КР Өкмөтүнүн «Кыргыз Республикасынын Экономика министрлиги 2021-жылдын 31-мартына чейинки мөөнөттө 2022-2024-жылдарга Кыргыз Республикасын социалдык-экономикалык өнүктүрүүнүн орто мөөнөттүү болжолун Кыргыз Республикасынын Финансы министрлигине жиберүү жөнүндө» буйруку

КЫРГЫЗ РЕСПУБЛИКАСЫНЫН ӨКМӨТҮ БУЙРУК 2021-жылдын 29-январы № 16-б 2022-2024-жылдарга Кыргыз Республикасынын фискалдык саясатынын негизги багыттарынын долбоорун жана "Кыргыз Республикасынын 2022-жылга республикалык бюджети жана 2023-2024-жылдарга болжолу жөнүндө" Кыргыз Республикасынын Мыйзамынын долбоорун өз убагында жана сапаттуу даярдоо максатында, Кыргыз Республикасынын Бюджеттик кодексинин 81-беренесине ылайык:

1. Кыргыз Республикасынын Экономика министрлиги 2021-жылдын 31-мартына чейинки мөөнөттө 2022-2024-жылдарга Кыргыз Республикасын социалдык-экономикалык өнүктүрүүнүн орто мөөнөттүү болжолун Кыргыз Республикасынын Финансы министрлигине жиберсин.

2. Кыргыз Республикасынын Өнөр жай, энергетика жана жер казынасын пайдалануу мамлекеттик комитети 2021-жылдын 10-апрелине чейинки мөөнөттө Кыргыз Республикасынын Финансы министрлигине 2022-2024-жылдарга жер казынасын пайдалануу укугу үчүн салык (бонус), пайдалуу кен чыккан жерлердин кендерин же казып алынуучу отунду пайдалануу үчүн жыйым, жер казынасын пайдалануу укугуна лицензияны кармоо үчүн жыйым боюнча түшүүлөрдүн болжолун берсин.

3. Кыргыз Республикасынын Өкмөтүнө караштуу Мамлекеттик бажы кызматы, Кыргыз Республикасынын Өкмөтүнө караштуу Мамлекеттик салык кызматы 2021-жылдын 10-апрелине чейинки мөөнөттө Кыргыз Республикасынын Финансы министрлигине 2022-2024-жылдарга салыктардын жана салыктык эмес кирешелердин бюджетке түшүүлөрүнүн негизделген болжолун беришсин.

4. Кыргыз Республикасынын Өкмөтүнө караштуу Мамлекеттик мүлктү башкаруу боюнча фонд 2021-жылдын 10-апрелине чейинки мөөнөттө Кыргыз Республикасынын Финансы министрлигине 2022-2024-жылдарга мамлекеттик менчикти менчиктештирүү, акциялардын мамлекеттик пакетине чегерилген дивиденддер боюнча түшүүлөрдүн, чарба жүргүзүүчү субъекттер боюнча мамлекеттик ишканалардын пайдасынын болжолун, ошондой эле мамлекеттин менчигиндеги жайларды, имараттарды жана курулмаларды ижарага берүү үчүн төлөмдөрдүн түшүүлөрүнүн болжолун берсин.

5. Кыргыз Республикасынын Социалдык фонду жана Кыргыз Республикасынын Өкмөтүнө караштуу Милдеттүү медициналык камсыздандыруу фонду 2021-жылдын 10-апрелине чейинки мөөнөттө Кыргыз Республикасынын Финансы министрлигине консолидацияланган бюджетти түзүү үчүн кирешелер жана чыгымдар боюнча бюджеттин 2020-жылдагы аткарылышын, 2021-жылга бекитилген маалыматтарды жана 2022-2024-жылдарга финансы ресурстарынын жана чыгымдардын болжолун беришсин.

6. 2022-2024-жылдарга бюджеттик чыгымдардын секторалдык стратегияларын (мындан ары - БЧСС) берүүчү аткаруу бийлигинин мамлекеттик органдарынын тизмеси тиркемеге ылайык бекитилсин.

