Кыргыз Республикасынын өзгөчө маанилүү маалыматтык инфратүзүм объекттерин категорияга бөлүү тартиби жөнүндө жобо (Кыргыз Республикасынын Министрлер Кабинетинин токтомуна)

1-тиркеме

(Кыргыз Республикасынын Министрлер Кабинетинин2024-жылдын 29-ноябрындагы № 716 токтомуна)

Кыргыз Республикасынын өзгөчө маанилүү маалыматтык инфратүзүм объекттерин категорияга бөлүү тартиби жөнүндө ЖОБО

1. Ушул Жобо Кыргыз Республикасынын өзгөчө маанилүү маалыматтык инфратүзүм (мындан ары - ӨМИ) объекттерин категорияга бөлүү тартибин аныктайт.

2. ӨМИ объекттерин категорияга бөлүү туруктуу иштеген ӨМИ объекттерин категорияга бөлүү боюнча комиссия (мындан ары - категорияга бөлүү боюнча комиссия) тарабынан жүзөгө ашырылат, анын курамы ушул Жобого ылайык аныкталат.

3. Оперативдүү жана чарбалык башкаруу укугунда, ошондой эле менчик, ижара укугунда же Кыргыз Республикасынын мыйзамдарында белгиленген башка негизде ӨМИ субъекттерине таандык болгон мамлекеттик башкаруу, мамлекеттик электрондук кызмат көрсөтүүлөр секторунда, саламаттык сактоо, илим, транспорт, телекоммуникациялар жана байланыш чөйрөлөрүндө, кредиттик-финансы чөйрөсүндө, коргоо секторунда, электр энергиясын генерациялоо жана бөлүштүрүү тармагында, отун өнөр жайында, тамак-аш өнөр жайында жана тоо-кен казуу өнөр жайында иштөөчү ӨМИ объекттери - маалыматтык системалар, маалыматтык-телекоммуникациялык системалар, электр байланыш тармактары, Кыргыз Республикасынын жалпы пайдалануудагы электр байланыш тармагы, маалымат базалары, маалыматтарды иштеп чыгуу борборлору жана автоматташтырылган башкаруу системалары категорияга бөлүштүрүлүүгө тийиш.

4. ӨМИ объекттеринин маанилүүлүк критерийлерине жана алардын маанилеринин көрсөткүчтөрүнө шайкештигин аныктоо Кыргыз Республикасынын Министрлер Кабинети тарабынан бекитилүүчү Кыргыз Республикасынын өзгөчө маанилүү маалыматтык инфратүзүм объекттеринин маанилүүлүк критерийлеринин көрсөткүчтөрүнүн тизмегинин (мындан ары - маанилүүлүк критерийлеринин көрсөткүчтөрүнүн тизмеги) негизинде жүргүзүлөт.

5. Категорияга бөлүү төмөнкүлөрдү камтыйт:

а) ӨМИ субъектинин функцияларын (ыйгарым укуктарын) аткаруунун же ишинин түрлөрүн жүзөгө ашыруунун алкагында ушул Жобонун 3-пунктунда көрсөтүлгөн ӨМИ объекттерин аныктоо;

б) ӨМИ субъекттеринин функцияларын (ыйгарым укуктарын) аткаруунун же ишинин түрлөрүн жүзөгө ашыруунун алкагында башкаруу, технологиялык, өндүрүштүк, финансы-экономикалык жана (же) башка процесстерди аныктоо, аларды бузуу жана (же) токтотуу терс социалдык, экономикалык, экологиялык кесепеттерге, өлкөнүн коргонуусун, мамлекеттин коопсуздугун жана укук тартибин камсыздоо (мындан ары - өзгөчө маанилүү процесстер) үчүн кесепеттерге алып келиши мүмкүн;

в) өзгөчө маанилүү процесстерди камсыз кылуу үчүн зарыл маалыматты иштеп чыгуучу жана (же) өзгөчө маанилүү процесстерди башкарган, контролдогон же мониторинг жүргүзгөн ӨМИ объекттерин аныктоо;

г) категорияга бөлүүгө тийиш болгон ӨМИ объекттеринин реестрин (мындан ары - объекттердин реестри) түзүү;

д) ӨМИ объекттеринде киберинцидент жана киберчабуул пайда болгон учурда мүмкүн болгон кесепеттердин масштабынын маанилүүлүк критерийлеринин көрсөткүчтөрүнүн тизмегине ылайык баа берүү;

е) ӨМИ объекттеринин ар бирине маанилүүлүк категориясынын бирин ыйгаруу же болбосо аларга маанилүүлүк категориясынын бирин ыйгаруу жана ӨМИ объекттерине киргизүү зарылдыгы жоктугу жөнүндө чечим кабыл алуу.

