КР Өкмөтүнүн (Кыргыз Республикасынын Өкмөтүнүн буйругуна толуктоо киргизүү боюнча) буйругу

КЫРГЫЗ РЕСПУБЛИКАСЫНЫН ӨКМӨТҮ БУЙРУК 2012-жылдын 15-майы № 196-б Көп жааган кардан жабыркаган облустардын малчыларына мамлекеттик колдоо көрсөтүү үчүн арпа сатып алуу жана сатуу механизмдерин тактоо максатында: Кыргыз Республикасынын Өкмөтүнүн 2012-жылдын 24-мартындагы № 100-б буйругуна төмөнкү толуктоо киргизилсин: төмөнкү мазмундагы 2-1 - 2-4-пункттар менен толукталсын: "2-1. Кыргыз Республикасынын Экономика жана монополияга каршы саясат министрлигинин алдындагы Атаандаштыкты өнүктүрүү боюнча департамент сатып алынуучу арпага бааны белгилесин. 2-2. Райондордун жергиликтүү мамлекеттик администрацияларынын арыздары боюнча Кыргыз Республикасынын Өкмөтүнө караштуу Мамлекеттик материалдык резервдер фонду көп жааган кардан жабыркаган райондордун малчыларына сатуу үчүн арпа бөлсүн. 2-3. Райондордун жергиликтүү мамлекеттик администрациялары:

- Кыргыз Республикасынын Экономика жана монополияга каршы саясат министрлигинин алдындагы Атаандаштыкты өнүктүрүү боюнча департамент белгилеген баа боюнча малчыларга арпа сатсын;

- арпаны сатуудан түшкөн акча каражаттарын республикалык бюджетке которсун.

2-4. Арпаны сатуудан түшкөн акча каражаттарын республикалык бюджетке өз убагында которууга жеке жоопкерчилик жергиликтүү мамлекеттик администрациялардын башчыларына жүктөлсүн.".

Премьер-министр

Ө.Бабанов