Кыргыз Республикасынын Министрлер Кабинетинин (Кыргыз Республикасынын Министрлер Кабинети менен Кытай Эл Республикасынын Өкмөтүнүн ортосундагы Авиациялык издөө жана куткаруу жаатындагы кызматташтык жөнүндө макулдашуунун долбоорун жактыруу тууралуу) ТЕСКЕМЕСИ

КЫРГЫЗ РЕСПУБЛИКАСЫНЫН МИНИСТРЛЕР КАБИНЕТИНИН ТЕСКЕМЕСИ

2023-жылдын 16-майы № 236-т

1. Кыргыз Республикасынын Министрлер Кабинети менен Кытай Эл Республикасынын Өкмөтүнүн ортосундагы Авиациялык издөө жана куткаруу жаатындагы кызматташтык жөнүндө макулдашуунун тиркелген долбоору жактырылсын.

2. Кыргыз Республикасынын тышкы иштер министрине жогоруда аталган Макулдашууга принциптүү эмес мүнөздөгү өзгөртүүлөрдү жана толуктоолорду киргизүүнү эске алуу менен Кыргыз Республикасынын Министрлер Кабинетинин атынан кол коюуга ыйгарым укук берилсин.

Кыргыз Республикасынын Министрлер Кабинетинин Төрагасы

А.У. Жапаров

Долбоор

Кыргыз Республикасынын Министрлер Кабинети менен Кытай Эл Республикасынын Өкмөтүнүн ортосундагы Авиациялык издөө жана куткаруу жаатындагы кызматташтык жөнүндө МАКУЛДАШУУ Мындан ары Тараптар деп аталуучу Кыргыз Республикасынын Министрлер Кабинети жана Кытай Эл Республикасынын Өкмөтү, Кыргыз Республикасы жана Кытай Эл Республикасы 1944-жылдын 7-декабрындагы Эл аралык жарандык авиация жөнүндө конвенциянын (мындан ары - Конвенция) катышуучулары болуп саналарын көңүлгө алып, чектеш мамлекеттердин авиациялык издөө-куткаруу кызматтарынын ортосундагы кызматташтыкка тиешелүү Эл аралык жарандык авиация уюмунун стандарттарын жана сунушталуучу практикасын эске алып, авиациялык окуялардын жана инциденттердин кесепетинен кырсыкка учураган адамдарга тез жардам көрсөтүүнүн олуттуулугун түшүнүп, төмөнкүлөр жөнүндө макулдашты: 1-берене. Бул Макулдашуунун максаттары үчүн Конвенциянын "Издөө жана куткаруу" 12-тиркемесинин 1-главасында камтылган терминдер жана аныктамалар, ошондой эле Конвенциянын "Аба кыймылын тейлөө" 11-тиркемесинин 1-главасында көрсөтүлгөн мааниге ээ болгон "учуу маалыматынын району" деген термин колдонулат. 2-берене. Авиациялык издөө-куткаруу операцияларын уюштурууну жана аткарууну Тараптар ушул Макулдашууга ылайык жүзөгө ашырат. Мындай операцияларды уюштуруу жана аткаруу үчүн негиз катары Конвенцияга "Издөө жана куткаруу" 12-тиркемеси колдонулат. 3-берене.

1. Тараптар өздөрүнүн мамлекеттеринин чектеш аймактарынын жана учуу маалыматынын жанаша жайгашкан райондорунун ортосундагы чек араны алардын издөө жана куткаруу райондорунун ортосундагы чек арасы катары карашат.

2. Ар бир Тарап өзүнүн издөө жана куткаруу районунда жарандык аба кемелеринин, ошондой эле авиациялык издөө-куткаруу кызматтарынын (мындан ары - издөө-куткаруу кызматтары) издөөнүн жеткиликтүүлүгүн камсыз кылат. Мындай кызматтар күнү-түнү кезметти жүзөгө ашырат.