7. Ушул буйруктун тиркемесинде көрсөтүлгөн жана 2022-2024-жылдарга фискалдык саясаттын негизги багыттарынын долбооруна БЧСС берүүчү аткаруу бийлигинин мамлекеттик органдары:

1) коргоо жана укуктук тартипти сактоо маселелерин тескөөчү ыйгарым укуктуу мамлекеттик органдардан тышкары, коомдук угууларды өткөрүү убактысы жана жери жөнүндө билдирүү менен БЧСС долбоорун ведомстволук расмий веб-сайтка 2021-жылдын 15-апрелине чейинки мөөнөттө жарыялашсын;

2) коргоо маселелерин тескөөчү ыйгарым укуктуу мамлекеттик органдан тышкары, кызыкдар мамлекеттик органдардын өкүлдөрүнүн катышуусу менен секторалдык стратегияларды коомдук талкуулоону 2021-жылдын 26-апрелине чейинки мөөнөттө жүргүзүшсүн;

3) Кыргыз Республикасынын Финансы министрлигине Кыргыз Республикасынын Өкмөтүнүн 2017-жылдын 30-декабрындагы № 854 токтому менен бекитилген Бюджеттик чыгымдардын орто мөөнөттүү стратегияларын түзүү, кароо жана аткаруу тартиби жөнүндө нускамага ылайык тийиштүү багыттар боюнча 2022-2024-жылдарга БЧСС долбоору боюнча документтердин пакетин 2021-жылдын 1-майына чейинки мөөнөттө беришсин.

8. Аткаруу бийлигинин мамлекеттик органдары Кыргыз Республикасынын Финансы министрлигине төмөнкүлөрдү беришсин:

1) 2021-жылдын 10-апрелине чейинки мөөнөттө - 2022-2024-жылдарга ченемдик укуктук актыларга киргизилген өзгөртүүлөрдү эске алуу менен пландалган чыгымдарды, атайын эсептерде топтолгон каражаттар боюнча болжолду тийиштүү эсептөөлөрү жана негиздемеси менен;

2) 2021-жылдын 26-июлуна чейинки мөөнөттө 2022-2024-жылдарга бюджеттик каражаттар боюнча берилген контролдук цифраларга ылайык:

- Кыргыз Республикасынын Өкмөтүнүн 2017-жылдын 30-декабрындагы № 854 токтому менен бекитилген Программалык негизде бюджеттерди түзүү, кароо жана аткаруу тартиби жөнүндө нускамага ылайык 2022-2024-жылдарга программалык негиздеги бюджеттин долбоорлорун;

- Кыргыз Республикасынын Финансы министрлиги тарабынан бекитилген сунуштамаларга жана сметалардын формаларына ылайык, программалык негиздеги зарыл болгон эсептөөлөр жана негиздеме менен өнүктүрүүнүн мамлекеттик тармактык программаларына негизделген 2022-2024-жылдарга бюджеттик каражаттардын чыгымдарынын жыйынды сметаларынын жана атайын эсептерде топтолгон каражаттар боюнча кирешелер менен чыгымдардын сметаларынын долбоорлорун.

9. Кыргыз Республикасынын Финансы министрлиги:

1) министрликтерге, мамлекеттик комитеттерге жана административдик ведомстволорго ресурстар боюнча болжолго ылайык 2022-2024-жылдарга бюджеттик каражаттар боюнча алдын ала контролдук цифралардын долбоорлорун 2021-жылдын 27-апрелине чейинки мөөнөттө билдирсин;

2) министрликтердин, мамлекеттик комитеттердин жана административдик ведомстволордун өкүлдөрүнүн катышуусу менен контролдук цифралар жөнүндө пикир келишпестиктер боюнча жумушчу кеңешмелерди 2021-жылдын 10-майына чейинки мөөнөттө өткөрсүн;

3) фискалдык жана инвестициялык саясат боюнча Кыргыз Республикасынын Өкмөтүнүн кеңешинде кароо үчүн 2022-2024-жылдарга министрликтер, мамлекеттик комитеттер, административдик ведомстволор үчүн чыгымдар боюнча жалпы контролдук цифраларды камтуучу 2022-2024-жылдарга Кыргыз Республикасынын фискалдык саясатынын негизги багыттарынын долбоорун 2021-жылдын 20-майына чейинки мөөнөттө иштеп чыксын;

