КР Президентинин ПБ № 14 «Кыргыз Республикасы менен Казакстан Республикасынын ортосундагы кыргыз-казак мамлекеттик чек арасын демаркациялоо жөнүндө келишимдин долбоорун жактыруу жөнүндө» буйругу

КЫРГЫЗ РЕСПУБЛИКАСЫНЫН ПРЕЗИДЕНТИ БУЙРУК 2017-жылдын 22-декабры ПБ № 14

1. Кыргыз Республикасы менен Казакстан Республикасынын ортосундагы кыргыз-казак мамлекеттик чек арасын демаркациялоо жөнүндө келишимдин тиркелген долбоору жактырылсын.

2. Кыргыз Республикасынын Өкмөтүнүн Аппаратынын Жетекчисинин биринчи орун басары рангындагы чек ара маселелери боюнча Кыргыз Республикасынын Өкмөтүнүн атайын өкүлү Искандаров Курбанбай Алибаевичке жогоруда аталган Келишимди принциптүү эмес мүнөздөгү өзгөртүүлөрдү жана толуктоолорду киргизүү укугу менен парафирлөөгө ыйгарым укук берилсин.

Кыргыз Республикасынын Президенти

С.Жээнбеков

Долбоор Кыргыз Республикасы менен Казакстан Республикасынын ортосундагы Кыргыз-казакстан мамлекеттик чек арасын демаркациялоо жөнүндө КЕЛИШИМ Кыргыз Республикасы менен Казакстан Республикасы (мындан ары - Тараптар), 2001-жылдын 15-декабрындагы Кыргыз Республикасы менен Казакстан Республикасынын ортосундагы Кыргыз-казакстан мамлекеттик чек арасы жөнүндө келишимге негизденип, Кыргыз Республикасы менен Казакстан Республикасынын ортосундагы мамлекеттик чек ара (мындан ары - мамлекеттик чек ара) сызыгын демаркациялоо максатында, төмөнкүлөр жөнүндө макулдашты: 1-берене. Мамлекеттик чек аранын баштапкы чекити 1999-жылдын 25-августундагы Үч мамлекеттин мамлекеттик чек араларынын тогошкон чекити жөнүндө Кыргыз Республикасы, Казакстан Республикасы жана Кытай Эл Республикасынын ортосундагы макулдашууда аныкталган Кыргыз Республикасынын, Казакстан Республикасынын жана Кытай Эл Республикасынын мамлекеттик чек араларынын тогошкон чекити болуп саналат. Мамлекеттик чек аранын акыркы чекити 2001-жылдын 15-июнундагы Үч мамлекеттин мамлекеттик чек араларынын тогошкон чекити жөнүндө Кыргыз Республикасы, Казакстан Республикасы жана Өзбекстан Республикасынын ортосундагы макулдашууда аныкталган Кыргыз Республикасынын, Казакстан Республикасынын жана Өзбекстан Республикасынын мамлекеттик чек араларынын тогошкон чекити болуп саналат. Мамлекеттик чек аранын демаркацияланган сызыгынын узундугу 1257,07 км. Мамлекеттик чек аранын демаркацияланган сызыгына Тараптар бардыгы болуп 683 чек ара белгисин орнотушкан, алардын ичинен 354 чек ара белгиси кургак жердеги Мамлекеттик чек ара сызыгында түздөн-түз орнотулган бир чек ара мамысынан турат; 286 чек ара белгиси, анын ар бири чек ара сууларынын, каналдардын жана жолдордун жээктери боюнча орнотулган эки чек ара мамыларынан турат; 43 чек ара белгиси, анын ар бири ички жана чек ара суулары куюлушкан жерлерде, каналдарда жана жолдордо, ошондой эле мамлекеттик чек аранын суудагы жана кургактагы сызыгы алмашкан жерлерде орнотулган үч чек ара мамыларынан турат. Бардыгы болуп Тараптар 1055 чек ара мамысын орнотушкан, анын ичинде негизгилери - 537, алардын ичинен кыргыз Тарабы - 264, казакстан Тарабы - 273, орто аралык чек ара мамылары - 518, алардын ичинен кыргыз Тарабы - 258, казакстан Тарабы - 260 мамы орноткон. 2-берене. Мамлекеттик чек аранын демаркацияланган сызыгынын өтүшү жана чек ара белгилеринин жайгашкан орду Кыргыз-казакстан мамлекеттик чек ара сызыгынын өтүшүнүн баяндама-протоколунда чагылдырылган (1-тиркеме). Мамлекеттик чек ара сызыгы жана чек ара белгилеринин жайгашкан орду 1:50000 масштабдагы Кыргыз Республикасы менен Казакстан Республикасымын ортосундагы мамлекеттик чек ара картасынын (мындан ары - мамлекеттик чек ара картасы) 46 барагына түшүрүлгөн (2-тиркеме), ар бир барак кыргыз, казак жана орус тилдеринде даярдалган. Тик бурчтуу жана геодезиялык координаталар, бийиктиктердин белгилери жана ар бир чек ара белгисинин башка маалыматтары төрт томдон турган Чек ара белгилеринин протоколунда (3-тиркеме), Чек ара белгилеринин координата жана бийиктик каталогунда (4-тиркеме) жана эки томдон турган Чек ара белгилеринин мамыларынын өз ара жайгашуусунун схемаларында (5-тиркеме) көрсөтүлгөн. Ушул Келишимдин бардык тиркемелери анын ажырагыс бөлүгү болуп саналат. 