КР Өкмөтүнүн (Кыргыз Республикасынын Өкмөтүнө караштуу Баңгизаттарды контролдоо боюнча мамлекеттик кызмат менен Пакистан Ислам Республикасынын Өкмөтүнө караштуу Баңгизаттарды контролдоо боюнча министрликтин ортосундагы Баңги каражаттарды, психотроптук заттарды жана прекурсорлорду мыйзамсыз жүгүртүүгө каршы күрөшүүдөгү кызматташтык жөнүндө Макулдашуунун долбооруна берүү боюнча) буйругу

КЫРГЫЗ РЕСПУБЛИКАСЫНЫН ӨКМӨТҮ БУЙРУК 2012-жылдын 26-декабры № 603-б Кыргыз Республикасынын Өкмөтүнө караштуу Баңгизаттарды контролдоо боюнча мамлекеттик кызмат менен Пакистан Ислам Республикасынын Өкмөтүнө караштуу Баңгизаттарды контролдоо боюнча министрликтин ортосундагы Баңги каражаттарды, психотроптук заттарды жана прекурсорлорду мыйзамсыз жүгүртүүгө каршы күрөшүүдөгү кызматташтык жөнүндө Макулдашуунун долбооруна принциптүү эмес мүнөздөгү мүмкүн болгон өзгөртүүлөрдү жана толуктоолорду эске алуу менен макулдук берилсин.

Премьер-министри

Ж.Сатыбалдиев

Долбоор

Кыргыз Республикасынын Өкмөтүнө караштуу Баңгизаттарды контролдоо боюнча мамлекеттик кызмат менен Пакистан Ислам Республикасынын Өкмөтүнө караштуу Баңгизаттарды контролдоо боюнча министрликтин ортосундагы Баңги каражаттарды, психотроптук заттарды жана прекурсорлорду мыйзамсыз жүгүртүүгө карты күрөшүүдөгү кызматташтык жөнүндө Макулдашуу

Мындан ары Тараптар деп аталуучу Кыргыз Республикасынын Өкмөтүнө караштуу Баңгизаттарды контролдоо боюнча мамлекеттик кызмат жана Пакистан Ислам Республикасынын Өкмөтүнө караштуу Баңгизаттарды контролдоо боюнча министрлик, баңги каражаттарды, психотроптук заттарды жана прекурсорлорду (мындан ары - баңги заттар) мыйзамсыз жүгүртүүгө жана аларды ашкере колдонуунун масштабдары кеңейип баратканына тынчсызданганын билдиришип, баңги заттарды мыйзамсыз жүгүртүү Тараптардын мамлекеттеринин элдеринин ден соолугуна жана бакубаттыгына олуттуу коркунуч келтирерин түшүнүшүп, Баңги каражаттары жөнүндө 1961-жылдын 30-мартындагы бирдиктүү конвенцияга оңдоолор жөнүндө 1972-жылдын 25-мартындагы протоколго ылайык киргизилген оңдоолору менен, Баңги каражаттары жөнүндө 1961-жылдын 30-мартындагы бирдиктүү конвенциянын, 1971-жылдын 21-февралындагы Психотроптук заттар жөнүндө конвенциянын, Бириккен Улуттар Уюмунун 1988-жылдын 20-декабрындагы Баңги каражаттарды жана психотроптук заттарды мыйзамсыз жүгүртүүгө каршы күрөшүү жөнүндө конвенциясынын жоболорун, ошондой эле Кыргыз Республикасынын Өкмөтү менен Пакистан Ислам Республикасынын Өкмөтүнүн ортосундагы Баңгиликке каршы күрөшүүдөгү кызматташтык жөнүндө 1996-жылдын 27-октябрындагы макулдашууну эске алышып, баңги заттарды мыйзамсыз жүгүртүүгө каршы күрөшүүгө багытталган натыйжалуу чараларды көрүүгө өз ара кызыккандыктан улам, өз мамлекеттеринин улуттук мыйзамдарын жана эл аралык милдеттенмелерин жетекчиликке алып төмөнкүлөр жөнүндө макулдашты:

1-берене

1. Бул Макулдашуунун предмети болуп Тараптардын өз компетенцияларынын чегинде баңги заттарды мыйзамсыз жүгүртүүгө каршы натыйжалуу аракеттенүүнү уюштуруу максатындагы кызматташтык эсептелет.

2. Бул Макулдашуу кылмыш иштери боюнча укуктук жардам көрсөтүү жана берүү маселелерине таасирин тийгизбейт.

