КР Өкмөтүнүн (Кыргыз Республикасынын Өкмөтүнө караштуу Мамлекеттик бажы кызматы менен Федералдык бажы кызматынын (Россия Федерациясы) ортосундагы Кыргыз Республикасынан чыккан жана Россия Федерациясынын аймагына ташылып кирүүчү товарларга карата бажы операцияларын жана бажы контролун маалымат алмашууну пайдалануу менен жөнөкөйлөтүү боюнча долбоорду ишке ашыруу жөнүндө протоколдун долбооруна макулдук берүү тууралуу) буйругу

КЫРГЫЗ РЕСПУБЛИКАСЫНЫН ӨКМӨТҮ БУЙРУК 2013-жылдын 19-апрели № 146-б Кыргыз Республикасынын Өкмөтүнө караштуу Мамлекеттик бажы кызматы менен Федералдык бажы кызматынын (Россия Федерациясы) ортосундагы Кыргыз Республикасынан чыккан жана Россия Федерациясынын аймагына ташылып кирүүчү товарларга карата бажы операцияларын жана бажы контролун маалымат алмашууну пайдалануу менен жөнөкөйлөтүү боюнча долбоорду ишке ашыруу жөнүндө протоколдун тиркелген долбооруна принциптүү эмес мүнөздөгү өзгөртүүлөрдү жана толуктоолорду киргизүү укугу менен макулдук берилсин.

