КР Өкмөтүнүн (Кыргыз Республикасынын Өкмөтүнө караштуу Финансылык чалгындоо мамлекеттик кызматы менен Өзбекстан Республикасынын Башкы прокуратурасына караштуу Салык, валюта кылмыштары жана кылмыштуу кирешелерди легализациялоого карата күрөшүү боюнча департаментинин ортосундагы Терроризмди каржылоого жана кылмыштуу кирешелерди легализациялоого (адалдоого) каршы аракеттенүү чөйрөсүндө кызматташуу тууралуу макулдашуунун долбооруна макулдук берүү) буйругу

КЫРГЫЗ РЕСПУБЛИКАСЫНЫН ӨКМӨТҮ БУЙРУК 2011-жылдын 11-ноябры № 529-б Кыргыз Республикасынын Өкмөтүнө караштуу Финансылык чалгындоо мамлекеттик кызматы менен Өзбекстан Республикасынын Башкы прокуратурасына караштуу Салык, валюта кылмыштары жана кылмыштуу кирешелерди легализациялоого карата күрөшүү боюнча департаментинин ортосундагы Терроризмди каржылоого жана кылмыштуу кирешелерди легализациялоого (адалдоого) каршы аракеттенүү чөйрөсүндө кызматташуу тууралуу макулдашуунун тиркелген долбооруна, принциптүү эмес мүнөздөгү өзгөртүүлөрдү жана толуктоолорду киргизүү укугун берүү менен макулдук берилсин.

Кыргыз Республикасынын Биринчи вице-премьер-министри, Премьер-министрдин милдетин аткаруучу

Ө. Бабанов

Долбоор

Кыргыз Республикасынын Өкмөтүнө караштуу Финансылык чалгындоо мамлекеттик кызматы менен Өзбекстан Республикасынын Башкы прокуратурасына караштуу Салык, валюта кылмыштары жана кылмыштуу кирешелерди легализациялоого карата күрөшүү боюнча департаментинин ортосундагы Терроризмди каржылоого жана кылмыштуу кирешелерди легализациялоого (адалдоого) каршы аракеттенүү чөйрөсүндө кызматташуу жөнүндө макулдашуу

Мындан ары Тараптар деп аталуучу Кыргыз Республикасынын Өкмөтүнө караштуу Финансылык чалгындоо мамлекеттик кызматы менен Өзбекстан Республикасынын Башкы прокуратурасына караштуу Салык, валюта кылмыштары жана кылмыштуу кирешелерди легализациялоого карата күрөшүү боюнча департамент, 1999-жылдын 9-июлундагы Кыргыз Республикасынын Өкмөтү менен Өзбекстан Республикасынын Өкмөтүнүн ортосундагы Кылмыштуулукка каршы күрөшүүдөгү кызматташтык жөнүндө макулдашууну жетекчиликке алып, кызматташуунун жана өз ара кызыкчылыктын духунда терроризмди каржылоо жана кылмыштуу кирешелерди легализациялоо (адалдоо) менен байланышкан маалыматты алмашууга көмөктөшүүнү каалап, терроризмди каржылоо жана кылмыштуу кирешелерди легализациялоо (адалдоо) менен байланышкан ишке натыйжалуу каршы аракеттенүү максатында, төмөнкүлөр тууралуу макулдашты:

1-берене

Тараптар терроризмди каржылоо, кылмыштуу кирешелерди легализациялоо (адалдоо) же ушул чөйрөдөгү кылмыштуу иш менен байланышкан деп шектелген финансылык операциялар тууралуу өздөрүндөгү маалыматты чогултууда, ачып чыгууда жана талдоодо кызматташат. Ушул максаттарда Тараптар өзүнүн демилгеси же суроо-талабы боюнча терроризмди каржылоо жана кылмыштуу кирешелерди легализациялоо (адалдоо) менен байланышкан финансылык операциялардын алар тарабынан жана ушул ишке тартылган жеке адамдар же юридикалык жактар тарабынан иликтенүүгө байланыштуу болушу мүмкүн болгон ар кандай жеткиликтүү маалыматты алмашууну жүзөгө ашырышат. Маалыматка болгон ар кандай суроо-талап, маалыматты колдонуунун максатын билдирген суроо-талаптын, жок дегенде, себебин, ошондой эле суралчу Тараптын суроо-талабын өзү катышуучусу болуп саналган улуттук мыйзамдарга жана эл аралык келишимдерге шайкеш келүүсү тууралуу чечим кабыл алуусу үчүн зарыл болгон маалыматты кошкондо, негизги фактылардын кыскача баяндамасы менен негизделүүгө тийиш.