3-берене. Ушул Келишим күчүнө киргенден кийин Тараптар мамлекеттик чек ара сызыгынын белгиленишин 10 жылда бир жолу биргелешип текшеришет. Тараптардын макулдашуусу боюнча текшерүүнүн мөөнөттөрү өзгөртүлүшү, ошондой эле мамлекеттик чек аранын айрым участокторун биргелешип текшериши мүмкүн. Тараптар мамлекеттик чек ара сызыгынын белгиленишин текшерүү боюнча биргелешкен комиссия (мындан ары - Комиссия) түзүшөт. Комиссиядагы Тараптардын делегацияларынын курамдарын жана алардын ыйгарым укуктарын Тараптар өз алдынча бекитишет. Биргелешкен иштин тартибин Комиссия аныктайт. Мамлекеттик чек ара сызыгынын белгиленишин биргелешкен ар бир текшерүүнүн натыйжалары Биргелешкен текшерүү протоколу менен таризделет. 4-берене. Ар бир Тарап чек ара белгилерин кайтаруу боюнча чара көрөт, алардын бөлүнүшүнө, ордун жылдырууга же бузууга бөгөт коёт, ошондой эле өздөрү орноткон чек ара белгилери үчүн жоопкерчилик тартышат жана аларды күтүүнү камсыз кылышат. Чек ара белгилеринин абалын Тараптар өз алдынча же биргеликте текшере алышат. Тараптардын бири чек ара белгисинин бүлүнүүсүн, жылып калганын же жоголгонун аныктаса, ал кыска мөөнөттө экинчи Тарапка бул жөнүндө жазуу жүзүндө кабарлайт. Бул чек ара белгисинин сакталышы үчүн жооптуу Тарап аны калыбына келтирүү же мурдагы ордуна кайра орнотуу боюнча чара керет жана мындай иштерди жүргүзүүнүн зарылдыгы жөнүндө алар башталганга чейин кеминде 10 күн мурда экинчи Тарапка жазуу жүзүндө кабарлайт. Тараптардын бири мындай иштерди жүргүзгөндө экинчи тараптын тиешелүү компетенттүү органдарынын өкүлдөрү катышат. Тараптардын бири өзүнүн аймагынан кандайдыр бир чек ара белгисин калыбына келтирүү же кайталап орнотуу үчүн жетүүгө мүмкүнчүлүгү болбогон учурда экинчи Тарап бул Тарапка өзүнүн аймагынан мындай белгиге жетүүгө мүмкүндүк берет. 5-берене. Чек ара белгисин мурдагы ордунда калыбына келтирүүгө мүмкүн болбогон учурда Тараптардын макулдашуусу боюнча чек ара белгиси башка ылайыктуу жерге орнотулат, мында мамлекеттик чек ара сызыгынын өтүшү өзгөрбөйт. Бир чек ара мамысынан турган чек ара белгисин которуу зарыл болгон учурда мындай белгини которуу Мамлекеттик чек ара сызыгы боюнча гана жүргүзүлөт. Бул чек ара белгисин башка жерге орноткондон кийин тараптар жаңы Чек ара белгисинин протоколун, Чек ара белгилеринин мамыларынын өз ара жайгашуусунун схемасын, Чек ара белгилеринин координата жана бийиктик каталогунун фрагменттерин, Кыргыз-казакстан мамлекеттик чек ара сызыгынын өтүшүнүн баяндама-протоколун жана жаңыдан орнотулган чек ара белгисинин жайгашкан ордуна тиешелүү Мамлекеттик чек ара картасын түзөт. Комиссия биргелешкен текшерүүнү жүргүзгөндөн кийин мындай документтер Биргелешкен текшерүү протоколу менен таризделет, алар ушул Келишимдин ажырагыс бөлүгү болуп саналат. 6-берене. Бир дагы Тарап мамлекеттик чек ара сызыгында ушул Келишимде айтылбаган мамлекеттик чек араны белгилөөчү чек ара же башка белгилерди бир тараптуу тартипте орнотпойт. 7-берене. Аймактагы, анын ичинде чек ара сууларындагы ар кандай өзгөрүүлөр мамлекеттик чек ара сызыгынын өтүшүнүн өзгөрүүсүнө алып келбейт. 8-берене. Ушул Келишимдин мамлекеттик чек аранын демаркацияланган сызыгынын өтүшүнө тиешеси жок жоболорун чечмелөөгө жана колдонууга карата бардык маселелерди Тараптар консультациялар жана сүйлөшүүлөр жолу менен чечишет. 9-берене. Ушул Келишимге Тараптардын өз ара макулдугу боюнча мамлекеттик чек аранын демаркацияланган сызыгынын өтүшүнө тиешеси жок өзгөртүүлөр жана толуктоолор киргизилиши мүмкүн, ал ушул Келишимдин ажырагыс бөлүгү болуп саналган өзүнчө протокол менен таризделет. 10-берене. Ушул Келишим Тараптардын аны ратификациялоо жөнүндө дипломатиялык каналдар боюнча акыркы жазуу жүзүндөгү маалыматты алган датадан тартып күчүнө кирет. Ушул Келишим мөөнөтсүз болуп саналат жана денонсацияланууга жатпайт. _____________ шаарында 2017-жылдын "__" __________ ар бири кыргыз, казак жана орус тилдеринде эки нускада түзүлдү, мында бардык тексттер бирдей күчкө ээ. Ушул Келишимдин жоболорун чечмелөөдө кайчы пикирлер пайда болгон учурда Тараптар орус тилиндеги текстке кайрылышат.

Кыргыз Республикасы үчүн

Казакстан Республикасы үчүн