КР Өкмөтүнүн (Кыргыз Республикасынын Өкмөтүнө караштуу Баңгизаттарды контролдоо боюнча мамлекеттик кызмат менен Казакстан Республикасынын Ички иштер министрлигинин ортосундагы Баңги каражаттарды, психотроптук заттарды жана прекурсорлорду мыйзамсыз жүгүртүүгө каршы күрөшүүдөгү кызматташуу жөнүндө макулдашуунун долбооруна макулдук берүү боюнча) буйругу

КЫРГЫЗ РЕСПУБЛИКАСЫНЫН ӨКМӨТҮ БУЙРУК 2012-жылдын 15-августу № 403-б Баңги, психотроптук заттардын жана прекурсорлордун мыйзамсыз жүгүртүлүшүнө каршы күрөшүү чөйрөсүндөгү кызматташууну Казакстан Республикасы менен өркүндөтүү максатында: Кыргыз Республикасынын Өкмөтүнө караштуу Баңгизаттарды контролдоо боюнча мамлекеттик кызмат менен Казакстан Республикасынын Ички иштер министрлигинин ортосундагы Баңги каражаттарды, психотроптук заттарды жана прекурсорлорду мыйзамсыз жүгүртүүгө каршы күрөшүүдөгү кызматташуу жөнүндө макулдашуунун тиркелген долбооруна макулдук берилсин.

Премьер-министри

Ө. Бабанов

Долбоор

Кыргыз Республикасынын Өкмөтүнө караштуу Баңгизаттарды контролдоо боюнча мамлекеттик кызмат менен Казакстан Республикасынын Ички иштер министрлигинин ортосундагы Баңги каражаттарды, психотроптук заттарды жана прекурсорлорду мыйзамсыз жүгүртүүгө каршы күрөшүүдөгү кызматташтык жөнүндө макулдашуу

Мындан ары Тараптар деп аталуучу Кыргыз Республикасынын Өкмөтүнө караштуу Баңгизаттарды контролдоо боюнча мамлекеттик кызмат жана Казакстан Республикасынын Ички иштер министрлиги, баңги каражаттарды, психотроптук заттарды жана прекурсорлорду (мындан ары - баңгизаттар) мыйзамсыз жүгүртүүнүн жана аларды ашкере колдонуунун масштабдары кеңейип баратканына тынчсызданганын билдиришип, баңги заттарды мыйзамсыз жүгүртүү Тараптардын мамлекеттеринин элдеринин ден соолугуна жана бакыбаттыгына олуттуу коркунуч жаратаарын түшүнүшүп, Баңги каражаттары жөнүндө 1961-жылдын 30-мартындагы бирдиктүү конвенцияга оңдоолор жөнүндө 1972-жылдын 25-мартындагы Протоколго ылайык киргизилген оңдоолору менен Баңги каражаттары жөнүндө 1961-жылдын 30-мартындагы бирдиктүү конвенциянын, 1971-жылдын 21-февралындагы Психотроптук заттар жөнүндө конвенциянын, Бириккен Улуттар Уюмунун 1988-жылдын 20-декабрындагы Баңги каражаттардын жана психотроптук заттардын мыйзамсыз жүгүртүлүшүнө каршы күрөш жөнүндө конвенциясынын жоболорун, ошондой эле Көз карандысыз Мамлекеттер Шериктештигине катышуучу мамлекеттердин 2000-жылдын 30-ноябрындагы Баңги каражаттарды, психотроптук заттарды жана прекурсорлорду мыйзамсыз жүгүртүүгө каршы күрөшүүдө кызматташтыгы жөнүндө макулдашууну эске алышып, баңги заттарды мыйзамсыз жүгүртүүгө каршы күрөшүүгө багытталган натыйжалуу чараларды көрүүгө өз ара кызыкдарлыктан улам, өз мамлекеттеринин улуттук мыйзамдарына жана эл аралык милдеттенмелерине таянуу менен, төмөнкүлөр жөнүндө макулдашты:

1-берене.

