КР Өкмөтү (Кыргыз Республикасынын Өкмөтү менен Улуу Британия Кошмо Королдугунун жана Түндүк Ирландиянын ортосундагы Ооган Ислам Республикасынан Улуу Британия Кошмо Королдугунун жана Түндүк Ирландиянын куралдуу күчтөрүн чыгарууга байланыштуу Кыргыз Республикасынын аба мейкиндиги аркылуу жүктүн жана персоналдын транзитин камсыздоо жөнүндө макулдашуунун тиркелген долбоору жактыруу жөнүндө)буйругу.

КЫРГЫЗ РЕСПУБЛИКАСЫНЫН ӨКМӨТҮ БУЙРУК 2014-жылдын 11-ноябры № 493-б

1. Кыргыз Республикасынын Өкмөтү менен Улуу Британия Кошмо Королдугунун жана Түндүк Ирландиянын ортосундагы Ооган Ислам Республикасынан Улуу Британия Кошмо Королдугунун жана Түндүк Ирландиянын куралдуу күчтөрүн чыгарууга байланыштуу Кыргыз Республикасынын аба мейкиндиги аркылуу жүктүн жана персоналдын транзитин камсыздоо жөнүндө макулдашуунун тиркелген долбоору жактырылсын.

2. Кыргыз Республикасынын Транспорт жана коммуникациялар министрине жогоруда аталган Макулдашуунун долбооруна принциптүү эмес мүнөздөгү өзгөртүүлөрдү жана толуктоолорду киргизүү укугу менен Кыргыз Республикасынын Өкмөтүнүн атынан кол коюуга ыйгарым укук берилсин.

Премьер-министр

Дж.К. Оторбаев

Долбоор Кыргыз Республикасынын Өкмөтү менен Улуу Британия Кошмо Королдугунун жана Түндүк Ирландиянын ортосундагы Ооган Ислам Республикасынан Улуу Британия Кошмо Королдугунун жана Түндүк Ирландиянын куралдуу күчтөрүн чыгарууга байланыштуу Кыргыз Республикасынын аба мейкиндиги аркылуу жүктүн жана персоналдын транзитин камсыздоо жөнүндө МАКУЛДАШУУ

Чогуу алганда "Тараптар" деп аталуучу Кыргыз Республикасынын Өкмөтү, мындан ары "Кыргыз тарап" жана Улуу Британия Кошмо Королдугунун жана Түндүк Ирландиянын Өкмөтү, мындан ары "Британия тарап"; Бириккен Улуттар Уюмунун Коопсуздук кеңешинин 2011-жылдын 12-октябрындагы 2011 (2011) резолюциясынын жоболорун эске алуу менен; Кыргыз Республикасы 1994-жылдын 10-11-январындагы Түндүк Атлантика Кеңешинин кеңешмесине катышкан Түндүк Атлантика Келишими Уюмунун (НАТО) мамлекеттер башчылары жана өлкө өкмөттөрү тарабынан кол коюлган жана жөнөтүлгөн "Тынчтык үчүн өнөктөштүк" программасына Чакырууну кабыл алгандыгын жана 1994-жылдын 1-июнунда "Тынчтык үчүн өнөктөштүк" алкактык документине кошулгандыгын белгилөө менен; 1995-жылдын 19-июнунда Брюсселде кол коюлган, алардын Куралдуу Күчтөрүнүн статусуна карата "Тынчтык үчүн өнөктөштүк" программасынын жоболорун (мындан ары - PfP-SOFA программасы) эске алып; төмөнкүлөр жөнүндө макулдашты: 1-берене - Киришүү

1. Бул Макулдашуу Ооган Ислам Республикасынан Улуу Британия Кошмо Королдугунун жана Түндүк Ирландиянын куралдуу күчтөрүн чыгарууга байланыштуу Кыргыз Республикасынын аба мейкиндиги аркылуу Британия тарапка таандык жүктүн жана персоналдын транзитин жүзөгө ашыруу тартибин аныктайт.

2. 1-тиркеме бул Макулдашуунун ажыратылгыс бөлүгү болуп саналат.