6. Категорияга бөлүүнүн жыйынтыгы боюнча ӨМИ объектине маанилүүлүк критерийлеринин көрсөткүчтөрүнүн тизмегине ылайык эң жогорку маанидеги маанилүүлүк категориясы ыйгарылат.

Мындай көрсөткүчтүн бирден ашык мааниси белгиленген маанилүүлүк критерийлеринин ар бир көрсөткүчү үчүн маанилүүлүк критерийлеринин көрсөткүчүнө баа берилет, ал эми маанилүүлүк категориясы мындай көрсөткүчтүн эң жогорку мааниси боюнча ыйгарылат. Эгерде ӨМИ объекти маанилүүлүк критерийлеринин көрсөткүчтөрүнүн бири боюнча биринчи категорияга киргизилсе, маанилүүлүк критерийлеринин калган көрсөткүчтөрү боюнча эсептөө жүргүзүлбөйт. Эгерде ӨМИ объекти үчүн маанилүүлүк критерийлеринин бири да колдонууга ылайыксыз болсо же ӨМИ объекти маанилүүлүк критерийлеринин бир дагы көрсөткүчүнө жана анын маанисине шайкеш келбесе, маанилүүлүк категориясы берилбейт.

7. Маанилүүлүктүн үч категориясы белгиленет. Биринчиси - эң жогорку категория, үчүнчүсү - эң төмөнкү категория.

8. Түзүлүүчү ӨМИ объектине карата, анын ичинде капиталдык курулуш объектин түзүүнүн алкагында, ӨМИ субъекти ӨМИ объектине талаптарды түзгөн учурда, маанилүүлүк категориясын ӨМИ субъектинин өзгөчө маанилүү процесстери тууралуу колдо болгон баштапкы маалыматтарды эске алып, категорияга бөлүү боюнча комиссия аныктайт.

Ушул пункттун биринчи абзацында көрсөтүлгөн түзүлүүчү ӨМИ объекти үчүн маанилүүлүк категориясы аны долбоорлоо учурунда такталышы мүмкүн.

9. ӨМИ субъектинин бирине таандык, бирок башка ӨМИ субъектине таандык технологиялык жана (же) өндүрүштүк жабдууну контролдоо жана башкаруу максатында колдонулган объекттер үчүн категорияга бөлүү технологиялык жана (же) өндүрүштүк жабдууга ээ болгон ӨМИ субъекти берген баштапкы маалыматтардын негизинде жүргүзүлөт.

10. Киберкоопсуздукту камсыздоо чөйрөсүндөгү ыйгарым укуктуу мамлекеттик органдын чечими менен ӨМИ объекттерин категорияга бөлүү үчүн категорияга бөлүү боюнча комиссия түзүлөт, анын курамына төмөнкүлөр кирет:

а) киберкоопсуздукту камсыздоо чөйрөсүндөгү ыйгарым укуктуу мамлекеттик органдын өкүлдөрү;

б) ӨМИ субъектинин өкүлдөрү;

в) санариптештирүү жаатындагы ыйгарым укуктуу мамлекеттик органдын өкүлдөрү;

г) жеке маалыматтар жаатындагы ыйгарым укуктуу мамлекеттик органдын өкүлдөрү.

11. Киберкоопсуздукту камсыздоо чөйрөсүндөгү ыйгарым укуктуу мамлекеттик органдын чечими боюнча категорияга бөлүү боюнча комиссиянын курамына ушул Жобонун 10-пунктунда көрсөтүлбөгөн жактар кириши мүмкүн.

12. Категорияга бөлүү боюнча комиссияны киберкоопсуздукту камсыздоо чөйрөсүндөгү ыйгарым укуктуу мамлекеттик органдын өкүлү (мындан ары - комиссиянын жетекчиси) жетектейт.

13. Категорияга бөлүү боюнча комиссия ишинин жүрүшүндө:

а) ӨМИ субъектинин милдеттерин (ыйгарым укуктарын) аткаруунун же ишинин түрлөрүн жүзөгө ашыруунун алкагында ушул Жобонун 3-пунктунда көрсөтүлгөн ӨМИ объекттерин аныктайт;

б) ӨМИ субъектинде өзгөчө маанилүү процесстердин бар экендигин аныктайт;

в) өзгөчө маанилүү процесстерди аткарууну камсыздоо үчүн зарыл маалыматты иштеп чыга турган ӨМИ объекттерин аныктайт жана (же) өзгөчө маанилүү процесстерди башкарат, контролдойт же мониторинг жүргүзөт, объекттердин реестрине киргизүү үчүн сунуштарды даярдайт, ошондой эле жаңы түзүлгөн ӨМИ объекттерин категорияга бөлүү зарылдыгына баа берет;