2-берене

1. Тараптардын бул Макулдашуунун алкагында кызматташтыгы төмөнкү формаларда ишке ашырылат:

а) баңги каражаттарды, психотроптук заттарды жана прекурсорлорду мыйзамсыз жүгүртүүгө каршы аракеттенүү маселелери боюнча маалымат алмашуу;

б) экинчи Тараптын суроо-талабы боюнча бир Тараптын баңги каражаттарды, психотроптук заттарды жана прекурсорлорду мыйзамсыз жүгүртүүгө байланышкан маселелер боюнча операциялык-издөө иш-чараларды жүргүзүүсү;

в) баңги каражаттарды, психотроптук заттарды жана прекурсорлорду мыйзамсыз жүгүртүүгө каршы аракеттенүү боюнча иш-чараларды өткөрүүдө, анын ичинде контролдонуучу берүүлөрдү жана текшерме сатып алууларды жүргүзүүдө, ошондой эле баңги каражаттардын, психотроптук заттардын жана прекурсорлордун мыйзамдуу жүгүртүлүшүн контролдоо боюнча өз ара аракеттенүү жана өз ара жардам көрсөтүү;

г) тажрыйба алмашуу, анын ичинде кеңешмелерди, конференцияларды жана семинарларды өткөрүү жолу менен алмашуу;

д) ченемдик укуктук актыларды, аларды аткаруу практикасы жөнүндө материалдарды, баңги каражаттарды, психотроптук заттарды жана прекурсорлорду мыйзамсыз жүгүртүүгө каршы аракеттенүү маселелери боюнча, анын ичинде алардын мыйзамдуу жүгүртүлүшүн контролдоо боюнча статистикалык маалыматтарды жана методикалык рекомендацияларды алмашуу;

е) кадрларды даярдоо жана алардын квалификацияларын жогорулатуу;

ж) материалдык-техникалык жана консультациялык жардам көрсөтүү, ошондой эле экспертизаларды жүргүзүүгө көмөктөшүү;

з) баңги каражаттарды, психотроптук заттарды жана прекурсорлорду мыйзамсыз жүгүртүүгө каршы күрөшүү проблемалары боюнча өз ара кызыкчылыкты жараткан биргелешкен илимий изилдөөлөрдү жүргүзүү;

и) зарыл болгон учурда мыйзамсыз жүгүртүүдөн алынган баңги каражаттардын, психотроптук заттардын жана прекурсорлордун үлгүлөрү жана аларды изилдөөнүн натыйжалары менен алмашуу;

к) кызматташтык процессинде пайда болуучу маселелер боюнча ишти координациялоо, буга жумушчу топторду түзүү жана өкүлдөрдү алмашуу кирет.

2. Бул Макулдашуу Тараптардын мамлекеттеринин мыйзамдарына каршы келбеген, Тараптардын башка өз ара алгылыктуу кызматташтык формаларын даярдоого жана өнүктүрүүгө бөгөт болбойт.

3-берене

Бул Макулдашуунун алкагында маалымат алмашуу төмөнкүлөргө карата ишке ашырылат:

а) башка Тараптын мамлекетинин аймагында жасалган же жасоого даярдалып жаткан баңги каражаттарды, психотроптук заттарды жана прекурсорлорду мыйзамсыз жүгүртүүгө байланышкан ар кандай кылмыштарга;

б) баңги каражаттарды, психотроптук заттарды жана прекурсорлорду мыйзамсыз жүгүртүүгө тиешеси бар деп шектелген адамдарга;

в) бир Тараптын мамлекетинин аймагынан экинчи Тараптын мамлекетинин аймагына баңги каражаттарды, психотроптук заттарды жана прекурсорлорду мыйзамсыз ташуу же аларды мыйзамсыз ташууга ниеттенүү менен байланышкан конкреттүү фактыларга жана окуяларга;

г) баңги каражаттарды, психотроптук заттарды жана прекурсорлорду мыйзамсыз жүгүртүүгө тиешеси бар жана иш-аракеттери трансулуттук мүнөзгө ээ болгон кылмыштуу топтордун түзүмүнө, жеке курамына, иш чөйрөсүнө, башкаруунун уюштурулушуна жана байланыштарына;

д) Тараптардын мамлекеттеринде аракеттенген жана баңги каражаттарды, психотроптук заттарды жана прекурсорлорду мыйзамсыз жүгүртүүгө байланышы бар айрым адамдардын жана кылмыштуу топтордун ортосундагы болгон же божомолдуу байланыштарга;

