3-статья. Ушул Мыйзам колдонулуучу чөйрө

Ушул Мыйзамдын күч-аракети мамлекеттик башкаруу органдарына, менчигинин түрүнө карабастан чарба жүргүзүүчү субъекттерге, анын ичинде Кыргыз Республикасында жекече ишкерлер катары катталган жана ишкердик ишти юридикалык жакты түзбөй туруп жүзөгө ашырган, Кыргыз Республикасынын жарандарын эмгектик иш-аракеттерин жүзөгө ашыруусу үчүн чет өлкөгө жөнөтүү, чет өлкөлүк жумушчу күчүн Кыргыз Республикасына тартуу жана пайдалануу менен байланышкан иштерди жүргүзгөн жактарга (мындан ары - чарба жүргүзүүчү субъекттер), ошондой эле эмгекчи мигранттарга жана алардын үй-бүлө мүчөлөрүнө жайылтылат. Ушул Мыйзамдын ченемдери "Өзгөчө укуктук режимдеги жана статустагы "Тамчы" атайын финансылык инвестициялык аймагы жөнүндө" Кыргыз Республикасынын Мыйзамы жана аталган Мыйзамдан келип чыгуучу актылар менен жөнгө салынбаган жана каршы келбеген бөлүгүндө өзгөчө укуктук режимдеги жана статустагы "Тамчы" атайын финансылык инвестициялык аймагынын чегинде келип чыгуучу мамилелерге карата колдонулат.

Ушул Мыйзам төмөнкүдөй чет өлкөлүк жарандарга жана (же) жарандыгы жок адамдарга колдонулбайт:

а) Кыргыз Республикасынын аймагында качкын статусун же саясий баш калка алгандарга;

б) Кыргыз Республикасынын аймагында туруктуу жашагандарга;

в) дипломатиялык өкүлчүлүктөрдө, консулдук мекемелерде, ошондой эле Кыргыз Республикасында аккредиттелген эл аралык уюмдарда иштегендерге;

г) чет өлкөлүк юридикалык жактар тарабынан алар жөнөткөн технологиялык жабдууларды монтаждоо (шеф-монтаждоо), оңдоо үчүн түзүлгөн макулдашууларды (келишимдерди) Кыргьр Республикасынын аймагында ишке ашыруу чегинде иш сапарына жөнөтүлгөн кызматкерлерге;

д) кесиптик жогорку билим берүүнүн кыргыз билим берүү программаларынын чегинде өндүрүштүк практикадан өтүп жаткан студенттерге, ошондой эле каникул убагында иштегендерге;

е) Кыргыз Республикасында аккредиттилеген кабарчыларга жана журналисттерге;

ж) эл аралык келишимдерде ишке орношуунун башка тартиби аныкталган адамдарга;

з) кайрылман статусун алган этникалык кыргыздарга;

и) Кыргыз Республикасынын Министрлер Кабинети тарабынан кол коюлган күчүнө кирген макулдашуулардын алкагында гранттык жана инвестициялык долбоорлорду ишке ашырган башкаруучу компаниялардын жана подрядчы-компаниялардын жетекчилерине, ошондой эле гранттык жана инвестициялык долбоорлордун техникалык-экономикалык негиздемесин даярдоого катышкан долбоорлоо жана илимий-изилдөө институттарынын кызматкерлерине.

к) чет өлкөнүн жарандыгы бар мекендештин статусун алгандарга;

л) "Санариптик көчмөн" ("Digital nomad") статусун алган чет өлкөлүк жарандарга.

(Кыргыз Республикасынын 2015-жылдын 27-январындагы № 27, 2018-жылдын 14-мартындагы № 29, 2020-жылдын 24-июлундагы № 89, 2023-жылдын 30-июнундагы № 129, 2024-жылдын 18-ноябрындагы № 181, 2025-жылдын 10-июлундагы № 137 Мыйзамдарынын редакциясына ылайык)