Кыргыз Республикасынын Министрлер Кабинетинин «2021-жылдын 16-сентябрында Дүйшөмбү шаарында кол коюлган Жамааттык коопсуздук жөнүндө келишим уюмунун Аскерлерин (Жамааттык күчтөрүн) биргелешкен материалдык-техникалык жана медициналык камсыздоо тууралуу макулдашуу» корутундусу

Кыргыз Республикасынын Министрлер Кабинетинин 2022-жылдын 28-ноябрындагы № 656-т тескемеси менен жактырылган

2021-жылдын 16-сентябрында Дүйшөмбү шаарында кол коюлган Жамааттык коопсуздук жөнүндө келишим уюмунун Аскерлерин (Жамааттык күчтөрүн) биргелешкен материалдык-техникалык жана медициналык камсыздоо тууралуу макулдашууга Кыргыз Республикасынын Министрлер Кабинетинин корутундусу

2021-жылдын 16-сентябрында Дүйшөмбү шаарында кол коюлган Жамааттык коопсуздук жөнүндө келишим уюмунун Аскерлерин (Жамааттык күчтөрүн) биргелешкен материалдык-техникалык жана медициналык камсыздоо тууралуу макулдашуу (мындан ары - Макулдашуу) жалпысынан Кыргыз Республикасынын Конституциясынын, Кыргыз Республикасынын мыйзамдарынын ченемдерине ылайык келет жана Кыргыз Республикасынын мыйзамдарына ылайык күчүнө кирген эл аралык келишимдердин ченемдерине каршы келбейт. Макулдашуу кабыл алынган учурда ЖККУнун Аскерлерин (Жамааттык күчтөрүн) материалдык-техникалык жана медициналык камсыздоо иш-чараларын уюштуруу жана практикалык аткаруу маселелерин укуктук жөнгө салуунун натыйжалуулугун жогорулатууга мүмкүндүк берет. Макулдашууга ылайык ЖККУга мүчө мамлекеттер ЖККУнун Аскерлерин (Жамааттык күчтөрүн) курал-жарактын заманбап, бир түрдүү жана айкалышкан үлгүлөрү, аскердик жана атайын техникалар, ошондой эле материалдык каражаттар менен камсыз кылууга багытталган макулдашылган аскердик-техникалык саясатты жүргүзөт. ЖККУнун Аскерлеринин топторун (Жамааттык күчтөрүн) курал-жарак, аскердик жана атайын техника, материалдык каражаттар менен камсыздоо мүчө мамлекеттер тарабынан улуттук мыйзамдарына ылайык жеке каражаттарынын эсебинен өз алдынча же ЖККУ форматында же эки тараптуу форматта ишке ашырылуучу мамлекеттер аралык максаттуу программалардын алкагында ушул максаттарга бөлүнгөн каражаттардын эсебинен, ошондой эле мүчө мамлекеттердин бири-бирине макулдашылган көлөмдөрдө көрсөткөн аскердик-техникалык жардамдарынын эсебинен ишке ашырылат. Макулдашуу аталган чөйрөдөгү болгон олуттуу укуктук кемчиликтерди жоюуга мүмкүнчүлүк берет жана ЖККУнун Аскерлеринин контингентинин (Жамааттык күчтөрүнүн) күжүрмөн даярдыгын жана күжүрмөн жөндөмүн зарыл болгон колдоону камсыз кылат. "Кыргыз Республикасынын эл аралык келишимдери жөнүндө" Кыргыз Республикасынын Мыйзамынын талаптарына ылайык Макулдашуу ратификацияланууга тийиш жана кол коюлганга чейин Кыргыз Республикасынын кызыкдар болгон министрликтери жана ведомстволору менен макулдашылды, Кыргыз Республикасынын Жогорку Кеңешинин Эл аралык иштер, коргоо жана коопсуздук боюнча комитетинин чечими (2020-ж. 17-декабры, чыг. № 6-2725/20) жана Кыргыз Республикасынын Президентинин 2020-жылдын 18-декабрындагы № 49 буйругу менен жактырылган. Жогоруда аталган Макулдашууну кыргыз тарапка тиешелүү бөлүгүндө ишке ашыруу коргоо ведомствосунун Кыргыз Республикасынын республикалык бюджетинде тиешелүү жылга каралган каражаттарынын чегинде жүзөгө ашырылат жана кошумча финансылык каражаттарды бөлүүнү талап кылбайт. Макулдашууну ратификациялоо финансылык-экономикалык жана башка терс кесепеттерге алып келбейт.