Премьер-министри

Ж.Сатыбалдиев

Долбоор

Кыргыз Республикасынын Өкмөтүнө караштуу Мамлекеттик бажы кызматы менен Федералдык бажы кызматынын (Россия Федерациясы) ортосундагы Кыргыз Республикасынан чыккан жана Россия Федерациясынын аймагына ташылып кирүүчү товарларга карата бажы операцияларын жана бажы контролун маалымат алмашууну пайдалануу менен жөнөкөйлөтүү боюнча долбоорду ишке ашыруу жөнүндө ПРОТОКОЛ Кыргыз Республикасынын Өкмөтүнө караштуу Мамлекеттик бажы кызматы жана Федералдык бажы кызматы (Россия Федерациясы) (мындан ары - "Тараптар") Соода-экономикалык, илимий техникалык жана гуманитардык кызматташуу боюнча Кыргыз-Россия өкмөттөр аралык комиссиянын 2007-жылдын 12-октябрындагы жана 2008-жылдын 7-октябрындагы тогузунчу жана онунчу жыйындарынын протоколдоруна ылайык, 1995-жылдын 20-январындагы Бажы бирлиги тууралуу макулдашууга негизденип, 2009-жылдын 5-мартындагы Кыргыз Республикасынын Мамлекеттик бажы комитети менен Федералдык бажы кызматынын (Россиянын ФБКсы) ортосундагы Кыргыз Республикасынын аймагында өндүрүлгөн жана Россия Федерациясынын аймагына ташылып кирген товарларды маалымат алмашууну пайдалануу менен бажылык тариздөө жана бажы контролун жүргүзүү жөнүндө протоколдун (мындан ары - 2009-жылдын 5-мартындагы Протокол) жоболорун колдонууга алып, Кыргыз Республикасы менен Россия Федерациясынын ортосундагы соодага көмөктөшүү жана Кыргыз Республикасынан чыккан жана Россия Федерациясынын аймагына ташылып кирүүчү товарларга карата бажылык операцияларды жүргүзүүдөгү жана бажы контролунан өткөрүүдөгү Тараптардын өз ара аракетинин натыйжалуулугун жогорулатуу максатында, "Жөнөкөйлөтүлгөн бажы коридору" (мындан ары - ЖБК) деп аталган жол-жобону колдонуу "ачык-айкын", болжолдоп айта ала тургандай жана кысымга албагыдай болуусу керектигин көңүлгө алып, төмөнкүлөр тууралуу макулдашты: 1-берене. Тараптар 2009-жылдын 5-мартындагы Протокол менен бекитилген Техникалык шарттардын (мындан ары - Техникалык шарттар) талаптарына ылайык ЖБК колдонула турган товарлардын жана транспорт каражаттарынын өтүүсү тууралуу так маалыматтарды алдын ала алмашат. Тараптар алдын ала маалыматтарды Тараптар аныктаган ыйгарым укуктуу бажы органдарынын деңгээлинде алмашат. Мындай маалыматтар Техникалык шарттарга ылайык күбөлөндүрүлүүсү керек. Ушул Протоколго кол коюлгандан тартып 1 айдын аралыгында Тараптар жазуу түрүндө өзүлөрүнүн ыйгарым укуктуу бажы органдары тууралуу бири-бирин кабарлайт. Ар бир Тарап экинчи Тарапты өзүлөрүнүн ыйгарым укуктуу бажы органдарынын өзгөргөндүгү тууралуу жазуу түрүндө токтоосуз кабарлайт. 2-берене. ЖБК төмөнкүлөргө карата колдонулат: Россия Федерациясынын аймагына автомобилдик (2013-жылдын 1-июнунан тартып) жана темир жол (2013-жылдын 1-ноябрынан тартып) транспорт түрлөрү менен ташылып кирүүчү, өндүрүлгөн жана жөнөткөн өлкөсү Кыргыз Республикасы болгон товарларга карата; товар өндүрүүчү же товар өндүрүүчүнүн ыйгарым укуктуу расмий өкүлү болгон Кыргыз Республикасынын резидент-уюмдары үчүн; сейф-пакеттерде жөнөтүлгөн жана товарлардын саны, номенклатурасы жана фактуралык наркы тууралуу маалыматтарды камтыган коммерциялык документтерде Кыргыз Республикасынын ыйгарым укуктуу бажы органдарынын белгилери болгон учурда. Кыргыз Тарап товарлардын саны, номенклатурасы жана фактуралык наркы тууралуу маалыматтарды камтыган коммерциялык документтерди текшерүүгө жана күбөлөндүрүүгө ыйгарым укуктуу бажы органын, ошондой эле белгилерди коюу тартибин аныктайт жана аларды тууралуу Россия Тарапты кабарлайт. 3-берене. ЖБКга катышкан жана өткөрүлүп жаткан товарлар тууралуу так жана документтер менен тастыкталган маалыматтарды, анын ичинде ушул Протоколдун жоболоруна ылайык товарлардын саны, номенклатурасы жана наркы тууралуу маалыматтарды берген компаниялар төмөнкүдөй артыкчылыкка ээ болушат:

1) ЖБКга катышпаган, ошондой эле Кыргыз Республикасында жана Россия Федерациясында бажы операцияларын жүргүзгөн башка компанияларга салыштырмалуу бажы операциялары жана бажы контролу жүргүзүлүүчү жайларда артыкчылыкка ээ болушат;

2) бажы операцияларын жүргүзүү убактысын кыскартуу максатында, ал мүмкүн болгон жерлерде бажы жол-жоболорун тездетүү;

3) бажы контролун жүргүзүүдө төмөндө айтылган чараларды тандалма жана бажылык укук бузууларга жана контрабандага каршы күрөшүү максатында гана колдонуу:

- товарларды бажылык кароо;

- товарлардын сынамын жана үлгүлөрүн алуу;

- товарларды, документтерди жана товарларды идентификациялоо каражаттарын бажы экспертизасынан өткөрүү;

- бажы документтериндеги маалыматтарды текшерүү максатында кошумча документтерди жана маалыматтарды сурап алуу;

- товарлардын декларациясында билдирилген маалыматтарды тастыктаган документтердин түп нускасын кагаз түрүндө берүү тууралуу декларантка талап коюу (товарлар электрондук формада декларацияланган учурда).