2-берене - Аныктамалар Бул Макулдашуунун максаттары үчүн берилген терминдер төмөнкүлөрдү түшүндүрөт:

а) "Жүк" - Кыргыз Республикасынын аба мейкиндиги аркылуу ташылып өтүүчү Британия тарапка таандык бардык жүктөр, бул Макулдашуунун Тиркемесинде көрсөтүлгөн жүктөрдөн башкасы;

б) "Британия тараптын персоналы" - Улуу Британия Кошмо Королдугунун жана Түндүк Ирландиянын куралдуу күчтөрүнүн аскер персоналдары, ошондой эле Улуу Британия Кошмо Королдугунун жана Түндүк Ирландиянын куралдуу күчтөрү контракт боюнча жалдап иштеткен жарандар;

в) "Транзит" - жөнөтүү жана дайындоо пункттары Кыргыз Республикасынын чегинен тышкары жайгашкан Британия тараптын жүктөрүн жана персоналдарын Ооган Ислам Республикасынан Кыргыз Республикасынын аба мейкиндиги аркылуу ташуу;

г) "Транзиттик мезгил" - транзитке уруксат берилген убакыттын аралыгы;

д) "Учуп өтүү" - жөнөтүү жана дайындоо пункттары Кыргыз Республикасынын чегинен тышкары жайгашкан Кыргыз Республикасынын аба трассалары (каттамдары) боюнча Кыргыз Республикасынын аба мейкиндигинде аба кемелеринин учуусу;

е) "Аба кемеси" - Британия тарапка таандык аскер аба кемеси же Британия тарапка же башка мамлекетке таандык жана Британия тарал ташуулар үчүн жалдаган жарандык аба кемеси;

ж) "Өтө шашылыш конуу" - аба кемесинде бузулуулардын келип чыгышынын, жерде кечиктирилгис медициналык жардам талап кылынуу менен аба кемесинин экипажынын мүчөлөрүнүн же бортундагы персоналдын ооруп калышынын, каттам үчүн же аба кемесинин конуу пунктунда аба-ырайынын жагымсыз шарттарынын натыйжасында, ошондой эле аба кемесинин учуусун улантуу анын коопсуздугун камсыздабаган башка жагдайларда Кыргыз Республикасынын территориясында пландалбаган конуу.

3-берене - Транзиттин жол-жоболору

1. Британия тараптын персоналын ташыган аба кемесинин Кыргыз Республикасынын аба мейкиндиги аркылуу транзити Кыргыз Республикасынын аймагына аралык конуулар менен же конууларсыз жүргүзүлүшү мүмкүн.

2. Кыргыз тарапка жөнөтүлгөн тийиштүү суроо-талаптын негизинде Кыргыз Республикасынын аба мейкиндигин пайдалануу үчүн Британия тарапка уруксаттын төмөнкү түрлөрү берилет:

а) туруктуу уруксат - Британия тараптын аскер аба кемелери үчүн;

б) бир жолку уруксат - Британия тарапка же башка мамлекетке таандык жана Британия тарап ташуулар үчүн жалдаган жарандык аба кемелери үчүн.

3. Туруктуу уруксатты алуу үчүн Британия тарапка болжолдонгон транзитти аткарууга 5 (беш) жумушчу күндөн кечиктирбей Кыргыз тарапка дипломатиялык каналдар боюнча тийиштүү суроо-талап жөнөтөт. Суроо-талапта төмөнкү маалыматтар көрсөтүлөт:

а) дайындоо пунктун жана Британия тараптын ташууга болжолдонуучу жүктөрүн жана персоналдарын жалпы баяндоо;

б) транзиттин каттамдары;

в) пландалган транзиттик мезгил;

г) рейсти аткарууда туруктуу уруксатты тастыктоо үчүн 4-пункттун б), в), г) пунктчаларындагы маалыматтар кошумча берилет.

4. Бир жолку уруксатты алуу үчүн Британия тарап болжолдонгон транзитти аткарууга 5 (беш) жумушчу күндөн кечиктирбей, Кыргыз Республикасынын жарандык авиация чөйрөсүндөгү ыйгарым укуктуу мамлекеттик органына төмөнкү маалыматтарды көрсөтүү менен жазуу жүзүндө суроо-талапты жөнөтөт:

а) эксплуатанттын аталышы;

б) аба кемесинин тиби жана анын максималдуу учуу салмагы;

в) каттоо белгилери, радио чакыруучу жана аба кемесин каттоо мамлекети;

г) учуу/конуу убактысын көрсөтүү менен аба кемесинин учуп чыгуу жана дайындоо датасы, пункттары, Кыргыз Республикасынын аба мейкиндигине (-нен) кирүүнүн/чыгуунун эсеп убактысы;

д) жүктүн сүрөттөлүшү, Британия тараптын персоналынын саны, ошондой эле аба кемесинин бортунда кооптуу жүктүн болушу.