е) баңги каражаттарды, психотроптук заттарды жана прекурсорлорду мыйзамсыз жүгүртүүгө байланышкан кылмыш ишин жасоонун формаларына жана методдоруна;

ж) баңги каражаттарды, психотроптук заттарды жана прекурсорлорду мыйзамсыз жүгүртүүдөн түшкөн кирешелерди мыйзамдаштырууга (адалдоого) багытталган иш-аракеттерге;

з) баңги каражаттарды, психотроптук заттарды жана прекурсорлорду мыйзамсыз жүгүртүүгө түшүрүү булактарын аныктоонун формалары менен методдоруна жана ушундай мыйзамсыз жүгүртүүнү токтотуу чараларына;

и) баңги каражаттарды, психотроптук заттарды жана прекурсорлорду өстүрүүдө, жасоодо, ташууда жана сатууда колдонулуучу катуу жана жашыруу ыкмаларына, ошондой эле аларды аныктоо методдоруна, ошондой эле өз ара кызыкчылыкты жараткан башка маселелерге.

4-берене

Бул Макулдашуунун алкагында көмөк көрсөтүү Тараптардын биринин суроо-талабынын негизинде же ушундай көмөк көрсөтүү экинчи Тарап үчүн кызыкчылыкты жаратат деп эсептеген демилгесинин негизинде ишке ашырылат. Көмөк көрсөтүү жөнүндө суроо-талап жазуу жүзүндө же текстти жиберүүнүн техникалык каражаттарын колдонуу менен берилүүгө тийиш. Кечиктирүүгө болбогон учурларда телефон байланышы аркылуу берилген оозеки суроо-талап кабыл алынышы мүмкүн, бирок ал үч сутка ичинде жазуу жүзүндө же текстти жиберүүнүн техникалык каражаттарын колдонуу менен ырасталышы керек. Маалыматты жиберүүнүн техникалык каражаттарын колдонууда, ошондой эле алынган суроо-талаптын аныктыгына же мазмунуна карата күмөн пайда болсо, суроо-талапты алган Тарап суроо-талапты жиберген Тараптан жазуу жүзүндө ырастоону сурай алат.

2. Көмөк көрсөтүү жөнүндө суроо-талап төмөнкүлөрдү камтууга тийиш:

- суроо-талап жиберген Тараптын аталышы;

- суроо-талапты алуучу Тараптын аталышы;

- суроо-талаптын максатынын кыскача жазылышы жана негиздемеси;

- суроо-талапты аткарууга керектүү башка маалыматтар.

5-берене

1. Суроо-талапты алган Тарап суроо-талаптын мүмкүн болушунча тез жана толук аткарылышын камсыздоо үчүн бардык зарыл чараларды көрөт. Суроо-талап, эреже катары, ал алынган күндөн баштап 30 суткадан ашпаган мөөнөттө аткарылат.

2. Суроо-талапты алган Тарап суроо-талап жиберген Тараптын ыйгарым укуктуу өкүлдөрүнө суроо-талапты аткаруу учурунда өзүнүн мамлекетинин аймагында болууга, эгерде бул анын мамлекетинин мыйзамдарына каршы келбесе уруксат бериши мүмкүн.

6-берене

1. Суроо-талапты аткаруу мүмкүн болбосо же аны аткаруудан баш тартылган учурда, суроо-талапты алган Тарап суроо-талап жиберген Тарапты тез арада жазуу жүзүндө кабарлайт жана суроо-талапты аткарууга тоскоол болгон себептер тууралуу маалымдайт, мында суроо-талапты жана анын бардык тиркемелерин кайтарып берет.

2. Эгерде суроо-талапты алган Тарап суроо-талаптын аткарылышы анын мамлекетинин эгемендүүлүгүнө, коопсуздугуна же башка олуттуу кызыкчылыктарына зыян келтириши мүмкүн деп эсептесе, же болбосо анын мамлекетинин мыйзамдарына каршы келсе, анда суроо-талапты аткаруудан толук же жарым жартылай баш тартылышы мүмкүн.

3. Эгерде суроо-талапты алган Тарап суроо-талаптын дароо аткарылышы анын мамлекетинин аймагында жүргүзүлүп жаткан кылмышты териштирүүгө же башка өндүрүшкө тоскоол болот деп эсептесе, ал суроо-талаптын аткарылышын кийинкиге жылдырат же аны аткарылышын суроо-талап жиберген Тарап менен кеңешкенден кийин зарыл катары аныкталган шарттардын сактоо менен байланыштырат.

