КР Өкмөтүнүн (Кыргыз Республикасынын Куралдуу Күчтөрүнүн Генералдык штабынын жана Казакстан Республикасынын Коргоо министрлигинин ортосундагы Кыргыз Республикасынын Куралдуу Күчтөрүнүн жана Казакстан Республикасынын Куралдуу Күчтөрүнүн аскердик аэродромдорунда аскердик аба кемелерин кабыл алууну, аэродромдук-техникалык камсыздоону жана кайтарууну уюштуруу жөнүндө макулдашуунун тиркелген долбооруна макулдук берүү жөнүндө) буйругу

КЫРГЫЗ РЕСПУБЛИКАСЫНЫН ӨКМӨТҮ БУЙРУК 2019-жылдын 26-ноябры № 445-б Кыргыз Республикасынын Куралдуу Күчтөрүнүн Генералдык штабынын жана Казакстан Республикасынын Коргоо министрлигинин ортосундагы Кыргыз Республикасынын Куралдуу Күчтөрүнүн жана Казакстан Республикасынын Куралдуу Күчтөрүнүн аскердик аэродромдорунда аскердик аба кемелерин кабыл алууну, аэродромдук-техникалык камсыздоону жана кайтарууну уюштуруу жөнүндө макулдашуунун тиркелген долбооруна мүмкүн болгон принциптүү эмес мүнөздөгү өзгөртүүлөрдү жана толуктоолорду эске алуу менен макулдук берилсин.

Премьер-министр

М.Д.Абылгазиев

Долбоор

Кыргыз Республикасынын Куралдуу Күчтөрүнүн Генералдык штабынын жана Казакстан Республикасынын Коргоо министрлигинин ортосундагы Кыргыз Республикасынын Куралдуу Күчтөрүнүн жана Казакстан Республикасынын Куралдуу Күчтөрүнүн аскердик аэродромдорунда аскердик аба кемелерин кабыл алууну, аэродромдук-техникалык камсыздоону жана кайтарууну уюштуруу жөнүндө МАКУЛДАШУУ Мындан ары Тараптар деп аталуучу, Кыргыз Республикасынын Куралдуу Күчтөрүнүн Генералдык штабы жана Казакстан Республикасынын Коргоо министрлиги, 1997-жылдын 8-апрелиндеги Кыргыз Республикасы менен Казакстан Республикасынын ортосундагы аскердик чөйрөдөгү кызматташуу жөнүндөгү келишимдин жобосун эске алып, Кыргыз Республикасынын Куралдуу Күчтөрүнүн жана Казакстан Республикасынын Куралдуу Күчтөрүнүн аскердик аэродромдорунда аскердик аба кемелерин кабыл алуу, аэродромдук-техникалык камсыздоо жана кайтаруу тартибин аныктоо максатында төмөнкүлөр тууралуу макулдашты: 1-берене. Тараптардын аскердик аба кемелеринин учууларын уюштуруу жана аткаруу эки тараптын тең мамлекеттери катышуучусу болуп саналган эл аралык келишимдерге, ошондой эле Тараптардын мамлекеттеринин улуттук мыйзамдарына ылайык жүзөгө ашырылат. Тараптар ушул Макулдашууну жүзөгө ашыруу боюнча чыгымдарды өз алдынча Тараптардын мамлекеттеринин улуттук мыйзамдарында каралган каражаттын чегинде көтөрөт. 