14-статья. Кыргыз Республикасынын Өкмөтүнүн негизги функциялары

жана полномочиелери

Кыргыз Республикасынын Өкмөтү:

- экономикалык жана социалдык-маданий жактан өнүктүрүүнүн жана мамлекеттик башкаруунун кыйла маанилүү маселелерин кароонун жыйынтыктары боюнча токтомдорду жана буйруктарды кабыл алат;

- Кыргыз Республикасынын республикалык бюджетинин долбоорун даярдоо маселесин, Кыргыз Республикасынын Республикалык бюджетин учурда аткаруунун маселелерин, ошондой эле мамлекеттик бюджеттен тышкары фонддорду түзүү жана аткаруу маселелерин карайт;

- Кыргыз Республикасынын экономикалык жана социалдык жактан өнүктүрүү программаларынын долбоорлорун карайт;

- мамлекеттик казына кагаздарын жүгүртүүгө чыгаруунун көлөмүн жана мамлекеттик ички жана тышкы карыздарын көбөйтүүнүн чектерин аныктайт жана Кыргыз Республикасынын Жогорку Советинин кароосуна коет;

- мамлекеттик бекитилген баалар колдонулуучу продукциялардын, товарлардын жана кызматтардын номенклатурасын белгилейт;

- товарлардын айрым түрлөрүн чыгарууга жана кызмат көрсөтүүгө же ишкердиктин айрым чөйрөлөрүнө же граждандардын айрым категорияларына салык салуунун ставкаларын белгилөө жана өзгөртүү боюнча сунуштарды карайт;

- мамлекеттик менчикти приватташтыруунун жылдык программасынын долбоорлорун бекитет жана приватташтыруудан алынган каражаттарды Кыргыз Республикасынын законуна ылайык пайдалануунун негизги багыттары боюнча сунуштарды карайт;

- Кыргыз Республикасынын министрликтерин, мамлекеттик комитеттерин, мамлекеттик башкаруунун жана уюштуруучулук структураларынын башка органдарын түзүү, кайра уюштуруу жана жоюу жөнүндөгү сунуштарды даярдоо жана Кыргыз Республикасынын Президентине сунуш кылуу жөнүндө чечим кабыл алат;

- Кыргыз Республикасынын Өкмөтүнүн карамагына тиешелүү маселелер боюнча өкмөттөр аралык макулдашууларга кол коюу жөнүндө чечим кабыл алат;

- министрликтердин мамлекеттик комитеттердин, административдик ведомстволордун, башка уюштуруу структураларынын, жергиликтүү Советтердин аткаруучу органдарынын Кыргыз Республикасынын Конституциясына жана Кыргыз Республикасынын закондоруна карама-каршы келген актыларын жокко чыгарат.