КР ӨКМӨТҮНҮН «Кыргыз Республикасынын Ички иштер министрлиги менен Улуу Британиянын жана Түндүк Ирландиянын Биргелешкен Королдугунун Кылмыштуулукка каршы күрөшүү боюнча улуттук агенттигинин ортосундагы Улуттар аралык уюшкан кылмыштуулукка каршы күрөшүүдө өз ара түшүнүшүү тууралуу меморандумдун долбооруна макулдук берүү жөнүндө» буйругу

КЫРГЫЗ РЕСПУБЛИКАСЫНЫН ӨКМӨТҮ БУЙРУК 2017-жылдын 17-февралы № 44-б Кызматташтыкты түзүү жана бекемдөө, укук коргоо ишиндеги билимдерди жана тажрыйбаларды алмашуу максатында, "Кыргыз Республикасынын эл аралык келишимдери жөнүндө" Кыргыз Республикасынын Мыйзамынын 6-беренесине ылайык: Кыргыз Республикасынын Ички иштер министрлиги менен Улуу Британиянын жана Түндүк Ирландиянын Биргелешкен Королдугунун Кылмыштуулукка каршы күрөшүү боюнча улуттук агенттигинин ортосундагы Улуттар аралык уюшкан кылмыштуулукка каршы күрөшүүдө өз ара түшүнүшүү тууралуу меморандумдун тиркелген долбооруна принциптүү эмес мүнөздөгү өзгөртүүлөрдү жана толуктоолорду киргизүү укугу менен макулдук берилсин.

Премьер-министр

С.Ш.Жээнбеков

Долбоор Кыргыз Республикасынын Ички иштер министрлиги менен Улуу Британиянын жана Түндүк Ирландиянын Биргелешкен Королдугунун Кылмыштуулукка каршы күрөшүү боюнча улуттук агенттигинин ортосундагы Улуттар аралык уюшкан кылмыштуулукка каршы күрөшүүдө өз ара түшүнүшүү тууралуу МЕМОРАНДУМ Кыргыз Республикасынын Ички иштер министрлиги менен Улуу Британиянын жана Түндүк Ирландиянын биргелешкен Королдугунун Кылмыштуулукка каршы күрөшүү боюнча улуттук агенттиги (мындан ары "Тараптар" деп аталышып), өлкөлөрдүн ортосундагы достук мамилени жана алардын кылмыштуулукка каршы күрөшүүдөгү жалпы кызыкчылыктарын таануу менен, кылмыштын бардык формалары инсандын, коомдун жана мамлекеттин коопсуздугу үчүн олуттуу коркунуч жаратып жаткандыгын эске алышып, улуттар аралык уюшкан кылмыштуулукка каршы күрөшүүдө Тараптардын ортосунда кызматташтыкты чыңдоо зарылдыгын таанышып, эл аралык укуктун принциптерин жана демократиялык баалуулуктарды, ошондой эле Кыргыз Республикасы жана Улуу Британиянын жана Түндүк Ирландиянын Биргелешкен Королдугу тараптары болгон эл аралык макулдашууларда бекитилген адамдын укуктарын жана эркиндиктерин жактоону таануу менен, төмөнкүлөр тууралуу макулдашты: 1-берене. Кызматташуу чөйрөсү Катышуучулар улуттар аралык уюшкан кылмыштуулукка каршы күрөшүүдөгү кызматташууну Тараптардын мамлекеттеринин улуттук мыйзамдарына жана эл аралык укуктук милдеттенмелерине ылайык бекемдешет. 2-берене. Кызматташуу багыты

1. Ушул Меморандумдун алкагында Тараптардын кызматташуусу төмөнкү багытта жүзөгө ашырылат:

- уюшкан кылмыштуулукту болтурбоо, аныктоо, иликтөө же кылмыш катары жазалоо максатында маалымат жана дайындарды алмашуу;

- Тараптардын ортосундагы кызматташууну чыңдоо, анын ичинде уюшкан кылмыштуулуктан келип чыккан коркунучтарга каршы ыкчам кызматташуу;

- тажрыйба алмашуу үчүн өз ара кызыкчылык жараткан тармактарды биргелешип баалоо жана аныктоо;

- зарыл болгон учурларда окуу курстарын уюштуруу;

- байланыш офицерлерин дайындоо;

- улуттар аралык уюшкан кылмыштуулукка каршы күрөшүү максатында өз ара кызыкчылык жараткан кызматташуунун башка тармактары.