3. Бул Макулдашууну ишке ашырууга жооптуу компетенттүү органдар болуп төмөнкүлөр саналат:

Кыргыз Республикасынан - Кыргыз Республикасынын Министрлер Кабинетине караштуу Жарандык авиация мамлекеттик агенттиги жана Кыргыз Республикасынын мыйзамдарына ылайык издөө-куткаруу кызматтарынын функцияларын жүзөгө ашырууга ыйгарым укук берилген мамлекеттик органдар; Кытай Эл Республикасынан - Кытай Эл Республикасынын Жарандык авиация администрациясы же аталган Администрация тарабынан азыркы убакта жүзөгө ашырылуучу функцияларды аткарууга ыйгарым укук берилген жак/орган. Тараптар бул Макулдашууну ишке ашырууга жооптуу компетенттүү органдардын өзгөргөндүгү жөнүндө бири-бирине дипломатиялык каналдар аркылуу билдирет. 4-берене. Тараптардын мамлекеттеринин аймактарында, ошондой эле учуу маалыматынын жанаша жайгашкан райондорунда издөө жана куткаруу боюнча аракеттер тиешелүү Тараптын мамлекетинин мыйзамдарына ылайык жүзөгө ашырылат. 5-берене.

1. Эгерде бир Тараптын мамлекетинин издөө-куткаруу кызматы өзүнүн издөө жана куткаруу районундагы авиациялык окуя же инцидент жөнүндө билдирүү алган учурда бул кызмат издөө жана куткаруу боюнча бардык зарыл чараларды токтоосуз түрдө көрөт.

2. Эгерде бир Тараптын мамлекетинин издөө-куткаруу кызматы башка Тараптын мамлекетинин издөө жана куткаруу районундагы авиациялык окуя же инцидент жөнүндө билдирүү алган учурда бул кызмат башка Тараптын мамлекетинин издөө-куткаруу кызматына мындай окуя же инцидент жөнүндө токтоосуз түрдө маалымдайт.

3. Эгерде бир Тараптын мамлекетинин издөө-куткаруу кызматында ушул берененин 1-пунктунда көрсөтүлгөн кырдаалда экинчи Тараптын мамлекетинин издөө-куткаруу кызматынын жардамына муктаждык келип чыкса, анда ал мындай жардамды сурай алат. Бул учурда жардам сураган Тарап өзүнүн мамлекетинин аймагына экинчи Тараптын мамлекетинин издөө-куткаруу күчтөрүнүн жана каражаттарынын тез арада кирүүсү үчүн бардык чараларды көрөт. Андан аркы чаралар эки Тараптын тең мамлекеттеринин издөө-куткаруу кызматтарынын өз ара аракеттери менен көрүлөт.

4. Коркунучта калган бардык адамдарга жарандыгына же анын статусуна же ушул адам табылган учурдагы жагдайларга карабастан жардам көрсөтүлөт.

5. Ар бир Тарап өзүнүн издөө жана куткаруу аймагында экинчи Тараптын мамлекетинде катталган аба кемелеринин катышуусунда орун алган бардык окуялар жана көрүлгөн чаралар жөнүндө маалымдоого милдеттүү.

6. Ар бир Тарап экинчи Тараптын дипломатиялык өкүлчүлүгүн же консулдук мекемесин тирүү калгандардын куткарылышы же каза болгон адамдардын - экинчи Тараптын мамлекетинин жарандарынын табылышы жөнүндө маалымдайт. Куткарылган адамдардын же каза болгондордун аты-жөнү, туулган жылы, үй дареги, инсандыгын ырастаган документтин реквизиттери, ошондой эле ден соолугунун абалы жана жайгаштырылган жери жөнүндө маалымат дароо (мүмкүн болушунча) берилет.

6-берене.

1. Тараптар өз мамлекеттеринин издөө-куткаруу кызматтарынын ортосундагы кызматташтыкты бекемдешет. Мындай кызматташтык издөө жана куткаруу боюнча биргелешкен машыгууларды, мамлекеттер ортосундагы байланыш каналдарын үзгүлтүксүз текшерип турууну, издөө жана куткаруу боюнча эксперттердин өз ара визиттерин, издөө-куткаруу маалыматтарын жана тажрыйба алмашууну өзүнө камтыйт.