4-берене. Россия Тарап тобокелдикти башкаруу тутумунун алкагында бажы контролу учурунда тобокелдикти минималдаштыруу боюнча чараларды колдонууну тандап алуунун деңгээлин аныктоо жолу менен ЖБКнын алкагында ташылып кирип жаткан товарларга карата бажылык кароонун жана бажы контролунун башка формаларынын санын кыскартууга көмөктөшөт. 5-берене. Тараптар тобокелдикти башкаруунун улуттук тутумдарын колдонуу менен Тараптардын мамлекеттеринин ортосунда өткөрүлүп жаткан товарлар жана транспорт каражаттарына карата бажы операцияларын жана бажы контролун жүргүзүү максатында ушул Протоколго ылайык алынган алдын ала маалыматтын колдонулушун камсыз кылат. 6-берене. Тараптардын мамлекеттеринин бажы мыйзамдары ЖБКнын алкагында ташылып кирип жаткан товарларды туура эмес декларациялоо же декларациялабоо менен байланыштуу бузулганы табылганда Тараптардын ар бири мындай укук бузууларга алып келген себептер жоюлганга чейин Тараптардын бажы мыйзамдарын бузган жактарга карата ЖБКнын колдонулуусун токтотуусу мүмкүн. 7-берене. Тараптардын мамлекеттеринин ортосунда өткөрүлүп жаткан товарлар жана транспорт каражаттары тууралуу электрондук маалымат алмашууну уюштурууда Тараптар Бириккен Улуттар Уюмунун, Дүйнөлүк бажы уюмунун, Бажы бирлигинин бажы мыйзамдарынын, Россия Федерациясы менен Кыргыз Республикасынын бажы мыйзамдарынын ченемдерин, стандарттарын жана сунуштамаларын, ошондой эле маалымат алмашуунун эл аралык практикасын пайдаланышат. 8-берене. Тараптардын ортосунда ЖБКны ишке ашыруу 2009-жылдын 5-мартындагы Протоколдун жоболоруна ылайык ушул Протоколго кол коюлган күндөн тартып 1 айдын аралыгында башталуусу керек. 9-берене. Эгер ушул Протоколдо 2009-жылдын 5-мартындагы Протоколдо каралгандан башка жоболор белгиленсе, анда ушул Протоколдун жоболору колдонулат. 10-берене. Тараптар өзүлөрүнүн мамлекеттеринин мыйзамдарына ылайык ушул Протоколду бузууларды жоюу боюнча зарыл чараларды көрүшөт жана мындай бузуулар тууралуу, ошондой эле маалымат алмашуунун алкагында Тараптардын ортосунда өткөрүлүп жаткан товарлар жана транспорт каражаттары тууралуу маалыматтардагы айырмалар жана/же фальсификациялар тууралуу бири-бирин кабарлашат. 11-берене. Ушул протоколдун жоболорун аткаруу жана түшүндүрүүгө байланышкан бардык талаш маселелер Тараптардын ортосундагы консультациялар жана сүйлөшүүлөр жолу менен чечилет. 12-берене. Тараптардын өз ара макулдашуусу боюнча бул Протоколго өзүнчө протоколдор менен таризделе турган өзгөртүүлөр жана толуктоолор киргизилиши мүмкүн. 13-берене. Бул Протокол кол коюлгандан тартып күчүнө кирет. Тараптардын ар бири экинчи Тарапка өзүнүн ниетин жазуу түрүндө билдирүүнү жөнөтүү жолу менен ушул Протоколду колдонуусун токтотууга укуктуу. Бул учурда ушул Протоколду колдонуу аталган кабарлоо алынгандан 10 күн өткөндөн кийин токтотулат.

_________ шаарында 2013-жылдын "__" ________ ар бири кыргыз жана орус тилдеринде эки нускада түзүлдү, эки текст тең бирдей күчкө ээ.

Кыргыз Республикасынын Өкмөтүнө караштуу Мамлекеттик бажы кызматы үчүн

Федералдык бажы кызматы (Россия Федерациясы) үчүн