2. Катышуучулар төмөнкү кылмыштарга каршы күрөшүүдө кызматташат:

- баңги каражаттарын, психотроптук заттарды жана алардын прекурсорлорун мыйзамсыз жүгүртүүгө;

- психотроптук заттардын жана алардын прекурсорлорунун жаңы түрлөрү боюнча маалымат алмашуу;

- куралдарды, ок дарыларды, жарылуучу заттарды жана башка коркунучтуу заттарды мыйзамсыз жүгүртүүгө жана сатууга;

- адам сатуу, адамдын органдарын жана мүчөлөрүн сатуу жана мыйзамсыз миграцияга;

- кибер кылмыштуулукка;

- жашы жете электердин жыныстык эркиндигине каршы, анын ичинде балдардын порнографиясын чыгарууга жана/же таркатууга, ошондой эле ортомчулукка байланышкан кылмыштарга;

- кылмыштардын Тараптар өз ара макулдашкан баардык башка түрлөрүнө.

3-берене. Кызматташуунун шарттары Тараптар ушул Меморандумду ишке ашырууну камсыз кылуу үчүн төмөндөгү шарттарды эске алуу менен кызматташат:

1. Тараптар маалыматтарды ушул Меморандумдун алкагында гана, Тараптардын мамлекеттеринин улуттук мыйзамдарына жана маалыматты коргоого жана ачыкка чыгарбоого тиешелүү эл аралык укуктук милдеттенмелерге ылайык алмашат.

2. Тараптар берки Тарап берген ар кандай маалыматты санкциясыз алуудан же жарыялоодон коргошот жана ал маалыматты Тараптардын мамлекеттеринин улуттук мыйзамдарына жана маалыматты коргоого жана ачыкка чыгарбоого тиешелүү эл аралык укуктук милдеттенмелерге ылайык пайдалануунун баардык шарттарын сакташат.

3. Тараптардын бири ушул Меморандумга ылайык берген маалымат аны берген Тараптын жазуу жүзүндөгү алдын ала макулдугусуз үчүнчү жактарга берилбейт же башка максат үчүн пайдаланылбайт.

4. Катышуучулар уюшкан кылмыштуу топтордон келип чыккан жалпы коркунучтарды болтурбоо жана азайтуу үчүн эки тараптуу кызматташуунун жана координациянын маанилүүлүгүн таанышат.

5. Тараптардын укук коргоо чөйрөсүндөгү кызматташуусу төмөндөгү тармактарда жүзөгө ашырылат:

- укук коргоо чөйрөсүндө, анын ичинде адам укугу жаатындагы эл аралык стандарттарды сактоо боюнча өз ара макулдашуу менен аныкталган тажрыйба алмашуу;

- консультация жана сунуштама берүү;

- техникалык жана криминалдык дараметти чыңдоо;

- Тараптардын мамлекеттеринин улуттук мыйзамдарына жана эл аралык милдеттенмелерине ылайык ыкчам колдоо жана көмөк көрсөтүү;

- биргелешкен операцияларды, анын ичинде Тараптар биргелешип аныкташы мүмкүн болгон биргелешкен иш-чаралардын ар кандай жагдайларын пландоо.

Ушул Меморандумдун алкагында алынган маалыматтарды жана дайындарды Тараптар соттук процесстерде далил катары пайдалана алышпайт, Соттук процесстерде бул маалыматтарды пайдалануу өзүнчө суроо-талаптын предмети болот.

6. Тараптар ушул Меморандумдун алкагында кызматташууну ишке ашырууда иш-аракеттин толук планын иштеп чыгат, анын ичинде:

- ыкчам иш-чаралар;

- биргелешкен координацияланган иликтөөлөрдү иштеп чыгуу жана жүргүзүү;

- кайсыл жерге мүмкүн жана ылайыктуу болсо финансы жана техникалык жактан колдоо жана көмөк көрсөтүү.

7. Укук коргоо чөйрөсүндөгү кызматташууну ишке ашыруу Тараптардын алдын ала макулдашуусунун негизинде жүзөгө ашырылат.

8. Эгерде башкача макулдашылбаса, суроо-талап жиберүүчү Тарап маалымат берүү тууралуу суроо-талапты өзүнүн мамлекетинин расмий тилинде жиберет жана ошол эле тилде жооп алат.

