КР Өкмөтүнүн « Кыргыз Республикасынын Өкмөтүнө караштуу Экономикалык кылмыштарга каршы күрөшүү боюнча мамлекеттик кызмат (финансы полициясы) менен Тажикстан Республикасынын Мамлекеттик, финансылык контроль жана коррупцияга каршы күрөшүү боюнча агенттигинин ортосундагы Экономикалык жана финансылык кылмыштарга каршы күрөшүү боюнча кызматташтык жөнүндө макулдашуунун долбооруна макулдук берүү жөнүндө» буйругу

КЫРГЫЗ РЕСПУБЛИКАСЫНЫН ӨКМӨТҮ БУЙРУК 2018-жылдын 29-январы № 31-б

1. Кыргыз Республикасынын Өкмөтүнө караштуу Экономикалык кылмыштарга каршы күрөшүү боюнча мамлекеттик кызмат (финансы полициясы) менен Тажикстан Республикасынын Мамлекеттик, финансылык контроль жана коррупцияга каршы күрөшүү боюнча агенттигинин ортосундагы Экономикалык жана финансылык кылмыштарга каршы күрөшүү боюнча кызматташтык жөнүндө макулдашуунун тиркелген долбооруна макулдук берилсин.

2. Кыргыз Республикасынын Өкмөтүнө караштуу Экономикалык кылмыштарга каршы күрөшүү боюнча мамлекеттик кызматтын (финансы полициясы) төрагасына принциптүү эмес мүнөздөгү өзгөртүүлөрдү жана толуктоолорду киргизүү укугу менен жогоруда аталган Макулдашууга кол коюуга укук берилсин.

Премьер-министр

С. Дж.Исаков

Долбоор Экономикалык жана финансылык кылмыштарга каршы күрөшүү боюнча кызматташтык жөнүндө Кыргыз Республикасынын Өкмөтүнө караштуу Экономикалык кылмыштарга каршы күрөшүү боюнча мамлекеттик кызмат (финансы полициясы) менен Тажикстан Республикасынын Мамлекеттик, финансылык контроль жана коррупцияга каршы күрөшүү боюнча агенттигинин ортосундагы МАКУЛДАШУУ

2018-жылдын "___" ______________

_______________________ ш.

Мындан ары Тараптар деп аталуучу Кыргыз Республикасынын Өкмөтүнө караштуу Экономикалык кылмыштарга каршы күрөшүү боюнча мамлекеттик кызмат (финансы полициясы) менен Тажикстан Республикасынын Мамлекеттик, финансылык контроль жана коррупцияга каршы күрөшүү боюнча агенттиги, экономикалык жана финансылык кылмыштарга, анын ичинде банктык жана кредиттик-финансылык чөйрөдөгү кылмыштарга каршы күрөшүү боюнча кызматташтыкты өнүктүрүү, ошондой эле экономикалык жана финансылык кылмыштарды жасоонун натыйжасында алынган кирешелердин изин жашырууга (легалдаштырууга) каршы күрөшүү боюнча өз ара аракетти күчөтүү максатында, Тараптардын мамлекеттеринин экономикалык коопсуздугуна зыян келтирүү менен байланышкан бардык кесепеттерди эске алып, Бириккен Улуттар Уюмунун 2003-жылдын 31-октябрындагы Коррупцияга каршы конвенциясынын, 2002-жылдын 7-октябрындагы Жарандык, үй-бүлөлүк жана жазык иштери боюнча укуктук жардам жана укуктук мамилелер жөнүндө конвенциянын, 1969-жылдын 23-майындагы Эл аралык келишимдердин укугу жөнүндө конвенциянын, 2005-жылдын 3-июнундагы Көз карандысыз Мамлекеттер Шериктештигине мүчө мамлекеттердин Салыктык кылмыштарга каршы күрөшүүдөгү кызматташтыгы жөнүндө макулдашуунун, ошондой эле 1996-жылдын 12-апрелиндеги Экономика чөйрөсүндөгү кылмыштарга каршы күрөшүүдөгү кызматташтык жөнүндө макулдашуунун жоболорун көңүлгө алуу менен, экономика жана финансы чөйрөсүндөгү кылмыштарга каршы күрөшүүгө багытталган натыйжалуу чараларды көрүүдө өз ара кызыкчылыктарга жараша, өз мамлекеттеринин улуттук мыйзамдарын жана эл аралык милдеттенмелерди жетекчиликке алып төмөнкүлөрдү макулдашты: 1-берене.

