КР Өкмөтүнүн «Кыргыз Республикасынын Өкмөтү менен Казакстан Республикасынын Өкмөтүнүн ортосундагы Жардам берүү жана анын колдонулушун контролдоо тартиби жөнүндө протоколдун долбоору жана Кыргыз Республикасынын Өкмөтү менен Казакстан Республикасынын Өкмөтүнүн ортосундагы техникалык көмөктөшүү жөнүндө протоколдун долбоору жактыруу жөнүндө» буйругу

КЫРГЫЗ РЕСПУБЛИКАСЫНЫН ӨКМӨТҮ БУЙРУК 2016-жылдын 20-декабры № 554-б

1. Төмөнкү тиркелгендер жактырылсын:

- Кыргыз Республикасынын Өкмөтү менен Казакстан Республикасынын Өкмөтүнүн ортосундагы Жардам берүү жана анын колдонулушун контролдоо тартиби жөнүндө протоколдун долбоору;

- Кыргыз Республикасынын Өкмөтү менен Казакстан Республикасынын Өкмөтүнүн ортосундагы техникалык көмөктөшүү жөнүндө протоколдун долбоору.

2. Кыргыз Республикасынын Евразия экономикалык бирлигине мүчө мамлекеттер менен кызматташтык маселелерин тескөөчү вице-премьер-министрине принциптүү эмес мүнөздөгү өзгөртүүлөрдү жана толуктоолорду киргизүү укугу менен Кыргыз Республикасынын Өкмөтүнүн атынан жогоруда аталган протоколдорго кол коюуга ыйгарым укук берилсин.

Премьер-министр

С.Ш.Жээнбеков

Долбоор Кыргыз Республикасынын Өкмөтү менен Казакстан Республикасынын Өкмөтүнүн ортосундагы Жардам берүү жана анын колдонулушун контролдоо тартиби жөнүндө ПРОТОКОЛ Мындан ары "Тараптар" деп аталуучу Кыргыз Республикасынын Өкмөтү жана Казакстан Республикасынын Өкмөтү, мамлекет башчыларынын деңгээлиндеги Жогорку Евразия экономикалык кеңешинин 2014-жылдын 29-майындагы № 74 "Беларусь Республикасынын, Казакстан Республикасынын жана Россия Федерациясынын Бажы бирлигине Кыргыз Республикасынын кошулуусу боюнча иш-чаралар планы ("жол картасы") жөнүндө" жана 2014-жылдын 10-октябрындагы № 75 "Евразия экономикалык бирлигин түзүүнү эске алуу менен Беларусь Республикасынын, Казакстан Республикасынын жана Россия Федерациясынын бирдиктүү экономикалык мейкиндигине Кыргыз Республикасынын кошулуусу боюнча иш-чаралар планы ("жол картасы") жөнүндө" чечимдерин (мындан ары - жол карталары) аткаруунун маанилүүлүгүн таанып, Кыргыз Республикасынын Өкмөтү менен Казакстан Республикасынын Өкмөтүнүн ортосундагы Евразиялык экономикалык интеграциялоонун шарттарында экономикалык кызматташтыкты өнүктүрүү жөнүндө макулдашууну (мындан ары - Макулдашуу) ишке ашыруу максатында, төмөнкүлөр жөнүндө макулдашты: 1-берене. Тараптар ушул Протокол менен Макулдашуунун 3-беренесине ылайык кыргыз тарабына жардам берүүнүн, ошондой эле алардын аткарылышын контролдоонун тартибин аныктайт. 2-берене.

1. Ушул Протоколду ишке ашыруу Тараптардын ыйгарым укуктуу органдарына жүктөлөт.

Техникалык көмөктөшүү иш-чаралары үчүн жооптуу ыйгарым укуктуу орган - техникалык көмөктөшүү иш-чараларын макулдашуу үчүн Тараптар ыйгарым укук берген мамлекеттик орган же уюм. Ыйгарым укуктуу орган техникалык көмөктөшүү жөнүндө протоколго ылайык - Тараптардын кызматташуу процессинде берилүүчү жана (же) көрсөтүлүүчү жардамды өткөрүп берүүгө, алууга жана пайдаланууга техникалык көмөктөшүү жөнүндө протоколго ылайык Тараптар ыйгарым укук берген мамлекеттик орган же уюм.