4-берене. Каржылоо Тараптар ушул Меморандумду ишке ашыруу боюнча чыгымдарды өздөрүнүн милдеттерин аткаруу үчүн зарыл көлөмдө өз алдынча тартышат. Зарыл болгон учурда Тараптардын кимиси болсо да экинчи Тарапка өз ара кызыкчылык жараткан кандайдыр бир иш-чараларга финансылык колдоо көрсөтүү тууралуу суроо-талап менен кайрыла алат. Каржылоонун көлөмүн суроо жиберилген тарап караштырат. 5-берене. Талаш-тартыштарды чечүү Ушул Меморандумду чечмелөөгө же колдонууга байланыштуу чыккан баардык талаш-тартыштарды Тараптар талкуулоо жана сүйлөшүү жолу менен чечишет. 6-берене. Баш тартуу үчүн негиздер

1. Тараптардын кимиси болсо да төмөнкүдөй учурларда суроо-талапты аткаруудан толугу менен же айрымдарынан баш тартууга укуктуу, эгерде суроо-талапты аткаруу:

- мамлекеттин эгемендүүлүгүнө, коопсуздугуна, коомдук тартипке же башка маанилүү кызыкчылыктарына зыян келтириши мүмкүн болсо;

- Тараптардын мамлекеттеринин улуттук мыйзамдарына же эл аралык милдеттенмелерине каршы келсе;

- жүргүзүлүп жаткан иликтөөлөргө же соттук процесстерге терс таасирин тийгизиши мүмкүн болсо.

- сурам жетишээрлик негизге ээ эмес.

2. Көмөк көрсөтүү тууралуу сурамды иштеп чыгуудан баш тартуу тууралуу чечим кабыл алынган учурда, суроо жиберилген Тарап баш тартуунун себебин көрсөтүү менен экинчи Тарапка токтоосуз кат түрүндө билдирүү жөнөтүүгө милдеттенет.

7-берене. Корутунду жоболор

1. Ушул Меморандум кол коюлган күндөн баштап күчүнө кирет жана үч (3) жыл бою жарактуу болот.

2. Эгерде кезектеги мезгили аяктоого үч айдан кем эмес убакыт калган учурда Тараптардын бири анын жарактуулугун токтотуу тууралуу ниетин дипломатиялык канал аркылуу жазуу түрүндө берки Тарапка билдирбесе Меморандумдун жарактуулугу кийинки үч жылдык мөөнөттөргө өзүнөн-өзү узартылат.

3. Тараптардын кимиси болсо да эгемендикке, коопсуздукка, коомдук тартипке же мамлекеттин кандайдыр-бир башка маанилүү кызыкчылыктарына залал келтире турган жагдайлар пайда болгон учурда, же мамлекеттин улуттук мыйзамдарына же эл аралык милдеттенмелерине каршы келсе, же жүргүзүлүп жаткан иликтөөлөргө же соттук процесстерге терс таасирин тийгизиши мүмкүн болсо, бул Меморандумдун жарактуулугун жарым-жартылай же толугу менен токтотууга. укуктуу.

Ушул Меморандумдун ишин токтотуу тууралуу андай чечим экинчи Тарап кат түрүндөгү билдирүүнү дипломатиялык каналдар аркылуу алган күндөн тартып күчүнө кирет.

4. Ушул Меморандум Тараптардын биргелешкен ишиндеги түшүнүгүн жана ниеттерин аныктайт. Ушул документ юридикалык күчкө ээ эмес жана эл аралык укуктун алкагында юридикалык милдеттенмелерди жүктөбөйт.

5. Тараптардын өз ара макулдашуусу боюнча ушул Меморандумга өзгөртүүлөр жана толуктоолор киргизилиши мүмкүн, алар анын ажырагыс бөлүгү болуп эсептелген өзүнчө Протоколдор менен таризделет жана ушул берененин 1-пунктуна ылайык күчүнө кирет.

6. Ушул Меморандум ___________________ шаарында 20____-жылдын __________________ ар бири англис, кыргыз жана орус тилдериндеги үч түп нускада кол коюлду жана тексттер бирдей юридикалык күчкө ээ.

Ушул Меморандумдун жоболорун чечмелөөдө келишпестиктер пайда болгон учурда Тараптар англис тилиндеги текстти жетекчиликке алышат.

Кыргыз Республикасынын Ички иштер министрлиги үчүн

Улуу Британиянын жана Түндүк Ирландиянын Биргелешкен Королдугунун Кылмыштуулукка каршы күрөшүү боюнча улуттук агенттиги үчүн