2. Тараптардын мамлекеттеринин компетенттүү органдары ушул Макулдашууну ишке ашыруунун тартибин өз ара макулдашат.

3. Ушул Макулдашуунун алкагындагы кызматташуу маселелерин кароо жана чечүү үчүн Тараптардын мамлекеттеринин компетенттүү органдары зарылдыгына жараша кезеги менен Кыргыз Республикасында жана Кытай Эл Республикасында жолугушууларды өткөрүп турушат.

7-берене.

1. Кырсыкка учурап жаткан же кырсыктаган аба кемелерине өз убагында жардам берүү үчүн кырсыктын, шашылыштын, эскертүүнүн эл аралык сигналдары жана издөө-куткаруу операцияларында колдонулуучу сигналдар пайдаланылат.

2. Издөө-куткаруу операцияларын жүргүзүү үчүн арналган аба кемелерине орнотууга тийиш болгон техникалык каражаттардын тизмеси ар бир Тараптын мамлекетинде кабыл алынуучу эрежелер менен аныкталат.

8-берене. Ушул Макулдашуунун негизинде өз жоопкерчилигинин алкагында издөө-куткаруу операцияларын жүзөгө ашырууда келип чыккан чыгымдарды ар бир Тарап өз алдынча көтөрөт. 9-берене. Бул Макулдашуу Тараптардын мамлекеттери катышуучу болгон башка эл аралык келишимдерден келип чыгуучу, алардын укуктарына жана милдеттенмелерине таасирин тийгизбейт. 10-берене. Ушул Макулдашууну чечмелөөгө же колдонууга байланыштуу Тараптардын ортосунда келип чыгуучу бардык талаш-тартыштар жана пикир келишпестиктер Тараптардын мамлекеттеринин компетенттүү органдарынын ортосундагы консультациялар жана сүйлөшүүлөр жолу менен чечилет. Эгерде компетенттүү органдар макулдашууга келе алышпаса, талаш-тартыш дипломатиялык каналдар боюнча чечилет. 11-берене. Тараптардын өз ара макулдашуусу боюнча ушул Макулдашууга жазуу жүзүндө таризделе турган жана анын ажырагыс бөлүгү болуп саналган өзгөртүүлөр жана толуктоолор киргизилиши мүмкүн. 12-берене. Ушул Макулдашуу жана ага болгон бардык түзөтүүлөр Жарандык авиациянын эл аралык уюмунда каттоодон өтүүгө тийиш. 13-берене. Ушул Макулдашуу белгисиз мөөнөткө түзүлөт жана анын күчүнө кирүүсүнө зарыл болгон ички мамлекеттик жол-жоболорду Тараптардын аткаргандыгы тууралуу жазуу жүзүндөгү акыркы билдирүүнү дипломаттык каналдар боюнча алган күндөн тартып күчүнө кирет. Бул Макулдашуунун колдонулушу кайсы Тарап болбосун анын аракетин токтотуу жөнүндө өзүнүн ниетин экинчи Тарапка дипломаттык каналдар боюнча кабарлоо жолу менен токтолушу мүмкүн. Мындай учурда, бул Макулдашуунун колдонулушу экинчи Тарап мындай билдирүүнү алган күндөн тартып 12 ай өткөндөн кийин токтотулат.

2023-жылдын "____" _________________ шаарында эки түп нускада, ар бири кыргыз, орус, кытай жана англис тилдеринде түзүлдү, мында бардык тексттер бирдей аутенттүү болуп саналат. Бул Макулдашууну чечмелөөдө пикир келишпестиктер келип чыккан учурда, негиз катары англис тилиндеги текст кабыл алынат.

Кыргыз Республикасынын Министрлер Кабинети үчүн

Кытай Эл Республикасынын Өкмөтү үчүн