2. Макулдашуунун жана анын протоколдорунун алкагында милдеттенмелерди аткаруунун натыйжалары жана контролдоо процесси боюнча Тараптардын ортосунда маалыматтарды алмашуу төмөнкүлөргө жүктөлөт:

Кыргыз тарабынан - евразиялык интеграциялоонун алкагында мамлекеттик органдардын ишин координациялоочу ыйгарым укуктуу орган; Казакстан тарабынан - Казакстан Республикасынын Тышкы иштер министрлиги. 3-берене. Жардам Макулдашуунун жоболоруна ылайык көрсөтүлөт жана Макулдашуу, ушул Протокол жана техникалык көмөктөшүү жөнүндө тиешелүү протокол күчүнө кирген күндөн тартып техникалык көмөктөшүү жөнүндө протоколдордун негизинде этабы менен берилет. Зарылдыгына жараша Казакстан Республикасынын бюджетти аткаруу боюнча ыйгарым укуктуу органы ушул Протоколдун 4-беренесинде каралган иш-чараларды каржылоо жана Казакстан Республикасынын ыйгарым укуктуу органдарынын өз ара аракеттенүү тартибин аныктайт. 4-берене. Макулдашуунун 2-беренесине ылайык кыргыз тарабына жардам төмөнкүлөр аркылуу берилиши мүмкүн:

1) жабдууларды, товарларды жана кызмат көрсөтүүлөрдү сатып алууга, курулушка акча каражаттарын которуу;

2) жаңы товарларды жана/же жабдууларды берүү;

3) окутуу боюнча кызматтарды көрсөтүү.

5-берене. Ушул Протоколдун 4-беренесинин 1) пунктчасында аталган товарларды, жабдууларды, кызмат көрсөтүүлөрдү сатып алуу жана курулуш үчүн жардам техникалык көмөктөшүү жөнүндө протоколдордун тиркемелерине ылайык кыргыз тарабына акчалай түрүндө берилет. 6-берене.

1. Бул жардам төмөнкүдөй тартипте берилет:

1) техникалык көмөктөшүү жөнүндө протоколдорду түзүү максатында техникалык көмөктөшүү боюнча иш-чаралар үчүн жооптуу кыргыз тараптын атынан ыйгарым укуктуу орган төмөнкүлөрдү берет:

- сатып алынууну товарлар, жабдуулар жана кызмат көрсөтүүлөр үчүн - техникалык адистикти, баалар боюнча сунуштарды, техникалык тапшырманы, техникалык-экономикалык негиздемени, Кыргыз Республикасынын мыйзамдарына ылайык ыйгарым укуктуу орган күбөлөндүргөн долбоордук-сметалык документтерге мамлекеттик экспертизанын корутундусунун көчүрмөсүн - техникалык көмөктөшүү жөнүндө иш-чаралар үчүн жооптуу болгон казакстан тарабынын ыйгарым укуктуу органына;

- курулуш үчүн - Кыргыз Республикасынын мыйзамдарына ылайык форматта долбоордук-сметалык документтерге мамлекеттик экспертизанын корутундусунун ыйгарым укуктуу орган күбөлөндүргөн көчүрмөсүн - техникалык көмөктөшүү жөнүндө иш-чаралар үчүн жооптуу болгон казакстан тарабынын ыйгарым укуктуу органына;

2) техникалык көмөктөшүү иш-чаралары үчүн жооптуу казакстан тарабынын ыйгарым укуктуу органы ушул берененин 1-пунктунун 1) пунктчасында аталган керектүү документтерди алгандан кийин макул болгон учурда кыргыз тарабына акча каражатын бөлүүгө даяр экендиги тууралуу билдирет;