1. Ушул Макулдашуунун предмети экономикалык жана финансылык кылмыштарга каршы натыйжалуу күрөшүүнү уюштуруу максатында Тараптардын кызматташуусу болуп саналат.

2. Жазык иштери боюнча укуктук жардам көрсөтүү өз мамлекеттеринин ушул маселелерин жөнгө салган эл аралык келишимдердин алкагында ишке ашырылат.

2-берене.

1. Тараптар өздөрүнүн компетенциясынын алкагында өз мамлекетинин жарандары жана юридикалык жактары менен бирдей эле экинчи Тараптын мамлекетинин жарандарынын жана юридикалык жактарынын укуктарын, эркиндигин, мыйзамдуу кызыкчылыктарын жана мүлктөрүн коргоону камсыз кылат.

2. Тараптар ушул органдардын компетенциясына кирген маселелер боюнча Тараптардын мамлекеттеринин компетенттүү органдары, экинчи Тараптын мамлекетинин жарандарынын жана юридикалык жактарынын даттанууларын жана арыздарын тоскоолсуз кабыл алып жана кароосун камсыздоого милдеттенет.

3-берене. Тараптар туруктуу негизде ак ниет ишкерлерди коргоо, алардын мамлекеттик жана башка салыктарды төлөөрү менен байланышкан, ошондой эле ак ниет бизнести ар кандай мыйзамсыз кийлигишүүлөрдөн коргоо боюнча маалымат алмашып турушат. 4-берене. Тараптар туруктуу негизде товарлардын контрабандасына каршы күрөшүү максатында Тараптардын мамлекеттеринин чек ара жанындагы аймактарын контролдошот, мамлекеттик чек аралар аркылуу күйүүчү-майлоочу материалдарды жана эл керектөөчү товарларды мыйзамсыз жана эсепке албай ташып кирүү учурлары жөнүндө бири-бирине дароо билдиришет, ошондой эле чек ара жанындагы аймактардагы абал жөнүндө маалымат алмашат. 5-берене. Тараптардын кызматташтыгы ушул Макулдашуунун алкагында Тараптардын мамлекеттеринин улуттук мыйзамдарына, эл аралык макулдашууларга жана эл аралык укуктун башка ченемдерине ылайык төмөнкүдөй түрдө ишке ашырылат:

а) экономика жана финансы чөйрөсүндөгү кылмыштарга каршы күрөшүүгө тийиштүү маселелер боюнча маалымат алмашуу, мамлекеттик сыр болгон маалыматтарды кошпогондо статистикалык маалыматтарды берүү;

б) экономика жана финансы чөйрөсүндөгү кылмыштардын алдын алуу, табуу, бөгөт коюу, бетин ачуу жана териштирүү боюнча иш-чараларды өткөрүү;

в) экономика жана финансы чөйрөсүндөгү кылмыштарды алдын алуу, табуу, бөгөт коюу, бетин ачуу жана териштирүү боюнча иш тажрыйбаны, анын ичинде окуу, методикалык жана атайын адабияттарды алмашуу;

г) биргелешкен илимий изилдөөлөрдү, семинарларды жана конференцияларды уюштуруу;

д) кадрларды даярдоого, алардын квалификациясын жогорулатууга көмөктөшүү;

е) Тараптардын биринин суроо-талабы боюнча экономика жана финансы чөйрөсүндөгү иштерди жөнгө салган ченемдик актыларга карата маалымат берүү;

ж) Кыргыз Республикасынын жана Тажикстан Республикасынын аймактарында экономика жана финансы чөйрөсүндөгү кылмыштардын натыйжасында ушуга ыйгарым укуктуу мамлекеттик органдардын тийиштүү чечими болгондо келтирилген зыяндын ордун толтурууга (активдерди камоо) көмөк көрсөтүү;

з) Кыргыз Республикасынын жана Тажикстан Республикасынын аймактарында экономикалык жана финансылык кылмыштарды табуу, бөгөт коюу жана бетин ачуу максатында ушул боюнча ыйгарым укуктуу мамлекеттик органдардын тийиштүү чечими болгондо ыкчам-издөө иш-чараларын жүргүзүүгө көмөк көрсөтүү;