2-берене

Ушул Макулдашуунун алкагында алынган маалымат терроризмди каржылоого же кылмыштуу кирешелерди легализациялоого (адалдоого) жана ушул чөйрөдөгү башка кылмыш ишине шектелген адамдарды талдоо, иликтөө жана соттук куугунтукка алуу максатында Тараптар тарабынан колдонулушу мүмкүн. Ушул Макулдашуунун алкагында башка Тараптан альгнган маалымат же документ үчүнчү тарапка берилбейт жана маалымат берүүчү Тараптын алдын ала макулдугусуз администрациялык, тергөө же соттук максатта колдонулбайт.

3-берене

Тараптар Тараптардын мамлекеттеринин тийиштүү органдарынан алынган ар кандай маалыматты же документти ушул Макулдашууда көрсөтүлбөгөн максаттарда, өткөрүп берүүчү Тараптын алдын ала макулдугусуз пайдаланылышына же ачыкка чыгарылышына жол беришпейт.

4-берене

Ушул Макулдашууга ылайык алынган маалымат жашыруун болуп саналат жана ага улуттук булактардан алынган ошондой маалыматка карата алуучу Тараптын мамлекетинин улуттук мыйзамдарында каралган коргоо режими таралат. Ушул Макулдашуунун иш-аракети токтогон учурда, бул жобо мурда өткөрүлүп берилген маалыматтарга жана документтерге карата күчүндө кала берет.

5-берене

Тараптар өз мамлекеттеринин улуттук мыйзамдарына ылайык, маалыматты өткөрүп берүү тартибин чогуу аныкташат жана ушул Макулдашуунун жоболорун ишке ашыруу маселелери боюнча консультацияларды өткөрүшөт.

6-берене

Тараптардын ортосундагы кызматташуу, маалымат тууралуу суроо-талаптарды, суроо-талаптарга жоопторду, маалыматты жана билдирүүлөрдү алмашууну кошо алганда, орус тилинде жүзөгө ашырылат. Маалымат алууга болгон суроо-талап жазуу жүзүндө, анын ичинде текстти берүүчү техникалык каражаттардын жардамы менен жөнөтүлөт. Документтер мамлекеттик тилде таризделген кезде, күбөлөндүрүлгөн орусча котормосун тиркөө зарыл.

7-берене

Эгерде: (1) суроо-талапта көрсөтүлгөн фактылар боюнча соттук териштирүү жүрүп жаткан болсо, (2) маалыматтын берилиши берүүчү Тараптын мамлекетинин коопсуздугуна, коомдук тартипке жана улуттук кызыкчылыктарга зыян келтириши мүмкүн болсо, же болбосо улуттук мыйзамдарга жана Тараптын мамлекети катышуучусу болуп саналган эл аралык келишимдерге карама-каршы келе турган болсо, Тараптар маалымат берүүгө милдеттүү эмес.

8-берене

Ушул Макулдашуунун жоболорун колдонууга байланыштуу бүт талаш-тартыштар Тараптардын ортосундагы консультациялар жолу менен чечилет.

9-берене

Тараптардын өз ара макулдугу боюнча, ушул Макулдашуунун ажырагыс бөлүгү болуп саналган жана ушул Макулдашуунун 10-беренесинде каралган тартипте күчүнө кирүүчү өзүнчө протоколдор менен таризделген өзгөртүүлөр жана толуктоолор киргизилиши мүмкүн.

10-берене

Бул Макулдашууага кол коюлган күндөн тартып күчүнө кирет жана 5 жыл бою жарактуу болот. Эгерде ушул Макулдашуунун иш-аракетинин кезектеги мөөнөтү аяктаарына кеминде 6 ай калганга чейин Тараптардын эч бири ушул Макулдашуунун иш-аракетин токтотуу тууралуу өзүнүн ниетин бөлөк Тарапка жазуу жүзүндө билдирбесе, анын иш-аракети кийинки 5 жылдык мезгилге автоматтык түрдө узартылат.

Макулдашуу __________________шаарында 20___-жылдын «____»_____________ ар бири кыргыз, өзбек жана орус тилдеринде эки түп нускада түзүлдү. Ушул Макулдашуунун жоболорун чечмелөөдө кайчы көз караштар келип чыккан учурда, орус тилиндеги текст негиз катары колдонулат.

Кыргыз Республикасынын Өкмөтүнө караштуу Финансылык чалгындоо мамлекеттик кызматы

Өзбекстан Республикасынын Башкы прокуратурасына караштуу Салык, валюта кылмыштары жана кылмыштуу кирешелерди легализациялоого каршы боюнча департамент