1. Бул Макулдашуунун предмети болуп Тараптардын баңги заттарды мыйзамсыз жүгүртүүгө каршы натыйжалуу чара көрүүнү уюштуруу максатындагы кызматташтыгы эсептелет.

2. Кылмыш иштери боюнча укуктук жардам көрсөтүү ушул маселелерди жөнгө салуучу эл аралык келишимдердин алкагында ишке ашырылат.

2-берене.

1. Тараптардын ушул Макулдашуунун алкагында кызматташтыгы төмөнкү формаларда иш жүзүнө ашырылат:

а) баңги заттарды мыйзамсыз жүгүртүүгө каршы чара көрүү боюнча маалыматтарды алмашуу;

б) экинчи Тараптын суроосу боюнча бир Тараптын баңги заттарды мыйзамсыз жүргүзүүгө байланышкан маселелер боюнча операциялык-иликтөө иштерин жүргүзүү;

в) баңги заттарды мыйзамсыз жүгүртүүгө каршы чара көрүү боюнча операциялык-иштөө иштерин жүргүзүүдө өз ара аракеттенүү жана өз ара жардам көрсөтүү, анын ичинде контролдонуучу берүүлөр, текшерме сатып алууларды иш жүзүнө ашырууда, ошондой эле баңги заттарды мыйзамдуу жүгүртүү боюнча;

г) тажрыйба алмашуу, анын ичинде кеңешмелерди, конференцияларды жана семинарларды өткөрүү жолу менен;

д) мыйзам жана башка ченемдик укуктук актыларды, аларды ишке ашыруу практикасы жөнүндө материалдарды, баңги заттардын мыйзамсыз жүгүртүлүшүнө каршы чара көрүү маселелери боюнча, анын ичинде алардын легалдуу жүгүртүлүшүн контролдоо боюнча статистикалык маалыматтарды жана усулдук рекомендацияларды алмашуу;

е) кадрларды даярдоо жана квалификациясын жогорулатуу;

ж) материалдык-техникалык жана консультациялык жардам көрсөтүү, ошондой эле экспертиза жүргүзүүгө көмөктөшүү;

з) баңги заттарды мыйзамсыз жүгүртүүгө каршы күрөшүү көйгөйлөрү боюнча өз ара кызыкчылыкты жаратуучу биргелешкен илимий изилдөөлөрдү жүргүзүү;

и) зарыл болсо мыйзамсыз жүгүртүүдөн алынган баңги заттардын үлгүлөрүн жана аларды изилдөөнүн натыйжаларын алмашуу;

к) кызматташтык процессинде пайда болуучу маселелер боюнча ишти координациялоо, анын ичинде жумушчу топторду түзүү жана өкүлдөрдү алмашуу.

2. Бул Макулдашуу Тараптардын башка өз ара алгылыктуу кызматташтык формаларын иштеп чыгууга жана өнүктүрүүгө бөгөт болбойт.

3-берене.

Бул Макулдашуунун алкагында маалымат алмашуу төмөнкүлөргө карата иш жүзүнө ашырылат:

а) башка Тараптын мамлекетинин аймагында жасалган же жасоого даярдалып жаткан баңги заттарды мыйзамсыз жүгүртүүгө байланыштуу ар кандай кылмыштар боюнча;

б) баңги заттардын мыйзамсыз жүгүртүлүшүнө тиешеси бар экендиги боюнча шектүү адамдарга карата;

в) бир Тараптын мамлекетинин аймагынан башка Тараптын мамлекетинин аймагына баңги заттарды мыйзамсыз өткөрүүгө же өткөрүү ниетине байланышкан конкреттүү фактыларга жана окуяларга карата;

г) баңги заттарды мыйзамсыз жүгүртүүгө тиешеси бар жана иши трансулуттук мүнөздөгү кылмыштуу топтордун түзүмүнө, жеке курамына, иштөө чөйрөсүнө, башкаруусунун уюштурулушуна жана байланыштарына карата;

д) Тараптардын мамлекеттеринде аракеттенген жана баңги заттарды мыйзамсыз жүгүртүү менен байланышы бар айрым адамдардын жана кылмыштуу топтордун ортосунда болгон же божомолдуу байланыштарга карата;