4) 2021-жылдын 5-июнуна чейинки мөөнөттө министрликтер, мамлекеттик комитеттер, административдик ведомстволор жана Кыргыз Республикасынын аткаруу бийлигинин башка органдары менен контролдук цифралар боюнча пикир келишпестиктерди кароонун натыйжалары боюнча 2022-2024-жылдарга Кыргыз Республикасынын фискалдык саясатынын негизги багыттарын бекитүү жөнүндө Кыргыз Республикасынын Өкмөтүнүн чечиминин долбоорун даярдасын жана берсин;

5) Кыргыз Республикасынын Өкмөтүнүн токтому менен бекитилген контролдук цифраларды 2021-жылдын 10-июлуна чейинки мөөнөттө министрликтерге, мамлекеттик комитеттерге, административдик ведомстволорго жана аткаруу бийлигинин башка органдарына билдирсин;

6) "Кыргыз Республикасынын 2022-жылга республикалык бюджети жана 2023-2024-жылдарга болжолу жөнүндө" Кыргыз Республикасынын Мыйзамынын долбоору боюнча коомдук угууларды 2021-жылдын 6-сентябрына чейинки мөөнөттө жүргүзсүн;

7) "Кыргыз Республикасынын 2022-жылга республикалык бюджети жана 2023-2024-жылдарга болжолу жөнүндө" Кыргыз Республикасынын Мыйзамынын долбоорун 2020-жылдын 15-сентябрына чейинки мөөнөттө Кыргыз Республикасынын Өкмөтүнүн кароосуна киргизсин.

10. Ушул буйруктун аткарылышын контролдоо Кыргыз Республикасынын Өкмөтүнүн Аппаратынын финансы жана кредит саясаты бөлүмүнө жүктөлсүн.

Премьер-министрдин милдетин аткаруучу, биринчи вице-премьер-министрдин милдетин аткаруучу

А.Э.Новиков

Тиркеме

2022-2024-жылдарга бюджеттик чыгымдардын секторалдык стратегияларын берүүчү аткаруу бийлигинин мамлекеттик органдарынын ТИЗМЕСИ

1. Кыргыз Республикасынын Билим берүү жана илим министрлиги

2. Кыргыз Республикасынын Саламаттык сактоо министрлиги

3. Кыргыз Республикасынын Эмгек жана социалдык өнүктүрүү министрлиги

4. Кыргыз Республикасынын Айыл чарба, тамак-аш өнөр жайы жана мелиорация министрлиги

5. Кыргыз Республикасынын Транспорт жана жол министрлиги

6. Кыргыз Республикасынын Ички иштер министрлиги

7. Кыргыз Республикасынын Өзгөчө кырдаалдар министрлиги

8. Кыргыз Республикасынын Маданият, маалымат жана туризм министрлиги

9. Кыргыз Республикасынын Тышкы иштер министрлиги

10. Кыргыз Республикасынын Экономика министрлиги

11. Кыргыз Республикасынын Коргоо иштери боюнча мамлекеттик комитети

12. Кыргыз Республикасынын Өнөр жай, энергетика жана жер казынасын пайдалануу мамлекеттик комитети

13. Кыргыз Республикасынын Маалыматтык технологиялар жана байланыш мамлекеттик комитети

14. Кыргыз Республикасынын Өкмөтүнө караштуу Жаштар иштери, дене тарбия жана спорт боюнча мамлекеттик агенттик

15. Кыргыз Республикасынын Өкмөтүнө караштуу Курчап турган чөйрөнү коргоо жана токой чарбасы мамлекеттик агенттиги

16. Кыргыз Республикасынын Өкмөтүнө караштуу Жер ресурстары боюнча мамлекеттик агенттиги

17. Кыргыз Республикасынын Өкмөтүнө караштуу Суу ресурстары мамлекеттик агенттиги

18. Кыргыз Республикасынын Өкмөтүнө караштуу Мамлекеттик миграция кызматы

19. Кыргыз Республикасынын Өкмөтүнө караштуу Экологиялык жана техникалык коопсуздук боюнча мамлекеттик инспекция

20. Кыргыз Республикасынын Өкмөтүнө караштуу Ветеринардык жана фитосанитардык коопсуздук боюнча мамлекеттик инспекция

21. Кыргыз Республикасынын Социалдык фонду

22. Кыргыз Республикасынын Өкмөтүнө караштуу Милдеттүү медициналык камсыздандыруу фонду.