КР Өкмөтүнүн (Кыргыз Республикасынын Жогорку Кеңешинин «Кыргыз Республикасынын Өкмөтүнүн ишинин программасын бекитүү жөнүндө) буйругу

КЫРГЫЗ РЕСПУБЛИКАСЫНЫН ӨКМӨТҮ БУЙРУК 2020-жылдын 22-июлу № 259-б Кыргыз Республикасынын Жогорку Кеңешинин 2018-жылдын 20-апрелиндеги № 2377-VI "Кыргыз Республикасынын Өкмөтүнүн ишинин программасын бекитүү жөнүндө" токтомун, Кыргыз Республикасынын Өкмөтүнүн 2019-жылдын 15-февралындагы № 20-б "Санарип Кыргызстан 2019-2023" санариптик трансформациялоо концепциясын ишке ашыруу боюнча буйругун аткаруу жана мамлекеттик активдерге системалык башкарууну киргизүү максатында:

1. Акционердик коомдор жана жоопкерчилиги чектелген коомдор өзгөртүп түзүлгөн учурга карата уставдык капиталына киргизилбеген жана алардын жооптуу сактоосуна өткөрүп берилген социалдык, маданий жана тиричиликтик багыттагы мамлекеттик мүлккө 1991-жылдын январынан тартып 2019-жылдын декабрына чейинки мезгил үчүн ревизия жүргүзүү боюнча ведомстволор аралык комиссия (мындан ары - ведомстволор аралык комиссия) тиркемеге ылайык курамда түзүлсүн.

2. Ведомстволор аралык комиссия бир жумалык мөөнөттө социалдык-маданий жана тиричиликтик багыттагы мамлекеттик объекттердин архивдик иш-кагаздарын текшерүү (ревизия) боюнча иш-чаралар планын иштеп чыгып, бекитсин жана квартал сайын маалыматты Кыргыз Республикасынын Өкмөтүнүн Аппаратына берип турсун.

3. Ведомстволор аралык комиссия өзүнүн ишин камсыздоо үчүн белгиленген тартипте төмөнкүлөргө укуктуу экендиги белгиленсин:

- мамлекеттик органдардын, жергиликтүү мамлекеттик администрациялардын, жергиликтүү өз алдынча башкаруу органдарынын (макулдашуу боюнча), бизнес-ассоциациялардын жана эксперттик коомдоштуктун (макулдашуу боюнча) өкүлдөрүн ишке тартууга;

- мамлекеттик органдардан, жергиликтүү мамлекеттик администрациялардан, жергиликтүү өз алдынча башкаруу органдарынан (макулдашуу боюнча), бизнес-ассоциациялардан жана эксперттик коомдоштуктан (макулдашуу боюнча) зарыл болгон маалыматтарды сурап алууга.

4. Ведомстволор аралык комиссия социалдык-маданий жана тиричиликтик багыттагы мамлекеттик объекттердин иш жүзүндө болгондугун, алардын абалын, статусун аныктоо жана жайгашкан жери боюнча зарыл болгон маалыматтарды чогултуу максатында архивдик иш-кагаздарын жеринде текшерүү (ревизия), тизмесин түзүү жана аныктоо боюнча ведомстволор аралык аймактык жумушчу топторду түзсүн, мында жумушчу топтордун отчетторун ай сайын карап, аталган объекттерди андан ары пайдалануу боюнча чечимдерди кабыл алсын.

5. Министрликтердин, мамлекеттик комитеттердин, административдик ведомстволордун, жергиликтүү мамлекеттик администрациялардын, жергиликтүү өз алдынча башкаруу органдардын жетекчилери, Бишкек жана Ош шаарларынын мэрлери (макулдашуу боюнча) эки жумалык мөөнөттө ведомстволор аралык аймактык жумушчу топтордун курамына киргизүү үчүн адамдардын тизмесин аныктап, бекитүү үчүн ведомстволор аралык комиссияга беришсин.

6. Ведомстволор аралык комиссия ведомстволор аралык аймактык жумушчу топтордун өздүк курамын бекитсин.

7. Ушул буйрукту аткаруу менен байланышкан бардык чыгымдар, анын ичинде командировкалык чыгымдар, маалым каттарды жана документтердин көчүрмөлөрүн берүү боюнча чыгымдар тиешелүү ыйгарым укуктуу мамлекеттик органдардын, жергиликтүү мамлекеттик администрациялардын жана жергиликтүү өз алдынча башкаруу органдарынын каражаттарынын эсебинен каржылана тургандыгы белгиленсин.

8. Министрликтердин, мамлекеттик комитеттердин, жергиликтүү мамлекеттик администрациялардын, жергиликтүү өз алдынча башкаруу органдарынын, коммерциялык жана коммерциялык эмес уюмдардын жетекчилери ведомстволор аралык комиссиянын жана жумушчу топтордун ишине жардам көрсөтүшсүн.

9. Ушул буйруктун аткарылышын контролдоо Кыргыз Республикасынын Өкмөтүнүн Аппаратынын экономика жана инвестициялар бөлүмүнө жүктөлсүн.

Премьер-министр

К.А. Боронов

Тиркеме

Ведомстволор аралык комиссиянын КУРАМЫ Кыргыз Республикасынын Өкмөтүнө караштуу Мамлекеттик мүлктү башкаруу боюнча фонддун төрагасынын орун басары, ведомстволор аралык комиссиянын төрагасы; Кыргыз Республикасынын Экономика министрлигинин мамлекеттик менчик саясаты башкармалыгынын начальниги, ведомстволор аралык комиссиянын төрагасынын орун басары; Кыргыз Республикасынын Юстиция министринин орун басары; Кыргыз Республикасынын Ички иштер министринин орун басары; Кыргыз Республикасынын Улуттук статистика комитетинин төрагасынын орун басары (макулдашуу боюнча); Кыргыз Республикасынын Өкмөтүнө караштуу Мамлекеттик каттоо кызматынын төрагасынын орун басары; Кыргыз Республикасынын Өкмөтүнө караштуу Жер ресурстары боюнча мамлекеттик агенттиктин директорунун орун басары; Кыргыз Республикасынын Өкмөтүнө караштуу Жергиликтүү өз алдынча башкаруу иштери жана этностор аралык мамилелер боюнча мамлекеттик агенттиктин директорунун орун басары; Кыргыз Республикасынын Өкмөтүнүн Чүй облусундагы ыйгарым укуктуу өкүлүнүн орун басары; Кыргыз Республикасынын Өкмөтүнө караштуу Мамлекеттик мүлктү башкаруу боюнча фонддун эсепке алуу жана реестр башкармалыгынын начальниги, ведомстволор аралык комиссиянын катчысы; Кыргыз Республикасынын Өкмөтүнө караштуу Мамлекеттик мүлктү башкаруу боюнча фонддун юридикалык маселелер боюнча башкармалыгынын начальниги; Кыргыз Республикасынын Өкмөтүнө караштуу Мамлекеттик мүлктү башкаруу боюнча фонддун мүлктүк мамилелер башкармалыгынын начальниги; Кыргыз Республикасынын Өкмөтүнө караштуу Мамлекеттик мүлктү башкаруу боюнча фонддун чарбалык коомдор менен иштөө боюнча башкармалыгынын начальниги.