5. Кооптуу жүктөрдү ташуу Кыргыз Республикасынын Өкмөтүнүн 2011-жылдын 29-июнундагы № 346 токтому менен бекитилген "КРАЭ-18. Аба аркылуу кооптуу жүктөрдү ташуу" Кыргыз Республикасынын авиациялык эрежелерине жана "Кооптуу жүктөрдү аба аркылуу коопсуз ташуу боюнча техникалык нускамалар" (Doc9284) Жарандык авиациянын эл аралык уюмунун (ИКАО) документине ылайык жүргүзүлөт.

6. Транзитти аткаруунун жүрүшүндө туруктуу же бир жолку уруксаттын колдонулушу токтотулган же жокко чыгарылган учурда Британия тарап борттогу бардык жүктөр, аскердик мүлктөр жана персоналдары менен Кыргыз Республикасынын аба мейкиндигинен анын Кыргыз Республикасынын аба мейкиндигине кирүү пункту аркылуу же эгерде бул техникалык себептер менен мүмкүн болбосо, жакынкы пункт аркылуу конууларды аткарбастан же транзитти аяктабастан аба кемесинин чыгышын өз эсебинен камсыздайт.

7. Британия тараптын аба кемелеринин Кыргыз Республикасынын аба мейкиндигинде учуулары Кыргыз Республикасынын авиациялык эрежелерине жана бул Макулдашууга ылайык аткарылат. Мында ИКАОнун Стандарттары жана сунушталган практикасы Кыргыз Республикасынын авиациялык эрежелерине каршы келбеген даражада колдонулат.

8. Кыргыз тараптын учуп өтүүгө берген бардык уруксаты учуп өтүүнүн суралган мезгилине жана Кыргыз Республикасынын аба мейкиндигине кирүүнүн суралган убактысына кошумча 72 саат бою жарактуу деп эсептелинет.

9. Британия тарап транзиттин бул Макулдашууда айтылган максаттарда гана аткарыла тургандыгына жоопкерчилик алат.

10. Жүктөрдү жана персоналдарды көчүрүүдө Кыргыз Республикасынын улуттук коопсуздугуна коркунуч келе тургандыгы белгиленсе Кыргыз тарап транзитке уруксат берүүдөн баш тартууга укуктуу.

11. Британия тарапка тиешелүү жүктөр Кыргыз Республикасынын аймагына кандай көлөмдө жана санда (партияда ж.б.) алып келинген болсо, ошол көлөмдө жана санда алынып чыгылышы керек.

12. Эгерде Британия тарап транзиттин шарттарын же бул берененин 9-пунктунда айтылган шарттарды бузса, анда Кыргыз тарап транзитке берилген мурдагы уруксатты жокко чыгарганга укуктуу.

4-берене - Аба кемесинин жабдуулары

1. Аба кемеси төмөнкүлөр менен жабдылат:

а) аба кыймылын тейлөө органы менен эки тараптуу радиобайланышты камсыздаган радиобайланыш аппаратурасы менен;

б) Кыргыз Республикасынын авиациялык эрежелерине жана Жарандык авиациянын эл аралык уюмунун стандарттарына ылайык иштеген радиолокациялык кабыл алып-жооп бергич (транспондер) менен.

2. Аба кемелеринин экипаждары менен диспетчерлердин ортосундагы сүйлөшүүлөр "КРАЭ-10. Авиациялык электрбайланыш" Кыргыз Республикасынын авиациялык эрежелеринде камтылган радиотелефондук байланыштын эрежелерине жана Эл аралык жарандык авиациянын Конвенциясынын II томунун "Авиациялык электрбайланыш" деген 10-тиркемесине ылайык жүргүзүлөт.

5-берене - Персоналдын транзити

1. Британия тараптын персоналынын транзити жарактуу паспорттордун бар болушу менен визасыз негизде аткарылат.

2. Тараптар өтө шашылыш конуу учурунда Кыргыз Республикасынын аймагындагы Британия тараптын персоналына колдоо көрсөтүү менен байланышкан бардык маселелер боюнча кызматташат.

6-берене - Курал жана аскер кийими

1. Британия тараптын персоналы Кыргыз Республикасынын компетенттүү органдарынын тийиштүү уруксаты жок өзү менен курал алып аба кемесинен чыгып кете албайт.

2. Британия тараптын персоналына транзитти аткарууда аскер кийимин кийип жүрүүгө уруксат берилет.

7-берене - Юрисдикция

1. Британия тараптын персоналы Кыргыз Республикасынын мыйзамдарын сактоого жана Кыргыз Республикасынын ички иштерине кийлигишпөөгө милдеттенет.

