Кыргыз Республикасынын Министрлер Кабинетинин «Кыргыз Республикасынын Жалал-Абад облусунун Жалал-Абад шаарында жайгашкан жерлерди “Айыл чарба багытындагы жерлер” жана “Суу фондунун жерлери” категорияларынан “Өнөр жайынын, транспорттун, байланыштын, энергетиканын, коргонуунун жерлери жана башка багыттагы жерлер” категориясына которуу (трансформациялоо) жөнүндө» токтому

КЫРГЫЗ РЕСПУБЛИКАСЫНЫН МИНИСТРЛЕР КАБИНЕТИНИН ТОКТОМУ

2024-жылдын 3-декабры № 732

Кыргыз Республикасынын Жалал-Абад облусунун Жалал-Абад шаарында жайгашкан жерлерди “Айыл чарба багытындагы жерлер” жана “Суу фондунун жерлери” категорияларынан “Өнөр жайынын, транспорттун, байланыштын, энергетиканын, коргонуунун жерлери жана башка багыттагы жерлер” категориясына которуу (трансформациялоо) жөнүндө

Кыргыз Республикасынын Жалал-Абад облусунун Жалал-Абад шаарынын аймагы боюнча өтүүчү “Кытай – Кыргызстан – Өзбекстан” темир жолун куруу боюнча долбоорду ишке ашыруу максатында, Кыргыз Республикасынын Жер кодексинин 20-статьясына, “Жер участокторун которуу (трансформациялоо) жөнүндө” Кыргыз Республикасынын Мыйзамына, “Кыргыз Республикасынын Министрлер Кабинети жөнүндө” Кыргыз Республикасынын конституциялык Мыйзамынын 13, 17-беренелерине ылайык, Кыргыз Республикасынын Президентинин Кыргыз Республикасынын Жалал-Абад облусундагы ыйгарым укуктуу өкүлүнүн аппаратынын 2024-жылдын 1-ноябрындагы № 04-01/6796 корутундусун, Жалал-Абад шаарынын мэриясынын 2024-жылдын 1-ноябрындагы № 167-т чечимин көңүлгө алып, Кыргыз Республикасынын Министрлер Кабинети токтом кылат:

1. Кыргыз Республикасынын Жалал-Абад облусунун Жалал-Абад шаарынын аймагында жайгашкан жалпы аянты 44,29 га жер “Айыл чарба багытындагы жерлер” жана “Суу фондунун жерлери” категорияларынан “Өнөр жайынын, транспорттун, байланыштын, энергетиканын, коргонуунун жерлери жана башка багыттагы жерлер” категориясына которулсун (трансформациялансын), алардын ичинен:

1) № № 434, 459, 454, 440, 16, 18, 29 контурлардагы 36,55 га сугат айдоо;

2) № № 335, 358, 13 контурлардагы 7,54 га кайрак айдоо;

3) № 343 контурдагы 0,2 га саз.

2. Кыргыз Республикасынын Жалал-Абад облусунун Жалал-Абад шаарынын мэриясы төмөнкүлөрдү камсыз кылсын:

1) жерди эсепке алуу документтерине тиешелүү өзгөртүүлөрдү киргизүүнү;

2) Айыл чарба жерлеринин мамлекеттик фондунан жер ээлерине бирдей маанидеги жер участокторун берүү менен Кыргыз Республикасынын жарандарынын жеке менчигинде турган жер участокторун алмашуу келишимдерин белгиленген тартипте түзүүнү;

3) жеке менчикте турган жер участокторун мамлекеттик менчикке кабыл алуу менен келишимдерди аткарууну;

4) бул токтомдун 1-пунктунда көрсөтүлгөн жерлерди максаттуу пайдаланууну;

5) Кыргыз Республикасынын курулуш ченемдерин жана эрежелерин так сактоону эске алуу менен Кыргыз Республикасынын шаар куруу жана архитектура чөйрөсүндөгү мыйзамдарына ылайык ушул токтомдун 1-пунктунда көрсөтүлгөн жерлердин шаар куруу документтерин иштеп чыгууну жана бекитүүнү;

6) пайдаланылбаган же максаттуу багыты боюнча пайдаланылбаган учурда көрсөтүлгөн жерлерди Кыргыз Республикасынын жер мыйзамдарына ылайык алып коюуну;

7) жамгырдын жана эриген кардын сууларын коопсуз буруу системасын, башкы пландагы жер титирөөгө каршы иш-чараларды жана тиешелүү аймакта кооптуу процесстерге жана кубулуштарга мониторинг жүргүзүү, божомолдоо боюнча колдонмону сактоону;

8) бул токтомдун 1-пунктунда көрсөтүлгөн жерлерде тарыхый-маданий мурас объекттери табылган учурда тарыхый-маданий мурас объекттерин коргоо жана пайдалануу жөнүндө Кыргыз Республикасынын мыйзамдарына ылайык аларды сактоону.

3. Бул токтомдун аткарылышын контролдоо Кыргыз Республикасынын Президентинин Администрациясынын Президенттин жана Министрлер Кабинетинин чечимдерин аткарууну контролдоо башкармалыгына жүктөлсүн.

4. Бул токтом расмий жарыяланган күндөн тартып он күн өткөндөн кийин күчүнө кирет.

«Эркин-Тоо» мамлекеттик расмий гезитинин 2024-жылдын 6-декабрындагы № 94 (3649) саны менен жарыяланды

Кыргыз Республикасынын Министрлер Кабинетинин Төрагасы

А.У.Жапаров