3) ушул Протоколдун 2-беренесинин 2-пунктунда аталган ыйгарым укуктуу орган кыргыз тарабынын атынан техникалык көмөктөшүү жөнүндө протокол күчүнө кирген күндөн тартып 10 жумуш күнүнөн кечиктирбей ушул Протоколдун 2-беренесинин 2-пунктунда аталган казакстан тарабынын ыйгарым укуктуу органына акча каражаттарынын суммасын которуу үчүн банктык реквизиттерди берет;

4) акча каражаттарын которуу берилген банктык реквизиттерге ылайык кыргыз тарабынын эсебине техникалык көмөктөшүү жөнүндө тиешелүү протоколдун иш-чараларында каралган каражаттын суммасынан 100 (жүз) пайыз өлчөмүндө АКШ доллары менен жүргүзүлөт;

5) кыргыз тарабынын эсебине акча каражаттар түшкөндөн кийин, техникалык көмөктөшүү жөнүндө протоколдорго ылайык иш-чаралар үчүн жооптуу кыргыз тарабынын ыйгарым укуктуу органы Кыргыз Республикасынын мыйзамдарына ылайык товарларды, жабдууларды жана кызмат көрсөтүүлөрдү сатып алат. Техникалык көмөктөшүү жөнүндө протоколго ылайык иш-чаралар үчүн жооптуу кыргыз тарабынын ыйгарым укуктуу органы техникалык көмөктөшүү жөнүндө протоколго ылайык иш-чаралар үчүн жооптуу казакстан тарабынын ыйгарым укуктуу органына тиешелүү контракттардын түзүлгөнү тууралуу алардын көчүрмөлөрүн тиркөө менен билдирет.

Сатып алуулардын жыйынтыгы боюнча үнөмдөлгөн каражаттар Кыргыз Республикасынын Финансы министрлигинин Борбордук казыначылыгынын тиешелүү алыш-бериш эсебине топтолот, аны андан ары башкаруу Тараптардын макулдугу боюнча жүргүзүлөт.

2. Кыргыз тарабы ушул беренеде каралган берилген документтердин толуктугуна жана тууралыгына жооптуу болот.

3. Кыргыз тарабы объекттерди куруу боюнча башкы подрядчыны тандайт, ал өз кезегинде курулушту Кыргыз Республикасынын мыйзамдарына ылайык жүргүзөт.

4. Казакстан тарабы кыргыз тарабынын, башкы подрядчынын жана субподрядчынын милдеттенмелери үчүн жооп тартпайт.

7-берене.

1. Ушул Протоколдун 4-беренесинин 2) пунктчасында аталган техникалык көмөктөшүү жөнүндө протоколдордун тиркемелерине ылайык жаңы товарларды жана/же жабдууларды өткөрүп берүү түрүндөгү жардам Макулдашуу, ушул Протокол жана техникалык көмөктөшүү жөнүндө тиешелүү протокол күчүнө кирген күндөн тартып 30 күндүн ичинде жүзөгө ашырылат.

2. Кыргыз Республикасынын аймагына товарларды жана/же жабдууларды жеткирүүгө байланыштуу бардык чыгымдар (даярдоого, сактоого, жүктөөгө, ташууга жана жолдо жүрүүдөгү башка күтүлбөгөн чыгымдар) Казакстан Республикасынын мыйзамдарына ылайык казакстан тарабына жүктөлөт.

3. Ушул Протоколдун 4-беренесинин 2) пунктчасында аталган товарларды жана/же жабдууларды кыргыз тарабы Кыргыз Республикасынын мыйзамдарына ылайык Кыргыз Республикасынын аймагында тиешелүү колдонууга уруксат берүү максатында каттоого алышы керек.

4. Техникалык көмөктөшүү жөнүндө протоколдорго ылайык иш-чаралар үчүн жооптуу Тараптардын ыйгарым укуктуу органдарынын өз ара макулдашуусу боюнча ушул товарларды жана/же жабдууларды кыргыз тарабы Казакстан Республикасынын аймагынан өз алдынча ташып кетиши да мүмкүн.