и) экономика жана финансы чөйрөсүндөгү кылмыштарды жасоонун натыйжасында алынган кирешелердин изин жашырууга (легалдаштырууга) каршы күрөшүү боюнча өз ара аракеттенүү;

к) алдын ала макулдашуу боюнча ведомстволор аралык жумушчу топторду түзүү;

л) кызыкдар Тараптын суроо-талабы боюнча териштирүүгө жана далилдерди чогултууга, кылмыш жасаганга шектүү адамдарды издөөгө жана мүлкүн алууга, аларды издөөгө жана репатриациялоого көмөк көрсөтүү.

6-берене.

1. Ушул Макулдашуунун алкагындагы кызматташтык кызыкдар Тараптын текшерүү материалдары жана жазык иштери боюнча көмөк көрсөтүү жөнүндө суроо-талаптын негизинде же мындай көмөк көрсөтүү башка Тарап үчүн кызыкчылыкты жаратат деп эсептеген Тараптын демилгеси боюнча ишке ашырылат.

2. Жардам берүү жөнүндө суроо-талап жазуу жүзүндө жөнөтүлөт. Суроо-талапты жөнөтүү үчүн телекоммуникациянын заманбап каражаттары колдонулушу мүмкүн.

3. Суроо-талапты аткаруу мөөнөтү 30 календарлык күн.

7-берене.

1. Ушул Макулдашуунун алкагында жардам көрсөтүүдөн, эгерде суроо-талап жиберген Тарап суроо-талапты аткаруу эгемендикке, коопсуздукка, коомдук тартипке же мамлекеттин башка олуттуу кызыкчылыктарына зыян алып келет, же мамлекеттин мыйзамына же эл аралык милдеттенмелерине каршы келет деп эсептесе толугу менен же жарым-жартылай баш тартылышы мүмкүн.

2. Суроо-талап жиберген Тарапка жазуу жүзүндө 30 күндүн ичинде баш тартуунун себептерин көрсөтүү менен аткаруудан толук же жарым-жартылай баш тартуу жөнүндө билдирилет.

8-берене.

1. Суроо-талап жиберилген Тарап суроо-талапты тез жана мүмкүн болушунча толук аткарууну камсыз кылуу үчүн бардык зарыл чараларды көрөт.

Суроо-талап жиберген Тарапка 30 күндүн ичинде суроо-талапты аткарууда тоскоол болгон же аны аткарууну олуттуу кечеңдеткен шарттар жөнүндө билдирилет.

2. Эгерде суроо-талапты аткаруу суроо-талап жиберилген Тараптын компетенциясына кирбесе 30 күндүн ичинде ал тууралуу суроо-талап жиберген Тарапка билдирет.

3. Суроо-талап жиберилген Тарап, суроо-талаптын предметинин (объекттин) чегинде, эгерде суроо-талап жиберилген Тараптын кызыкчылыгын кемсинтпесе, суроо-талапты тиешелүү түрдө аткаруу үчүн зарыл болгон кошумча маалыматтарды суроого укуктуу.

4. Эгерде суроо-талап жиберилген Тарап, суроо-талапты дароо аткаруу анын мамлекетинде аткарыла турган жазыктык куугунтуктоого же башка өндүрүшүнө тоскоол болушу мүмкүн деп эсептесе, ал суроо-талапты аткарууну кийинкиге калтырса болот же суроо-талап жиберген Тарап менен кеңешкенден кийин зарыл катары аныкталган шарттарды сактоо менен аны аткарууну байланыштырса болот. Суроо-талап жиберген Тараптын макулдугу менен, ага жардам көрсөтүүгө сунушталган шарттарда суроо-талап жиберген Тарап ушул шарттарды сакташы керек.

5. Суроо-талап жиберилген Тарап өтүнүч боюнча суроо-талаптын, анын мазмунунун жана ага тиркелген документтердин, ошондой эле жардам көрсөтүү фактысынын купуялуулугун камсыздоо үчүн зарыл чараларды көрөт.

Купуялуулук сакталбастан суроо-талапты аткаруу мүмкүн болбогон учурда суроо-талап жиберилген Тарап суроо-талап жиберген Тарапка бул жөнүндө маалымдайт, ал болсо ушундай шартта суроо-талапты аткарууга болоор-болбосун чечет.

