Кыргыз Республикасынын Министрлер Кабинетинин (Фискалдык тобокелдиктер боюнча маалыматтын долбоорун даярдоо боюнча ведомстволор аралык жумушчу тобунун курамын түзүү тууралуу) тескемеси

КЫРГЫЗ РЕСПУБЛИКАСЫНЫН МИНИСТРЛЕР КАБИНЕТИ тескеме

2023-жылдын 30-майы № 289-т Фискалдык тобокелдиктер боюнча маалыматтын долбоорун өз убагында даярдоо максатында, Кыргыз Республикасынын Бюджеттик кодексинин 80-беренесине, "Кыргыз Республикасынын Министрлер Кабинети жөнүндө" Кыргыз Республикасынын конституциялык Мыйзамынын 13, 17-беренелерине ылайык:

1. Фискалдык тобокелдиктер боюнча маалыматтын долбоорун даярдоо боюнча ведомстволор аралык жумушчу топ (мындан ары - ведомстволор аралык жумушчу топ) 1-тиркемеге ылайык курамда түзүлсүн.

2. Фискалдык тобокелдиктер боюнча маалыматтарды берүүнүн тартиби 2-тиркемеге ылайык бекитилсин.

3. Ведомстволор аралык жумушчу топ туруктуу негизде:

1) төмөнкү маселелер боюнча фискалдык тобокелдиктер боюнча маалыматты Кыргыз Республикасынын Финансы министрлигине берип турсун:

- Кыргыз Республикасынын экономикалык сереби;

- макроэкономикалык фискалдык тобокелдиктер;

- төмөнкүлөр менен байланышкан фискалдык тобокелдиктер:

мамлекеттик кирешелерди болжолдоонун сапаты; мамлекеттик карыз; мамлекеттик компаниялар; бюджеттик кредиттөө;

- мамлекеттик-жеке өнөктөштүк (мындан ары - МЖӨ) долбоорлору боюнча милдеттенмелер менен байланышкан тобокелдиктер;

- башка фискалдык тобокелдиктер.

2) төмөнкүлөргө катышсын:

- Фискалдык тобокелдиктер боюнча маалыматтын долбоорун жыл сайын даярдоого;

- Фискалдык тобокелдиктер боюнча маалыматтын финалдык версиясынын долбоорунун тиешелүү бөлүмдөрүн жарыялоонун алдында кароого;

- Фискалдык тобокелдиктер боюнча маалыматты даярдоо боюнча методикалык колдонмону өркүндөтүү боюнча иштерге;

- фискалдык тобокелдиктер боюнча окутуу семинарларына;

- фискалдык тобокелдиктер боюнча кеңешмелерге жана жолугушууларга;

- фискалдык тобокелдиктер боюнча башка иш-чараларга.

4. Ведомстволор аралык жумушчу топ белгиленген тартипте төмөнкүлөргө укуктуу деп белгиленсин:

- мамлекеттик органдардын, ишканалардын жана уюмдардын адистерин, ошондой эле көз карандысыз эксперттерди ишке тартууга;

- жүктөлгөн милдеттерди аткаруу үчүн зарыл болгон маалыматтарды мамлекеттик органдардан, ишканалардан жана уюмдардан суроого жана алууга;

- фискалдык тобокелдиктер боюнча маалыматтарды берүүнүн мазмунун жана форматтарын тактоого;

- мөөнөттөрүн жана жооптуу аткаруучуларды көрсөтүү менен Фискалдык тобокелдиктер боюнча маалыматтын долбоорун даярдоо графигин бекитүүгө.

5. Кыргыз Республикасынын Энергетика министрлиги, Кыргыз Республикасынын Министрлер Кабинетине караштуу Мамлекеттик мүлктү башкаруу боюнча мамлекеттик агенттик, Кыргыз Республикасынын Финансы министрлигине караштуу Финансы-кредиттик фонду, Кыргыз Республикасынын Президентине караштуу Инвестициялар боюнча улуттук агенттиктин алдындагы "Мамлекеттик-жеке өнөктөштүк борбору" мамлекеттик мекемеси, "Улуттук энергетикалык холдинг компаниясы" ачык акционердик коому:

- ушул тескемесинин 3-пунктунун аткарылышын камсыз кылсын;

- жыл сайын 10-апрелге чейинки мөөнөттө ушул тескеменин 2-тиркемесине ылайык түшүндүрмөлөрү менен фискалдык тобокелдиктер боюнча маалыматты Кыргыз Республикасынын Финансы министрлигине берип турсун;

- ведомстволор аралык жумушчу топтун ишине көмөк көрсөтсүн.

6. Ведомстволор аралык жумушчу топтун ишин координациялоо жана камсыз кылуу Кыргыз Республикасынын Финансы министрлигине жүктөлсүн.

7. Бул тескеменин аткарылышын контролдоо Кыргыз Республикасынын Президентинин Администрациясынын Президенттин жана Министрлер Кабинетинин чечимдерин аткарууну контролдоо башкармалыгына жүктөлсүн.

Кыргыз Республикасынын Министрилер Кабинетинин Төрагасы

А.У.Жапаров

1-тиркеме

Фискалдык тобокелдиктер боюнча маалыматтын долбоорун даярдоо боюнча ведомстволор аралык жумушчу топтун курамы Кыргыз Республикасынын финансы министринин биринчи орун басары - ведомстволор аралык жумушчу топтун жетекчиси; Кыргыз Республикасынын Финансы министрлигинин бюджеттик саясат башкармалыгынын начальниги - ведомстволор аралык жумушчу топтун жетекчисинин орун басары. Ведомстволор аралык жумушчу топтун мүчөлөрү: Кыргыз Республикасынын Энергетика министрлигинин тышкы байланыштар жана долбоорлорду илгерилетүү башкармалыгынын начальниги; Кыргыз Республикасынын Министрлер Кабинетине караштуу Мамлекеттик мүлктү башкаруу боюнча мамлекеттик агенттиктин мамлекеттик ишканалар менен иштөө боюнча башкармалыгынын начальниги; Кыргыз Республикасынын Министрлер Кабинетине караштуу Мамлекеттик мүлктү башкаруу боюнча мамлекеттик агенттиктин чарбалык коомдор менен иштөө боюнча жана корпоративдик башкаруу боюнча башкармалыгынын начальниги; Кыргыз Республикасынын Министрлер Кабинетине караштуу Мамлекеттик мүлктү башкаруу боюнча мамлекеттик агенттиктин мамлекеттик секторду оптималдаштыруу башкармалыгынын начальниги; "Улуттук энергетикалык холдинг компаниясы" ачык акционердик коомунун тышкы байланыштар жана долбоорлорду илгерилетүү башкармалыгынын начальниги; Кыргыз Республикасынын Президентине караштуу Инвестициялар боюнча улуттук агенттиктин алдындагы "Мамлекеттик-жеке өнөктөштүк борбору" мамлекеттик мекемесинин директорунун орун басары; Кыргыз Республикасынын Финансы министрлигине караштуу Финансы-кредиттик фонддун төрагасынын орун басары.