2-берене. Ушул Макулдашууну жүзөгө ашыруу боюнча ыйгарым укуктуу органдар болуп төмөнкүлөр эсептелет: кыргыз Тараптан - Кыргыз Республикасынын Куралдуу Күчтөрүнүн Абадан кол салуудан коргоо күчтөрүнүн командачылыгы; казак Тараптан - Казакстан Республикасынын Куралдуу Күчтөрүнүн Абадан кол салуудан коргоо күчтөрүнүн Башкы командачысынын башкармалыгынын Аба кыймылын башкаруунун башкы борбору. Ыйгарым укуктуу органдардын аталышы же функциялары өзгөргөн учурда, Тараптар тез арада бири-бирине кабарлайт. Жөнөтүүчү Тарап кабыл алуучу Тарапка Тараптардын ыйгарым укуктуу органдарынын линиясы боюнча жөнөтүүчү Тараптын аймагынан учуу башталган күнгө чейин 7 календардык күндөн кечиктирбестен аскердик аба кемелеринин пландалган учуулары жөнүндө маалымдайт. Ар бир конкреттүү учурда кабарламада күйүүчү майдын, майлардын, майлоочу материалдардын жана атайын суюктуктардын жана алардын сортторунун керектүү өлчөмү көрсөтүлөт. Аскердик аба кемелерин кабыл алуу, күйүүчү майдын, майлардын, майлоочу материалдардын жана атайын суюктуктардын бар экендиги жөнүндө ырастамаларды кабыл алуучу Тарап жөнөтүүчү Тараптын аймагынан конкреттүү учуу убактысы пландалган күнгө чейин 24 сааттан кечиктирбестен берет. Тараптардын өтүнүчү боюнча тез арада учууну талап кылуучу өзгөчө кырдаалдарда учуунун шарттарын макулдашуу аба кыймылдарын башкаруу борборлору аркылуу ыкчам (телефондук) байланыш каналдары боюнча учуунун алдында жүргүзүлүшү мүмкүн. Мындай учурларда кабыл алуучу Тарап өз убагында аэродромдук-техникалык камсыздоого, күйүүчү майды, майларды, майлоочу материалдарды жана атайын суюктуктарды куюуга, ошондой эле кабыл алуучу Тараптын куралдануусунда турган ошол эле типтеги аскердик аба кемелерине ээ жөнөтүүчү Тараптын аскердик аба кемелери үчүн жердеги тейлөө каражаттарынын оң техникалык абалына кепилдик берет. 3-берене. Аскердик аэродромдордо аскердик аба кемелерин кабыл алууну (чыгарууну) учууларды жетектөө тобу же конуучу (учуучу) аэродромдордогу аба кемелерин кабыл алуу (чыгаруу) боюнча дежур жүргүзөт. Конуучу аскердик аэродромдун даярдыгы жөнүндө ырастама учуучу-конуучу тилкенин даярдыгынын, байланыш каражаттарынын ишинин, радиотехникалык, аэродромдук-техникалык жана метеорологиялык камсыздоонун жана инженердик-авиациялык камсыздоого көмөк көрсөтүүнүн кепилдиги болуп саналат. Жүргүнчүлөрдү ташуучу аскердик аба кемелерин кабыл алуу (чыгаруу) конуучу (учуучу) аэродромдун учууларын жетектөөнүн штаттык тобу тарабынан гана жүргүзүлөт. 4-берене. Аскердик аба кемелерине күйүүчү майды, майларды, майлоочу материалдарды жана атайын суюктуктарды куюу кабыл алуучу Тараптын мамлекетинин Куралдуу Күчтөрүндө колдонулуучу күйүүчү майдын сапатын жана техникалык коопсуздук эрежелерин контролдоо боюнча ченемдик документтердин талаптарын так сактоо менен жүргүзүлөт. 5-берене. Аскердик аба кемелеринин Тараптардын биринин аскердик аэродромдоруна конуусунда Тараптар төмөнкү кызматтарды көрсөтүүнү уюштурууга милдеттенет:

а) акысыз:

аэродром тууралуу керектүү маалыматтарды алуу; учууларга (учуулар планына) өтүнмөлөрдү берүү; аскердик аэродромдордун метеотүзүмдөрүнүн метеомаалыматтарды берүүсү; учууда жана конууда учуу маршрутунда (трасса боюнча учуудан башка учурда) аскердик навигациялык системаларды колдонуу; аскердик аба кемелери туруучу жай жана кайтаруу;

б) акы төлөө менен:

күйүүчү май, майлар, майлоочу материалдар жана атайын суюктуктар менен камсыз кылуу; иштебей калган авиациялык техниканы калыбына келтирүү боюнча чыгымдарды кайтарууга; биргелешкен база жана биргелешип пайдалануу аэродромунда метеомаалыматтарды берүү жана башка аэропорттук кызматтарды көрсөтүү. 6-берене. Аскердик аба кемелерине күйүүчү майды, майларды, майлоочу материалдарды жана атайын суюктуктарды куюу үч нускадагы эки тараптуу акт менен таризделет, алардын бири аскердик аба кемесинин экипажынын командирине (топтун улугуна) берилет, ал эми эки нускасы кабыл алуучу Тараптын аскердик аэродромунун май куюучу пунктуна берилет, аталган актыларга алар иш жүзүндө аткарылгандан кийин Тараптардын кызмат адамдары тарабынан кол коюлат. Эки тараптуу актыда төмөнкүлөр көрсөтүлөт: күнү жана май куюу пункту, аба кемесинин тиби, анын таандыктыгы жана борт номери, күйүүчү майдын, майлардын, майлоочу материалдардын жана атайын суюктуктардын маркасы, куюлган күйүүчү майдын, майлардын, майлоочу материалдардын жана атайын суюктуктардын кабыл алуучу Тараптын мамлекетинин улуттук валютасындагы эсепке алуу наркы. Күйүүчү майдын, майлардын, майлоочу материалдардын жана атайын суюктуктардын сортунун аталышы колдонуудагы эл аралык стандарттарга ылайык көрсөтүлөт. Өлчөмү тууралуу жазуу цифра жана жазуу түрүндө жүргүзүлөт. Аскердик аба кемелеринин топторуна май куюуда, бир актыда куюу үчүн берилген күйүүчү майдын, майлардын, майлоочу материалдардын жана атайын суюктуктардын жалпы өлчөмү көрсөтүлөт жана аскердик аба кемесинин экипажынын командирине (топтун улугуна) берилүүчү ар бир аскердик аба кемеси боюнча күйүүчү майдын, майлардын, майлоочу материалдардын жана атайын суюктуктардын өлчөмүн көрсөтүү менен 2 нускадагы таратуу ведомосту түзүлөт. 7-берене. Тараптардын ортосундагы эсептер Тараптардын бири эки тараптуу актыны алган күндөн тартып 30 календардык күндүн ичинде жүргүзүлөт. Эсептөөлөрдө күйүүчү майдын, майлардын, майлоочу материалдардын жана атайын суюктуктардын эки тараптуу актыда көрсөтүлгөн эсепке алуу наркына ылайык, казакстан Тарап эсепти кыргыз сомунда төлөйт, ал эми кыргыз Тарап эсепти казак теңгеси менен төлөйт. Аскердик аба кемелерине күйүүчү майды, майларды, майлоочу материалдарды жана атайын суюктуктарды куюу үчүн акы төлөө күнү болуп Тараптардын эсебинен акча каражаты чыгарылган күн эсептелет. Тараптар каражаттарды которуу үчүн белгиленген тартипте бири-бирине банктык реквизиттер жана алуучулардын аталыштары жөнүндө кабарлайт. Алуучунун маалыматы жана (же) анын банктык реквизити өзгөргөн учурда Тараптар өзгөртүү кирген күндөн тартып 7 календардык күндүн ичинде бири-бирине бул тууралуу кабарлайт. Эки тараптуу актыларда көрсөтүлгөн күйүүчү майдын, майлардын, майлоочу материалдардын жана атайын суюктуктардын, кызмат көрсөтүүлөрдүн эсептерин иш жүзүндө берилген жана төлөнгөн күйүүчү майдын, майлардын, майлоочу материалдардын жана атайын суюктуктардын эсеби менен салыштырып текшерүү максатында ар бир жарым жылдын жыйынтыгы боюнча эсептерди текшерүү актысы түзүлөт. 8-берене. Конуу (учуу) аэродромдорундагы аскердик аба кемелери кабыл алуучу Тарап тарабынан жабдылган токтоочу жай жана кайтаруу менен камсыз кылынат. Бул аба кемелери аба кемесинин сакталышын контролдоону камсыз кылуу тартибинде кайтарууга берилет. 9-берене. Учууларды аткаруу жөнүндө кабарламаны жөнөтүү, учуу шарттарын макулдашуу, жерде жана абада аскердик аба кемелеринин экипаждарын башкаруу, ошондой эле өз ара эсептешүүлөр жөнүндө документтер орус тилинде жүргүзүлөт. 10-берене. Ушул Макулдашуунун жоболорун колдонууга жана (же) талкуулоого байланыштуу талаш-тартыштар жана пикир келишпестиктер Тараптар тарабынан консультациялар жана сүйлөшүүлөр жолу менен чечилет. 11-берене. Тараптардын өз ара макулдашуусу боюнча ушул Макулдашууга анын ажырагыс бөлүгү болуп саналган өзгөртүүлөр жана толуктоолор киргизилиши мүмкүн жана өзүнчө протоколдор менен таризделет. 12-берене. Ушул Макулдашуу кол коюлган күндөн тартып күчүнө кирет. Макулдашуу беш жылдык мөөнөткө түзүлөт жана эгерде Тараптардын бири да тиешелүү беш жылдык мөөнөт бүткөнгө чейин алты айдан кем эмес убакытта экинчи Тарапка дипломатиялык каналдар аркылуу анын аракетин узартпоо ниети жөнүндө кат түрүндөгү кабарламаны жибербесе, кийинки беш жылдык мезгилге автоматтык түрдө узартылат.

20__-жылдын "__" ___________ ___________ шаарында эки нускада, кыргыз, казак жана орус тилдеринде даярдалды, мында бардык тексттер бирдей күчкө ээ. Тексттердин ортосунда айырмачылыктар болгондо Тараптар орус тилиндеги текстке кайрылышат.

Кыргыз Республикасынын Куралдуу Күчтөрүнүн Генералдык штабы үчүн

Казакстан Республикасынын Коргоо министрлиги үчүн