5. Берилип жаткан товарлардын жана/же жабдуулардын сапаты жана коопсуздугу Евразия экономикалык бирлигинин талаптарына ылайык шайкештик сертификаты менен ырасталууга, өткөрүп берүү учурунда колдонууга жана пайдаланууга жарактуу болууга тийиш.

6. Товарларды жана/же жабдууларды алууну, ошондой эле алардын пайдаланууга жана колдонууга жарактуулугун Тараптар кабыл алуу - өткөрүп берүү актысына кол коюу менен ырасташат.

7. Тараптар тиешелүү кабыл алуу - өткөрүп берүү актысына кол коюшуп, товарларды жана/же жабдууларды өткөрүп берген учурдан тартып менчик укугу пайда болуу менен бирге кокусунан толук боюнча жарактан чыгуу же бузулуу опурталы кыргыз тарабына өтөт.

8. Казакстан тарабынын кыргыз тарабына товарларды жана/же жабдууларды өткөрүп бергенден кийин, аларды ташуу, сактоо же колдонуунун натыйжасында келтирилген зыянга кыргыз тарабы жооптуу болот.

9. Кыргыз тарабы алган товарларды жана/же жабдууларды казакстан тарабынын алдын ала жазуу жүзүндө макулдугусуз үчүнчү тарапка колдонууга бербөөгө милдеттенет.

10. Кыргыз тарабына тигил же бул товарларды жана/же жабдууларды өткөрүп берүү бөлүгүндө ушул Протоколду ишке ашыруу үчүн жооптуу болуп техникалык көмөктөшүү жөнүндө протоколдордун тиркемесинде аталган казакстан тарабынын ыйгарым укуктуу органы саналат.

Техникалык көмөктөшүү жөнүндө протоколдорго ылайык иш-чаралар үчүн жооптуу, техникалык көмөктөшүү жөнүндө протоколдун тиркемелерине ылайык товарларды жана/же жабдууларды өткөрүп берген казакстан тарабынын ыйгарым укуктуу органы өткөрүп берүүнү, ташууну, жеткирүүнү, монтаждоону, жөнгө салып иштетүүнү жана кыргыз тарабына өткөрүп берүү үчүн зарыл болгон башка иш-чараларды жүзөгө ашырат. 8-берене. Ушул Протоколду ишке ашыруунун алкагында Казакстан Республикасынын аймагына ташылып кирген жана аймагынан ташылып чыккан товарлар жана/же жабдуулар техникалык көмөктөшүү жөнүндө протоколго ылайык иш-чаралардын тизмеси боюнча бажы жыйымдарын, алымдарды жана салыктарды төлөбөстөн, биринчи кезекте бажы жол-жобосунда жайгаштырылат. Ушул Протоколду ишке ашыруу алкагында Кыргыз Республикасынын аймагына ташылып кирген жана аймагынан ташылып чыккан товарлар жана/же жабдуулар техникалык көмөктөшүү жөнүндө протоколго ылайык иш-чаралардын тизмеси боюнча бажы жыйымдарын, алымдарды жана салыктарды төлөбөстөн, биринчи кезекте бажы жол-жобосунда жайгаштырылат. Ушул Протоколдун алкагында Кыргыз Республикасынын аймагына товарларды берүү, жумуштарды жана кызматтарды көрсөтүү кошумча нарк салыгын жана сатуудан салыкты төлөөдөн бошотулат. 9-берене. Техникалык көмөктөшүү жөнүндө протоколдун тиркемелерине ылайык ушул Протоколдун 4-беренесинин 3) пунктчасында аталган кыргыз адистерин окутуу боюнча кызматтарды көрсөтүү формасында жардам берүү Казакстан Республикасынын окутуу борборлорунун базасында же Кыргыз Республикасында жүргүзүлөт. Окутуу программасы Тараптардын макулдашуусу боюнча иштелип чыгат. Аяктоо формасы тийиштүү окутуу сертификаты болуп саналат. 10-берене. Кыргыз тарап көрсөтүлгөн жардамды максаттуу пайдаланууга милдеттенет. 11-берене.

