# 2-берене. Ушул Мыйзамда пайдаланылуучу негизги түшүнүктөр жана терминдер - Документ: [Аксакалдар соттору жөнүндө](https://aqlex.ai/kg/doc/230001722) - Документтеги орду: 1-глава - Толук аталышы: Кыргыз Республикасынын 2024-жылдын 19-февралындагы № 52 "Аксакалдар соттору жөнүндө" Мыйзамы - Актынын түрү: Закон - Номери: 52 - Кабыл алынган күнү: 19.02.2024 - Статусу: Күчүндө - Редакциянын күнү: 19.02.2024 - Тексттин тили: кыргыз тили - aqlex'теги барагы: - Расмий булак: - Башка тилдеги тексти (Markdown): > Текст расмий булактын маалыматы боюнча 19.02.2024 редакциясында берилди. Бул юридикалык кеңеш эмес: юридикалык маанилүү аракеттер үчүн расмий жарыялоо менен салыштырыңыз. > > Кантип шилтеме берүү керек: Аксакалдар соттору жөнүндө, 2-берене (19.02.2024 редакциясы) - https://aqlex.ai/kg/doc/230001722/st-2 --- Ушул Мыйзамда төмөнкүдөй түшүнүктөр жана терминдер пайдаланылат: 1) мыйзамдуу өкүлдөр - аксакалдар сотунун жыйналышына катышуучу баланын ата-энеси, асырап алуучулары, камкорчулары же көзөмөлчүлөрү (арыз ээси, жоопкер, күбө), балдарды коргоо боюнча мекемелердин же уюмдардын, ыйгарым укуктуу мамлекеттик органдын өкүлдөрү; 2) арыз ээси - чыр-чатакты чечүү же өз ишин кароо жөнүндө аксакалдар сотуна арыз берген адам; 3) таасир этүү чарасы - аксакалдар сотунун жыйналышында каралып жаткан адамга карата аксакалдар соту чыгарган чечим; 4) үрп-адаттар - адамдардын турмуштук керектөөлөрү менен шартталган, муундан муунга өтүп келе жаткан, алардын жүрүм-турум ченемдери жана эрежелери тууралуу туруктуу, стереотиптик, адеп-ахлактык аныктамалар; 5) аксакалдар сотунун аныктамасы - соттук териштирүүнүн жүрүшүндө чечүүнү талап кылган маселелер боюнча аксакалдар соту чыгарган, бирок ал тарабынан иш маңызы боюнча чечилбеген акт; 6) жоопкер - өзүнө каршы арыз же доо берилген жана өз кызыкчылыктарын коргоо үчүн аксакалдар сотунун жыйналышына чакырылган адам; 7) протокол - аксакалдар сотунун жыйналышында орун алган бардык процесстик аракеттер чагылдырылган документ; 8) аксакалдар сотунун чечими - ишти маңызы боюнча кароочу жыйналышта аксакалдар соту чыгарган, бардык тараптар үчүн милдеттүү жана аткарылууга тийиш болгон акт; 9) күбө - иш боюнча көрсөтмөлөрдү же маалыматты берүү үчүн аксакалдар сотунун жыйналышына чакырылган адам; 10) жарашуу жөнүндө макулдашуу - жарашуу жөнүндө тараптардын өз ара алгылыктуу чечими; 11) тараптар - ишти кароо учурунда укуктардын теңдигинин жана атаандаштыктын негизинде аксакалдар сотунун жыйналышына катышкан жактар; 12) салт - элдин топтолгон тажрыйбасынын натыйжасында калыптанган коомдук мамилелердин ченемдери, эрежелери жана үлгүлөрү; 13) аксакалдар сотунун мүчөсү - ушул Мыйзамда белгиленген талаптарга жана тартипке ылайык аксакалдар сотунун курамына шайланган Кыргыз Республикасынын жараны. --- Мурунку берене: [1-берене](https://aqlex.ai/kg/doc/230001722/st-1) Кийинки берене: [3-берене](https://aqlex.ai/kg/doc/230001722/st-3)