КР Өкмөтүнүн «Көз карандысыз Мамлекеттердин Шериктештигине катышкан мамлекеттердин чек ара аймактарында токой илдеттеринин очогун жана зыянкечтерин алдын алуу жана жок кылуу боюнча өз ара аракеттенүү жөнүндө макулдашуунун расмий тилде долбоорун жактыруу жөнүндө» буйругу

КЫРГЫЗ РЕСПУБЛИКАСЫНЫН ӨКМӨТҮ БУЙРУК 2018-жылдын 31-октябры № 382-б Көз карандысыз Мамлекеттердин Шериктештигине катышкан мамлекеттердин чек ара аймактарында токой илдеттеринин очогун жана зыянкечтерин алдын алуу жана жок кылуу боюнча өз ара аракеттенүү жөнүндө макулдашуунун расмий тилде тиркелген долбоору принциптүү эмес мүнөздөгү өзгөртүүлөрдү жана толуктоолорду киргизүү укугу менен жактырылсын.

Премьер-министр

М.Д.Абылгазиев

Долбоор Көз карандысыз Мамлекеттердин Шериктештигине катышкан мамлекеттердин чек ара аймактарында токой илдеттеринин очогун жана зыянкечтерин алдын алуу жана жок кылуу боюнча өз ара аракеттенүү жөнүндө МАКУЛДАШУУ Мындан ары Тараптар деп аталуучу, ушул Макулдашууга катышкан мамлекеттердин Өкмөттөрү, 1998-жылдын 11-сентябрындагы Токой өнөр жай комплексин жана токой чарба тармагындагы кызматташтык жөнүндө Макулдашууга, 2008-жылдын 10-октябрындагы Көз карандысыз Мамлекеттердин Шериктештигине катышкан мамлекеттердин чек ара боюндагы кызматташуусу жөнүндө конвенцияга негизденип, 2013-жылдын 31-майындагы Көз карандысыз Мамлекеттердин Шериктештигине катышкан мүчө мамлекеттердин чек ара жанындагы аймактарда табигый өрттөрдү алдын алуу жана өчүрүү жаатында кызматташуу жөнүндө макулдашууну бекитүү тууралуу макулдашуунун жоболорун өнүктүрүп, Токой илдеттеринин жана зыянкечтеринин Көз карандысыз Мамлекеттердин Шериктештигине катышкан мамлекеттердин чектеш аймактарына жайылып кетүүсүн алдын алуу максатында кызматташуунун маанилүүлүгүн таануу менен, төмөнкүлөр жөнүндө макулдашты: 1-берене. Ушул Макулдашуунун максаттары үчүн төмөнкүдөй мааниге ээ болгон негизги терминдер колдонулат: токойдогу зыяндуу организмдердин түрлөрү - белгилүү санга көбөйгөндө же өнүгүү жана жайылуу деңгээлине жеткенде токойго жана токой продукцияларына экологиялык жана экономикалык зыян келтирүү мүмкүндүгү бар тирүү организмдердин түрлөрү (зыянкечтер жана өсүмдүктөрдүн инфекциялык ооруларын козгогучтар); токойдун патологиялык мониторинги - экологиялык мониторингинин системасы, токойдун патологиялык жана санитардык абалы, токой зыянкечтеринин жана илдеттеринин өнүгүшү жана жайылышы, жана башка жагымсыз жаратылыш жана антропогендик факторлордун таасиринен бузулушу (жабыркашы) жөнүндө маалыматты жыйноо, талдоо жана пайдалануу системасы. Токойдун патологиялык абалын болжолдоо жана токойду коргоо боюнча иш-чараларды пландоо жана жүргүзүү боюнча чечим кабыл алуу максатында өткөрүлөт; ыйгарым укуктуу органдар - Тараптар ушул Макулдашууну ишке ашыруу үчүн чечим кабыл алуу жана иш-чараларды жүргүзүү боюнча ыйгарым укук берген ушул Макулдашууга катышкан мамлекеттердин мамлекеттик органдары жана/же уюмдары. 2-берене. Көз карандысыз Мамлекеттердин Шериктештигине катышкан мамлекеттердин чек ара аймактарында токой илдеттеринин очогун жана зыянкечтерин алдын алуу жана жок кылуу, токойдун патологиялык мониторингин жана ушул Макулдашууга катышкан мамлекеттердин чек ара аймактарында токойдун жоготууларын, келтирилген экономикалык зыянды минималдаштыруу үчүн токой илдеттеринин жана зыянкечтеринин таасиринен коргоо деңгээлин өнүктүрүү боюнча биргелешкен чараларды иштеп чыгуу боюнча макулдашууга катышкан мамлекеттердин кызматташуусу ушул Макулдашуунун максаты болуп эсептелет. 3-берене. Тараптар өздөрүнүн ыйгарым укуктуу органдарынын тизмесин аныктайт, тизме ушул Макулдашуунун күчүнө кириши үчүн зарыл болгон мамлекеттик ички жол-жоболордун аткарылгандыгы жөнүндө билдирме тапшырылган учурда депозитарийге берилет. Ыйгарым укуктуу органдардын тизмесинин өзгөрүлгөндүгү жөнүндө ар бир Тарап мындай чечим кабыл алынган күндөн тартып 30 күндөн кечиктирбей депозитарийге маалымдайт, ал калган Тараптарды бул тууралуу кабарлайт. 