2. Кыргыз Республикасынын аймагындагы Британия тараптын персоналынын статусу PfP-SOFA программасы менен аныкталат.

8-берене - Чек аралык жана бажылык эрежелер

1. Өтө шашылыш конуу жана Кыргыз Республикасынын мамлекеттик чек арасын кесип өтүү учурунда Британия тараптын персоналы Кыргыз Республикасынын мыйзамына ылайык чек аралык жана бажылык контролдон өтүшөт.

2. Өтө шашылыш конуу учурунда жүк бул Макулдашуунун Тиркемесинин талаптарына ылайык, Кыргыз Республикасынын компетенттүү органдары тарабынан текшерүүгө жатат.

9-берене - Кызмат көрсөтүүгө акы төлөө

1. Британия тарап транзитти аткарууда аба кемелерине көрсөтүлгөн аэронавигациялык жана аэропорттук кызматтар үчүн Кыргыз тарабына төлөмдөрдү жүргүзөт.

2. Британия тарап жүктүн ар бир партиясын транзит менен жөнөтүүнүн алдында алдын ала акы төлөшү керек, анткени жүктүн транзити тобокелдик жана жүктү коштоонун кыйынчылыктары менен байланыштуу болушу мүмкүн.

10-берене - Маалымат Транзитти аткаруунун натыйжасында Тараптардын биринен алынган маалымат экинчи Тараптын кат жүзүндөгү макулдугусуз үчүнчү тараптарга берилиши мүмкүн эмес. 11-берене - Дооматтарды жөнгө алуу

1. Өзүнүн компетенциясынын жана ыйгарым укуктарынын чегинде, Тараптар төмөнкүлөр үчүн бардык тийиштүү чараларды көрөт:

а) Кыргыз Республикасынын аймагында транзитти аткаруунун жүрүшүндө кандайдыр бир инциденттин алдын алуу үчүн;

б) инциденттердин себептерин аныктоо жана алардын кесепеттерин жоюу үчүн;

в) инцидентке күнөөлүү Тараптын, инциденттин кесепеттерин жоюу боюнча чыгымдардын ордун толтуруусу үчүн.

2. Үчүнчү жактарга зыян келтирген учурда, зыяндын ордун толтуруу боюнча дооматтар, Кыргыз Республикасынын мыйзамдарына ылайык, зыян келтирген тарабына көрсөтүлөт.

12-берене - Кайчы пикирлер Бул Макулдашуунун жоболорун колдонуу жана талкуулоо менен байланышкан кайчы пикирлер Тараптардын ортосунда кандайдыр бир үчүнчү жактардын катышуусуз консультацияларды жүргүзүү аркылуу чечилет. 13-берене - Макулдашуунун колдонуу мөөнөтү жана аны токтотуу

1. Бул Макулдашуу Британия тарап Кыргыз тарабынан өздөрүнүн мамлекет ичиндеги жол-жоболордун аткарылгандыгы жөнүндө жазуу жүзүндө билдирмени алган күндөн баштап күчүнө кирет.

2. Бул Макулдашуу 12 (он эки) айга түзүлөт, эгерде Тараптардын бири бул Макулдашуунун колдонуу мөөнөтү бүткөнгө 90 (токсон) күн калганга чейин бул Макулдашууну узартпоо тууралуу ниетин жазуу жүзүндө билдирүүнү дипломатиялык каналдар боюнча экинчи Тарапка жөнөтпөсө, кийинки ушундай эле мезгилге өзүнөн-өзү узартылат.

3. Бул Макулдашуунун колдонулушу бул Макулдашуунун колдонулушун токтотуу ниети жөнүндө экинчи Тараптын жазуу жүзүндөгү билдирүүсүн Тараптардын бири дипломатиялык каналдар боюнча алгандан баштап 90 (токсон) күн өткөндөн кийин токтотулат.

4. Бул Макулдашуунун колдонулушу токтотулган учурда бул Макулдашуунун 9 жана 11-беренелеринде каралган милдеттенмелер бардык дооматтар жөнгө салынмайынча, Тараптардын экөөндө тең күчүндө калат.

2014-жылдын "__" ___________ _______________ шаарында кыргыз, англис жана орус тилдеринде эки нускада кол коюлду, алардын ар бири бирдей юридикалык күчкө ээ. Бул Макулдашуунун текстин талкуулоодо орус тилиндеги текст негизги болуп эсептелет.

Кыргыз Республикасынын Өкмөтү үчүн

Улуу Британия Кошмо Королдугунун жана Түндүк Ирландиянын Өкмөтү үчүн