Суроо-талап жиберген Тарап сунушталган шарттарда ага көмөк көрсөтүлүшүнө макул болсо, анда ал ушул шарттарды сактоого тийиш.

7-берене

1. Тараптардын ортосундагы алмашуу предмети болуп саналган баңги каражаттарды, психотроптук заттарды жана прекурсорлорду мыйзамсыз жүгүртүүгө каршы аракеттенүү маселелери боюнча Тараптар маалыматтын, ага тете документтердин жана материалдарынын мазмунунун купуялуулугун камсыз кылышат.

2. Суроо-талап жиберген Тарап алынган маалыматтарды суроо-талапта көрсөтүлгөн максаттарда гана пайдаланат.

3. Бул Макулдашуунун алкагында алынган маалыматтар үчүнчү тарапка бул маалыматты берген Тараптын жазуу жүзүндөгү макулдугу жок берилиши мүмкүн эмес.

8-берене

Тараптар бул Макулдашуунун алкагындагы кызматташтыкты жүргүзүүдө жумушчу тил катары орус жана англис тилин колдонушат.

9-берене

1. Тараптар бул Макулдашууну өзүнүн мамлекетинин аймагында аткаруу менен байланышкан чыгымдарды көтөрүшөт.

2. Эгерде Тараптардын ортосунда жазуу жүзүндөгү башка келишимдер жок болсо, алар өз өкүлдөрүнүн кабыл алуучу Тараптын мамлекетинин аймагына барып-келүүсү жана жашашы менен байланышкан бардык чыгымдарды өздөрүнө алышат.

3. Суроо-талап жиберген Тараптын өкүлдөрүнүн баруусу суроо-талапты алган Тараптын алдын ала макулдугу менен ишке ашырылат.

10-берене

Бул Макулдашууда каралган кызматташтыктын ишке ашыруунун жүрүшүн кароо жана аны андан аркы өркүндөтүүнүн багыттарын иштеп чыгуу үчүн Тараптар өз ара сүйлөшүүнүн негизинде биргелешкен жумушчу жолугушууларды, кеңешмелерди, семинарларды өткөрүшөт. Жолугушуулар ар бир Тараптардын мамлекетинде кезеги менен өткөрүлөт.

11-берене

Бул Макулдашуунун 2-беренесинин 1-пунктунун ж), з), и) пунктчаларында каралган кызматташууну ишке ашыруунун конкреттүү формалары жана атап айтканда, аны каржылоо Тараптардын ортосундагы өзүнчө келишимдер менен аныкталат.

12-берене

Бул Макулдашууга Тараптардын чечими боюнча өзгөртүүлөр жана толуктоолор киргизилиши мүмкүн, алар ушул Макулдашуунун ажыратылгыс бөлүгү болуп саналган жана аларга кол коюлган күндөн баштап күчүнө кирүүчү өзүнчө протоколдор менен таризделет.

13-берене

Тараптар бул Макулдашуунун жоболорун чечмелөөгө же колдонууга байланыштуу келип чыгышы мүмкүн болгон бардык талаш маселелерди консультация жана сүйлөшүү жолу менен чечишет.

14-берене

Бул Макулдашуу белгисиз мөөнөткө түзүлөт. Бул Макулдашуу кол коюлган күндөн баштап күчүнө кирет жана Тараптардын бири экинчи Тараптан бул Макулдашууну колдонууну токтотуу ниети жөнүндө жазуу жүзүндөгү билдирүү алган күндөн баштап үч ай аяктаганга чейин күчүндө болот.

_______________шаарында 20 _______ жылдын «____» __________________ эки нускада, ар бири кыргыз, орус жана англис тилдеринде түзүлдү, мында бардык тексттер бирдей юридикалык күчкө ээ. Бул Макулдашуунун текстин чечмелөөдө кайчы пикирлер келип чыккан учурда негиз катары орус тилиндеги текст колдонулат.

Кыргыз Республикасынын Өкмөтүнө караштуу Баңгизаттарды контролдоо боюнча мамлекеттик кызмат үчүн ___________________________________

Пакистан Ислам Республикасынын Өкмөтүнө караштуу Баңгизаттарды контролдоо боюнча министрлик үчүн ___________________________________