаптар (КР Министрлер Кабинетинин токтомуна)

Тиркеме

(Кыргыз Республикасынын Министрлер Кабинетинин 2025-жылдын 17-январындагы № 25 токтомуна)

Тамекини жана никотинди (тамеки жана никотин камтылган заттарды) чегүү үчүн атайын орундарды/жайларды жабдууга карата ТАЛАПТАР

1. Тамекини жана никотинди (тамеки жана никотин камтылган заттарды) чегүү үчүн атайын орундарды/жайларды жабдууга карата талаптар (мындан ары - Талаптар) "Кыргыз Республикасынын жарандарынын ден соолугун тамекини, никотинди керектөөнүн кесепеттеринен жана айланадагы тамеки түтүнүнүн жана аэрозолдун таасиринен коргоо жөнүндө" Кыргыз Республикасынын Мыйзамына (мындан ары - Мыйзам) ылайык тамеки заттарын (анын ичинде тамекини ысытуунун электрондук системаларынын жардамы менен ысытылуучу тамекиси бар буюмдарды), тамеки жана тамеки аралашмасын (кальяндын жардамы менен) жана никотин камтылган суюктукту же никотинди камтыган гелди (никотинди жеткирүүчү электрондук системалардын жардамы менен) чегүү үчүн агайын орундарды/жайларды жабдууга карата санитардык-гигиеналык жана өрткө каршы ченемдерди аныктайт.

2. Бул талаптардын ченемдери тамеки жана никотин камтылган заттардын бардык түрүн чегүүгө Мыйзам менен тыюу салынган жерлерге жайылтылбайт.

3. Коомдук жайларда тамеки чегүүгө Мыйзамга ылайык тыюу салынган жерлерден тышкары, ачык абада уруксат берилет.

4. Бул талаптар юридикалык жактар жана жеке ишкерлер үчүн Мыйзамда белгиленген учурларда тамекини жана никотинди (тамеки жана никотин камтылган заттарды) чегүү үчүн атайын жайларды жабдууда негизги документ болуп саналат.

5. Мыйзамда каралган учурларда тамекини жана никотинди (тамеки жана никотин камтылган заттарды) чегүү атайын жайларда уюштурулушу мүмкүн.

6. Тамекини жана никотинди (тамеки жана никотин камтылган заттарды) чегүү үчүн атайын жай төмөнкүдөй болууга тийиш:

1) тамекини жана никотинди чегүү процессинде бөлүнүп чыккан булганууларды ассимиляциялоону камсыз кылган, механикалык түрткү берүүчү тартып-соруп алма желдеткич системасы менен жабдылган, ошондой эле булганыч абанын чектеш жайларга кирүүсүнө тоскоолдук кылуучу жалпы соруп алма желдеткич системасынан өзүнчө жабык жайда жайгаштырылган;

2) тамеки чегүүгө тыюу салынган имараттын негизги жайларынан (бөлмөлөрүнөн) обочолонуп турган, тамекини жана никотинди (тамеки жана никотин камтылган заттарды) чегүү процессинде бөлүнүп чыккан булганууга тамеки чекпегендер кабылбаш үчүн, тамекини жана никотинди чегүү процессинде бөлүнүп чыккан булгануулардын чектеш жайларга, анын ичинде санитардык-тиричилик жайларга киришине тоскоол болуучу полдон шыпка чейин дубалы, эшиги же окшош түзүлүшү, чектелген аянты болушу керек. Тамеки чегүү үчүн өлчөмү 6 кв. метрден кем эмес кабина түрүндөгү атайын бөлүнгөн жайларды жайгаштырууга жол берилет;

3) күл түшүргүчтөр жана (же) тамекинин калдыктарын чогултуу үчүн урналар менен жабдылган, тамекинин калдыктарын жана ширеңкени өчүрүүнү камсыз кылуу максатында урнаны кум жана башка күйбөй турган соруучу материалдар менен толтурууга, бөлмөгө тамекинин түтүнүнөн жана (же) жытынан арылтууга мүмкүндүк берүүчү каражаттарды жана өрт өчүргүчтү (көлөмү 5 килограммдан кем эмес) жайгаштырууга жол берилет;

4) "Тамеки чегүү үчүн жай" деген жазуу же белги жайдын (бөлмөнүн) сыртындагы көрүнөө жерге илинет;

5) жуучу жана дезинфекциялоочу каражаттарды колдонуу менен күнүмдүк нымдуу тазалоо жүргүзүлөт, урналар жана күл түшүргүчтөр күн сайын жана толгонуна жараша тамекинин калдыктарынан жана таштандылардан бошотулуп, күн сайын жуучу жана дезинфекциялоочу каражаттар менен жуулат.

7. Тамекини жана никотинди (тамеки жана никотин камтылган заттарды) чегүү үчүн атайын орундар ачык абада уюштурулат:

1) менчигинин формасына карабастан уюмдардын жана ишканалардын аймактарында;

2) маданий-массалык, спорттук иш-чараларды, чогулуштарды, акцияларды өткөрүү мезгилинде ачык аянтчаларда, пляждардын аймагынын чектеринде;

3) жергиликтүү өз алдынча башкаруу органдары тарабынан аныкталган ачык абадагы коомдук жайларда.

8. Тамекини жана никотинди (тамеки жана никотин камтылган заттарды) чегүү үчүн атайын орундар имараттын ичине тамеки түтүнүнүн же аэрозолдун таралышына жол бербөө максатында уюмдардын жайларынын терезелеринен жана кире бериштеринен алыс орнотулат жана урна менен жабдылат.

9. Мамлекеттик органдар, жергиликтүү өз алдынча башкаруу органдары, менчигинин формасына карабастан юридикалык жактар, жеке ишкерлер урналарды тамекинин калдыктарынан жана таштандылардан күн сайын тазалоону камсыз кылышат.