Кыргыз Республикасынын Жогорку Кеңешинин «Кыргыз Республикасынын экономика тармактарын жана калкын 2023-2024-жылдардын күз-кыш мезгилине даярдоо боюнча Кыргыз Республикасынын Министрлер Кабинетинин жүргүзүп жаткан иштери жөнүндө» токтому

КЫРГЫЗ РЕСПУБЛИКАСЫНЫН ЖОГОРКУ КЕҢЕШИНИН ТОКТОМУ

2023-жылдын 4-октябры № 1459-VII

Кыргыз Республикасынын экономика тармактарын жана калкын 2023-2024-жылдардын күз-кыш мезгилине даярдоо боюнча Кыргыз Республикасынын Министрлер Кабинетинин жүргүзүп жаткан иштери жөнүндө

Кыргыз Республикасынын экономика тармактарын жана калкын 2023-2024-жылдардын күз-кыш мезгилине даярдоо жөнүндө Кыргыз Республикасынын Министрлер Кабинетинин маалыматын угуп жана талкуулап, Кыргыз Республикасынын Жогорку Кеңеши токтом кылат:

1. Кыргыз Республикасынын экономика тармактарын жана калкын 2023-2024-жылдардын күз-кыш мезгилине даярдоо жөнүндө Кыргыз Республикасынын Министрлер Кабинетинин маалыматы эске алынсын.

2. Кыргыз Республикасынын Министрлер Кабинетине төмөнкүлөр сунушталсын:

- Токтогул ГЭСтеринин каскадында авариялык жагдайларга жол бербөө максатында Токтогул суу сактагычындагы суунун деңгээлин контролдоону камсыз кылсын;

- министрликтер жана ведомстволор, Кыргыз Республикасынын Президентинин облустардагы ыйгарым укуктуу өкүлдөрүнүн аппараттары, жергиликтүү өз алдынча башкаруу органдары, Бишкек жана Ош шаарларынын мэриялары отун камдоо графигин аткарууну, электр энергиясын жана кубаттуулукту керектөөнүн белгиленген лимиттерин сактоону, электр, жылуулук энергиясын, жагуучу мазутту жана жаратылыш газын керектегендиги үчүн карызды өз учурунда жоюуну камсыз кылсын;

- керектелген жылуулук, электр энергиялары жана жаратылыш газы үчүн бюджеттик мекемелердин дебитордук карызынын жаралышына жол бербесин;

- Бишкек шаарынын жылуулук электр борборуна көмүр ташуу үчүн зарыл болгон санда жарым вагондорду камсыз кылсын;

- көмүрдүн сапатына жана бааларына контролду камсыз кылсын;

- Дыйкан - Кара-Кече автожолунун 0-2,8 км участогуна асфальт төшөө маселесин карасын;

- 2020-2023-жылдар үчүн Кыргыз Республикасынын Энергетика министрлигине караштуу "Кыргызкөмүр" мамлекеттик ишканасына көз карандысыз аудит жүргүзүү маселесин карасын;

- оор жүк ташууда жолдун төшөлмөсүнө оордук келтирбөө максатында салмак габариттик чендерине контролду күчөтсүн;

- 2023-2024-жылдын күз-кыш мезгилинде энерготутумдун туруктуу иштөөсүн жана республиканын экономикасын жана калкын электр, жылуулук энергиясы жана жаратылыш газы менен үзгүлтүксүз камсыздоону камсыз кылсын, ошондой эле электр жана жылуулук энергиясын керектөөчүлөрдүн авариялык өчүрүүлөргө жол бербөөсү боюнча зарыл чараларды көрсүн;

- Кыргыз Республикасынын Энергетика министрлигине караштуу "Кыргызкөмүр" мамлекеттик ишканасынын кызматкерлеринин эмгек акысын өз убагында төлөөнү камсыз кылсын;

- "Кыргыз Республикасынын экономика тармактарын жана калкын 2023/2024-жылдардын күз-кыш мезгилине даярдоо жөнүндө" Кыргыз Республикасынын Министрлер Кабинетинин 2023-жылдын 25-апрелиндеги № 220 токтомуна ылайык отун энергетикалык комплексинин ишканалары тарабынан отун берүүнү камсыз кылсын;

- энергокомпаниялардын жылуулук жана электр энергиясын жоготуусун азайтуу, дебитордук карызды азайтуу жана керектелген электр жана жылуулук энергиясы үчүн акча каражаттарын чогултуу боюнча көрсөткүчтөрдүн 100 пайыз аткарылышын камсыз кылсын;

- отун жаккан учурда, зыяндуу бөлүнүп чыгуулардын деңгээлин төмөндөтүү үчүн заманбап атайын чыпкаларды жана күлдү кармап калуучу жабдууларды орнотуу боюнча чараларды көрсүн.

3. Ушул токтомду аткаруунун жүрүшү тууралуу Кыргыз Республикасынын Жогорку Кеңешине ар квартал сайын маалымат берип турсун.

4. Ушул токтомдун аткарылышын контролдоо Кыргыз Республикасынын Жогорку Кеңешинин Отун-энергетикалык комплекс, жер казынасын пайдалануу жана өнөр жай саясаты боюнча комитетине жүктөлсүн.

Кыргыз Республикасынын Жогорку Кеңешинин Төрагасынын орун басары

Н.О. Сыдыгалиев