КР Өкмөтүнүн (Өзгөчө кырдаалдардын алдын алуу жана жоюу тармагында Кыргыз Республикасынын Өзгөчө кырдаалдар министрлиги менен Кытай Эл Республикасынын Өзгөчө кырдаалдарды башкаруу боюнча министрлигинин ортосундагы өз ара түшүнүшүү жөнүндө меморандумдун долбооруна макулдук берүү жөнүндө) буйругу

КЫРГЫЗ РЕСПУБЛИКАСЫНЫН ӨКМӨТҮ БУЙРУК 2019-жылдын 11-июну № 200-б Өзгөчө кырдаалдардын алдын алуу жана жоюу тармагында Кыргыз Республикасынын Өзгөчө кырдаалдар министрлиги менен Кытай Эл Республикасынын Өзгөчө кырдаалдарды башкаруу боюнча министрлигинин ортосундагы өз ара түшүнүшүү жөнүндө меморандумдун долбооруна принциптүү эмес мүнөздөгү өзгөртүүлөрдү жана толуктоолорду киргизүү укугу менен макулдук берилсин.

Премьер-министр

М.Д.Абылгазиев

Долбоор

Өзгөчө кырдаалдардын алдын алуу жана жоюу тармагында Кыргыз Республикасынын Өзгөчө кырдаалдар министрлиги менен Кытай Эл Республикасынын Өзгөчө кырдаалдарды башкаруу боюнча министрлигинин ортосундагы өз ара түшүнүшүү жөнүндө МЕМОРАНДУМ Мындан ары "Тараптар" деп аталган Кыргыз Республикасынын Өзгөчө кырдаалдар министрлиги жана Кытай Эл Республикасынын Өзгөчө кырдаалдарды башкаруу боюнча министрлиги, 2002-жылдын 24-июнунда Кыргыз Республикасы менен Кытай Эл Республикасынын ортосундагы Тилектеш коңшулаштык, достук жана кызматташтык келишимине негизденишип, эки мамлекеттин ортосундагы достук мамилелерди чыңдоого умтулуп, өзгөчө кырдаалдардын алдын алуу жана жоюу тармагында кызматташтык эки мамлекеттин тең өнүгүүсүнө жана коопсуздугуна көмөк көрсөтөөрүн таанып, эки мамлекет үчүн өзгөчө кырдаалдар коркунуч алып келерин түшүнүп, Тараптардын биринин күчтөрү жана каражаттары менен жоюу мүмкүн болбогон өзгөчө кырдаалдардын пайда болуу мүмкүнчүлүгүн жана өзгөчө кырдаалдардын алдын алуу жана жоюу максатында эки мамлекеттин координацияланган иш аракеттеринин муктаждыгын көңүлгө алуу менен, Шанхай кызматташтык уюму жана башка көп тараптуу форматтарда өз ара аракеттенүүнү, ошондой эле өзгөчө кырдаалдардын жана табигый кырсыктардын алдын алууну жана кесепеттерин жоюу боюнча "Бир тилке - бир жол" эл аралык кызматташтык механизмин изилдөөнү, түзүүнү жана биргелешип илгерилетүүнү тереңдетүүгө умтулуп, төмөнкүлөр жөнүндө өз ара макулдашууга келишти: 1-берене. Максаты Ушул Меморандумдун максаты болуп өзгөчө кырдаалдардын алдын алуу жана жоюу тармагында кызматташтыкты өнүктүрүү саналат. 2-берене. Кызматташтык чөйрөлөрү Тараптар өздөрүнүн компетенцияларынын чегинде төмөнкү чөйрөлөрдө кызматташат:

1. Өз ара иш сапарларды, эксперттик кеңешмелерди, семинарларды жана илимий-техникалык жетишкендиктерди талкуулоону уюштуруу, ошондой эле өзгөчө кырдаалдардын алдын алуу жана жоюу тармагында билим, тажрыйба, технологиялар, маалыматтар менен алмашуу.

2. Табигый кырсыктардын алдын алуу, анын кесепеттерин жеңилдетүү жана жардам көрсөтүү үчүн космостук технологияларды колдонуу.

3. Издөө-куткаруу иштерин, окууларды, мелдештерди жана биргелешкен машыгууларды өткөрүү.

4. Өзгөчө кырдаалдардын алдын алуу жана жоюу тармагында биргелешкен долбоорлорду ишке ашыруу.

5. Өзгөчө кырдаалдар келип чыккан учурда Тараптардын биринин өтүнүчү боюнча мүмкүнчүлүгүнө жараша жардам көрсөтүү.

Жогоруда аталган тармактарда кызматташтык боюнча конкреттүү чаралар Тараптардын ортосунда консультацияларды өткөрүү жолу менен аныкталат. 3-берене. Каржылоо Тараптар ушул Меморандумду ишке ашыруунун финансылык шарттарын өзүнчө ар бир учурда өз ара макулдашылган негизде консультациялар жолу менен чечүү тууралуу макулдашты. 4-берене. Талаш-тартыштарды чечүү Ушул Меморандумдун алкагындагы кызматташтык Тараптардын мамлекеттеринин улуттук мыйзамдарына жана тиешелүү эл аралык келишимдерине ылайык ишке ашырылат. Ушул Меморандумдун жоболорун чечмелөөгө же колдонууга байланыштуу Тараптардын ортосунда келип чыккан ар кандай талаш-тартыштар консультацияларды жана сүйлөшүүлөрдү өткөрүү жолу менен жөнгө салынат. Бул Меморандум Тараптар катышкан башка эл аралык келишимдери боюнча укуктарын жана милдеттенмелерин козгобойт. 5-берене. Күчүнө кириши жана колдонуу мөөнөтү Ушул Меморандум кол коюлган күндөн тартып күчүнө кирет жана аныкталбаган мөөнөткө түзүлөт. Тараптардын ар бири экинчи Тарапка өзүнүн чечими тууралуу кабарлоону жазуу жүзүндө жиберип, ушул Меморандумдун колдонулушун токтото алат, анын колдонуу мөөнөтү кабарлоону алган күндөн тартып 6 айдан кийин аяктайт. Тараптардын өз ара макулдугу боюнча ушул Меморандумга анын ажырагыс бөлүгү болгон өзүнчө протокол менен таризделүүчү өзгөртүүлөр жана толуктоолор киргизилиши мүмкүн. Ушул Меморандумдун колдонулушун токтотуу, эгерде Тараптар башка тууралуу сүйлөшпөсө, ага ылайык ишти баштап жүргүзүп келген, бирок анын күчүн токтотууга чейин бүтүрүлө элек ишти козгобойт.

Ушул Меморандум 2019-жылдын "__" __________ ______________ шаарында эки түп нускада, ар бири кыргыз, кытай жана орус тилдеринде түзүлдү, бардык тексттер бирдей күчкө ээ болот. Эгерде ушул Меморандумдун жоболорун чечмелөөдө кайчы пикирлер жаралса, тексттин орус тилиндеги варианты артыкчылыкка ээ болот.

Кыргыз Республикасынын Өзгөчө кырдаалдар министрлиги үчүн

Кытай Эл Республикасынын Өзгөчө кырдаалдарды башкаруу боюнча министрлиги үчүн

Министр

Министр