КР Министрлер Кабинетинин «Кыргыз Республикасынын Чүй облусунун Аламүдүн районундагы Таш-Мойнок айыл аймагында жайгашкан жерлерди „Айыл чарба багытындагы жерлер“ категориясынан „Калктуу конуштардын жерлери“ категориясына которуу (трансформациялоо) жөнүндө» токтому

КЫРГЫЗ РЕСПУБЛИКАСЫНЫН МИНИСТРЛЕР КАБИНЕТИНИН ТОКТОМУ 2022-жылдын 14-январы № 18 Кыргыз Республикасынын Чүй облусунун Аламүдүн районундагы Таш-Мойнок айыл аймагында жайгашкан жерлерди "Айыл чарба багытындагы жерлер" категориясынан "Калктуу конуштардын жерлери" категориясына которуу (трансформациялоо) жөнүндө Кыргыз Республикасынын Чүй облусунун Аламүдүн районундагы Таш-Мойнок айыл аймагында жеке турак үйлөрдү куруу максатында, Кыргыз Республикасынын Жер кодексинин 20-статьясына, "Жер участокторун которуу (трансформациялоо) жөнүндө" Кыргыз Республикасынын Мыйзамынын 6-беренесине, "Сугат айдоо жерлерин жарактуу жерлердин башка категорияларына жана түрлөрүнө которууга (трансформациялоого) мораторий киргизүү жөнүндө" Кыргыз Республикасынын Мыйзамынын 1-беренесинин 2-пунктунун 12-пунктчасына, "Кыргыз Республикасынын Министрлер Кабинети жөнүндө" Кыргыз Республикасынын конституциялык Мыйзамынын 13, 17-беренелерине ылайык, Кыргыз Республикасынын Президентинин Кыргыз Республикасынын Чүй облусундагы ыйгарым укуктуу өкүлүнүн 2021-жылдын 28-декабрындагы № НА-05-1255 корутундусун жана Кыргыз Республикасынын Чүй облусунун Аламүдүн районунун мамлекеттик администрациясынын 2021-жылдын 28-декабрындагы № 400-т тескемесин көңүлгө алып, Кыргыз Республикасынын Министрлер Кабинети токтом кылат:

1. Кыргыз Республикасынын Чүй облусунун Аламүдүн районундагы Таш-Мойнок айыл аймагындагы № 213 контурда жайгашкан Баяманов Алмаз Баямановичтин жеке менчигиндеги 1,3 га айдоо жери жеке турак үйлөрдү куруу үчүн "Айыл чарба багытындагы жерлер" категориясынан "Калктуу конуштардын жерлери" категориясына которулсун (трансформациялансын).

2. Кыргыз Республикасынын Чүй облусунун Аламүдүн районунун мамлекеттик администрациясы төмөнкүлөрдү камсыз кылсын:

- жерди эсепке алуу документтерине тиешелүү өзгөртүүлөрдү киргизүүнү;

- ушул токтомдун 1-пунктунда көрсөтүлгөн жерди максаттуу багыты боюнча пайдаланууну.

3. Төмөнкүлөр белгиленсин:

- инфратүзүмдү камсыз кылуу менен байланышкан чыгымдар которулуп (трансформацияланып) жаткан жер участогунун менчик ээсине жүктөлөрү;

- ушул токтомду ишке ашыруу үчүн жоопкерчилик жана аталган токтомдун 1-пунктунда көрсөтүлгөн жердин максаттуу пайдаланылышын контролдоо Кыргыз Республикасынын айыл чарба министрине жүктөлөрү.

4. Бул токтом кол коюлган күндөн тартып күчүнө кирет.

Төрага

А.У. Жапаров