е) баңги заттардын мыйзамсыз жүгүртүлүшүнө байланышкан кылмыштуу иштерди жасоонун формалары жана методдору боюнча;

ж) баңги заттардын мыйзамсыз жүгүртүлүшүнөн түшкөн кирешелерди мыйзамдаштырууга (адалдоого) багытталган иш-аракеттер боюнча;

з) баңги заттарды мыйзамсыз жүгүртүүгө түшүү булактарын аныктоонун формалары менен усулдары жана ушундай мыйзамсыз жүгүртүүнү токтотуу чаралары боюнча;

и) баңги заттарды өстүрүүдө, жасоодо, ташууда жана сатууда колдонулуучу жашыруу жана көмүскөлөө ыкмалары, ошондой эле аларды аныктоонун колдонулган усулдары боюнча; ошондой эле өз ара кызыкчылыкты туудурган башка маселелер боюнча.

4-берене.

1. Бул Макулдашуунун алкагында көмөк көрсөтүү Тараптардын биринин өтүнүчүнүн же ушундай көмөк көрсөтүү экинчи Тарап үчүн кызыкчылыкты жаратат деп эсептеген Тараптын демилгесинин негизинде ишке ашырылат.

Көмөк көрсөтүү жөнүндө суроо жазуу жүзүндө же текстти жиберүүнүн техникалык каражаттарын пайдалануу менен жиберилүүгө тийиш. Кечиктирүүгө болбочу учурларда телефон байланышы аркылуу берилген оозеки суроо кабыл алынышы мүмкүн, бирок ал үч сутка ичинде жазуу жүзүндө же текстти жиберүүнүн техникалык каражаттарын колдонуу менен ырасталышы керек. Маалыматты берүүнүн техникалык каражаттарын пайдаланууда, ошондой эле алынган суроонун аныктыгы же мазмуну боюнча күмөн пайда болсо, суроону алган Тарап жиберген Тараптан жазуу жүзүндө ырастоо жиберүүнү сураса болот.

2. Көмөк көрсөтүү жөнүндө суроодо жазуу жүзүндө төмөнкүлөр болууга тийиш:

- суроо жиберген Тараптын аталышы;

- суроо жиберилген Тараптын аталышы;

- суроонун мазмунунун кыскача баяндамасы жана анын негиздемеси;

- суроону аткаруу үчүн керектүү башка маалыматтар.

5-берене.

1. Суроону алган Тарап суроонун мүмкүн болушунча тез жана толук аткарылышын камсыздоо үчүн бардык зарыл чараларды көрөт. Суроо, эреже катары, алынган күндөн 30 суткадан ашпаган мөөнөттө аткарылат.

2. Суроону алган Тарап суроо жиберген Тараптын ыйгарым укуктуу өкүлдөрүнө суроону аткаруу учурунда өзүнүн мамлекетинин аймагында болууга уруксат бериши мүмкүн, эгерде ал мамлекеттин мыйзамдарына каршы келбесе.

6-берене.

1. Эгерде суроону аткаруу мүмкүн болбосо же аны аткаруудан баш тартылса, суроо жиберилген Тарап суроочу Тарапка дароо жазуу жүзүндө маалымдайт жана суроону аткарууга бөгөт болгон себептер тууралуу кабарлоо менен суроону жана анын бардык тиркемелерин кайра артка жиберет.

2. Эгерде суроону алган Тарап суроону аткаруу мамлекеттин эгемендигине, коопсуздугуна же башка олуттуу кызыкчылыктарына зыян келтириши мүмкүн деп эсептесе, же ал мамлекеттин мыйзамдарына каршы болсо, анда суроону аткаруудан толук же айрым бөлүгүн аткаруудан баш тартылышы мүмкүн.