г) ӨМИ объекттерине карата бузуучулардын мүмкүн болгон иш-аракеттерин, ошондой эле башка киберкоркунуч булактарын карайт;

д) ӨМИ объекттеринде киберинциденттерге алып келиши мүмкүн болгон киберкоркунучтарга талдоо жүргүзөт;

е) ӨМИ объекттеринде киберинциденттер жана киберчабуулдар пайда болгон учурда маанилүүлүк критерийлеринин көрсөткүчтөрүнүн тизмегине ылайык мүмкүн болуучу кесепеттердин масштабына баа берет, маанилүүлүк критерийлеринин көрсөткүчтөрүнүн ар биринин маанисин аныктайт же алардын колдонулбай калышын негиздейт;

ж) ӨМИ объекттеринин ар бирине маанилүүлүк категориясынын бирин белгилейт же болбосо аларга маанилүүлүк категориясын ыйгаруу жана аларды ӨМИ объекттерине киргизүү зарылдыгы жок экендиги жөнүндө чечим кабыл алат.

14. Ушул Жобонун 13-пунктунун "г" жана "д" пунктчаларында каралган иштерди аткарууда ӨМИ объекттерине максаттуу багытталган киберчабуулдарды жүргүзүүнү эске алуу менен мүмкүн болгон тобокелдиктер жана кесепеттер каралып чыгууга тийиш, анын натыйжасы болуп өзгөчө маанилүү процесстерди аткарууну токтотуу же бузуу жана мүмкүн болгон максималдуу зыян келтирүү саналат.

15. Эгерде бир ӨМИ объектинин иштөөсү башка ӨМИ объектинин иштешинен көз каранды болсо, ушул Жобонун 13-пунктунун "е" пунктчасында каралган мүмкүн болгон кесепеттердин масштабына баа берүү баа берилип жаткан объектиге көз каранды болгон ӨМИ объектинин киберчабуулдан улам ишин токтотуу же бузуу тууралуу божомолго ылайык жүргүзүлөт.

16. Эгерде өзгөчө маанилүү процессти аткаруу башка өзгөчө маанилүү процесстерди аткаруудан көз каранды болсо, ушул Жобонун 13-пунктунун "е" пунктчасында каралган баа берүү аткарыла турган бардык өзгөчө маанилүү процесстердин иштөөсүнүн бузулушунун же токтотулушунун мүмкүн болгон кесепеттеринин жалпы масштабынын негизинде жүргүзүлөт.

17. Объекттердин реестрин киберкоопсуздукту камсыздоо чөйрөсүндөгү ыйгарым укуктуу мамлекеттик орган жүргүзөт.

Объекттердин реестри зарыл учурда өзгөртүлүшү же толукталышы мүмкүн. Объекттердин реестрине, анын ичинде ӨМИ субъектинин филиалдарынын, өкүлчүлүктөрүнүн ӨМИ объекттери кирет.

18. Категорияга бөлүү боюнча комиссиянын ишинин жыйынтыгы акт менен таризделип, ӨМИ объекти тууралуу, ага ыйгарылган маанилүүлүк категориясы же ага ушундай категориялардын бирин ыйгаруу зарылдыгы жоктугу тууралуу маалыматты камтууга тийиш.

Категорияга бөлүү боюнча комиссиянын ишинин жыйынтыгы боюнча пикир келишпестиктер болгон учурда акыркы чечимди комиссиянын жетекчиси кабыл алат. ӨМИнин бир субъектине таандык болгон ӨМИнин бир нече объекттерин категорияга бөлүүнүн жыйынтыгы боюнча бирдиктүү акт түзүүгө жол берилет. Актыга категорияга бөлүү боюнча комиссиянын мүчөлөрү кол коюшат жана комиссиянын жетекчиси бекитет. ӨМИ субъекти ӨМИ объекти эксплуатациялоодон чыгарылганга же маанилүүлүк категориясы өзгөргөнгө чейин актынын сакталышын камсыздайт.

19. ӨМИ субъекти үч жылда бир жолудан кем эмес, ошондой эле ӨМИ объекттеринин маанилүүлүк критерийлеринин көрсөткүчтөрү же алардын маанилери өзгөргөн учурда белгиленген маанилүүлүк категорияларын же ушул Жобого ылайык бул объекттерге мындай категорияларды ыйгаруу зарылдыгы жоктугу жөнүндө чечимдерин кайра карап чыгат.

20. Ушул Жобону бузуу Кыргыз Республикасынын мыйзамдарына ылайык жоопкерчиликке алып келет.