1. Көрсөтүлгөн жардамды максаттуу жана натыйжалуу пайдаланууну контролдоо максатында кыргыз-казакстан Өкмөттөр аралык кеңештин алкагында биргелешкен эки тараптуу Ревизиялык комиссия түзүлөт.

2. Ревизиялык комиссиянын курамы жана текшерүүлөрдү жүргүзүүнүн тартиби контролдоонун мөөнөтүн жана мезгилин белгилөө менен Өкмөттөр аралык кеңештин чечими менен бекитилет.

3. Ревизиялык комиссиянын ыйгарым укуктарына төмөнкүлөр кирет:

1) сатып алынуучу жабдууну, товарларды, иштерди жана кызмат көрсөтүүлөрдү сатып алууда жана пайдаланууда Кыргыз Республикасынын мыйзамдарынын талаптарына шайкештигин текшерүү;

2) товарлардын жана жабдуулардын болушун, сакталышын, аларды натыйжалуулук принциптерин сактоо менен максаттуу пайдаланылышын текшерүү;

3) бухгалтердик операцияларды туура чагылдыруу, бөлүнгөн каражаттарды чегерүүнүн, иш-сапарга жана чарбалык чыгымдарды төлөп берүүнүн негиздүүлүгү, ошондой эле Тараптардын макулдашуусу боюнча текшерүү жүргүзүүдө пайда болгон башка маселелер.

4. Текшерүүнүн жыйынтыгы корутунду (акт) түрүндө таризделет жана кыргыз-казакстан Өкмөттөр аралык кеңешке берилет, аны карап чыгуунун жыйынтыгы боюнча ушул Протоколдун алкагында андан ары каржылоо жөнүндө чечим кабыл алынат.

5. Ревизия Макулдашуунун шарттарын Тараптар толук аткарганга чейин жылына жок дегенде бир жолу жүргүзүлөт.

6. Ревизиялык комиссия өзүнүн ишин ушул Макулдашуудан келип чыккан бардык милдеттенмелерди жана ушул Протоколду Тараптар аткарышканы жөнүндө кыргыз-казакстан Өкмөттөр аралык кеңештин чечими боюнча токтотот.

12-берене. Ушул Протоколдун жоболорун колдонууга же чечмелөөгө байланыштуу кайчы пикирлерди жана талаштарды Тараптар консультацияларды жана сүйлөшүүлөрдү жүргүзүү жолу менен жөнгө салышат. 13-берене. Тараптардын өз ара макулдугу менен ушул Протоколго өзгөртүүлөр жана толуктоолор киргизилиши мүмкүн, алар өз алдынча протоколдор менен таризделет жана ушул Протоколдун ажырагыс бөлүгү болуп саналат. 14-берене. Ушул Протокол ушул Протоколдун жана Макулдашуунун күчүнө кириши үчүн зарыл болгон мамлекеттик ички жол-жоболорду Тараптардын аткарышкандыгы жөнүндө жазуу жүзүндөгү акыркы билдирүү дипломатиялык каналдар боюнча алынган күндөн баштап күчүнө кирет. Ушул Протокол Тараптар ушул Протоколдо каралган милдеттенмелердин бардыгын аткарышкан учурдан тартып колдонулушун токтотот. _______________________ шаарында 2016-жылдын "___" _______________ эки түп нускада, ар бири кыргыз, казак жана орус тилдеринде түзүлдү жана тексттердин бардыгы бирдей күчкө ээ болот. Ушул Протоколду чечмелөөдө пикир келишпестиктер пайда болгон учурда, Тараптар орус тилиндеги текстке кайрылышат.

