1-берене

"Мамлекеттик жарандык кызмат жана муниципалдык кызмат жөнүндө" Кыргыз Республикасынын Мыйзамына ("Эркин-Тоо" гезити, 2021-жылдын 2-ноябры, № 113-114) төмөнкүдөй өзгөртүүлөр киргизилсин:

1) расмий тилдеги 7-берененин 1-бөлүгүнүн 3-пунктунда "языком" деген сөз "и официальным языками" деген сөздөргө алмаштырылсын.

2) 11-берене төмөнкүдөй мазмундагы 3-бөлүк менен толукталсын:

"3. Мамлекеттик жарандык кызматчыларды жана муниципалдык кызматчыларды аттестациялоонун жыйынтыктары боюнча төмөнкүдөй чечимдердин бири чыгарылат:

- ээлеген кызмат ордуна ылайык келет, жогору турган кызмат ордуна көрсөтүү сунушталат;

- ээлеген кызмат ордуна ылайык келет;

- ээлеген кызмат ордуна ылайык келбейт.";

3) 13-берененин 1-бөлүгүндө:

а) 18-пункттун экинчи абзацы күчүн жоготту деп таанылсын;

б) бөлүк төмөнкүдөй мазмундагы 18-1-пункт менен толукталсын:

"18-1) саламаттык сактоо, билим берүү, кайрымдуулук, ыктыярдуулук жана башка чөйрөлөрдө коомдук пайдалуу ишти жүзөгө ашыруучу коомдук бирикмелердин курамында иш жүргүзүүгө. 18 жана 18-1-пункттарда көрсөтүлгөн иштердин түрүн жүзөгө ашыруу аткарылуучу иштин санына жана сапатына таасирин тийгизбөөгө, ошондой эле кызматчынын иштеген жеринде кызыкчылыктардын кагылышуусуна жол бербөөгө тийиш;";

4) 15-берененин 1-бөлүгүнүн 7-пункту "түзүүгө," деген сөздөн кийин "ошондой эле" деген сөздөр менен толукталсын.