Кыргыз Республикасынын Министрлер Кабинетинин «Ысык-Көл облусунун аймагында „Асман экологиялык таза шаары“ пилоттук долбоорун ишке ашыруу жөнүндө» токтому

КЫРГЫЗ РЕСПУБЛИКАСЫНЫН МИНИСТРЛЕР КАБИНЕТИНИН ТОКТОМУ 2022-жылдын 4-августу № 441 Ысык-Көл облусунун аймагында "Асман экологиялык таза шаары" пилоттук долбоорун ишке ашыруу жөнүндө Инвестицияларды тартуу жана туризмди өнүктүрүү, ошондой эле Ысык-Көл облусунун аймагында "Асман экологиялык таза шаарын" куруу максатында, "Кыргыз Республикасынын Министрлер Кабинети жөнүндө" Кыргыз Республикасынын конституциялык Мыйзамынын 13, 17-беренелерине ылайык Кыргыз Республикасынын Министрлер Кабинети токтом кылат:

1. Ысык-Көл облусунун аймагында "Асман экологиялык таза шаарын" (мындан ары - "Асман" шаары) куруунун пилоттук долбоору ишке ашырылсын.

2. Төмөнкүлөр аныкталсын:

- пилоттук долбоорду ишке ашырууда бирдиктүү заказчы болуп "Асман экологиялык таза шаарын" куруу боюнча мамлекеттик дирекция (мындан ары - дирекция);

- Ысык-Көл облусунун Ысык-Көл районунун Тамчы айыл өкмөтүнүн аянты 4015 га аймагы "Асман" шаарынын жайгашкан жери.

3. Кыргыз Республикасынын Президентинин Кыргыз Республикасынын Ысык-Көл облусундагы ыйгарым укуктуу өкүлү, Кыргыз Республикасынын Айыл чарба министрлиги, Ысык-Көл районунун мамлекеттик администрациясы жергиликтүү өз алдынча башкаруу органдары менен биргеликте оперативдүү тартипте:

- ушул токтомдун 2-пунктунда көрсөтүлгөн жер участогунун чектерин аныктасын жана белгилесин;

- дирекция менен биргеликте Тамчы айыл өкмөтүндөгү жер участокторунун ээлерине бирдей болгон жер участокторун менчикке берүү менен алардын жер участокторун алмашуу, ошондой эле калктын/менчик ээлеринин арасында түшүндүрүү иштерин жүргүзүү боюнча чараларды көрсүн;

- жеке менчикте турган жерлерди башка жерлерге алмаштыруу мүмкүндүгүн карасын;

- "Асман" шаарын курууга багытталган жерлерди которуу (трансформациялоо) боюнча Кыргыз Республикасынын Министрлер Кабинетинин чечиминин долбоорун киргизсин.

4. Кыргыз Республикасынын Министрлер Кабинетине караштуу Архитектура, курулуш жана турак жай-коммуналдык чарба мамлекеттик агенттиги:

- "Асман" шаарынын башкы планын иштеп чыгууну камсыз кылсын;

- дирекция менен биргеликте "Асман" шаарынын курулушунун аймагында ичүүчү суу менен жана саркынды сууларды чыгарууну камсыз кылсын.

5. Кыргыз Республикасынын Маданият, маалымат, спорт жана жаштар саясаты министрлиги долбоорлонуп жаткан жер участогунда тарыхый-маданий мурас объекттеринин бар же жок экендигине археологиялык изилдөөнү акысыз негизде жүргүзсүн.

6. Кыргыз Республикасынын Жаратылыш ресурстары, экология жана техникалык көзөмөл министрлиги:

- "Асман" шаарынын курулушунун экологиялык шайкештик корутундусун даярдасын;

- Кыргыз Республикасынын Өзгөчө кырдаалдар министрлиги жана Кыргыз Республикасынын Министрлер Кабинетине караштуу Архитектура, курулуш жана турак жай-коммуналдык чарба мамлекеттик агенттиги менен биргеликте долбоорлонуп жаткан жер участогунун кыртышын андан ары изилдөө менен участокту радиациялык изилдөөнү жана сейсмикалык микрорайондоштурууну жүргүзсүн.

7. Кыргыз Республикасынын Энергетика министрлиги "Кыргызстан улуттук электр тармагы" ачык акционердик коому менен биргеликте "Асман" шаарын электр энергиясы менен камсыз кылуу үчүн подстанция курууну камсыз кылсын.

8. Кыргыз Республикасынын Президентине караштуу Инвестициялар боюнча улуттук агенттик дирекция менен биргеликте:

- "Асман" шаарына өзгөчө статус берүү боюнча ченемдик укуктук актынын долбоорун иштеп чыксын;

- пилоттук долбоорду натыйжалуу ишке ашыруу үчүн зарыл болгон ченемдик укуктук актылардын долбоорлорун иштеп чыгуу боюнча иштерди өз убагында жүргүзсүн жана Кыргыз Республикасынын Министрлер Кабинетинин кароосуна белгиленген тартипте киргизсин.

9. Аткаруу бийлигинин мамлекеттик органдары жана жергиликтүү өз алдынча башкаруу органдары пилоттук долбоорду ишке ашырууда Кыргыз Республикасынын Президентине караштуу Инвестициялар боюнча улуттук агенттикке жана "Асман экологиялык таза шаарын" куруу боюнча мамлекеттик дирекцияга ар тараптуу жана оперативдүү көмөк көрсөтсүн.

10. Бул токтомдун аткарылышын контролдоо Кыргыз Республикасынын Президентинин Администрациясынын Президенттин жана Министрлер Кабинетинин чечимдерин аткарууну контролдоо башкармалыгына жүктөлсүн.

11. Бул токтом расмий жарыяланган күндөн тартып күчүнө кирет.

Кыргыз Республикасынын Министрлер Кабинетинин Төрагасынын биринчи орун басары

А.Касымалиев