КР Өкмөтүнүн (Кыргыз Республикасынын Коргоо министрлиги менен Россия Федерациясынын Коргоо министрлигинин ортосундагы Кыргыз Республикикасынын Коргоо министрлигинин санатордук-курорттук мекемелеринин базасында санатордук-курорттук дарылоону жана эс алууну уюштуруу жаатындагы кызматташык жөнүндө) буйругу

КЫРГЫЗ РЕСПУБЛИКАСЫНЫН ӨКМӨТҮ БУЙРУК 2014-жылдын 9-декабры № 562-б Кыргыз Республикасынын Коргоо министрлиги менен Россия Федерациясынын Коргоо министрлигинин ортосундагы Кыргыз Республикасынын Коргоо министрлигинин санатордук-курорттук мекемелеринин базасында санатордук-курорттук дарылоону жана эс алууну уюштуруу жаатындагы кызматташтык жөнүндө макулдашуунун тиркелген долбооруна принциптүү эмес мүнөздөгү өзгөртүүлөрдү жана толуктоолорду киргизүү мүмкүндүгүн эсепке алуу менен макулдук берилсин.

Кыргыз Республикасынын Премьер-министри

Дж.Оторбаев

Долбоор Кыргыз Республикасынын Коргоо министрлиги менен Россия Федерациясынын Коргоо министрлигинин ортосундагы Кыргыз Республикасынын Коргоо министрлигинин санатордук-курорттук мекемелеринин базасында санатордук-курорттук дарылоону жана эс алууну уюштуруу жаатындагы кызматташтык жөнүндө МАКУЛДАШУУ Кыргыз Республикасынын Коргоо министрлиги (мындан ары "Кыргыз тарап" деп аталат) жана Россия Федерациясынын Коргоо министрлиги (мындан ары "Россия тарап" деп аталат), мындан ары чогуу алганда Тараптар деп аталышып, Кыргыз Республикасы менен Россия Федерациясынын ортосундагы 1993-жылдын 5-июлундагы аскердик жааттагы кызматташтык жөнүндө келишимдин жоболорун жетекчиликке алышып, өз ара пайдалуу аскердик кызматташтыкты мындан ары өнүктүрүү зарылдыгын таанышып, төмөнкүлөр жөнүндө макулдашты: 1-берене. Ушул Макулдашуунун жоболорун ишке ашыруу боюнча ишти координациялоо максатында Тараптар төмөнкүдөй ыйгарым укуктуу органдарды дайындашат:

- Кыргыз Республикасынын Коргоо министрлигинен - Кыргыз Республикасынын Коргоо министрлигинин аскердик-медициналык башкармалыгы;

- Россия Федерациясынын Коргоо министрлигинен - Россия Федерациясынын Коргоо министрлигинин Башкы аскердик-медициналык башкармалыгы.

2-берене. Тараптар Кыргыз Республикасынын аймагында жайгашкан бириккен россиялык аскердик базасынын (мындан ары - БРАБ) өздүк курамынын жана алардын үй-бүлө мүчөлөрүнүн аскердик туристтик базасында жана аскердик санаторийинин базасында (мындан ары - Кыргыз Республикасынын Коргоо министрлигинин аскердик санаторийинин) санатордук-курорттук дарылоону жана уюшкан эс алууну уюштуруу жаатындагы кызматташтыкты ишке ашырышат. Санатордук-курорттук дарылоо Россия Федерациясынын Куралдуу Күчтөрүнүн башка аскер кызматчыларына жана алардын үй-бүлө мүчөлөрүнө да көрсөтүлөт. 3-берене. Кыргыз Тарап БРАБдын өздүк курамына жана алардын үй-бүлө мүчөлөрүнө аскердик санаторийде болгон санатордук-курорттук дарылоонун жана уюшкан эс алуунун бардык комплексин көрсөтүүгө милдеттенет. 4-берене. Көрсөтүлгөн кызматтар үчүн акы БРАБдын өздүк курамы жана алардын үй-бүлө мүчөлөрү, ошондой эле Россия Федерациясынын Куралдуу Күчтөрүнүн башка аскер кызматчылары жана алардын үй-бүлө мүчөлөрү тарабынан санатордук-курорттук дарылоо жана эс алуу жерине келген күнү Кыргыз Республикасынын мыйзамдарына ылайык белгиленген баалардын прейскуранты боюнча сом менен төлөнөт. Кыргыз Тарап Россия Тарапка кызматтардын баасы жөнүндө баалардын жаңы прейскуранты бекитилгенден кийин 2 аптадан кем эмес мезгилде маалымдайт. 5-берене. Аскердик санаторийдеги санатордук-курорттук дарылоонун жана эс алуунун мөөнөтү Кыргыз Республикасынын ченемдик укуктук актылары менен белгиленет. 6-берене. Россия Тараптын ыйгарым укуктуу органы Кыргыз Тараптын ыйгарым укуктуу органына адамдардын пландалган санын, мөөнөтүн жана алардын келүү максатын көрсөтүү менен аскердик санаторийден орундарды бөлүүгө ар бир квартал сайын табыштамаларды жиберет. Кыргыз Тараптын ыйгарым укуктуу органы табыштаманы алгандан кийин 2 аптанын ичинде Россия Тараптын ыйгарым укуктуу органына БРАБдын өздүк курамы жана алардын үй-бүлө мүчөлөрү, ошондой эле Россия Федерациясынын Куралдуу Күчтөрүнүн башка аскер кызматчылары жана алардын үй-бүлө мүчөлөрү үчүн бөлүнүүчү жатуучу-орундардын саны жөнүндө маалымдайт. 7-берене. Бул Макулдашууга Тараптардын өз ара макулдашуусу боюнча өзүнчө протоколдор менен таризделүүчү өзгөртүүлөр жана толуктоолор киргизилиши мүмкүн. Ушул Макулдашууну колдонууга жана чечмелөөгө байланыштуу талаш чыккан учурда Тараптар аларды сүйлөшүү жүргүзүү жолу менен чечишет. 8-берене. Бул Макулдашуу ага кол койгон күндөн баштап күчүнө кирет. Ар бир Тарап ушул Макулдашуунун колдонулушун токтотуу жөнүндө ниети тууралуу экинчи Тарапка дипломатиялык каналдар боюнча жазуу түрүндө кабарлоо жиберүү жолу менен аны колдонууну токтото алат. Бул учурда Макулдашуунун колдонулушу кабарлоо алган датадан тартып алты ай өткөндөн кийин токтотулат. 2014-жылы "__" _________ _____________ шаарында эки нускада кыргыз жана орус тилдеринде түзүлдү, эки текст тең бирдей күчкө ээ.

Кыргыз Республикасынын Коргоо министрлиги үчүн

Россия Федерациясынын Коргоо министрлиги үчүн