4-берене. Тараптар кызматташууну эл аралык келишимдер жана ушул Макулдашууга катышкан мамлекеттердин мыйзамдары сакталган шартта ушул Макулдашууга ылайык өздөрүнүн ыйгарым укуктуу органдары аркылуу жүргүзүшөт. Тараптардын ыйгарым укуктуу органдары кызматташууну төмөнкүдөй жол менен ишке ашырышат: маалымат алмашуу жана ушул Макулдашууга катышкан мамлекеттердин чек ара аймактарындагы токойдун патологиялык мониторингинин жыйынтыктары жөнүндө консультацияларды өткөрүү; зыяндуу организмдер менен көрүлгөн чаралар жөнүндө маалымат алмашуу; ушул Макулдашууга катышкан мамлекеттердин чек ара аймактарындагы токойлордун патологиялык мониторинги жаатындагы биргелешкен илимий-изилдөө иштерин аткаруу; токойду коргоо боюнча иш-чараларды өткөрүү жаатында өз ара илимий жана техникалык жардам көрсөтүү; токой илдеттери жана зыянкечтери менен күрөшүү боюнча окуу курстарын жана семинарларды уюштуруу. 5-берене. Ушул Макулдашууга катышкан мамлекеттердин чек ара аймактарындагы токой илдеттеринин очогун жана зыянкечтерин алдын алуу жана жок кылуу жаатындагы ушул Макулдашууга катышкан мамлекеттердин кызматташуу маселелери боюнча өз ара аракеттенүүнүн координатору болуп Токой өнөр жай комплекси жана токой чарбасы боюнча өкмөттөр аралык кеңеш эсептелет. 6-берене. Ушул Макулдашуунун максаты үчүн Тараптар ушул Макулдашууга катышкан мамлекеттердин чек ара аймактарында жайылган токойдогу зыяндуу организмдердин түрлөрүнүн жалпы тизмесин (тизмелерин) түзөт, ал Токой өнөр жай комплекси жана токой чарбасы боюнча өкмөттөр аралык кеңеш тарабынан бекитилет. 7-берене. Ушул Макулдашууну ишке ашыруу боюнча кызматташууну финансылык камсыздоо Көз карандысыз Мамлекеттердин Шериктештигине катышкан мамлекеттердин бюджетинде кызыкдар министрликтердин жана ведомстволордун функцияларын камсыздоого каралган каражаттардын чегинде ишке ашырылат. 8-берене. Ушул Макулдашууга Тараптардын макулдугу боюнча өзгөртүүлөр киргизилиши мүмкүн, ал анын ажырагыс бөлүгү болуп саналат жана тиешелүү протокол менен таризделет. 9-берене. Тараптардын ортосунда ушул Макулдашууну колдонууда жана чечмелөөдө келип чыгуучу талаш маселелер консультациялар жана кызыкдар Тараптардын сүйлөшүүлөрү же Тараптардын макулдашылган башка жол-жоболору аркылуу чечилет. 10-берене. Ушул Макулдашуу, анын күчүнө кириши үчүн зарыл болгон мамлекеттик ички жол-жоболорду Макулдашууга кол койгон Тараптардын аткаргандыгы жөнүндө үчүнчү билдирме депозитарий тарабынан алынган күндөн тартып 30 күндөн кийин күчүнө кирет. Мамлекеттик ички жол-жоболорду кечиктирип аткарган Тараптар үчүн ушул Макулдашуу депозитарий тарабынан тийиштүү документтер алынган күндөн тартып 30 күндөн кийин күчүнө кирет. 11-берене. Ушул Макулдашуу, ал күчүнө киргенден кийин депозитарийге кошулуу жөнүндө документти берүү жолу менен Көз карандысыз Мамлекеттердин Шериктештигине катышкан ар бир мамлекет кошула алат. Кошулуп жаткан мамлекет үчүн Макулдашуу депозитарий тарабынан кошулуу жөнүндө документтер алынган күндөн тартып 30 күндөн кийин күчүнө кирет. 12-берене. Ушул Макулдашуу белгисиз мөөнөткө түзүлдү. Ар бир Тарап ушул Макулдашуудан чыгып кеткенге чейин 6 айдан кеч эмес мөөнөттө өзүнүн ниети жөнүндө депозитарийге жазуу жүзүндө билдирип жана ушул Макулдашууну колдонуу мезгилинде келип чыккан милдеттенмелерди жөнгө салып, ушул Макулдашуудан чыгып кетүүгө укуктуу.

Астана шаарында 2018-жылдын 2-ноябрында орус тилиндеги бир түп нускада түзүлдү. Түп нуска Көз карандысыз Мамлекеттердин Шериктештигинин аткаруучу комитетинде сакталат, ал ушул Макулдашууга кол койгон ар бир мамлекетке анын күбөлөндүрүлгөн көчүрмөсүн жиберет.

Азербайжан Республикасынын Өкмөтү үчүн

Россия Федерациясынын Өкмөтү үчүн

Армения Республикасынын Өкмөтү үчүн

Тажикстан Республикасынын Өкмөтү үчүн

Беларусь Республикасынын Өкмөтү үчүн

Түркмөнстандын Өкмөтү үчүн

Казакстан Республикасынын Өкмөтү үчүн

Өзбекстан Республикасынын Өкмөтү үчүн

Кыргыз Республикасынын Өкмөтү үчүн

Украинанын Өкмөтү үчүн

Молдова Республикасынын Өкмөтү үчүн