3. Эгерде суроону алган Тарап суроону дароо аткаруу ал мамлекеттин аймагында ишке ашырылып жаткан кылмышты териштирүүгө же башка өндүрүшкө тоскоол болот деп эсептесе, ал суроону аткарууну кийинкиге жылдырышы же аны суроо жиберген Тарап менен кеңешкенден кийин зарыл деп аныкталган шарттардын аткарылышына жараша ишке ашырышы мүмкүн. Суроочу Тарап сунушталган шарттар менен көмөк көрсөтүлүшүнө макул болсо, анда ал ушул шарттарды аткарууга тийиш.

7-берене.

1. Тараптар алынган маалыматтардын, ага тете эле баңги заттарды мыйзамсыз жүгүртүүгө каршы чара көрүү маселеси боюнча документтердин жана материалдардын мазмунунун купуялуулугун камсыз кылышат.

2. Суроону жиберген Тарап алынган маалыматтарды суроодо көрсөтүлгөн максаттарда гана колдонот.

3. Ушул Макулдашуунун алкагында алынган маалыматтар үчүнчү Тарапка ошол маалыматты берген Тараптын жазуу жүзүндөгү макулдугусуз берилиши мүмкүн эмес.

8-берене.

Тараптар бул Макулдашуунун алкагындагы кызматташтыкты жүргүзүшкөндө жумуштун тили катары орус тилин пайдаланылат.

9-берене.

1. Тараптар бул Макулдашууну өзүнүн мамлекетинин аймагында ишке ашырууга байланышкан чыгымдарды өздөрү көтөрүшөт.

2. Эгерде алардын ортосунда жазуу жүзүндөгү башкача макулдашуу болбосо, Тараптар өз өкүлдөрүнүн кабыл алуучу Тараптын мамлекетинин аймагына барып-келүүсүнө жана жашоосуна байланыштуу бардык чыгымдарын өздөрүнө алышат.

3. Суроочу Тараптын өкүлдөрүнүн баруусу суроо жиберилген Тараптын алдын ала макулдугу менен иш жүзүнө ашырылат.

10-берене.

Бул Макулдашууда каралган кызматташтыкты ишке ашыруунун жүрүшүн кароо жана аны андан аркы өркүндөтүүнүн багыттарын иштеп чыгуу үчүн Тараптар биргелешкен жумушчу жолугушууларды, кеңешмелерди, семинарларды өткөрөт. Жолугушуулар кезеги менен ар бир Тараптын мамлекетинде өткөрүлөт.

11-берене.

Бул Макулдашуунун 2-беренесинин 1-пунктунун ж), з) жана и) пунктчаларында каралган кызматташууну ишке ашыруунун конкреттүү формалары, тактап айтканда аны каржылоо Тараптардын ортосундагы өзүнчө келишимдер менен аныкталат.

12-берене.

Тараптардын өз ара макулдугу менен бул Макулдашууга өзгөртүүлөр жана толуктоолор киргизилиши мүмкүн, алар ушул Макулдашуунун ажыратылгыс бөлүгү болуп эсептелүүчү өзүнчө протоколдор менен таризделет.

13-берене.

Тараптар бул Макулдашуунун жоболорун чечмелөөдө же колдонууда пайда болгон бардык пикир келишпестиктерди кеңешүү жана сүйлөшүү жолу менен чечишет.

14-берене.

Бул Макулдашуу белгисиз мөөнөткө түзүлөт. Бул Макулдашуу кол коюлган күндөн тартып күчүнө кирет жана Тараптардын бири экинчи Тараптан бул Макулдашууну колдонууну токтотуу ниети жөнүндө жазуу жүзүндөгү дипломатиялык каналдар аркылуу билдирүү алган күндөн тартып үч ай өткөнгө чейин күчүнө болот.

Бишкек шаарында 2012-жылдын «___» августунда эки түп нускада, ар бири кыргыз, казак жана орус тилдеринде түзүлдү, баардык тексттер бирдей юридикалык күчкө ээ. Бул Макулдашуунун текстин чечмелөөдө айырмачылыктар пайда болсо, орус тилиндеги текст колдонулат.

Кыргыз Республикасынын Өкмөтүнө караштуу Баңгизаттарды контролдоо боюнча мамлекеттик кызмат үчүн

Казакстан Республикасынын Ички иштер министрлиги үчүн