6. Суроо-талап жиберилген Тарап мүмкүн болушунча кыска мөөнөттө суроо-талап жиберген Тарапка суроо-талапты аткаруунун натыйжасы жөнүндө маалымдайт.

9-берене.

1. Ар бир Тарап экинчи Тараптан суроо-талапты аткаруунун натыйжасында алынган маалыматтардын жана документтердин купуялуулугун камсыздайт, эгерде алар жабык мүнөздө болсо же берип жаткан Тарап алардын ачыкка чыгышын каалабаса. Мындай маалыматтардын жана документтердин жашыруундуулук даражасы берип жаткан Тараптын мамлекетинин мыйзамдарына ылайык аныкталат.

2. Ушул Макулдашуунун негизинде алынган суроо-талапты аткаруунун натыйжасы берген Тараптын макулдугусуз, алар суралганына байланыштуу жана берилгенден башка максаттарга колдонулбайт.

3. Ушул Макулдашуунун негизинде бир Тараптан алынган маалыматтарды үчүнчү Тарапка берүү үчүн маалыматты берген Тараптын алдын ала макулдугу талап кылынат.

4. Ушул Макулдашуунун Тараптардын башка эл аралык келишимдерден келип чыккан укуктарына жана милдеттерине тиешеси жок.

10-берене. Ушул Макулдашууда каралган кызматташтыкты ишке ашыруунун жүрүшүн кароо жана анан да ары өркүндөтүү багыттарын иштеп чыгуу үчүн Тараптар биргелешкен жолугушууларды, кеңешмелерди, семинарларды өткөрүшөт. Жолугушуулар Тараптардын мамлекеттеринин ар биринде кезеги менен өткөрүлүп турат. 11-берене. Ушул Макулдашуунун жоболорун чечмелөөдө же колдонууга байланыштуу пайда болгон Тараптардын ортосундагы кайчы пикирлер консультациялар жана сүйлөшүүлөр жолу менен чечилет. 12-берене.

1. Ар бир Тарап өзүнүн мамлекетинин аймагында ушул Макулдашууну аткарууга байланышкан чыгымдарды өз алдынча көтөрөт.

2. Тараптар, эгерде ортолорунда башка жазуу жүзүндөгү келишим жок болсо, өз өкүлдөрүнүн кабыл алуучу Тараптын мамлекетинин аймагына баруусуна жана жашоосуна байланышкан бардык чыгымдарын өздөрү көтөрөт.

3. Суроо-талап жиберилген Тараптын өкүлдөрүнүн иш сапарлары суроо-талап жиберген Тараптын алдын ала макулдугу менен ишке ашырылат.

13-берене. Ушул Макулдашуунун алкагында кызматташууну ишке ашыруу үчүн Тараптар жумушчу тил катары орус тилин колдонушат. 14-берене. Тараптардын өз ара макулдашуусу боюнча ушул Макулдашууга, анын ажырагыс бөлүгү болуп саналган, өзүнчө протоколдор менен таризделүүчү өзгөртүүлөр жана толуктоолор киргизилиши мүмкүн. 15-берене. Ушул Макулдашуу аныкталбаган мөөнөткө түзүлөт. Ушул Макулдашуу кол коюлган учурдан тартып күчүнө кирет жана Тараптардын бири экинчи Тараптан анын аракетин токтотуу ниети тууралуу жазуу жүзүндөгү билдирүү алган күндөн тартып үч ай өткөнгө чейин күчүндө болот.

____________________ шаарында 201___-жылдын "___" _____________, эки түп нускада, ар бири кыргыз, тажик жана орус тилдеринде аткарылды, мында бардык тексттер бирдей юридикалык күчкө ээ. Макулдашуунун жоболорун чечмелөөдө кайчы пикирлер пайда болгон учурда негиз катары орус тилиндеги текст алынат.

Кыргыз Республикасынын Өкмөтүнө караштуу Экономикалык кылмыштарга каршы күрөшүү боюнча мамлекеттик кызмат (финансы полициясы) үчүн

Тажикстан Республикасынын Мамлекеттик, финансылык контроль жана коррупцияга каршы күрөшүү боюнча агенттиги үчүн

Төрага

Директор