Кыргыз Республикасынын Өкмөтү үчүн

Казакстан Республикасынын Өкмөтү үчүн

Долбоор Кыргыз Республикасынын Өкмөтү менен Казакстан Республикасынын Өкмөтүнүн ортосундагы Техникалык көмөктөшүү жөнүндө ПРОТОКОЛ Мындан ары Тараптар деп аталуучу Кыргыз Республикасынын Өкмөтү менен Казакстан Республикасынын Өкмөтү, мамлекет башчыларынын деңгээлиндеги Жогорку Евразия экономикалык кеңешинин 2014-жылдын 29-майындагы № 74 "Беларусь Республикасынын, Казакстан Республикасынын жана Россия Федерациясынын Бажы бирлигине Кыргыз Республикасынын кошулуусу боюнча иш-чаралар планы ("жол картасы") жөнүндө", ошондой эле 2014-жылдын 10-октябрындагы № 75 "Евразия экономикалык бирлигинин түзүлүшүн эске алуу менен Беларусь Республикасынын, Казакстан Республикасынын жана Россия Федерациясынын бирдиктүү экономикалык мейкиндигине Кыргыз Республикасынын кошулуусу боюнча иш-чаралар планы ("жол картасы") жөнүндө" (мындан ары - жол карталары) чечимдерин аткаруунун маанилүүлүгүн таанып, Кыргыз Республикасынын Өкмөтү менен Казакстан Республикасынын Өкмөтүнүн ортосундагы Евразиялык экономикалык интеграциялоонун шарттарында экономикалык кызматташтыкты өнүктүрүү жөнүндө макулдашууну (мындан ары - Макулдашуу) ишке ашыруу максатында, төмөнкүлөр жөнүндө макулдашты: 1-берене.

1. Ушул Протокол менен-Тараптар Макулдашуунун 2-беренесине ылайык жол карталарынын иш-чараларына шайкеш келүүчү, жалпы суммасы 7526789 (жети миллион беш жүз жыйырма алты миң жети жүз сексен тогуз) АКШ долларын түзгөн иш-чаралардын тизмегин, суммаларын, мөөнөттөрүн, Тараптардын аларды ишке ашырууга ыйгарым укуктуу органдарын тиркемеге ылайык бекитишет.

2. Ушул Протоколдун Тиркемесине ылайык Кыргыз Республикасына техникалык көмөктөшүү иш-чараларынын тизмеги анын ажырагыс бөлүгү болуп саналат.

2-берене. Жардам Кыргыз Республикасынын Өкмөтү менен Казакстан Республикасынын Өкмөтүнүн ортосундагы Жардам берүү жана анын колдонулушун контролдоо тартиби жөнүндө протокол менен бекитилген тартипте төмөнкүдөй формаларда көрсөтүлөт: акча каражаттары, жабдуулар, товарлар, окутуу жана кызмат көрсөтүүлөр. 3-берене. Ушул Протоколдун жоболорун колдонууга же чечмелөөгө байланыштуу келип чыккан кайчы пикирлерди жана талаш-тартыштарды Тараптар консультацияларды жана сүйлөшүүлөрдү жүргүзүү жолу менен жөнгө салышат. 4-берене. Тараптардын өз ара макулдугу менен ушул Протоколго өзгөртүүлөр жана толуктоолор киргизилиши мүмкүн, алар өзүнчө протоколдор менен таризделет жана анын ажырагыс бөлүгү болуп саналат. 5-берене. Ушул Протокол ушул Протоколдун, Макулдашуунун жана Кыргыз Республикасынын Өкмөтү менен Казакстан Республикасынын Өкмөтүнүн ортосундагы Жардам берүү жана анын колдонулушун контролдоо тартиби жөнүндө протоколдун күчүнө кириши үчүн зарыл болгон мамлекеттик ички жол-жоболорду Тараптардын аткарышкандыгы жөнүндө жазуу жүзүндөгү акыркы билдирүү дипломатиялык каналдар боюнча алынган датадан тартып күчүнө кирет. Ушул Протокол Тараптар ушул Протоколдо каралган бардык милдеттенмелерди аткарган учурдан тартып колдонулушун токтотот.

__________________ шаарында 2016-жылдын "____" ________________ эки түп нускада, ар бири кыргыз, казак жана орус тилдеринде түзүлдү, мында бардык тексттер бирдей күчкө ээ. Ушул Протоколду чечмелөөдө пикир келишпестиктер келип чыккан учурда Тараптар орус тилиндеги текстке кайрылышат.

Кыргыз Республикасынын Өкмөтү үчүн

Казакстан Республикасынын Өкмөтү үчүн